XƏBƏR LENTİ

Xəbər verdiyimiz kimi, martın 14-də Fransa Respublikasının Prezidenti Fransua Ollandın adından Azərbaycan Respublikasının Prezidenti İlham Əliyevin və birinci xanım Mehriban Əliyevanın şərəfinə şam yeməyi verilib.

Dövlət başçıları şam yeməyində çıxış etdilər.

 

Prezident Fransua Ollandın çıxışı

- Cənab Prezident.

Cənab nazirlər.

Hörmətli deputatlar.

Hörmətli xanımlar və cənablar.

Mən Sizi ölkələrimiz arasında diplomatik münasibətlərin qurulmasının 25 illiyini qeyd etdiyimiz bir dönəmdə qarşılayıram. Fransa 1992-ci il yanvarın 3-də Azərbaycanın müstəqilliyini tanımışdır. Beləliklə, həqiqətən də Fransa Azərbaycanın müstəqilliyini tanıyan ilk dövlətlərdən biri olmuşdur. Əslində mən “bərpa olunmuş müstəqilliyini” sözlərini söyləməli idim. Çünki 1918-ci il mayın 28-dən 1920-ci ilin aprelinə kimi artıq Azərbaycan Demokratik Respublikası mövcud olmuşdur və onun yaranması tarixi hər il Azərbaycanın milli günü kimi qeyd olunur. Biz bir neçə gün əvvəl Beynəlxalq Qadınlar Gününü qeyd etdiyimizə görə onu da xatırlatmaq istərdim ki, Azərbaycan Demokratik Respublikası dünyada qadınlara səsvermə hüququnu verən ilk ölkələrdən olmuşdur.

Əslində xalqlarımız arasındakı əlaqələrin tarixi 25 illik diplomatik münasibətlərdən daha qədimdir. Bizim ölkələri birinci növbədə ticarət əlaqələri yaxınlaşdırmışdır. Bu əlaqələrin ilk izlərinə IX və X əsrlərdən başlayaraq Azərbaycandan keçən tarixi İpək Yolunda rast gəlmək olar. XIII əsrdən isə bu yolu fransız səyyahları da keçməyə başlamışlar.

Daha sonra Fransanın qədim tarixə malik olan şərqşünaslıq ənənəsi bizi mədəniyyət sahəsində də yaxınlaşdırmışdır. Bartelemi Derblo 1700-cü ildə işıq üzü görmüş məşhur “Şərq kitabxanası” əsərində sizin ədəbiyyatınızı ilk dəfə olaraq ölkəmizə tanıtmışdır. Amma ölkənizi fransızlara ən çox tanıdan 1858-1859-cu illərdə Qafqaza səfər etmiş və öz əsərində Bakını təsvir edən Aleksandr Düma olmuşdur.

Artıq o vaxtdan ölkələrimiz arasında möhkəm əlaqələr qurulmuşdur və mən münasibətlərimizin istisnasız hər bir mövzuya toxunmağa imkan verən səmimiliyini və açıqlığını çox qiymətləndirirəm.

Cənab Prezident, Sizin ölkənizin əməkdaşlıq əlaqələrini şaxələndirmək, müstəqilliyini möhkəmləndirmək kimi böyük bir məqsədiniz var. Biz Azərbaycan və Avropa İttifaqı arasında yeni müqavilə perspektivini məhz bunu düşünərək dəstəklədik. Mən şadam ki, bununla bağlı danışıqlar artıq bir ay əvvəl Brüsseldə Sizin iştirakınızla başlamışdır. Arzu edirəm ki, bu danışıqlar tez bir zamanda uğurla nəticələnsin. Fransa karbohidrogenlər sahəsində sizin əsas müştərilərinizdən biridir. Bu baxımdan mən Total və SOCAR arasında Abşeron neft yataqlarının istismarı üzrə uzun illərdən bəri davam edən əməkdaşlığı alqışlayıram.  

Cənab Prezident, hörmətli birinci xanım. Fransanın bir çox şirkətləri Sizin ölkənin nəqliyyat, turizm, ekologiya, təhlükəsizlik, şəhərsalma və kənd təsərrüfatı sahələrində öz təcrübələri və bacarıqları ilə bölüşməyə hazırdırlar. Bildiyimə görə, Fransaya səfəriniz çərçivəsində Siz onların bir çoxu ilə artıq görüşmüsünüz və Sizin iştirakınızla bir çox müqavilələr imzalanmışdır.

Cənab Prezident, mən Sizin ölkənizə səfər etmişəm. Biz 2016-cı ilin sentyabr ayında açılan Azərbaycan-Fransız Universitetinin uğurundan qürur hissi duyuruq. Universitetin artıq 150 tələbəsi var. Mən Sizə bu layihənin reallaşmasına verdiyiniz şəxsi dəstəyinizə görə təşəkkür etmək istərdim. Bu, təhsilə və ölkənizdə 50 minə yaxın şagirdə tədris edilən və 3-cü xarici dil olan fransız dilinin geniş yayılmasına Sizin verdiyiniz əhəmiyyəti bir daha göstərir.

Mən, həmçinin Fransanın və Azərbaycanın regionları arasında sayı get-gedə artan əməkdaşlıq proqramlarında iştirak edən rayon icra başçılarını və deputatları da alqışlamaq istərdim.         

Mən nitqimi sülhün və sabitliyin vacibliyini qeyd edərək bitirmək istərdim. Dağlıq Qarabağ münaqişəsinin həlli yollarının tapılmasında irəliləmək vaxtı çoxdan çatmışdır. Danışıqlar artıq 23 ildir ki, davam edir və tərəflər heç bir həlledici nəticəyə gəlməmişlər. Status-kvodan pis bir şey yoxdur. 2016-cı ilin aprelində və bir neçə həftə bundan əvvəl baş verən toqquşmalar aydın göstərir ki, bu münaqişə heç vaxt tam dayanmamışdır.

Siz Fransanın ATƏT-in Minsk qrupunun rusiyalı və amerikalı həmsədrləri ilə birlikdə çıxış yolunun tapılmasına nə qədər səy göstərdiyini bilirsiniz. Bir neçə gün əvvəl Parisə səfər edən prezident Sarkisyana söylədiyim kimi, mən bunu Sizin qarşınızda da təkrar edirəm: Bu münaqişə hərbi yolla həll edilə bilməz. Belə ki, Amerika və Rusiya ilə birlikdə Fransa öz vasitəçilik səylərini yorulmadan davam etdirəcək. Bu səylər hərbi yola əl atmamaq, dövlətlərin ərazi bütövlüyünün qorunması və öz müqəddəratını təyin etmə prinsiplərinə əsaslanır. Fransa bu çərçivədə hər bir təşəbbüs göstərməyə hazırdır.

