XƏBƏR LENTİ

Qafqaz Müsəlmanları İdarəsinin sədri şeyxülislam Allahşükür Paşazadənin rəhbərliyi ilə Tehranda səfərdə olan Azərbaycan nümayəndə heyəti avqustun 7-də İranın Mədəniyyət və İslam Əlaqələri Təşkilatının sədri Əbuzər İbrahim Türkmən ilə görüşüb.

Azərbaycanı dost və qardaş ölkə adlandıran Ə.İ.Türkmən iki ölkə arasında münasibətlərin inkişaf dinamikasının sevindirici olduğunu deyib. O bildirib ki, mədəni əlaqələrin yaxınlaşdırılması istiqamətində bir sıra əhəmiyyətli addımlar atılıb. Ötən ay Tehranda Azərbaycan mədəniyyəti günlərinin keçirildiyini xatırladan Ə.İ.Türkmən xalqlarımızın ortaq mənəvi dəyərlərə malik olduğunu qeyd edib.

Nəzərə çatdırılıb ki, Azərbaycan Prezidentinin 2017-ci ili ölkədə “İslam Həmrəyliyi İli” elan etməsi olduqca əhəmiyyətli və tarixi qərardır. Bu gün dünyada, xüsusilə İslam aləmində baş verən hadisələr həmrəyliyi zərurətə çevirib. Azərbaycan Prezidentinin də həmrəylik çağırışları İslam dünyasında sülhün bərqərar olmasına xidmət edir. Buna görə də Azərbaycan Prezidentinin bu təşəbbüsünə hərtərəfli dəstək verilməlidir.

Qafqaz Müsəlmanları İdarəsinin sədri Allahşükür Paşazadə Tehranda “İslam həmrəyliyi İran-Azərbaycan dostluğu timsalında” mövzusunda konfransın keçirilməsində təşkilatçı qismində iştirak etdiyinə görə minnətdarlığını bildirib. Qeyd edib ki, konfransda İranın görkəmli din alimləri iştirak edərək həmrəylik haqqında öz fikirlərini çatdırıblar. Bu konfrans Bakıda da keçiriləcək və İran tərəfi geniş tərkibdə dəvət olunacaq.

Allahşükür Paşazadə İran-Azərbaycan münasibətlərinə toxunaraq qeyd edib ki, iki qardaş ölkə arasında nifaq salmağa çalışanlar buna nail ola bilməyiblər. İnşallah, bundan sonra da nail ola bilməyəcəklər, çünki bizim əlaqələrdə mənəvi dəyərlərə üstünlük verilir.

Görüşdə iştirak edən Dini Qurumlarla İş üzrə Dövlət Komitəsinin sədri Mübariz Qurbanlı deyib ki, Azərbaycan Prezidenti İlham Əliyevin 2016-cı ili ölkədə “Multikulturalizm İli”, 2017-ci ili isə “İslam Həmrəyliyi İli” elan etməsi təsadüfi xarakter daşımır. Bu gün İslam dünyasında mürəkkəb proseslər gedir. İslam dünyasında daha çox vəhdətə və həmrəyliyə ehtiyac duyulur.

M.Qurbanlı bildirib ki, eyni mahiyyətli konfransın ilin sonunadək Özbəkistan, İspaniya, Türkiyə, Mərakeş, Rusiyada da keçirilməsi nəzərdə tutulub.

Görüş zamanı mədəni əlaqələrin daha da yaxınlaşdırılması məsələləri müzakirə edilib.

Milli Məclisin deputatları Eldar İbrahimov, Hikmət Məmmədov, Azərbaycanın Rusiyadakı səfiri Polad Bülbüloğlu və İrandakı səfiri Bünyad Hüseynov görüşdə iştirak ediblər.

 

 

AZƏRTAC

Bu günlərdə Heydər Əliyev hava limanında əsl bayram əhval-ruhiyyəsi duyulur, Azərbaycan Televiziyasının əməkdaşları Portuqaliyanın Guimaraes şəhərində stolüstü tennis üzrə gənclər arasında Avropa çempionatından uğurlu nəticələrlə Vətənə qayıtmış idmançılarla maraqlı müsahibə götürülürdü. Gənc tennisçilər arasında Bakının Nərimanov rayonundakı 258 nömrəli məktəbin yetirməsi Nəzakət Qarayeva da var idi. O, yarışlarda qazandığı kuboku sevinc yaşları ilə başının üstündə tutur, gənc idmançıya doğmaları qucaq-qucaq tər gül-çiçək dəstələri hədiyyə edirdilər.

