XƏBƏR LENTİ

Bu isə suvarma suyuna tələbatın artması deməkdir

Son illər Dövlət Baytarlıq Nəzarəti Xidmətində bir sıra uğurlar əldə olunmuşdur. Qabaqcıl aqrar rayonu olan Goranboy rayonunda da bu sahədə uğurlar qazanılmışdır. Goranboy Rayon Baytarlıq İdarəsinə rəhbərlik edən Elsevər Hüseynovdan qurumun fəaliyyəti barədə məlumat verməyini xahiş etdik. O qeyd etdi ki, Goranboy Rayon Baytarlıq İdarəsi rayon ərazisində mülkiyyət formasından asılı olmayaraq, bütün sektorlarda vətəndaşların saxladığı kənd təsərrüfatı heyvanları və quşları arasında rayonun epizootik durumuna uyğun olaraq lazımi müalicə-profilaktiki tədbirləri vaxtlı-vaxtında həyata keçirir. Heyvan (mal-qara, quşlar, balıqlar, arılar, vəhşi heyvanlar və s.) xəstəliklərinin qarşısının alınması, insan sağlamlığı üçün yararlı və təhlükəsiz heyvandarlıq məhsullarının istehsalı, habelə əhalinin heyvan və insanlar üçün ümumi olan xəstəliklərdən mühafizəsi sahəsində elmi, praktiki və təşkilati tədbirləri yerinə yetirən baytarlıq sistemi daimi fəaliyyətdədir. Son illər maldarlıq və qoyunçuluqla məşğul olan fermerlərə dövlət tərəfindən göstərilən diqqət və qayğı təsərrüfatların genişləndirilməsi, damazlığın inkişafı məqsədilə güzəşli kreditlərin verilməsi, bilavasitə dövlətin investisiya proqramında bu sahələrin inkişafı üçün maliyyə vəsaitinin nəzərdə tutulması ölkəmizdə heyvandarlığın inkişafı üçün stimul yaratmışdır. Respublika Kənd Təsərrüfatı Nazirliyi yanında Dövlət Baytarlıq Xidməti tərəfindən təsdiq edilmiş plana əsasən mal-qara arasında yoluxucu xəstəliklərin yayılma təhlükəsinin qarşısının alınması istiqamətində Goranboy Rayon Baytarlıq İdarəsi tərəfindən işlər vaxtlı-vaxtında aparılır. Belə ki, peyvənd vasitələri rayonda fəaliyyət göstərən 18 baytarlıq sahəsi arasında bölünərək yerlərdə yoluxucu və təhlükəli xəstəliklərə qarşı tədbirlər görülür. 2016-cı il ərzində rayonda təsdiq edilmiş tədbirlər planına əsasən iribuynuzlu heyvanların brusellyoz xəstəliyinə görə 18000 plana qarşı 18061 başdan qan götürülərək Diaqnostika kabinetində yoxlanılmış, nəticədə 24 baş iribuynuzlu heyvanda, törədici qoçlarda 4000 plana qarşı 4027 baş törədici qoçdan qan nümunəsi götürülüb yoxlanılmış və ondan 14-ündə brusellyoz xəstəliyi aşkar edilmişdir. Həmçinin 177 baş ana qoyundan 25 başı brusellyoza tutulmuşdur. Baytarlıq təlimatına uyğun olaraq, həmin xəstə heyvanlar zərərsizləşdirilmişdir. Mallenizasiya təkdırnaqlı heyvanlarda 1000 baş plana qarşı 1000 baş heyvanda malleinlə göz sınağı aparılmışdır. Tuberkulyoz xəstəliyinə qarşı 8000 baş plana qarşı, 7728 baş iribuynuzlu heyvanda “tuberkulinlə” vaksinasiya aparılmışdır. Heyvanlarda qarayara xəstəliyinə qarşı Ştam-55 vaksini ilə peyvəndləmə aparılmışdır. 