Cənab Prezident, Sizin Parisə bu səfəriniz bizim üçün uzunmüddətli münasibətlərimizdə yeni bir mərhələnin başlanğıcıdır. Fransa Azərbaycan üçün hər zaman mübadilələrimizi, xüsusilə də insan hüquqları sahəsində mübadilələri artırmaq, regionda təhlükəsiz və sabit bir gələcəyin olması naminə birgə işləmək istəyən açıq və səmimi bir tərəfdaş olaraq qalacaqdır.

 

Prezident İlham Əliyevin çıxışı

- Hörmətli cənab Prezident.

Xanımlar və cənablar.

Cənab Prezident, ilk növbədə məni Fransaya rəsmi səfərə dəvət etdiyinizə, eləcə də səfər zamanı mənə və nümayəndə heyətinə göstərdiyiniz qonaqpərvərliyə görə Sizə minnətdarlığımı bildirirəm.

Məmnunluqla qeyd etmək istəyirəm ki, Azərbaycan ilə Fransa arasında siyasi əlaqələr yüksək səviyyədədir. Qarşılıqlı səfərlərimiz artıq ənənəyə çevrilmişdir. Mən Azərbaycan Respublikasının Prezidenti kimi Fransada dəfələrlə səfərdə olmuşam. Siz, cənab Prezident, iki dəfə Bakıda səfərdə olmusunuz. Qarşılıqlı səfərlər onu göstərir ki, Fransa-Azərbaycan əlaqələri yüksək səviyyədədir. Aramızda çox fəal siyasi dialoq aparılır. Fransa Respublikasına bugünkü səfərimizin diplomatik münasibətlərimizin qurulmasının 25 illiyinə təsadüf etməsindən olduqca məmnunam.

Fransa regionun ən ağrılı problemi olan Ermənistan-Azərbaycan, Dağlıq Qarabağ münaqişəsinin həlli üzrə ATƏT-in Minsk qrupunun həmsədridir. Ermənistanın hərbi təcavüzü nəticəsində Azərbaycan ərazisinin 20 faizi - tarixi torpaqlarımız olan Dağlıq Qarabağ və ətrafdakı 7 rayon işğal edilmiş, etnik təmizləmə siyasəti aparılmış və bir milyondan çox soydaşımız qaçqın və məcburi köçkün vəziyyətinə düşmüşdür. Münaqişə ilə bağlı BMT Təhlükəsizlik Şurasının dörd qətnaməsi, BMT Baş Məclisi, ATƏT, NATO, Avropa Parlamenti, Avropa Şurasının Parlament Assambleyası,  Qoşulmama Hərəkatı, İslam Əməkdaşlıq Təşkilatı və digər nüfuzlu beynəlxalq təşkilatların müvafiq qərar və qətnamələri vardır. Bu münaqişə ancaq beynəlxalq hüququn normalarına uyğun və Azərbaycanın ərazi bütövlüyü çərçivəsində həll olunmalıdır. Status-kvo qəbuledilməzdir. Fransa digər həmsədrlər kimi, bu barədə dəfələrlə bəyanatlar vermişdir. Təəssüflər olsun ki, Ermənistan buna məhəl qoymur və öz işğalçı siyasətindən əl çəkmir. Dağlıq Qarabağ əzəli və tarixi Azərbaycan torpağıdır. Ölkəmizin ərazi bütövlüyü danışıqlar mövzusu ola bilməz.

Azərbaycan ilə Fransa arasında iqtisadi əlaqələr sürətlə inkişaf edir. Fransa şirkətləri bu günədək Azərbaycanda energetika, aviasiya, kosmik sənaye, nəqliyyat, su təchizatı, kənd təsərrüfatı və digər sahələrdə təxminən iki milyard ABŞ dolları dəyərində 27 layihədə podratçı kimi iştirak etmişlər. Enerji sahəsində əməkdaşlıq iqtisadi münasibətlərimizin əsas istiqamətlərindən biridir. Fransa şirkətləri Azərbaycanın neft-qaz sektorunda həyata keçirilən layihələrdə iştirak edirlər. Azərbaycanın təşəbbüsü ilə uğurla icra edilən “Cənub Qaz Dəhlizi” layihəsi Avropanın enerji təhlükəsizliyinin təmin edilməsi üçün böyük əhəmiyyət kəsb edir.

Humanitar sahədə də əməkdaşlığımız çox genişdir. Fransız dili uzun illərdir Azərbaycanda tədris olunur. Azərbaycanın 338 məktəbində 50 minə yaxın şagird fransız dilini öyrənir. Azərbaycanın yeddi ali təhsil müəssisəsində fransız dili tədris edilir. Bakı Slavyan Universitetində Viktor Hüqo adına Fransız Dili və Ədəbiyyatı Mərkəzi, Azərbaycan Dillər Universitetində Fransa Mərkəzi yaradılmışdır. üç il əvvəl biz Bakı Fransız Liseyini yaratdıq.  Cənab Prezident, Sizinlə bu liseyin açılışında iştirak etmişik. Ötən il isə Azərbaycan-Fransız Universiteti fəaliyyətə başladı. Artıq bir neçə ildir ki, Fransada da Azərbaycan dili tədris olunmağa başlayıb. Eyni zamanda, mədəniyyət sahəsində də uğurlu əməkdaşlıq aparılır.

Fransa ilə Azərbaycanın regionları arasında da əməkdaşlıq inkişaf edir. Azərbaycanın 14 şəhəri ilə Fransanın 12 şəhəri və 1 vilayəti arasında müvafiq sənədlər imzalanmışdır.

Hörmətli cənab Prezident, dəvətə və göstərdiyiniz yüksək qonaqpərvərliyə görə bir daha minnətdarlığımı bildirir, Sizə cansağlığı, ölkənizə və xalqınıza daim inkişaf və tərəqqi arzulayıram. 

 

 

 

 

Səfər başa çatıb

Azərbaycan Respublikasının Prezidenti İlham Əliyevin Fransa Respublikasına rəsmi səfəri martın 15-də başa çatıb.

AZƏRTAC-ın xüsusi müxbiri xəbər verir ki, Azərbaycanın və Fransanın dövlət bayraqlarının dalğalandığı Parisin Orli Beynəlxalq hava limanında dövlətimizin başçısının şərəfinə fəxri qarovul dəstəsi düzülmüşdü.