Hava limanında stolüstü tennis üzrə məşqçi Mixail Timofayev durna qatarı kimi dəstələnən yetirmələri ilə xatirə şəkilləri çəkdirir, bütün valideynlərə, o cümlədən 16 yaşlı idmançı Nəzakət Qarayevanın atası Qaraya, anası Raminəyə, sevimli nənəsi Rəna xanıma dərin minnətdarlığını bildirirdi. Əminliklə dedi ki, stolüstü tennisin sirlərinə gənc yaşlarından mükəmməl yiyələnən, yarış meydanında rəqiblərini məğlub etdirməyi bacaran, peşəkarlığı ilə Azərbaycan bayrağını dalğalandıran Nəzakəti qarşıdakı illərdə də böyük uğurlar gözləyir. O, buna qadirdir, tennis idmanının vurğunudur.

İsti yay günündə gənclər arasında Avropa çempionatından zəfərlə geri dönən məktəbli qız Nəzakət Qarayeva redaksiyamızın qonağı oldu. “Respublika” qəzetinin kollektivi dünya ölkələrini qarış-qarış gəzən, yarışın qalibləri sırasında olan Nəzakəti hərarətlə qarşıladı. Biz iş otağında Portuqaliyada ölkəmizi bacarıqla təmsil edən məktəbli qızla üzbəüz əyləşib şirin söhbət etdik, onun ömür kitabını vərəqlədik.

Nəhayət, danışıq üçün meydanı gənc, bacarıqlı tennis ustasına verdik. O, ilk öncə özü ilə gətirdiyi növ-növ şəkilləri bizə təqdim etdi. Qürur hissi ilə vurğuladı ki, Azərbaycan idman ölkəsi kimi bütün dünyada məşhurdur.

Azərbaycan Respublikasının Prezidenti cənab İlham Əliyev idmana və idmançılara böyük dəstək verir.

Söhbət əsnasında Nəzakət bildirdi ki, 7 yaşından stolüstü tennislə məşğul olur. Məktəbin idman zalında yüksək həvəslə tennislə məşğul olub, bu sahədə idman müəllimi Vaqif Məmmədov Nəzakətin yaxın köməkçisi olub, hər an onu qələbəyə ruhlandırıb, dəyərli tövsiyələr verib.

Çox keçmədən Nəzakət Qarayeva qəlbinin hökmü ilə könlünü verdiyi tennisdə püxtələşdi. Respublika üzrə keçirilən yarışlarda birinci yerdə qərarlaşdı.

Ayrı-ayrı vaxtlarda Nəzakət Qarayeva Xorvatiya, Ukrayna, İran, Türkiyə, Rusiya Federasiyası, Çexiya və digər ölkələrdə stolüstü tennis yarışlarında uğurlu nəticəyə imza atıb, birincilər sırasında olmaqla fəxri kürsünün yüksək pilləsində dayanıb.

Nəzakət Qarayeva qarşıdakı dərs ilində məktəbin X sinfində təhsilini davam etdirəcəkdir. O, gənc idmançılara qayğı və diqqət göstərdiyinə görə Nərimanov Rayon İcra Hakimiyyətinin başçısı Abdin Fərzəliyevə və 258 nömrəli məktəbin direktoru Sədaqət Hüseynovaya minnətdarlığını bildirdi.

Yəqin ki, qarşıdakı illərdə Nəzakət Qarayeva tennis meydanında ulduztək parıldayacaq, püxtələşəcək, Azərbaycan idmanının şərəfini ləyaqətlə qoruyub saxlayacaqdır.

Nəzakət asudə vaxtlarında milli musiqimizə çox üstünlük verir. Telli sazı dünyalar qədər sevir. “Göyçə gülü” aşıq havası səslənəndə sanki özünü adını çox eşidib görmədiyi Göyçə gölünün nəğməli sahillərində, ata yurdu Nərimanlıda hiss edir. Bu da səbəbsiz deyildir, valideynləri əslən aşıqlar yurdu, söz-sənət diyarı Göyçə mahalındandır...

 

Q.ASLAN,

“Respublika”.