Dezinfeksiya məqsədilə il ərzində profilaktiki olaraq 131 obyektdə 16000 kv. m ərazidə məcburi olaraq 385 obyektdə 49000 kv. m ərazidə, dezinfeksiya məqsədilə 486 obyektdə 27500 kv. m ərazidə profilaktiki tədbir aparılmışdır. 2016-cı il ərzində Baytarlıq İdarəsinin Baytarlıq Sanitariya Ekspertiza laboratoriyalarında 1012 iribuynuzlu heyvan, 1782 baş xırdabuynuzlu heyvan, 2392 kq quş əti, 46 partiya balıq, 7130 ədəd yumurta və 893 partiya süd məhsulları müayinə edilmişdir. Müayinə zamanı 79 baş iribuynuzlu heyvanda, 93 baş xırdabuynuzlu heyvanda, 109 kq quş ətində, 33 kq balıqda, 238 ədəd yumurtada xəstəlik aşkarlanmışdır. Baytar həkimləri tərəfindən 280 kq mal əti, 149 kq qoyun əti, 109 kq quş əti, 33 kq balıq, 238 ədəd yumurta satışdan çıxarılmışdır. Baytarlıq qanunvericiliyinin pozulmasına görə 4 fiziki şəxs barədə inzibati protokol tərtib edilmiş və barələrində qanunvericiliyə uyğun olaraq qərar qəbul edilmişdir.
Söhbətinin sonunda idarə rəisi tam əminliklə bildirdi ki, bundan sonra da mövcud imkanlardan istifadə edilərək, əhalini keyfiyyətli, saf ərzaqla təmin etmək üçün xidmətin kollektivi var qüvvəsi ilə çalışacaqdır.
***
Samux rayonunun iqtisadiyyatında heyvandarlığın inkişafı və kənd təsərrüfatı məhsulları istehsalının xüsusi yeri vardır. Burada rayonun ərazisinin əhatə etdiyi Kür sahili boyunca heyvandarlıqla məşğuliyyət bir ənənəyə çevrilmişdir. Bu baxımdan baytarlıq xidmətinin üzərinə böyük məsuliyyət düşür. Cari ildə “Epizootiya əleyhinə profilaktik və diaqnostik tədbirlər planı”na uyğun olaraq nəzərdə tutulmuş baytarlıq tədbirləri vaxtında yerinə yetirilərək rayonda epizootik sabitlik qorunub saxlanmışdır. Uzun müddətdir Samux Rayon Baytarlıq İdarəsinə rəhbərlik edən Mürvət Bağırovla Gürcüstan Respublikası ilə həmsərhəd olan bir ərazidə görüşdük. O, xidmətin fəaliyyəti barədə ətraflı məlumat verərək qeyd etdi ki, Samux Rayon Baytarlıq İdarəsi rayon ərazisində olan heyvanları və quşları arasında lazımi müalicə-profilaktiki tədbirləri yüksək səviyyədə icra edilir. Belə ki, heyvan (mal-qara, quşlar, balıqlar, arılar, vəhşi heyvanlar və s.) xəstəliklərinin qarşısının alınması, insan sağlamlığı üçün yararlı və təhlükəsiz heyvandarlıq məhsullarının istehsalı, habelə əhalinin heyvan və insanlar üçün ümumi olan xəstəliklərdən mühafizəsi sahəsində elmi, praktiki və təşkilati tədbirlər davamlı şəkildə rayonda 35 kənd və qəsəbə olmaqla ərazidə 24300-baş iribuynuzlu, 163000 baş xırda, 1211 baş təkdırnaqlı, 251000 baş müxtəlif ev quşları mövcuddur ki, həmin heyvanlara baytarlıq idarəsi və onun tabeçiliyində olan baytar məntəqələrinin mütəxəssisləri yetərincə xidməti göstərirlər. Son illər ərzində rayon ərazisində heyvandarlıq və quşçuluq sahələrində aparılmış müalicə-profilaktiki tədbirlər nəticəsində heç bir qorxulu heyvan xəstəlikləri qeydə alınmamış və təhlükə ehtimalı olduğu halda lazımi tədbirlər görmüşlər. Rayon ərazisində aparılmış müalicə-profilaktiki tədbirlər üçün lazım olan biopreparatorlar, oliaqnostikumlar vardır. İdarə və sahə baytarlıq məntəqələri, biotəhlükəsizlik vasitələri və dezinfeksiya maddələri ilə tam təmin olunmuşlar. Brusellyoz xəstəliyinə qarşı mübarizə tədbirləri çərçivəsində əhalinin maarifləndirilməsi məqsədi ilə bağlı təbliğat və təşviqat işləri daimi gündəmdədir.
Respublikada aparılan aqrar islahatlar çərçivəsində baytarlıqda da son illər ərzində böyük dəyişikliklər baş vermişdir. Möhtərəm Prezidentimiz cənab İlham Əliyevin bu sahəyə göstərdiyi xüsusi diqqət və qayğı nəticəsində rayonun baytarlıq idarəsinin və Zazalı baytar sahəsinin yeni inzibati binaları müasir standartlara uyğun inşa edilmiş, lazımi avadanlıqlarla təmin olunmuşdur. Rayon baytarlıq xidməti işçiləri minik avtomobili və yedəkli motosikllərlə təmin olunmuşdur ki, bu da işimizin operativliyinə stimul verir. Uzun müddət xidmətdə çalışan yüksək ixtisaslı kadrların köməyi ilə sərhəddən gələn köçəri quşlar və həşaratlar vasitəsilə yoluxan xəstəliklərin vaxtında qabağının alınması üçün müvafiq tədbirlər görülür. Xidmətin işçiləri kəndlərə, qoyun sürüləri olan yataqlara baş çəkir, binalar dezinfeksiya olunur, lazımi profilaktik tədbirlər aparırlar. Vaxtaşırı monitorinqlər və seminar-məşğələlərin keçirilirilməsi, əhalinin və fermerlərin bu sahədə maariflənməsinə böyük təsir göstərir. Damazlıq heyvanların böyük qismi Samux rayon sakinlərinə lizinq yolu ilə verilmişdir. Bu da gələcəkdə yeni məhsuldar cinslərin artmasına və əhalinin ərzaq məhsullarına olan təlabatının ödənilməsinə xidmət edir. Bu tədbirlərin lazımınca yerinə yetirilməsində Kənd Təsərrüfatı Nazirliyi yanında Dövlət Baytarlıq Nəzarəti Xidmətinin, rayon icra hakimiyyətinin və bələdiyyələrin köməyi əvəzsizdir.
Zabit XƏLİLOV,
“Respublika”.

 

 

 

Şənbə, 15 Aprel 2017 13:25

Keçmiş şöhrət bərpa olunur

Vaxtilə adı dillərdə dolaşan, neçə-neçə insanı əmək qəhrəmanına çevirən, yüz minlərlə insanın həyat şəraitini, güzəranını yaxşılığa doğru dəyişən, şəninə nəğmələr qoşulan “ağ qızıl”ın şanı-şöhrəti ötən əsrin 70-80-ci illərində daha yüksək zirvədə idi. Respublikamızda pambıqçılığın inkişaf etdirilməsi, bu strateji məhsulun dünya bazarına çıxarılması, bir sözlə, aqrar sahənin dirçəlişi xalqımızın ümummilli lideri Heydər Əliyevin adı ilə sıx bağlıdır. Ulu öndərin ikinci dəfə hakimiyyətə qayıdışından sonra pambıqçılığa olan münasibət də kökündən dəyişilib. Təsadüfi deyil ki, regionların sosial-iqtisadi inkişafına dair Dövlət Proqramının hər mərhələsində pambıqçılığın inkişaf etdirilməsi və dövlət tərəfindən dəstəklənməsi ön plana çəkilib.