Azərbaycan Prezidenti İlham Əliyevi və birinci xanım Mehriban Əliyevanı Fransanın yüksək vəzifəli rəsmi şəxsləri yola saldılar.

 

AZƏRTAC

Azərbaycan Respublikasının Prezidenti İlham Əliyev martın 15-də Nizami Gəncəvi Beynəlxalq Mərkəzinin həmsədrləri - Latviyanın sabiq Prezidenti Vayra Vike-Freyberqa və İsgəndəriyyə Kitabxanasının direktoru İsmail Serageldinin rəhbərlik etdikləri, Serbiyanın sabiq Prezidenti Boris Tadiçin, Bolqarıstanın sabiq Prezidenti Petar Stoyanovun, Xorvatiyanın sabiq Prezidenti İvo Yosipoviçin, Rumıniyanın sabiq Prezidenti Emil Konstantineskunun, Bosniya və Herseqovinanın sabiq Baş naziri Zlatko Laqumdciyanın, Ərəb Liqasının sabiq baş katibi Əmr Musanın və UNESCO-nun xoşməramlı səfiri Marianna Vardinoyannisin daxil olduqları Nizami Gəncəvi Beynəlxalq Mərkəzinin İdarə Heyətinin nümayəndə heyətini qəbul edib.

AZƏRTAC xəbər verir ki, qonaqları salamlayan Prezident İlham Əliyev mühüm beynəlxalq tədbir - V Qlobal Bakı Forumunda iştirak etmək üçün ölkəmizə gəldiklərinə görə onlara təşəkkürünü bildirdi. Dövlətimizin başçısı vurğuladı ki, Azərbaycan artıq beşinci dəfədir bu Foruma ev sahibliyi edəcək. Prezident İlham Əliyev bu mötəbər tədbirin müzakirələr üçün maraqlı gündəliyinin olduğunu dedi. Forum iştirakçıları arasında çox tanınmış şəxslərin olduğunu və həmin şəxslərin sayının ildən-ilə artdığını deyən dövlətimizin başçısı Nizami Gəncəvi Beynəlxalq Mərkəzinin fəaliyyətini yüksək qiymətləndirdi.

Nümayəndə heyətinə göstərilən diqqətə görə Prezident İlham Əliyevə təşəkkürünü çatdıran Nizami Gəncəvi Beynəlxalq Mərkəzinin həmsədri, Latviyanın sabiq Prezidenti Vayra Vike-Freyberqa qeyd etdi ki, əsası beş il əvvəl qoyulan Bakı Forumu böyük uğurlar qazanıb. Qonaq dedi ki, Azərbaycan dövlətinin başçısının qeyd etdiyi kimi, Bakı Forumuna maraq ildən-ilə artır. O, Nizami Gəncəvi Beynəlxalq Mərkəzinin fəaliyyətini dəstəklədiyinə görə dövlətimizin başçısına təşəkkürlərini çatdırdı. “Biz Nizami Gəncəvinin və Azərbaycanın dostlarıyıq, işimizi həvəslə görürük”, - deyən Vayra Vike-Freyberqa bundan sonra da səylərini əsirgəməyəcəklərini söylədi. Mərkəzin həmsədri dünyanın müxtəlif ölkələrini təmsil edən nüfuzlu qonaqların burada iştirak etdiklərini və Forumun səmərəli dialoqa hərtərəfli imkan yaradacağını vurğuladı.

Prezident İlham Əliyev Nizami Gəncəvi Beynəlxalq Mərkəzinin nümayəndə heyətinin səyləri və təşəbbüslərini yüksək qiymətləndirdi, onların fəaliyyətinin Qlobal Bakı Forumu kimi geniş beynəlxalq toplantının keçirilməsinə imkan yaratdığını qeyd etdi.

Görüşdə əməkdaşlığın perspektivləri ətrafında fikir mübadiləsi aparıldı.

 

 

AZƏRTAC

Hörmətli konfrans iştirakçıları!

Sizi - “İslam həmrəyliyi - zamanın çağırışı” mövzusunda Bakıda keçirilən Beynəlxalq konfransın iştirakçılarını səmimi qəlbdən salamlayır, ən xoş arzu və diləklərimi yetirirəm.

Avropa ilə Asiyanın qovuşuğunda yerləşən qədim Azərbaycan torpağında müxtəlif dinlərə, ayrı-ayrı mədəniyyətlərə mənsub insanlar tarix boyu əmin-amanlıq şəraitində yaşamışdır. Azərbaycan xalqı bu gün də özünün dərin tarixi köklərə malik zəngin tolerantlıq və multikulturalizm ənənələrini qoruyur, sivilizasiyalararası dialoqa, islamdaxili və konfessiyalararası həmrəyliyə öz töhfələrini verir. Buna görə də zamanın çağırışlarına səs verən İslam həmrəyliyinə həsr olunmuş konfransın keçirilmə məkanının dəqiq seçilməsi şübhəsizdir.

Məmnuniyyət hissi ilə qeyd etmək istəyirəm ki, 2016-cı il ölkəmizdə “Multikulturalizm İli” elan olunduqdan sonra xalqımız öz tarixi mənəvi ənənələrinə sadiqliyini böyük coşqunluqla bir daha  nümayiş etdirdi. Bu münasibətlə Azərbaycanda və xaricdə bir sıra əhəmiyyətli və faydalı tədbirlər keçirildi. Dünyada multikulturalizmin Azərbaycan modelinə xüsusi maraq və diqqət yarandı. Bütün bunlar ona gətirdi ki, ötən ilin məntiqi davamı olaraq 2017-ci il Azərbaycanda “İslam Həmrəyliyi İli” elan edildi.