Qəbələ şəhərində keçirilən XIII Dünya Skaut Gənclər Forumu çox yüksək səviyyədə təşkil edilib. Bu forum iştirakçı ölkələrin və gənc skautların sayına görə əvvəlki forumlardan çox böyükdür. Mən Azərbaycana bir neçə dəfə səfər etmişəm və hər dəfə müsbət dəyişikliyin, inkişafın şahidi olmuşam. Əvvəllər şəhərsalma ilə məşğul olmuşam və Bakını gördükdə yaxşı mənada təəccübləndim, şəhərdəki qədim və müasir binaların harmoniyasını, inkişafı gördükdə sevindim.

AZƏRTAC xəbər verir ki, bu sözləri Qəbələdə səfərdə olan Dünya Skaut Hərəkatı Təşkilatının icraedici orqanı olan Dünya Skaut Komitəsinin sədri Joao Armando Qonsalves jurnalistlərə müsahibəsində deyib.

O, Azərbaycanda və dünyada skaut hərəkatının inkişafı üçün Qəbələ forumunun əhəmiyyətini yüksək qiymətləndirib, son illər hərəkatın genişləndiyini, gənclərin bu sahəyə marağının artdığını bildirib: “Dünya Skaut Hərəkatı Təşkilatı dünyanın 224 ölkəsi və regionunda fəaliyyət göstərir və 40 milyon üzvü öz ətrafında birləşdirir. 1907-ci ildə yaradılan Skaut hərəkatının məqsədi  gənclərin özlərini şəxsiyyət kimi formalaşmasına və cəmiyyətdə konstruktiv rol oynamasına, onların ən yaxşı dünyanın qurulması işində iştirakına kömək edir”.

Komitə sədrinin fikrincə, Azərbaycanda turizmin inkişafı və ölkənin dünyada tanıdılması üçün bu cür böyük tədbirlərin Qəbələ və Bakıda təşkil edilməsi düzgün addımdır. “Bilirsiniz ki, Dünya Skaut Komitəsinin 41-ci konfransı və XIII Dünya Skaut Gənclər Forumu səs çoxluğu ilə Avrasiya regionunda ilk dəfə olaraq Azərbaycanda keçirilir. Hazırda Qəbələdə keçirilən XIII Dünya Skaut Gənclər Forumunda 133 ölkədən 18-26 yaş arası 320 gənc iştirak edir”, - deyə o vurğulayıb.

Joao Armando Qonsalves müsahibəsində Azərbaycanın milli yeməklərini, Qəbələnin gözəl təbiətini çox bəyəndiyini, insanların mehriban və qonaqpərvər olduğunu da qeyd edib.

 

AZƏRTAC

Avqustun 8-də “Dəniz kuboku-2017” müsabiqəsinin ikinci mərhələsinin “Xilasetmə vasitələrinin istifadəsi” üzrə 5-ci epizodu icra edilib.

Müdafiə Nazirliyinin mətbuat xidmətindən AZƏRTAC-a bildiriblər ki, beynəlxalq hakimlər kollegiyasının qərarı ilə tapşırığı 2 dəqiqə 13 saniyəyə icra edən Qazaxıstan Hərbi Dəniz Qüvvələrinin “Sarıarka” raket artilleriya gəmisinin ekipajı birinci, 2 dəqiqə 20 saniyə nəticə ilə Azərbaycan Hərbi Dəniz Qüvvələrinin “G-124” gözətçi gəmisinin ekipajı ikinci, 2 dəqiqə 21 saniyə nəticə ilə Rusiya Hərbi Dəniz Donanmasının  “Qrad Sviyajsk” kiçik raket gəmisinin ekipajı üçüncü, 2 dəqiqə 26 saniyə nəticə ilə İran Hərbi Dəniz Qüvvələrinin “Cövşən” raket katerinin ekipajı isə dördüncü yerə layiq görülüb.

“Dəniz kuboku-2017” müsabiqəsinin sonuncu üçüncü mərhələsi avqustun 9-da keçiriləcək.