Mil düzündə, qədim Beyləqan torpağında torpaq bərəkətli, günəş şəfəqləri bol, insanlar isə çox zəhmətkeş, qoçaq və yurda daha çox bağlıdırlar. Rayonda həm əkinçiliyin, həm də heyvandarlığın inkişaf etdirilməsi üçün münbit şərait var. Həm də eyni zamanda qabaqcıl təcrübə, gözəl ənənə mövcuddur. Bax, elə buna görə də rayonda kənd təsərrüfatı məhsullarının istehsalında yüksək nəticələr əldə olunur. Bu barədə daha ətraflı məlumat verən rayon icra hakimiyyətinin başçısı Vaqif Abdullayev deyir:
- Respublikamızda sosial-iqtisadi inkişafla bağlı aparılan uğurlu siyasət, sahibkarlığa dövlət dəstəyinin gücləndirilməsi, torpaqlardan səmərəli istifadə edilməklə ölkənin ərzaq təhlükəsizliyinin təmin olunması, yeni iş yerlərinin yaradılması, ən başlıcası isə insanların həyat şəraitinin yaxşılaşdırılması sahəsində qarşıya qoyulmuş vəzifələr uğurla yerinə yetirilir. Bunu bizim rayonun timsalında da aydın görmək mümkündür. Son bir neçə il ərzində insanların həyat şəraitində müsbət dəyişikliklər baş verir, sahibkarlığın inkişaf tempi yüksələn xətt üzrə davam edir.
Möhtərəm Prezident İlham Əliyevin pambıqçılığın yenidən inkişaf etdirilməsi ilə bağlı verdiyi tapşırıqlar beyləqanlıların ürəyincə olub. İnsanlar qarşıya qoyulan vəzifələrin məsuliyyətini dərindən dərk edir, göstərilən qayğını, etimadı yüksək qiymətləndirirlər. Tapşırığın icrasını təmin etmək məqsədilə icra hakimiyyətinin təşkilatçılığı ilə rayonda bütün qüvvələr səfərbər olunub, icra nümayəndələri və bələdiyyə orqanları, keçmiş təsərrüfat işçiləri bu işə cəlb edilib, pambıq əkini ilə məşğul olan şirkətlərlə əlaqəli iş qurulub, onların təklifləri dinlənilib. Nəticədə 2016-cı ildə rayon üzrə ötən illə müqayisədə 1,9 dəfə artıq, yəni 3958 hektar sahədə pambıq əkilib. Əkinin gec başlanması və əlverişsiz hava şəraitinə baxmayaraq, hər hektardan orta hesabla 20 sentner məhsul yığılıb.
Pambıq sahələrinin əkilib-becərilməsində və məhsulun toplanmasında rayonun 7900-dən çox sakini işlə təmin edilib və onlar 4,8 milyon manatdan çox qazanc əldə ediblər. Bundan əlavə, onlara 787 min manat subsidiya verilib. Bu da adambaşına orta hesabla 100 manat təşkil etməklə insanların məşğulluğu üçün çox əhəmiyyətlidir.
Beyləqan sovetlər dövründə respublikanın ən iri pambıqçılıq rayonlarından biri olub. Ulu öndər 1969-1980-ci illərdə Beyləqan rayonuna çoxsaylı səfərlər edib, zəhmət adamları ilə görüşüb, onların qayğıları, problemləri ilə maraqlanıb, beyləqanlıları halal zəhmətlə yaşayan əməksevər insanlar adlandırıb. 1980-ci ildə rayonumuzda 80,3 min ton pambıq istehsal olunmuşdu, bu da respublika göstəricisinin təxminən 10 faizini təşkil edirdi.
Rayon ərazisində pambıq istehsalı ilə məşğul olan “MKT İK” və “CTS AQRO” MMC-nin pambıq emalı zavodu fəaliyyət göstərir. Həmin müəssisələr pambığın əkilib-becərilməsi üçün torpaq mülkiyyətçiləri ilə qabaqcadan müqavilə bağlamaqla, müəyyən edilmiş qaydada onlara hektara uyğun olaraq kredit formasında vəsaitlərin ayrılmasını vaxtında təmin ediblər. Pambığın becərilməsində əvvəllər texnika çatışmazlığı olsa da, “Aqrolizinq” vasitəsilə rayonumuza texnikalar gətirilib, əkin prosesində olan problemlər aradan qaldırılıb.
Digər kənd təsərrüfatı məhsulları istehsalının azalmasına yol verilmədən rayonumuzda bu il 8500 hektar sahədə pambıq əkilməsi nəzərdə tutulur ki, bu da ötən illə müqayisədə 4500 hektar çoxdur. Pambıq əkilən torpaqların hamısı suvarılan torpaqlardır. Həmin sahələrin 2223 hektarı dövlət fonduna, 1056 hektarı bələdiyyə fonduna, 1060 hektarı qış otlaqlarına, 4161 hektarı isə xüsusi mülkiyyətə aid olan torpaqlardır. Bu il pambıq əkiləcək torpaqların böyük əksəriyyətinin xüsusi mülkiyyətdə olması onu göstərir ki, insanların bu sahəyə marağı böyükdür və birbaşa onların güzəranının yaxşılaşdırılmasına xidmət edəcək. Eyni zamanda, cari ildə pambıqçılığın inkişafı ilə əlaqədar rayonumuzda 19 mindən çox yeni iş yeri açılacaq.
Bu il əkinin vaxtında aparılması, görülən hazırlıq işləri, pambıqçılığa marağın artması bizə ümid verir ki, cari ildə orta hesabla hər hektardan azı 20-25 sentner pambıq əldə edə bilək.
Yeri gəlmişkən qeyd edim ki, rayonumuzda kənd təsərrüfatının dinamik inkişafını təmin etmək məqsədilə növbəli əkin sistemi tətbiq olunur. Növbəli əkində pambığa, taxıla və soyaya daha geniş yer verilir. Bu da fermerlər üçün sərbəst seçim şəraiti yaradır, həm də yüksək məhsuldarlıq əldə olunmasına kömək edir.
İcra başçısının sözünə qüvvət üçün demək lazımdır ki, Beyləqanda uzun illərdən bəri insanları çətin vəziyyətə salan mövcud problemlərin bir neçəsi öz uğurlu həllini tapıb. Qədim diyarın görkəmi gündən-günə dəyişir, şəhərin üfüqləri böyüyür, yeni yaşayış məhəllələri salınır. Adamlar asudə və rahat yaşayırlar, öz güzəranlarını qururlar. Ən əsası isə dövlətin onlara göstərdiyi diqqət və qayğını yüksək qiymətləndirir və keçmiş şöhrəti bərpa etmək üçün var qüvvə ilə çalışırlar.
Salman Alıoğlu,
“Respublika”.

 

 

 

Ölkə Prezidentinin 2015-ci il 18 sentyabr tarixli  “IV İslam Həmrəyliyi Oyunlarının keçirilməsi üzrə Təşkilat Komitəsinin yaradılması haqqında” Sərəncamına uyğun olaraq səhiyyə naziri Oqtay Şirəliyevin “2017-ci ildə Bakı şəhərində keçiriləcək IV İslam Oyunlarının tibbi təminatı barədə” imzaladığı əmrlə Təşkilat Komitəsi yaradılıb. Həmin əmrə əsasən yarış iştirakçıları və qonaqlara tibbi yardımın göstərilməsi üçün Bakı şəhər Kliniki Tibbi Mərkəz və Bakı Sağlamlıq Mərkəzi müəyyənləşdirilib.

AZƏRTAC-ın müxbiri Bakı şəhər Kliniki Tibbi Mərkəzdə olaraq İslam Oyunlarına tibbi yardım göstərilməsi ilə əlaqədar aparılan hazırlıq işlərinin vəziyyəti ilə tanış olub. Mərkəzdə yaradılmış işçi qrupuna xəstəxananın əməliyyat blokunun şöbə müdiri Aydın Əlizadə məsul nümayəndə təyin edilib. Qeyd edək ki, I Avropa Oyunları zamanı da onun rəhbərlik etdiyi qrup tapşırılan işin öhdəsindən yüksək səviyyədə gəlib. Onunla söhbətə də elə həmin Oyunlardan başladıq.