Müasir dünyamızda İslam həmrəyliyinin vacibliyi ilk olaraq İslam daxilindəki həmahəngliyin bərqərar edilməsində özünü göstərir. Bu, müxtəlif məzhəblər arasında dini anlaşılmazlıqların elmi müstəvidə aradan qaldırılması, bütün İslam ölkələri arasında qarşılıqlı hörmət və etibara əsaslanan münasibətlərin qurulmasıdır. Bununla yanaşı, İslam həmrəyliyi dedikdə, həmçinin İslam ilə digər dinlər arasında harmoniyanın yaranması da nəzərdə tutulur. Buna nail olmaq, əslində, dünya dinləri arasında ahəngdar və bir-birinə inamlı münasibətin daha da möhkəmlənməsinə, İslam ölkələri ilə digər ölkələr arasında bəşəri dəyərlərə əsaslanan xoş münasibətlərin inkişafına nail olmaq deməkdir. Bunun üçün çox işlər görmək, real addımlar atmaq lazımdır. Sizin konfransınız Azərbaycanda İslam həmrəyliyi ilə əlaqədar bu istiqamətdə görüləcək işlərin artıq başlanmasına ciddi bir işarədir. Bu gün İslama və digər konfessiyalara mənsub görkəmli alimlərin və din xadimlərinin dinlərarası mühüm aktual məsələləri belə yüksək səviyyədə müzakirə etmələri özünün müstəsna elmi-dini əhəmiyyəti ilə yanaşı, müsəlman dövlətləri və xalqları, eyni zamanda, dünya dövlətləri və xalqları arasında qardaşlıq və əməkdaşlıq əlaqələrinin genişləndirilməsinə xidmət etməlidir. Ümidvaram ki, konfrans nəinki İslam aləmində, bütün dünyada həmrəylik və dostluğun daha da möhkəmlənməsi işinə öz layiqli töhfəsini verəcəkdir.

Bu nəcib fəaliyyətinizdə bir olan uca Allahdan Sizə könül xoşluğu, cansağlığı və konfransınızın işinə uğurlar arzulayıram.

İlham ƏLİYEV,

Azərbaycan Respublikasının

Prezidenti.

Bakı şəhəri, 15 mart 2017-ci il.

 

 

 

Hörmətli konfrans iştirakçıları!

Sizi səmimi qəlbdən salamlayır və konfransınızın işinə uğurlar arzu edirəm.

Dünyanın 40-a yaxın ölkəsindən, beynəlxalq təşkilatlardan və işgüzar dairələrdən nümayəndələrin qatılması bu mötəbər tədbirinizə diqqət və marağın yüksək olduğunu göstərir. Konfransınız Azərbaycan xalqının qədim ənənələrə malik milli bayramı olan və UNESCO-nun qeyri-maddi mədəni irs siyahısına daxil edilmiş Novruz bayramı ərəfəsinə təsadüf edir. Bu isə tədbirinizdə iştirak etmək üçün ölkəmizə gələn qonaqların Azərbaycanın milli mədəniyyət nümunələri ilə yaxından tanış olmasına imkan yaradacaqdır.

Cari ildə dünyanın nadir su təchizatı qurğularından sayılan “Şollar-Bakı Su Qurğuları Kompleksi”nin istismara verilməsinin 100 illiyi tamam olur. Kəmər Bakı şəhəri və Abşeron yarımadasını içməli su ilə təmin edən ilk iri infrastruktur layihəsi olaraq ötən dövr ərzində əhalinin həyatının yaxşılaşdırılmasına xidmət göstərmişdir. “Şollar-Bakı Su Qurğuları Kompleksi”nə daxil olan hidrotexniki qurğuların xüsusiyyətləri bu gün də mütəxəssislər tərəfindən öyrənilməkdədir. Bu baxımdan iştirakçısı olduğunuz konfransda su resursları və sudan səmərəli istifadə, içməli su təchizatı, tullantı sularının idarə edilməsi, iqlim dəyişiklikləri və ətraf mühit mövzularının müzakirə obyektinə çevrilməsi təqdirəlayiqdir.

İnanıram ki, konfrans çərçivəsində tanınmış alimlərin, mütəxəssislərin, su ilə əlaqəli beynəlxalq təşkilatların qaldırdığı məsələlərlə bağlı aparılacaq müzakirələr bu sahədə mövcud problemlərin öyrənilməsi və onların həlli yollarının müəyyənləşdirilməsi baxımından səmərəli olacaq, təcrübə mübadiləsi və perspektiv əməkdaşlığın genişləndirilməsinə öz töhfəsini verəcəkdir.

İlham ƏLİYEV,

Azərbaycan Respublikasının Prezidenti.

Bakı şəhəri, 14 mart 2017-ci il.

 

 

 

Xanım Mehriban Əliyevanın Azərbaycan Respublikasının Birinci vitse-prezidenti təyin olunması münasibətilə bir sıra ölkələrin dövlət rəsmiləri, ictimai-siyasi xadimlər, beynəlxalq təşkilatların təmsilçiləri tərəfindən təbriklər gəlməkdə davam edir.

AZƏRTAC xəbər verir ki, Azərbaycanın Birinci vitse-prezidenti xanım Mehriban Əliyevanı Rusiya Federasiyasının Xarici Kəşfiyyat Xidmətinin direktoru Sergey Narışkin təbrik edib.

Həmçinin xanım Mehriban Əliyevanı Azərbaycanın Birinci vitse-prezidenti təyin olunması münasibətilə təbrik edənlər arasında Milli Məclisin deputatı, Azərbaycan Sosial-Demokrat Partiyasının sədri Araz Əlizadə də var.

Azərbaycanın Xalq Artisti Amaliya Pənahova da Mehriban Əliyevanı Azərbaycanın Birinci vitse-prezidenti təyin olunması münasibətilə təbrik edib.

Xanım Mehriban Əliyevaya Azərbaycanın Birinci vitse-prezidenti təyin olunması münasibətilə “ARB Media Qrup”un İdarə Heyətinin sədri İsmət Səttarov da təbrik məktubu ünvanlayıb.

Azərbaycanın Birinci vitse-prezidenti təyin olunması münasibətilə xanım Mehriban Əliyevanın ünvanına təbriklər gəlməkdə davam edir.

 

 

 

AZƏRTAC

 

 

 

Ukraynanın Versii.com saytında həmvətənimiz, hüquq elmləri doktoru, Ukrayna Milli Aviasiya Universitetinin beynəlxalq hüquq kafedrasının professoru Arif Quliyevin və sosial kommunikasiyalar ixtisası üzrə elmlər namizədi Veronika Çekalyukun “Zərif və zabitəli birinci xanım Mehriban Əliyeva ərinin uğurlarının güzgüsüdür” sərlövhəli məqaləsi dərc edilib.

Müəlliflər məqalənin əvvəlində qeyd edirlər ki, bu materialın yazılmasına Azərbaycanın birinci xanımı Mehriban Əliyevanın respublikanın Birinci vitse-prezidenti təyin edilməsi səbəb olub. Azərbaycanın birinci xanımının imici imicologiya və diplomatiya üzrə tədris vəsaitləri üçün nümunədir. Onun qüsursuz reputasiyaya əsaslanan imici son dərəcə diqqətlə və təbii şəkildə yaranıb. Mehriban xanım doğulduğu gündən sanki bilirdi: ölkənin mənafelərinə xidmət etmək, bu ölkənin siması, diplomat və birinci xanım olmaq onun alın yazısıdır.