 

 

AZƏRTAC

Çərşənbə, 09 Avqust 2017 07:47

DÜNYA BU GÜN

NIKKI HEYLI: ABŞ KXDR-IN TƏHDIDINDƏN QORXMUR
ABŞ-ın BMT-dəki daimi nümayəndəsi Nikki Heyli “Fox News” telekanalına verdiyi müsahibədə iqtisadiyyat sahəsində Şimali Koreyaya tətbiq edilən yeni sanksiya qərarlarını dəyərləndirib. Bu barədə “TRT” telekanalı məlumat yayıb.
Yeni sanksiyaları Şimali Koreyaya “endirilmiş yumruq zərbəsi” kimi dəyərləndirən Nikki Heyli bu ölkənin təcavüzkar mövqeyi və göstərdiyi reaksiyalardan narahat olduğunu bildirib.
Daha əvvəl Şimal Koreyaya nüvə fəaliyyətlərinə son qoyması barədə kifayət qədər təzyiq etmədiyinə görə tənqid olunan Çin və Rusiya bu dəfə BMT Təhlükəsizlik Şurasının sanksiya qərarına dəstək olublar. Bu halı xüsusilə qeyd edən Nikki Heyli vurğulayıb ki, Şimali Koreya artıq beynəlxalq ictimaiyyətin yekdil olduğunu açıq şəkildə gördü.
Eyni zamanda, Nikki Heyli bildirib ki, Çin və Rusiya bu vacib məsələdə geri addım atmadı. Onun sözlərinə görə, Təhlükəsizlik Şurasında hər kəs “artıq bu məsuliyyətsizliyi daha çox izləmək istəmirik” dedi.
Nikki Heyli qeyd edib ki, Şimali Koreya ticarətinin 90 faizini Çinlə reallaşdırır və buna görə sanksiyalara Çinin dəstək olması böyük əhəmiyyət daşıyırdı və bu ölkə öz gücünü göstərərək sanksiyaları tətbiq edəcəyini ortaya qoydu.
Nikki Heyli Şimali Koreyanın ABŞ-a “Ciddi dərs verməyə hazırıq” təhdidinə cavab olaraq bildirib ki, “ölkəsi göstərilən reaksiya və təhdidlər qarşısında geri çəkilmək fikrində deyil”.
“Şimali Koreya hər dollardan xalqının rifahı üçün yox, nüvə silah istehsalında istifadə edir. Qəbul edilən sanksiya qərarları Şimali Koreyanın raket sınaqı gücünü məhdud edəcəkdir”, - deyə Nikki Heyli bəyan edib.


DONALD TRAMPIN REYTİNQİ DÜŞMƏKDƏ DAVAM EDIR
ABŞ prezidenti Donald Trampın ölkə vətəndaşları arasındakı reytinqi andiçmə mərasimindən ötən müddətdə ən aşağı səviyyəyə enib. “APA”nın Rusiya mətbuatına istinadən verdiyi xəbərə görə, bunu “CNN” telekanalının sifarişi ilə keçirilən rəy sorğusu göstərir.
Məlumata görə, əgər fevral və mart aylarında respondentlərin 45 faizi Donald Trampa rəğbət bəsləyirdisə, hazırda bu rəqəm 38 faizə enib. Prezidentin fəaliyyətini dəstəklənməyənlər isə rəyi soruşulanların 56 faizini təşkil edir.
Eyni zamanda, respondentlərin qarşısında qaldırılan “Trampa etibar etmək olarmı?” sualına vətəndaşların yalnız 40 faizi müsbət cavab verib, rəyi soruşulanların 60 faizi isə prezidentə inanmadıqlarını qeyd ediblər.
Bununla yanaşı, respondentlərdən Ağ Evə etibar edib-etməmələri də soruşulub. Bu suala isə 24 faiz müsbət, 43 faiz vətəndaş isə mənfi cavab verib.
Xəbər verilir ki, telefon vasitəsilə keçirilən sorğuda ümumilikdə 1018 respondent iştirak edib.