-Həkim, Avropa Oyunları zamanı Kliniki Mərkəzə daxil olan müraciətlər barədə öyrənmək istərdik.

-I Avropa Oyunları zamanı bizə 129, o cümlədən 69 əcnəbi, 60 ölkə vətəndaşının müraciəti daxil olmuşdu.  Onlardan 76 nəfərinə ambulator, 53 nəfərinə stasionar xidmət göstərilib. İstər əcnəbi vətəndaşlar, istərsə də ölkə sakinləri onlara göstərdiyimiz tibbi xidmətin səviyyəsindən razı qalmışlar.

-IV İslam Həmrəyliyi Oyunlarına hansı hazırlıq işləri görülüb?

-Əlbəttə ki, əvvəlki illərdən müəyyən təcrübə əldə etmişik və bu il də yüksək tibbi xidmət göstərilməsi üçün bütün lazımi tədbirlər görülüb. Yaradılan 9 nəfərlik işçi qrupuna baş həkim, baş həkimin müavinləri, şöbə müdirləri və baş tibb bacısı daxil edilib.  Mühüm idman tədbiri ilə əlaqədar xəstəxanada ümumi, toksikoloji və yoluxucu xəstəliklər üzrə üç şöbədə qəbul otağı yaradılıb. Stasionar müalicə üçün qəbul edilən xəstələrə hər birində 2 çarpayı olmaqla uşaq cərrahiyyəsi və üz-çənə cərrahiyyəsi şöbəsində 10, ümumi terapiya, kardiologiya və nevrologiya, travma və neyrotravma, ümumi cərrahiyyə şöbələrinin hər birində 6 palata olmaqla ümumən 44 palata ayrılıb. Toksikologiya şöbəsində hərəsində 2 çarpayı olmaqla 3, yoluxucu xəstəliklər şöbəsində isə 10 palata ayrılaraq tam hazır vəziyyətə gətirilib.

Tədbir iştirakçıları və qonaqlara rentgen, ultrasəs, KT, MRT müayinələri göstərmək üçün də hər cür şərait yaradılıb.  Müraciət edənlərə tibbi yardım göstərmək üçün kifayət qədər gips, sarğı, dava-dərman və digər tibbi ləvazimatlar ayrılıb.

Ümumən xəstəxanada və hər bir şöbədə ayrı-ayrılıqda mayın 1-dən 31-dək növbətçilik cədvəlləri tutmuşuq. Cədvələ əsasən hər ixtisas üzrə 1 həkim və 1 tibb bacısı olmaqla 18 həkim və o qədər də tibb bacısı 12 saat ərzində növbədə olacaqlar. Növbələrə ingilis və digər dilləri bilən həkim, rezident və tibb işçiləri  cəlb ediləcək. Əlavə olaraq tapşırılıb ki, hər həkim öz şöbəsində əcnəbi dil bilən işçilərin siyahısını işçi qrupa təqdim etsin.

-Məlum olduğu kimi, İslam Həmrəyliyi Oyunları mayın 12-dən 22-dək keçiriləcək. Növbətçilik cədvəlinin biraylıq müddətə tutulması nə ilə əlaqədardır?

-Yarış iştirakçılarının və onları müşahidə edən qonaqların Bakı şəhərinə gəlişi bir neçə gün əvvəlcədən başlanacaq və yarış başa çatandan sonra da onlar paytaxtın və ölkəmizin görməli yerlərinə səyahət edəcəklər. Biz də bunu nəzərə alaraq işimizi daha uzun müddətə planlaşdırmışıq.

 

 

 

AZƏRTAC

 

 

 

“Bakı-2017” IV İslam Həmrəyliyi Oyunlarının Əməliyyat Komitəsi mayın 12-22-də Bakıda keçiriləcək bu mötəbər idman yarışının “Azərbaycan Televiziya və Radio Verilişləri” QSC (AzTV) tərəfindən yayımlanacağını elan edib.

Əməliyyat Komitəsindən AZƏRTAC-a bildiriblər ki, razılaşmaya əsasən, AzTV və “İdman Azərbaycan” kanalı Oyunlarla əlaqədar yayım materiallarından müvafiq olaraq, mayın 12-də və 22-də Bakı Olimpiya Stadionunda keçiriləcək açılış və bağlanış mərasimlərinin canlı yayımlanması, Oyunların ən yaxşı idman yarışlarından və medal uğrunda mübarizələrindən ibarət bir saatlıq gündəlik proqram, Türkiyə, Kamerun, Seneqal, Səudiyyə Ərəbistanı, Oman, Fələstin, Əlcəzair və Azərbaycan komandaları arasında keçiriləcək futbol üzrə 16 qarşılaşmanın canlı yayımlanması, Oyunlar haqqında iki saatlıq proqram hazırlamaqla bağlı xüsusi istifadə hüququna malik olacaq.

“Azərbaycan Televiziya və Radio Verilişləri” QSC-nin sədr müavini Elsevər Dünyamalıyev bu barədə fikirlərini bildirərkən deyib: “Biz “Bakı-2017” IV İslam Həmrəyliyi Oyunlarını Azərbaycan xalqına çatdıracağımız üçün qürur duyuruq. Ölkəmizdə keçirilən mötəbər tədbirlər AzTV və “İdman Azərbaycan” kanalları vasitəsilə daim yüksək səviyyədə yayımlanıb. IV İslam Həmrəyliyi Oyunları da bu baxımdan istisna təşkil etmir. Bu Oyunları yayımlamaqla yalnız Azərbaycanda deyil, bütün İslam dünyasında İslam həmrəyliyi ruhunu təbliğ edəcəyik. IV İslam Həmrəyliyi Oyunları heyrətamiz beynəlxalq idman tədbiri olması ilə seçiləcək”.

“Bakı-2017” IV İslam Həmrəyliyi Oyunları Əməliyyat Komitəsinin korporativ direktoru Elçin Səfərov deyib: “Biz Azərbaycanın aparıcı yayım şirkəti olan “Azərbaycan Televiziya və Radio Verilişləri” QSC ilə böyük məmnuniyyətlə tərəfdaşlıq edirik. AzTV ölkəmizdə keçirilən irimiqyaslı tədbirlərin yayımlanması istiqamətində böyük və zəngin təcrübəyə malikdir. Bu mötəbər yarışa ev sahibliyi edən ölkənin yayım hüququ olan şirkəti kimi AzTV “Bakı-2017” IV İslam Həmrəyliyi Oyunlarının Azərbaycanda yayımlanmasını təmin edəcək”.