Məqalədə vurğulanır ki, kütləvi informasiya vasitələri Azərbaycanın birinci xanımını enerjili, savadlı, özünə güvənən və vətənpərvər bir qadın, həyat yoldaşı, ana və cavan nənə kimi təqdim edirlər. O, bunların hamısına macal tapır, şəxsi nümunəsi ilə Azərbaycanın bütün qadınlarına göstərir ki, eyni vaxtda həm qadın, həm sədaqətli həyat yoldaşı, həm ictimai xadim, həm də ibrət götürüləsi nümunə olmaq mümkündür. Bu gün birinci ledinin reytinqi çox yüksəkdir və artmaqda davam edir. Mehriban xanım Əliyevanın nüfuzu və təsiri yenilməzdir.

Müəlliflər bir məqama diqqəti cəlb edirlər ki, birinci xanım ölkənin liderinin həyat yoldaşı olmaqla bərabər, müəyyən şəraitdə dövlətin siyasi həyatında aparıcı yerlərdən birini inamla tuta, başqaları üçün nümunə, qadın gözəlliyinin etalonu, müdrik rəhbər ola bilər. Bu statusa uyğunluq birinci ledinin özünün arzusundan, onun istəklərindən, zəkasından, zövqündən və qəribə də olsa, peşəkarlar komandasından asılıdır. İmicmeykerlər çox vaxt birinci ledinin lazımlı imicini yaratmaq üçün dünyanın məşhur qadınları tərəfindən uğurla sınaqdan keçirilmiş keyfiyyətlərin sintezini təklif edirlər. Azərbaycanın birinci xanımının imicini təqlid edilməyə layiq nümunə saymaq olar: o, incə zövqlü və müdrikdir, bir neçə Avropa dilini sərbəst bilir, həmişə qüsursuz görünür. Bir sözlə, dünyanın bütün qadınları üçün gözəllik etalonudur. Birinci xanım çalışqan və əməksevər, dəqiq və təmkinlidir.

Məqalə müəllifləri sonra yazırlar: “Birinci xanım xeyirxahlıq və mənəviyyat, möhtəşəmlik və geniş ürəklilik ab-havası, xüsusi ovqat yaradır. Şübhəsiz, siyasətçi qadının imici özünə inam, təmkinlilik, cəlbedici zahiri görkəm, lazımi dərəcədə fəallıq və gümrahlıq, təşəbbüskarlıq, nikbinlik, yeri gələndə qətiyyətlilik, əzmkarlıq kimi keyfiyyətlərə malik olmalıdır.

Birinci xanımın imici prezidentin ambisiyalarının təzahürü, onun ağlının və zövqünün, istedadının və digər üstünlüklərinin göstəricisidir. Azərbaycanın birinci xanımının ampluası bu fikirləri təsdiqləyir”.

 

 

AZƏRTAC

Xəbər verdiyimiz kimi, martın 14-də Parisdə Azərbaycan Respublikasının Prezidenti İlham Əliyevə dəstək mitinqi keçirilib. Azərbaycan-Fransa parlamentlərarası işçi qrupunun üzvü, deputat Cavanşir Feyziyev AZƏRTAC-a bildirib ki, mitinq iştirakçıları Prezident İlham Əliyevin Fransaya rəsmi səfəri ilə bağlı bu ölkədə yaşayan Azərbaycan icması adından bəyanatla çıxış ediblər.

Bəyanatda deyilir : “Biz, Fransada yaşayan Azərbaycan icması 2017-ci il martın 13-14-də Azərbaycan Respublikası Prezidenti İlham Əliyevin bu ölkəyə rəsmi səfərini dəstəkləyirik.

Azərbaycan Respublikası müstəqilliyini bərpa etdikdən sonra ölkələrimiz arasında ikitərəfli əlaqələr çox yüksək səviyyəyə çatıb. Dövlət başçılarının qarşılıqlı səfərləri, hökumətlər və parlamentlər arasında sıx münasibətlərin qurulması, siyasi, iqtisadi və mədəni əlaqələrin inkişafı ölkələrimizin əməkdaşlıq coğrafiyasını genişləndirir ki, bu da qarşılıqlı əlaqələrin getdikcə möhkəmləndiyinin göstəricisidir.

Fransa Azərbaycanın müstəqilliyini tanıyan ilk dövlətlərdən biridir. Bu il Fransa ilə Azərbaycan arasında diplomatik əlaqələr qurulmasının 25 illik yubileyi hər iki ölkədə qeyd olunur.

Eyni zamanda, Dağlıq Qarabağ münaqişəsinin bu günə qədər öz həllini tapmadığını qeyd etmək olduqca vacibdir. Bu münaqişə nəticəsində Azərbaycan ərazilərinin 20 faizini təşkil edən Dağlıq Qarabağ bölgəsi və onun ətrafındakı 7 rayonun işğalı, bu ərazilərdən azərbaycanlı əhalinin doğma torpaqlarından silah gücünə didərgin salınması ilə nəticələnib. Bu gün əhalisinin 1 milyondan çoxu qaçqın və məcburi köçkün olan Azərbaycan uzun illərdir ki, müharibə şəraitində yaşayır. 

Azərbaycanın Dağlıq Qarabağ bölgəsində Ermənistanın etnik təmizləmə siyasətinin kulminasiya nöqtəsi bir neçə gün əvvəl 25 illik anım tarixini qeyd etdiyimiz, 1992-ci il fevralın 25-dən 26-na keçən gecə törədilmiş Xocalı soyqırımı olub. Xocalı soyqırımına şəxsən rəhbərlik etmiş, Ermənistanın bugünkü prezidenti Serj Sarkisyan bu soyqırımını beynəlxalq mətbuata verdiyi müsahibələrdə dəfələrlə etiraf edib.