HENRI KISSINCER: İRAN YENIDƏN BÖYÜK IMPERIYA OLA BILƏR
“The Independent” qəzetində dərc olunmuş məqalədə bildirilir ki, keçmiş dövlət katibi Henri Kissincer “İranın yenidən böyük imperiya” ola biləcəyi barədə xəbərdarlıq edib. Bu barədə “BBC” agentliyi məlumat yayıb.
Keçmiş diplomat iddia edir ki, İŞİD məğlub edildikdən sonra Tehran onun ərazilərinə nəzarəti ələ alarsa, nəticədə İran böyük imperiyaya çevriləcək.
Prezident Riçard Niksonun vaxtında dövlət katibi olmuş 94 yaşlı Henri Kissincer ABŞ-ın Yaxın Şərq münaqişələrində kiminsə tərəfini tutmasının təhlükəli ola biləcəyini vurğulayıb.
Henri Kissincer bildirib: “Hazırkı şəraitdə ənənəvi “düşmənimin düşməni mənim dostumdur” düsturu işləmir. Müasir Yaxın Şərqdə “düşməninin düşməni sənin də düşmənin” ola bilər. Yaxın Şərq dünyanı öz ideologiyalarının səbatsızlığı ilə yanaşı, həm də müəyyən hərəkətləri ilə təsirləndirir”.
Keçmiş diplomat məqaləsinə belə davam edir: “Ətraf aləmin İŞİD-lə müharibəsi bunun parlaq nümunəsi ola bilər. Şiə İran və aparıcı sünni dövlətləri də daxil olmaqla, əksər ölkələr İŞİD-in məhv edilməsinin zərurətini qəbul ediblər. Lakin bu təşkilatın itirdiyi ərazini kim nəzarətə götürəcək? Sünni koalisiyası? Yoxsa bu ərazilər İranın təsir dairəsinə düşəcək?”
“Cavab qeyri-müəyyəndir, çünki Rusiya və NATO ölkələri qarşıduran tərəfləri dəstəkləyirlər. Əgər İŞİD ərazisi İnqilab Keşikçiləri və ya onun tərəfindən təlimləndirilmiş şiə qüvvələri tərəfindən zəbt olunarsa, nəticədə Tehrandan Beyrutadək uzanan ərazi qurşağı yaranacaq. Bu isə yeni böyük İran imperiyasının başlanğıcı ola bilər”, - deyə Henri Kissincer vurğulayıb.


AMERIKALI DIPLOMATLAR KÖRFƏZ BÖHRANININ HƏLLINƏ ÇALIŞIR
Küveytin xarici işlər nazirinin müavini Xalid əl Carallah Körfəz böhranını həll etmək üçün ölkədə səfərdə olan amerikalı rəsmilərlə görüşüb. Ölkənin “KUNA” xəbər agentliyinin verdiyi xəbərə görə, Xalid əl Carallah ABŞ-ın dövlət katibinin müavini Timoti Lenderkinq və istefada olan general Entoni Tsinni ilə bir araya gəlib. Bu barədə “TRT” telekanalı məlumat yayıb.
Görüşdə Körfəz böhranının həlli ilə əlaqəli atılan addımlarla yanaşı, iki ölkə arasındakı dostluq əlaqələri, regional və beynəlxalq sahədəki son vəziyyət müzakirə olunub.
Amerikalı diplomatlar görüşdə rəsmi Vaşinqtonun Küveytin davam etdirdiyi vasitəçilik fəaliyyətlərinə dəstəyini vurğulayıblar.
Qeyd edək ki, ABŞ Dövlət Depertamentindən adının açıqlanmasını istəməyən rəsmilərdən biri Qətər və dörd Körfəz ölkəsi arasında yaşanan böhranı həll etmək üçün bölgəyə yüksək səviyyəli iki rəsmi nümayəndəsini göndərdiklərini bildirib.
Yayılan məlumata əsasən, general Tsinni və Lenderkinq tərəflərlə əlaqə saxlamaq və Küveyt hökumətinin vasitəçilik fəaliyyətlərinə dəstək olmaq məqsədilə Körfəz bölgəsində səfərdədirlər.
Qeyd edək ki, Körfəzdəki böhran Səudiyyə Ərəbistanı, Birləşmiş Ərəb Əmirlikləri, Yəmən, Misir və Bəhreynin 5 iyunda Qətərlə bütün diplomatik əlaqələrini kəsdiklərini elan etməsindən sonra baş vermişdi.


ÇININ AÇIQLADIĞI HESABATLAR NEFTI UCUZLAŞDIRDI
Çinin xarici ticarət balansına dair aylıq hesabat neftin qiymətinə mənfi təsir göstərib. “APA”nın məlumatına görə, Çinin dollar ekvivalentində ixrac və idxal göstəriciləri gözlənildiyindən aşağı olub.
Bununla yanaşı, ABŞ-ın neft idxalına dair göstəriciləri də birja iştirakçılarını məmnun etməyib. İyul ayında Birləşmiş Ştatlar gündəlik 8,16 milyon barrel neft idxal edib ki, bu da son yeddi ayda qeydə alınan ən aşağı göstəricidir.
Eyni zamanda, xəbər verilir ki, ABŞ və Liviyada neft hasilatının ən yüksək həddə çatması da qiymətləri təzyiq altında saxlayır.
Hazırda dünya birjalarında “Brent” markalı neftin bir barreli 52,15 dollardan təklif olunur, Qərbi Texas nefti isə 49,13 dollara satılır.
Məlumata görə, iki neft markası arasında fərqin 3 dollara çatması ABŞ-dan qaynaqlanan amillərin qiymətlərə təsirinin azaldığını göstərir.
Bundan başqa, Amerika Neft İnstitutunun ölkənin neft ehtiyatlarının həcminə dair həftəlik hesabatının açıqlanması gözlənilir. Bildirilir ki, proqnoz xarakterli hesabat həftə ərzində qiymətlərin formalaşmasına təsir göstərən əsan amillərdən sayılır.