Xatırladaq ki, “Bakı-2017” IV İslam Həmrəyliyi Oyunları mayın 12-22-də keçiriləcək. Oyunlarda 57 İslam ölkəsinin idmançıları 20 idman növü üzrə 270 dəst medal uğrunda mübarizə aparacaqlar. Atletlər on yarış günü ərzində idmanın 20 növü (23 kateqoriya) - atletika və para-atletika, su idmanı növləri (suyatullanma, üzgüçülük, su polosu), basketbol 3x3, futbol, idman gimnastikası, bədii gimnastika, uşu, stolüstü tennis, həndbol, cüdo və görmə qabiliyyəti olmayanlar üçün cüdo, yunan-Roma güləşi, sərbəst güləş, atıcılıq, tennis, voleybol, boks, zorxana, karate, taekvando, ağır atletika üzrə 16 müasir idman qurğusunda keçiriləcək yarışlarda güclərini sınayacaqlar.

IV İslam Həmrəyliyi Oyunlarının Bakıda keçirilməsi ilə bağlı qərar 2013-cü il iyulun 24-də İslam Həmrəyliyi İdman Federasiyasının Səudiyyə Ərəbistanının Ciddə şəhərində təşkil olunan VIII Baş Assambleyasında qəbul edilib. 2015-ci il sentyabrın 18-də Prezident İlham Əliyev IV İslam Həmrəyliyi Oyunlarının Bakıda keçirilməsi üzrə Təşkilat Komitəsinin yaradılması haqqında Sərəncam imzalayıb. IV İslam Həmrəyliyi Oyunlarının Təşkilat Komitəsinin sədri Azərbaycanın Birinci vitse-prezidenti xanım Mehriban Əliyevadır.

AZƏRTAC

 

 

 

IV İslam Həmrəyliyi Oyunları və Formula-1 Azərbaycan Qran-pri yarışı ilə bağlı Dövlət Miqrasiya Xidmətinin qarşısına qoyulan tapşırıqlar vaxtında və yüksək keyfiyyətlə icra edilir.

Xidmətin İctimayətlə Əlaqələr Şöbəsindən aldığımız məlumata görə Prezident İlham Əliyev  bu il martın 2-də “IV İslam Həmrəyliyi Oyunlarının təşkili və keçirilməsi ilə əlaqədar bəzi tədbirlər haqqında” və “2017 Formula 1 Azərbaycan Qran-Pri yarışının təşkili və keçirilməsi ilə bağlı Azərbaycan Respublikasına gələn əcnəbilər və vətəndaşlığı olmayan şəxslər üçün viza prosedurlarının sadələşdirilməsi haqqında” Sərəncamlar imzalayıb.

“IV İslam Həmrəyliyi Oyunlarının təşkili və keçirilməsi ilə əlaqədar bəzi tədbirlər haqqında” Sərəncama əsasən müvafiq qaydada akkreditasiyadan keçmiş əcnəbilər və vətəndaşlığı olmayan şəxslər 2017-ci il aprelin 1-dən iyulun 1-dək pasport və ya digər sərhədkeçmə sənədləri və akkreditasiya kartı əsasında viza almadan Azərbaycan Respublikasına gələ və gedə bilərlər.

Həmçinin sənədə uyğun olaraq IV İslam Həmrəyliyi Oyunlarının təşkili və keçirilməsi ilə bağlı respublikanın ərazisində əmək fəaliyyətinə cəlb edilən və müvafiq qaydada akkreditasiyadan keçmiş əcnəbilər və vətəndaşlığı olmayan şəxslər üçün iş icazəsinin alınması da tələb olunmur.

Formula 1  yarışı ilə əlaqədar Azərbaycana gələn və Formula 1 yarışlarının beynəlxalq təşkilatçıları olan “Formula One Management Limited” şirkətinin və Beynəlxalq Avtomobil Federasiyasının müvafiq qaydalarına uyğun olaraq akkreditasiyadan keçməni təsdiq edən kart və ya digər sənəd və yaxud Bakı Şəhər Halqası Əməliyyat Şirkətində akkreditasiyadan keçməni təsdiq edən kart təqdim edən əcnəbilər və vətəndaşlığı olmayan şəxslər isə 2017-ci il mayın 15-dən iyulun 15-dək Azərbaycanın beynəlxalq hava limanlarında viza ala bilərlər.

Əcnəbilərin və vətəndaşlığı olmayan şəxslərin IV İslam Həmrəyliyi Oyunları və 2017 Formula 1 Azərbaycan Qran-Pri yarışı ilə bağlı  respublikaya gəlməsi qaydalarının, eləcə də viza prosedurlarının sadələşdirilmələri barədə ölkəmizə uçuşlar həyata keçirən aviasiya şirkətlərinə məlumat vermək adıçəkilən sərəncamlarla Dövlət Miqrasiya Xidmətinə tapşırılıb.

Qeyd edilən məsələlərlə əlaqədar Xidmət tərəfindən bu günə qədər nəzərdə tutulan işlər yerinə yetirilib. Belə ki, DMX-nin aparatında ölkəmizə uçuşlar həyata keçirən aviasiya şirkətləri nümayəndələri ilə görüş keçirilib. Xidmət rəisinin müavini, III dərəcəli dövlət miqrasiya xidməti müşaviri Pərviz Musayev hər iki tədbirin əhəmiyyətini diqqətə çatdırıb. IV İslam Həmrəyliyi Oyunları ilə əlaqədar əcnəbilərin və vətəndaşlığı olmayan şəxslərin respublikaya gəlməsi qaydalarının və 2017 Formula 1 Azərbaycan Qran-Pri yarışı ilə bağlı viza prosedurlarının sadələşdirilməsinə dair izahedici söhbət aparılıb və onlara məlumatlandırma xarakterli müvafiq məktublar təqdim olunub.

Həmçinin Beynəlxalq Mülki Aviasiya Təşkilatına və Beynəlxalq Hava Nəqliyyatı Assosiasiyasına məlumatlandırma xarakterli məktublar hazırlanaraq göndərilib və onlar tərəfindən verilən suallar ətraflı cavablandırılıb.

Məlumatda o da bildirilir ki, IV islam Həmrəyliyi Oyunlarının və  Formula 1 Azərbaycan Qran-Pri yarışının yüksək səviyyədə keçirilməsi üçün Xidmətin səlahiyyətinə aid olan məsələlərə dair digər müvafiq işlər də müvəffəqiyyətlə yerinə yetirilir.

 

Nurəngiz ADİLQIZI,

“Respublika”.