BMT Təhlükəsizlik Şurasının 822 (1993), 853 (1993), 874 (1993), 884 (1993) saylı və BMT Baş Məclisinin 62/243 (2008) saylı qətnamələri münaqişənin həlli üçün hüquqi əsaslar yaradıb. Bu qətnamələrdə Azərbaycana qarşı güc işlədilməsi və onun ərazilərinin işğal olunması qətiyyətlə pislənib, Azərbaycanın suverenliyi və ərazi bütövlüyü bir daha təsdiqlənib, ölkənin beynəlxalq səviyyədə tanınmış sərhədlərinin dəyişdirilməsinin yolverilməz olduğu qeyd edilib. Bu qətnamələr işğalçı qüvvələrin Azərbaycanın işğal olunmuş bütün ərazilərindən dərhal, tamamilə və qeyd-şərtsiz çıxarılmasını tələb edir. BMT-nin, Avropa Şurası Parlament Assambleyasının  və Avropa Parlamentinin 2005-ci və 2016-cı illərdə qəbul etdiyi qətnamələrinə, eləcə də ATƏT-in Minsk qrupunun və bütövlükdə dünya ictimaiyyətinin səylərinə baxmayaraq, münaqişə bu gün də həll olunmamış qalmaqdadır. 1994-cü ildə əldə edilmiş atəşkəs haqqında razılaşmadan sonra da Ermənistan qoşunların təmas xəttinin yaxınlığında yerləşən mülki əhaliyə hücumlarını dayandırmır və beynəlxalq təşkilatlar tərəfindən irəli sürülən sülh təkliflərinin heç birini qəbul etmir. Bu gün məcburi köçkün həyatı yaşayan hər bir azərbaycanlının yeganə arzusu öz doğma torpaqlarına qayıtmaqdır və bu işğal sonsuz davam edə bilməz.

Fransada yaşayan azərbaycanlılar icması adından Azərbaycanın ərazi bütövlüyünün sülh yolu ilə bərpa olunması üçün bu işğalın pislənməsini və bu istiqamətdə əməli tədbirlər görülməsini ATƏT-in Minsk qrupunun həmsədri kimi Fransadan və beynəlxalq birlikdən tələb edirik.

Bütün həqiqətlərin əksinə olaraq, özünün başladığı təcavüzdə hər vəchlə özünü münaqişənin qurbanı kimi qələmə verməyə çalışan Ermənistanı Dağlıq Qarabağın işğalını sonsuz davam etdirməyin mümkün olmayacağını anlamağa çağırırıq.

Azərbaycan Prezidenti İlham Əliyevin hazırda Fransada olduğunu nəzərə alaraq, biz dövlətimizin başçısının Ermənistan-Azərbaycan münaqişəsinin həlli istiqamətində apardığı siyasətə dəstəyimizi bildirir və  bu siyasətin münaqişənin tezliklə və birdəfəlik həllinə gətirib çıxaracağına ümid edirik”.

 

AZƏRTAC

 

 

 

Azərbaycanın qaçqın və məcburi köçkünlərin sosial vəziyyətinin yaxşılaşdırılması, onların mənzil probleminin həlli ilə bağlı gördüyü işlər alqışa layiqdir. Bu, heç də tez-tez rast gəlinən nümunə deyil. Digər dövlətlər də Azərbaycanın bu təcrübəsindən istifadə edə bilərlər.

AZƏRTAC xəbər verir ki, bu fikirlər martın 15-də Azərbaycan Respublikası Baş nazirinin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənovun Avropa Şurası Nümayəndələr Komitəsinin Demokratiya üzrə Məruzəçi Qrupunun nümayəndə heyəti ilə görüşündə səsləndirilib.

Avropa Şurasının Azərbaycanın ərazi bütövlüyünü tanıyan qərar qəbul etdiyini xatırladan Baş nazirin müavini Əli Həsənov bildirdi ki, biz bunu yüksək qiymətləndiririk. Bu işlər davam etdirilməli və gücləndirilməlidir. Münasibətlərdə ikili standartlara yol verilməməlidir. Ancaq bəzən AŞPA üzvlərinin içərisində qeyri-obyektiv çıxışlar da olur. Təbii ki, bunlar olmasa daha da yaxşı olar. Azərbaycanın müstəqillik illərində keçdiyi inkişaf yolunu 100 illik müstəqillik tarixi olan dövlətlərlə müqayisə etsəniz, ölkəmizin bu qısa zamanda böyük uğurlar qazandığını görərsiniz. Bu məsələlərə müqayisəli yanaşılmalıdır.

Ermənistanın Azərbaycana hərbi təcavüzü nəticəsində torpaqlarımızın 20 faizinin işğal edildiyini, bir milyondan çox insanın qaçqın və məcburi köçkün vəziyyətinə düşdüyünü xatırladan Əli Həsənov qeyd etdi ki, münaqişənin həlli məsələsi həddən artıq uzanıb. Dövlət Komitəsinin sədri dedi: “Əgər son 30 illə bugünkü vəziyyəti müqayisə etsək, görərik ki, dünyada qaçqın və məcburi köçkünlərin sayı iki dəfə artaraq 60 milyonu keçib. O cümlədən münaqişə zonalarının sayı da iki dəfə artıb. Bizim vəziyyətimiz digər münaqişə zonalarından fərqlidir. Çünki torpaqlarımızın 20 faizi qonşu dövlət tərəfindən işğal olunub. Hər iki dövlət də Avropa Şurasının, eyni zamanda, digər beynəlxalq təşkilatların üzvüdür. Bu, yolverilməz haldır. Biz müharibə istəmirik. Biz ermənilərlə qonşuluqda, bir yerdə yaşamaq istəyirik, necə ki, 200 il bir-birimizə etimad göstərə-göstərə yaşamışıq”.

Dağlıq Qarabağ münaqişəsi ilə bağlı beynəlxalq qurumlar tərəfindən qəbul olunmuş qərarların, qətnamələrin kağız üzərində qaldığını diqqətə çatdıran Əli Həsənov qeyd etdi ki, bir çox ölkələrdə radikallar hakimiyyətə gəlir, sistemlər, münasibətlər dəyişir. Buna baxmayaraq, biz əlimizi aşağı salıb dayanmaq fikrində deyilik. Beynəlxalq hüquq bizim haqq işimizi dəstəkləyir. “Ermənistan bütün gücü ilə cəhd edir ki, Dağlıq Qarabağ münaqişəsində mövcud status-kvonu saxlasın. Azərbaycan buna yol verməyəcək. Ermənistan tərəfi nə qədər tez başa düşsə ki, bu münaqişədən daha çox onlar ziyan çəkir, bir o qədər onlara xeyri olacaq. Əgər hər bir dövlət rəhbəri öz xalqının mənafeyini düşünsəydi, onun intellekt səviyyəsi yüksək olsaydı, xalqı da belə əziyyət çəkməzdi. Azərbaycan Prezidenti dəfələrlə bəyan edib ki, Dağlıq Qarabağda yaşayan ermənilərə ən yüksək idarəetmə statusu verməyə hazırdır. Lakin Ermənistan tərəfindən heç bir cavab gəlməyib. Yəni, bu ölkənin rəhbərliyi bu problemin həllində maraqlı deyil. Nə qədər ki, Ermənistanda mövcud rejim hakimiyyətdədir, onlar heç vaxt bu problemin həllinə razı olmayacaqlar. Çünki onlar azərbaycanlıların tökülmüş qanı üstündə hakimiyyətə gəliblər”, - deyə Baş nazirin müavini vurğuladı.