 

SIBIRDƏ GÜCLÜ MEŞƏ YANĞINLARI TÜĞYAN EDIR
Buryatiyada güclü meşə yanğınları başlayıb. “APA”nın Rusiya mətbuatına istinadən verdiyi xəbərə görə, respublika rəhbərliyi böyük bir ərazidə yanğına qarşı mübarizəyə başlandığını bildirib.
Məlumata görə, regionda fövqəladə vəziyyət elan olunub. Yanğın baş verən bölgəyə girişə qadağa qoyulub.
Eyni zamanda, bildirilir ki, ərazidəki istirahət mərkəzlərindən turistlər təxliyə edilib, sanatoriyaların fəaliyyəti dayandırılıb. Həmçinin qaydalara riayət etməyənləri cərimələr gözləyir.
Xəbər verilir ki, yanğın gecə saatlarından bu yana böyük bir ərazidə genişlənib. Yanğınla mübarizəyə minə qədər yanğınsöndürən cəlb edilib.
Xatırladaq ki, Rusiya prezidenti Vladimir Putin məzuniyyətini sözügedən bölgədə keçirib. Son günlər onun istirahətini necə keçirməsi ilə bağlı ölkə mətbuatında reportajlar və fotolar yayımlanıb.

Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq, “Dövlət qulluğu haqqında” Azərbaycan Respublikasının Qanununda dəyişiklik edilməsi barədə” Azərbaycan Respublikasının 2017-ci il 30 iyun tarixli 764-VQD nömrəli Qanununun tətbiqi ilə əlaqədar qərara alıram:

“Dövlət qulluqçularının əməkhaqlarının artırılması haqqında” Azərbaycan Respublikası Prezidentinin 2008-ci il 9 iyul tarixli 2934 nömrəli Sərəncamına (Azərbaycan Respublikasının Qanunvericilik Toplusu, 2008, N 7, maddə 645, N 8, maddələr 723, 731; 2009, N 6, maddələr 419, 421, N 12, maddə 1029; 2010, N 2, maddə 80, N 3, maddə 183, N 10, maddə 850; 2013, N 12, maddə 1556; 2014, N 11, maddə 1414; 2016, N 5, maddə 907, N 6, maddə 1172; 2017, N 1, maddə 82, N 5, maddə 858) Əlavə 3 - “Azərbaycan Respublikasında dövlət qulluqçularının aylıq vəzifə maaşları”nda aşağıdakı dəyişikliklər edilsin:

1. “İnzibati vəzifələrin təsnifatı üzrə:” hissəsinin “Yeddinci təsnifat” bəndinə “Yerli icra hakimiyyəti başçılarının inzibati ərazi dairələri üzrə nümayəndəliklərində:” yarımbəndindən əvvəl aşağıdakı məzmunda yarımbənd əlavə edilsin:

2. “Yardımçı vəzifələrin təsnifatı üzrə:” hissəsinin “Dördüncü təsnifat” bəndinin birinci abzasına üçüncü halda “bölmələrində,” sözündən sonra “yerli icra hakimiyyəti başçısının yanında olan orqanlarda,” sözləri əlavə edilsin.

İlham ƏLİYEV,

Azərbaycan Respublikasının Prezidenti.

Bakı şəhəri, 5 avqust 2017-ci il.

Azərbaycan Respublikası Konstitusiyasının 109-cu maddəsinin 17-ci bəndini rəhbər tutaraq qərara alıram:

1. Azərbaycan Respublikasının Mədəniyyət və Turizm Nazirliyi ilə Kolumbiya Respublikasının Mədəniyyət Nazirliyi arasında mədəniyyət sahəsində əməkdaşlığa dair 2017-ci il mayın 30-da Boqota şəhərində imzalanmış Saziş təsdiq edilsin.