 

 

 

Şənbə, 15 Aprel 2017 13:21

DÜNYA BU GÜN

ŞIMALI KOREYA: ABŞ GƏMILƏRINI ÇƏKMƏSƏ ZƏRBƏ ENDIRILƏCƏK

Şimali Koreya ABŞ hərbi qüvvələrinə preventiv zərbə endirilməsinə hazırdır. “APA”nın Rusiya mətbuatına istinadən məlumatına görə, bunu Şimali Koreyanın xarici işlər nazirinin müavini Xan Son Rel bildirib.
XİN rəsmisi həmçinin regionda gərginliyin artmasında ABŞ prezidenti Donald Trampı ittiham edərək, Ağ Ev rəhbərinin seçki kampaniyası zamanı açıqladığı Şimali Koreya lideri ilə görüş niyyətini boş vəd adlandırıb.
Eyni zamanda, nazir müavini Donald Tramın Şimali Koreyaya olan münasibətdə öncəki administrasiyaya nisbətən daha amansız və aqressiv olduğunu qeyd edib.
“Bizim güclü nüvə arsenalımız var. Əgər ABŞ “Karl Vinson” aviadaşıyıcısı nümunəsindəki kimi məntiqsiz hərbi manevrlərini davam etdirəcəksə, cavab zərbəsi endirəcəyik” - deyə, nazirlik rəsmisi vurğulayıb.
Bununla yanaşı, Xan Son Rel ölkəsinin Vaşinqton nüvə təhdidlərindən əl çəkməyənədək hərbi potensialını gücləndirəcəyini də gizlətməyib.
Qeyd edək ki, “Karl Vinson” aviadaşıyıcısının liderliyi ilə ABŞ donanması Şimali Koreya sahillərinə yaxınlaşıb. Məlumata görə, hərbi gəmilər artıq zərbə məsafəsindədir. Həmçinin xəbər verilir ki, “Tomahavk” raketləri ilə təchiz olunmuş iki esmines isə Şimali Koreyanın nüvə poliqonunu hədəfə alıb.
Eyni zamanda, Pxenyanın raket sınaqlarını davam etdirəcəyi təqdirdə amerikalıların istənilən an zərbə endirə biləcəyi və hücuma keçəcəyi istisna edilmir.
Xatırladaq ki, ABŞ donanması bu həftənin əvvəlində Şimali Koreya sahilləri istiqamətində hərəkətə keçib. Rəsmi Pxenyandan bu addım təhrik kimi qiymətləndirilib.

 

OPEK-in HESABATI NEFTIN QIYMƏTINƏ MÜSBƏT TƏSIR ETDI
OPEK mart ayında gündəlik neft hasilatını 153 min barrel azaldıb. “APA”nın məlumatına görə, bu barədə kartelin açıqladığı hesabatda bildirilir. Hesabata əsasən, OPEK-ə üzv 11 ölkə gündə 29,761 milyon barrel neft hasil edir. Bununla da hasilatın azaldılmasına dair öhdəlik kartel tərəfindən 104 faiz yerinə yetirilmiş olub.
OPEK 2017-ci ildə dünyada neftə olan sutkalıq tələbatın 1,26 milyon barrel deyil, 1,27 milyon barrel artacağını proqnozlaşdırır. Hesabatda qeyd olunur ki, OPEK üzvləri razılaşmaya riayət etsələr də, kartelə üzv olmayan ölkələrdə gündəlik hasilat həcmi martda 400 min, apreldə isə 580 min barrel artıb.
Bundan başqa, ABŞ-ın neft ehtiyatlarının həcminə dair hesabat da neftin qiymətinə müsbət təsir göstərib. Rəsmi hesabata əsasən, ABŞ-da uzun fasilədən sonra ilk dəfə ehtiyatların həcmində azalma qeydə alınıb. Proqnozlara əsasən, 87 min barrel artım gözlənilsə də, bu təxminlər özünü doğrultmayıb. Ötən həftə ABŞ-da neft ehtiyatlarının həcmi 2,2 milyon barrel azalıb.
Eyni zamanda, Beynəlxalq Enerji Agentliyinin son hesabatı da neftin qiymətini bahalaşdırıb. Məlumata görə, hesabatda bildirilir ki, tezliklə dünya bazarında neftə olan tələbat təklifi üstələyəcək.

 

ERMƏNISTANDA SEÇKILƏRIN NƏTICƏLƏRI LƏĞV EDILƏ BILƏR
Ermənistanın sabiq prezidenti Levon Ter-Petrosyanın sədri olduğu “Erməni Milli Konqresi-Ermənistan Xalq Partiyası” müxalifət bloku parlament seçkilərinin nəticələrinin ləğvi ilə bağlı Konstitusiya Məhkəməsinə müraciət edib. “APA”nın Rusiya mətbuatına istinadən verdiyi məlumata görə, bu barədə vəkil Tiqran Yeqoryan açıqlama verib.
“Biz alyans və “Vətəndaş-müşahidəçi” təşəbbüsü adından Konstitusiya Məhkəməsinə müraciət etmişik. Hesab edirik ki, 2 aprel seçkiləri zamanı dövlət əsas prinsipləri—öz iradəsini azad ifadəetmə və gizlin səsverməni təmin etməyib. İnzibati resurslardan istifadə olunub”, - deyə Tiqran Yeqoryan bildirib.
Xəbər verilir ki, bu müraciət nəticəsində parlamentin birinci iclası təxirə salına bilər. Konstitusiyaya əsasən, yeni seçilmiş parlamentin ilk iclası seçkilərdən üç həftə sonra keçirilir.
MSK səsvermənin nəticələrini aprelin 9-da təsdiqlədiyindən parlament öz işinə aprelin 27-də başlamalıdır. Lakin ərizədən sonra iclasın maya kimi təxirə salınacağı ehtimal olunur. Konstitusiya Məhkəməsi tərəfindən ərizəyə maksimum 15 gün ərzində baxılmalıdır.