Azərbaycan dövlətinin qaçqın və məcburi köçkünlərin sosial şəraitinin yaxşılaşdırılması ilə bağlı gördüyü işlərdən də danışan Əli Həsənov dedi: “Dünyanın heç bir münaqişə zonasında qaçqın və məcburi köçkünlərə Azərbaycandakı qədər diqqət və qayğı göstərilmir. Antonio Quterreş hələ BMT-nin qaçqınlar üzrə ali komissarı olarkən hər illik hesabatda icraiyyə komitəsinin iclasında səsləndirirdi ki, Azərbaycan dövlətinin qaçqın və məcburi köçkünlər üçün gördüyü işlər dünyaya nümunədir. Ölkəmizdə 1 milyon qaçqın və məcburi köçkün problemi yarananda Azərbaycanın cəmi 7 milyon əhalisi vardı və heç bir maliyyə imkanı yox idi. Çünki SSRİ dağılandan sonra bütün dövlətlərin iqtisadiyyatları çökmüşdü. Ancaq bu dövrdə ulu öndər Heydər Əliyev elə bir mexanizm, idarəetmə modeli qurdu ki, biz o vəziyyətdən çıxa bildik. Vahid idarəetmə sistemi yaradıldı, qaçqın və məcburi köçkün probleminin həlli, onların sosial vəziyyətinin yaxşılaşdırılması ölkədə bir nömrəli prioritet elan edildi. Bu, indi də qüvvədədir. Ölkəyə daxil olan neft gəlirləri qaçqın və məcburi köçkünlərin mənzil-məişət, sosial problemlərinin həllinə yönəldildi. Son 13 ildə 95 müasir qəsəbə tikilib, 250 min qaçqın və məcburi köçkün yeni müvəqqəti qəsəbələrə köçürülüb. Bu dövrdə həmin məsələlərə 6 milyard dollardan çox vəsait sərf olunub. Qaçqın və məcburi köçkünlərə tətbiq olunan güzəştlər, onların çeşidi dünyanın heç bir münaqişə zonasında yoxdur. Onlar yaşadıqları yerdə bütün kommunal xidmətlərdən pulsuz istifadə edirlər. Hər birinə aylıq müavinət ödənilir. Son aylarda Prezident İlham Əliyev fərman və sərəncamlar imzaladı. Məcburi köçkünlərin kommunal xidmətlərinin vəsaitini dövlət onların plastik kartlarına köçürür və özləri ödəyirlər”. 

Bir neçə il öncə Avropa Şurasının İnsan Hüquqları üzrə Komissarlığının ofisində işlədiyini və həmin vaxt Əli Həsənovla görüşünü xatırlayan Avropa Şurasının Siyasi Məsələlər Direktoratlığının rəhbəri Aleksandr Qessel dedi: “2002-ci ildə Avropa Şurasının nümayəndəsi kimi ölkənizə ilk səfərim yaxşı yadımdadır. Həmin vaxt biz qaçqın və məcburi köçkünlərin Bakıda, Sumqayıtda, Saatlıda məskunlaşdığı yerlərə - düşərgələrə səfər etdik. Dəmir yolunun ətrafında vaqonlarda, çadırlarda yaşayan məcburi köçkünlərin yaşayış şəraitini görmüşdük. Üstündən 15 il keçib və bu gün Azərbaycan dövlətinin qaçqın və məcburi köçkünlərin sosial şəraitinin yaxşılaşdırılması üçün gördüyü işlərin şahidiyik. Biz bunu alqışlayırıq. BMT-nin baş katibi Antonio Quterreş də Azərbaycanın bu sahədəki fəaliyyətini yüksək qiymətləndirib. Çünki bu, heç də tez-tez rast gəlinən təcrübə deyil. Bu yaxınlarda Avropa Şurasının baş katibi Torbyorn Yaqlandla BMT-nin baş katibi A.Quterreş arasında görüş oldu. Görüşdə Avropada artıq problemə çevrilən miqrant və qaçqın məsələsi də müzakirə edildi. Böhran artıq çox ciddi ölçülərə gəlib çatıb. İnanıram ki, bir çox təşkilatlar bu məsələdə Azərbaycanın təcrübəsindən bir nümunə kimi istifadə edəcəklər”.

Aleksandr Qessel bildirdi ki, vəzifəsi ilə əlaqədar olaraq Ermənistana da səfərlər edir və oradan da hesabat hazırlayır. “İnanın ki, orada da sadə insanlar Azərbaycanda olduğu kimi, bu münaqişədən əziyyət çəkirlər. Hamı bu münaqişənin həllini istəyir. Bildiyimiz kimi, münaqişənin həlli Minsk qrupuna həvalə olunub. Ancaq köçkünlərin yaşadığı vəziyyətin, onlara münasibətin təkmilləşdirilməsi Avropa Şurasının səlahiyyətlərinə daxil olan məsələlərdədir. Düşünürəm ki, hazırlayacağımız hesabatda Azərbaycanın bu sahədə əldə etdiyi nailiyyətləri qeyd etmək çox vacibdir. Çünki bu hesabat Nazirlər Komitəsi üçün hazırlanır. Görülən işlərin hesabatımızda, eyni zamanda, Avropa Şurasının özü tərəfindən hazırlanmış hesabatda da işıqlandırılması və bu məlumatın digər üzv dövlətlərə çatdırılması çox vacibdir”.

On beş il bundan əvvəl ölkəmizə səfərindən danışan qonaq dedi ki, həmin dövrdə Bakı gecə vaxtı zülmətə qərq olurdu, otellər tapmaq mümkün deyildi: “Lakin bu gün işıqlı paytaxtınız, gözəl və müasir otelləriniz, tamamilə yeni simaya malik şəhəriniz məndə yüksək təəssürat oyatdı. Onu da qeyd etmək lazımdır ki, bu investisiya təkcə tikililərə sərf olunmayıb, eyni zamanda, qaçqın və məcburi köçkünlərin sosial şəraitinin yaxşılaşdırılmasına da yönəlib”.

Görüşdə Avropa Şurasının Siyasi Məsələlər Direktoratlığının əməkdaşları Danil Xoçaba, Maksim Lonqanq, Avropa Şurasının Bakı ofisinin rəhbəri xanım Draqana Filipoviç, Azərbaycanın Avropa Şurası yanında daimi nümayəndəsi Emin Eyyubov və Azərbaycanın Xarici İşlər Nazirliyinin məsul işçisi Leyla Həsənova iştirak ediblər.