2. Bu Fərmanın 1-ci hissəsində göstərilən Saziş qüvvəyə mindikdən sonra Azərbaycan Respublikasının Mədəniyyət və Turizm Nazirliyi onun müddəalarının həyata keçirilməsini təmin etsin.

3. Azərbaycan Respublikasının Xarici İşlər Nazirliyi Sazişin qüvvəyə minməsi üçün zəruri olan dövlətdaxili prosedurların yerinə yetirildiyi barədə Kolumbiya Respublikası Hökumətinə bildiriş göndərsin.

İlham ƏLİYEV,

Azərbaycan Respublikasının Prezidenti.

Bakı şəhəri, 7 avqust 2017-ci il.

Azərbaycan Respublikası Konstitusiyasının 109-cu maddəsinin 17-ci bəndini rəhbər tutaraq qərara alıram:

1. Azərbaycan Respublikasının Ədliyyə Nazirliyi ilə Əlcəzair Xalq Demokratik Respublikasının Ədliyyə Nazirliyi arasında 2017-ci il aprelin 16-da Əlcəzair şəhərində imzalanmış əməkdaşlıq haqqında Anlaşma Memorandumu təsdiq edilsin.

2. Bu Fərmanın 1-ci hissəsində göstərilən Anlaşma Memorandumu qüvvəyə mindikdən sonra Azərbaycan Respublikasının Ədliyyə Nazirliyi onun müddəalarının həyata keçirilməsini təmin etsin.

3. Azərbaycan Respublikasının Xarici İşlər Nazirliyi Anlaşma Memorandumunun qüvvəyə minməsi üçün zəruri olan dövlətdaxili prosedurların yerinə yetirildiyi barədə Əlcəzair Xalq Demokratik Respublikası Hökumətinə bildiriş göndərsin.

İlham ƏLİYEV,

Azərbaycan Respublikasının Prezidenti.

Bakı şəhəri, 7 avqust 2017-ci il.

Azərbaycan Respublikası Konstitusiyasının 109-cu maddəsinin 19-cu bəndini rəhbər tutaraq, “İcra haqqında” Azərbaycan Respublikasının Qanununda dəyişikliklər edilməsi barədə” Azərbaycan Respublikasının 2017-ci il 30 iyun tarixli 762-VQD nömrəli Qanununun qüvvəyə minməsi ilə əlaqədar həmin Qanunun tətbiqini təmin etmək məqsədi ilə qərara alıram:

1. Azərbaycan Respublikasının Nazirlər Kabineti:

1.1. Azərbaycan Respublikası qanunlarının və Azərbaycan Respublikası Prezidentinin aktlarının “İcra haqqında” Azərbaycan Respublikasının Qanununda dəyişikliklər edilməsi barədə” Azərbaycan Respublikasının Qanununa uyğunlaşdırılması ilə bağlı təkliflərini üç ay müddətində hazırlayıb Azərbaycan Respublikasının Prezidentinə təqdim etsin;

1.2. Azərbaycan Respublikası Nazirlər Kabinetinin normativ hüquqi aktlarının həmin Qanuna uyğunlaşdırılmasını üç ay müddətində təmin edib Azərbaycan Respublikasının Prezidentinə məlumat versin;

1.3. mərkəzi icra hakimiyyəti orqanlarının normativ hüquqi aktlarının həmin Qanuna uyğunlaşdırılmasını nəzarətdə saxlasın və bunun icrası barədə beş ay müddətində Azərbaycan Respublikasının Prezidentinə məlumat versin;

1.4. həmin Qanundan irəli gələn digər məsələləri həll etsin.

2. Azərbaycan Respublikasının Ədliyyə Nazirliyi mərkəzi icra hakimiyyəti orqanlarının normativ hüquqi aktlarının və normativ xarakterli aktların “İcra haqqında” Azərbaycan Respublikasının Qanununda dəyişikliklər edilməsi barədə” Azərbaycan Respublikasının Qanununa uyğunlaşdırılmasını təmin edib Azərbaycan Respublikasının Nazirlər Kabinetinə məlumat versin.

İlham ƏLİYEV,

Azərbaycan Respublikasının Prezidenti.

Bakı şəhəri, 7 avqust 2017-ci il.

5 -dən səhifə 1272