 

SERGEY LAVROV: ABŞ BMT NIZAMNAMƏSINI KOBUD ŞƏKILDƏ POZUB
Moskvada Rusiya, İran və Suriya xarici işlər nazirlərinin üçtərəfli görüşü keçirilib. “APA”nın verdiyi xəbərə görə, Sergey Lavrov, Məhəmməd Cavab Zərif və Valed Müallimin iştirakı ilə keçirilən görüşdə ABŞ-ın raket zərbələrindən sonra Suriyada yaranan vəziyyət, beynəlxalq terrorçuluğa qarşı birgə mübarizə və İdlibdə baş verən hadisə müzakirə olunub.
Rusiya xarici işlər naziri Sergey Lavrov iranlı və suriyalı həmkarları ilə keçirdiyi üçtərəfli görüşün yekunlarına dair mətbuat konfransında bildirib ki, Moskva, Dəməşq və Tehran ABŞ-ın Suriyaya raket zərbələrini təcavüz aktı kimi qiymətləndirib.
Rusiya XİN başçısı deyib: “Üçtərəfli formatda dialoq artıq ənənə halını alıb. Görüşdə ABŞ-ın hərbi aerodroma raket zərbələrindən sonra Suriyada yaranan vəziyyəti müzakirə etdik. Mövqelərimizin eyni olduğunu bir daha təsdiq etdik. Bu mövqe ondan ibarətdir ki, ABŞ beynəlxalq hüququn prinsiplərini və BMT nizamnaməsini kobud şəkildə pozub”.
Sergey Lavrov həmçinin bildirib ki, Rusiya, Suriya və İran Suriyada kimyəvi silah hücumu ilə bağlı insidentin Kimyəvi Silahların Qadağan Olunması üzrə Təşkilat (OPC) tərəfindən diqqətli araşdırılmasını təkid edir.
Eyni zamanda, Rusiya XİN başçısı ABŞ-ın raket zərbələrinin Suriyada sülh prosesini pozmağa və hakimiyyəti dəyişməyə istiqamətləndiyini bildirib. O, ABŞ-ın cəhdlərinin uğurla nəticələnməyəcəyini vurğulayıb.
Sergey Lavrov deyib: “Bu aksiya açıq-aydın Suriyada hakimiyyətini devirmək üçün bəhanə axtarmağa istiqamətlənib. Bu cəhdlər uğurla nəticələnməyəcək. Rusiya BMT Təhlükəsizlik Şurasının 2254 saylı qətnaməsinin tələblərinin, o cümlədən Suriyanın ərazi bütövlüyünə və suverenliyinə ciddi hörmət edilməsini təkid edəcək. Hamıya məlumdur ki, beynəlxalq hüququn pozulması qəbuledilməzdir”.

 

GÜLƏŞÇILƏRI “ƏZIK QULAQDAN” XILAS EDƏCƏK KƏŞF
“The Telegraph” qəzetinin güləşçilərə və bir çox başqa idman növləri ilə məşğul olanlara şad xəbəri var. Bu barədə “BBC” agentliyi məlumat verib.
Qəzet yazır ki, Şimali İrlandiyadan olan Brenda Filips adlı qadın bəzi idmançıları “əzik qulaq” deyilən bəladan qurtarmaq üçün vasitə ixtira edib. Söhbət reqbi, boks və güləş idmançılarının qulaq seyvanlarının əzilib tanınmaz vəziyyətə düşməsinin qarşısının alınmasından gedir.
Şimali İrlandiyada diş həkimi işləyən Brenda Filips idmançıların qulaqlarının eybəcər hala düşməməsi üçün silikon qulaq qapaqları icad edib. Xəbər verilir ki, bu vasitədən artıq bəzi reqbiçilər, cüdoçular və güləşçilər istifadə edirlər.
Reqbiçi oğulun və xokkeyçi qızın anası olan xanım Brenda Filips qeyd edib ki, “əzik qulaq” təkcə estetik baxımdan eybəcər olmaqla qalmır, bu həm də idmançıya fiziki iztirablar verə bilər.
Bu ideya 23 yaşlı reqbiçi Konnorun və 25 yaşlı xokkeyçi Naominin anasının ağlına qəfil gəlib. Stomatoloq öz-özünə düşünüb: “Əgər xokkeyçilərin başlarını qoruyan dəbilqələr, boksçuların dişlərini qoruyan süni damaqlar varsa, niyə güləşçi və reqbiçilərin qulaqlarını qoruyan vasitə olmasın?”.
B.Filips əmindir ki, silikon qulaqlar güləşçilərin, reqbiçilərin, boksçuların, kriketçilərin və su poloçularının qulaqlarını həm zədələrdən, həm də eybəcərlikdən xilas edə bilər. Məlumata görə, artıq Brenda Filips ixtirasının kütləvi tətbiqi üçün patent idarəsinə müraciət də edib.

 

SOSIAL ŞƏBƏKƏLƏRIN UŞAQLARIN HƏYATINA VURDUĞU ZIYAN
Britaniyanın Şeffild Universitetinin apardığı araşdırmanın nəticlərinə görə, “Facebook”, “İnstagram” və “Snapchat” kimi sosial şəbəkələrdə bir saat vaxt keçirən uşaqlar xoşbəxtlikdən məhrum olurlar. Bu barədə “BBC” agentliyi Böyük Britaniyanın “The Times” qəzetinə istinadən məlumat yayıb.
Qəzetdə dərc olunan xəbərə görə, sosial şəbəkələrdə daha çox vaxt keçirən uşaqlar, daha az vaxt keçirən uşaqlarla müqayisə edildikdə ikincilər dərsləri, məktəbləri, görünüşləri, ailələri və ümumilikdə həyatları haqqında bədbin olmalarına baxmayaraq, dostlar əhatəsində özlərini daha xoşbəxt hiss edirlər.
Qəzetin təhsil üzrə redaktoru Rozemari Bennetin yazdığı məqaləyə görə, sosial şəbəkədə bir saat vaxt keçirmək uşaqların həyatıyla bağlı onalırın özlərini “tamamilə xoşbəxt” hiss etmə ehtimalını 14 faiz azaldır.
Xəbər verilir ki, Şeffild Universitetinin apardığı araşdırmanın nəticələri Kral İqtisadi Cəmiyyətinin illik konfransında təqdim ediləcək.
Gənclərin sosial şəbəkələrdə keçirdiyi vaxtın spirtli içki və siqaret kimi zərərli vərdişlərə başlamaq ehtimalını azaltdığını dəstəkləyənlərlə yanaşı, sosial şəbəkələrin gənclərin sağlamlığına ziyan vurduğunu düşünənlər də var.

 

 

 

İnsan qidasında tərəvəz məhsulları mühüm yer tutur. Mətbəximizi kələm, pomidor, soğan, xiyar, badımcan, kök, göyərti olmadan təsəvvür etmək olmur. Hər birində də zəngin vitaminlər var. Ölkəmizin zəngin iqlim qurşaqları bol tərəvəz məhsulları yetişdirməyə imkan verir, hətta ildə iki dəfə məhsul əldə etmək imkanı var.

Dövlət Statistika Komitəsi xəbər verir ki, ötən il 73,6 min hektar sahədə tərəvəz bitkiləri əklimiş və bol məhsul yetişdirilmişdir. Göstərilən sahələrdən 1 milyon 269,3 min ton tərəvəz məhsulları yığılıb. Bu, hər hektardan 156 sentner tərəvəz deməkdir.

Ötən il tarlalarda (toxumçuluq üçün birillik və ikiillik bitkilər istisna olmaqla) 190,2 min ton xiyar, 420,6 min ton pomidor, 7500 tona yaxın süfrə çuğunduru, 16 min tona yaxın yerkökü, 177 min tondan çox baş soğan, 21 min tondan artıq sarımsaq, 2800 tona yaxın göy noxud, 87 min tondan artıq badımcan, 37 min tona yaxın şirin bibər, 17 min tondan artıq acı bibər, 11 min tondan artıq turp istehsal olunub.

Xiyar məhsulu istehsalında birincilik Lənkəran rayonuna məxsusdur (20 min tona yaxın). Masallı (12,7 min ton), Biləsuvar (12 min tona yaxın) rayonları da xiyar istehsalında fərqləniblər.

Hər hektardan məhsuldarlıqda Biləsuvar rayonu ölkədə birinci (395 sentnerə yaxın), Masallı rayonu isə bu sırada ikincidir (290 sentner). 260 sentner civarında məhsul istehsal edən Hacıqabul, Xaçmaz, Şəki rayonları sonrakı yerləri bölüşürlər.

Dövlət Statistika Komitəsi xəbər verir ki, ötən il ölkədə 22,5 min hektara yaxın sahədə pomidor yetişdirilərək 420,5 min ton məhsul istehsal olunub. Bu, hər hektardan 188 sentnerə yaxın pomidor deməkdir. Məhsul istehsalında Xaçmaz (70 min tondan çox), Lənkəran (52 min tona yaxın), Biləsuvar (50 min tona yaxın) rayonları fərqləniblər.

Pomidor istehsalında Aran iqtisadi rayonu ölkənin ağırlıq mərkəzidir. 121,7 min ton pomidor istehsal edən iqtisadi rayon özündə 18 şəhər və rayonu birləşdirir. Lənkəran iqtisadi rayonu pomidor istehsalında ölkədə 3-cü sırada dayansa da, hər hektardan məhsuldarlıqda (236 sentner) ölkədə birincidir.

Son 25-30 il ərzində gözdən salınan və az qala unudulmaqda olan qiymətli sarımsaq bitkisinin də son illər əkin sahəsi artıb. Sarımsağa ögey münasibət əhalinin onun yüksək keyfiyyətini, min bir dərdin dərmanı olmasını hələ də lazımınca dərk etməməsindən irəli gəlir. DSK xəbər verir ki, ötən il sarımsağın əkin sahələri artaraq 2300 hektarı ötüb. Həmin sahələrdən ilkin çəkidə 21 min tondan çox məhsul əldə edilib.

Sarımsağı daha yaxşı qiymətləndirən Sabirabad rayonu 3,3 min tondan artıq məhsul istehsal edərək ölkədə birincilik qazanıb. Hər biri ayrı-ayrılıqda 1,6 min tondan artıq sarımsaq istehsal edən Ağsu, Ucar və Xaçmaz rayonları ölkədə sonrakı yerləri bölüşürlər.

Hər hektardan daha çox məhsul istehsal edən Biləsuvar (260 sentner) rayonu ölkədə birincidir. Qazax rayonu 200, Saatlı rayonu 190 sentnerə yaxın sarımsaq istehsal edərək sonrakı yerləri bölüşürlər. Xatırladaq ki, ölkə üzrə bu göstərici hər hektardan 91 sentnerdir.

Mətbəximizdə xüsusi yer tutan baş soğanın əkin sahəsi ötən il 12 min hektara yaxınlaşıb. DSK xəbər verir ki, həmin sahələrdən 177,4 min ton baş soğan istehsal olunub. Ağdam və Şəmkir rayonları hər biri ayrı-ayrılıqda 30 min tondan artıq məhsul istehsal ediblər. Ağstafa rayonu hər hektardan 250 sentnerdən, Qazax, Xaçmaz, Biləsuvar, Ağdam rayonlarının hər biri isə 200 sentnerdən çox baş soğan istehsal ediblər. Həmin rəqəm ölkə üzrə 150 sentnerə yaxındır.

Nəriman CAVADOV,

“Respublika”.

 

 

 

Azərbaycan Respublikasının Prezidenti İlham Əliyev aprelin 13-də Ukraynanın Kiyev Şəhər Dövlət Administrasiyasının başçısı Vitali Kliçkonu qəbul edib.

AZƏRTAC xəbər verir ki, Kiyev Şəhər Dövlət Administrasiyasının başçısı Vitali Kliçko ilə bu yaxınlarda Münxendəki görüşünü xatırlayan dövlətimizin başçısı onun Azərbaycana səfərinin maraqlı keçəcəyinə, ölkələrimiz, o cümlədən Bakı ilə Kiyev arasında əlaqələrin möhkəmləndirilməsi işinə xidmət edəcəyinə ümidvar olduğunu bildirdi.

Əməkdaşlıq və qarşılıqlı təcrübə üçün yaxşı perspektivlərin olduğunu vurğulayan dövlətimizin başçısı İlham Əliyev Vitali Kliçkonun bu səfərinin həmkarları ilə görüşmək, paytaxtımızda gedən inkişaf prosesləri və Bakıda inşa olunan idman obyektləri ilə yaxından tanış olmaq üçün imkan yaratdığını dedi.

Azərbaycana səfərindən böyük məmnunluq hissi keçirdiyini bildirən Kiyev Şəhər Dövlət Administrasiyasının başçısı Vitali Kliçko Bakıda uzun müddət olmadığını və paytaxtımızın gözəlliyinin onda dərin təəssürat yaratdığını vurğuladı. O, bu səfəri ilə bağlı ölkələrimiz, eləcə də Bakı ilə Kiyev arasında əməkdaşlığın genişləndirilməsi baxımından böyük hazırlıq işlərinin görüldüyünü dedi.

Sonra Vitali Kliçko dünya şöhrətli boksçu Məhəmməd Əliyə həsr olunmuş, üzərində Məhəmməd Əlinin şəxsi avtoqrafı olan məhdud nəşrli kitab-albomun bir nüsxəsini hədiyyə olaraq Prezident İlham Əliyevə təqdim etdi. Qeyd edək ki, dövlətimizin başçısına təqdim olunan bu kitab-albom məhdud nəşrin 16-cı nüsxəsidir. 

 

 

 

AZƏRTAC

8 -dən səhifə 1169