 

AZƏRTAC

 

 

 

Martın 15-də müdafiə naziri, general-polkovnik Zakir Həsənov birlik, birləşmə və hərbi hissə komandirlərinin və xüsusi təyinatlı təhsil müəssisələri rəislərinin şəxsi heyətlə iş üzrə müavinləri ilə görüşüb.

Müdafiə Nazirliyinin mətbuat xidmətindən AZƏRTAC-a bildiriblər ki, döyüş və mənəvi-psixoloji hazırlıq işinin hazırkı vəziyyəti ilə bağlı ətraflı təhlil aparan Z.Həsənov bu istiqamətdə fəaliyyətin yüksək səviyyədə təşkili, hərbi qulluqçuların milli-mənəvi dəyərlər ruhunda tərbiyə edilməsi, müasir silah və texnikanı dərindən bilmələri və bir çox məsələlərlə bağlı fikirlərini bölüşüb.

Silahlı Qüvvələrin qazandığı nailiyyətləri xüsusi qeyd edən nazir bu uğurların Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin ordu quruculuğu prosesinə göstərdiyi diqqət və qayğının nəticəsi olduğunu vurğulayıb.

Sonda nazir döyüş və mənəvi-psixoloji hazırlıq işinin daim gücləndirilməsi, təhlükəsizlik qaydalarına əməl olunması və sayıqlığın artırılması, hərbi qulluqçular arasında fərdi tərbiyə işinin düzgün aparılması, qarşılıqlı münasibətlərin nizamnamələrin tələblərinə uyğun təşkil edilməsi və digər sahələrlə bağlı səylərin artırılması istiqamətində konkret tapşırıqlar verib.

 

AZƏRTAC

 

 

 

Ukrayna Prezidenti Petro Poroşenko bu ölkədə səfərdə olan İqtisadiyyat naziri Şahin Mustafayevin rəhbərlik etdiyi Azərbaycan nümayəndə heyətini qəbul edib.

İqtisadiyyat Nazirliyinin mətbuat xidmətindən AZƏRTAC-a bildiriblər ki, görüşdə Prezident Petro Poroşenko ilk növbədə Azərbaycan Respublikasının Prezidenti İlham Əliyevə səmimi salamlarının, həmçinin onun adından Azərbaycan Respublikasının Birinci vitse-prezidenti təyin olması münasibətilə Mehriban xanım Əliyevaya təbrikinin çatdırılmasını xahiş edib. Ukrayna Prezidenti Mehriban xanım Əliyevanın böyük xidmətlərini vurğulayıb, bu mühüm təyinatın Azərbaycanın inkişafına mühüm töhfə verəcəyinə əminliyini bildirib.

Ölkələrimiz arasında siyasi, iqtisadi və digər sahələrdə, eləcə də beynəlxalq təşkilatlar çərçivəsində əməkdaşlıqdan məmnunluğunu bildirən Prezident Poroşenko ölkəsinin Azərbaycanla əlaqələrin genişləndirilməsinə önəm verdiyini və bu sahədə geniş imkanların olduğunu vurğulayıb.

Azərbaycan nümayəndə heyətinin rəhbəri, iqtisadiyyat naziri Şahin Mustafayev səmimi qəbula görə təşəkkür edib və Azərbaycan Respublikasının Prezidenti İlham Əliyevin salamlarını Ukrayna Prezidentinə çatdırıb.

 

 

Görüşdə ölkələrimizin BMT, ATƏT, Avropa Şurası kimi beynəlxalq təşkilatlar çərçivəsində də uğurlu əməkdaşlıq etdiyi, bir-birinin suverenliyini və ərazi bütövlüyünü dəstəklədiyi vurğulanıb.

Görüşdə Azərbaycan və Ukrayna arasında ticarət-iqtisadi sahədə qarşılıqlı əməkdaşlığın genişləndirilməsinə maraq ifadə olunub, Ukrayna Prezidenti Azərbaycan məhsullarının Ukraynaya ixracı üçün hər cür şərait yaradıldığını, Kiyevdə Azərbaycan Ticarət Evinin açılması təşəbbüsünü dəstəklədiyini bildirib və region ölkələri ilə ticarətin genişləndirilməsi baxımından Azərbaycanda Ukrayna Ticarət Evinin yaradılması barədə müvafiq qurumlara tapşırıq verib.

Sənaye sahəsində əməkdaşlığın genişləndirilməsi imkanlarının müzakirəsi zamanı SOCAR-ın Ukraynadakı fəaliyyəti yüksək qiymətləndirilib, qida sənayesi, gəmiqayırma, əczaçılıq, kimya, neft emalı, neft maşınqayırması və elektrik avadanlıqlarının istehsalı, Ukrayna şirkətlərinin Azərbaycanda yaradılan sənaye parklarında və aqroparklarda fəaliyyət göstərməsi, Azərbaycan şirkətlərinin Ukraynanın yol infrastrukturunun yenidən qurulmasında və təmirində iştirakı məsələləri müzakirə edilib. Görüşdə, həmçinin Ukraynanın Azərbaycanın tranzit potensialından istifadə etməklə İran və Mərkəzi Asiya bazarlarına çıxmaq imkanları qeyd edilib, Şərq-Qərb və Şimal-Cənub nəqliyyat dəhlizlərinin Ukrayna üçün əhəmiyyəti, bu sahədə vahid tarif siyasətinin tətbiqinin vacibliyi vurğulanıb, Azərbaycan şirkətlərinin Ukrayna limanlarının idarə edilməsində iştirakı barədə geniş fikir mübadiləsi aparılıb.

Ukrayna Respublikasının Baş nazirinin birinci müavini, iqtisadi inkişaf və ticarət naziri Stepan Kubiv ilə görüşdə Azərbaycan və Ukrayna arasında əlaqələrin iqtisadiyyatın müxtəlif sahələrini əhatə etdiyi qeyd edilib. Bildirilib ki, Azərbaycanda Ukrayna şirkətləri uğurla fəaliyyət göstərir. 2016-cı ildə ölkələrimiz arasında ticarət dövriyyəsi artıb və bu sahədə əlaqələrin genişləndirilməsi üçün potensial böyükdür. Şahin Mustafayev Azərbaycanın Ukraynada Ticarət Evinin yaradılmasında maraqlı olduğunu diqqətə çatdırıb. Azərbaycan Ukraynaya fındıq, meyvə və tərəvəz, xüsusilə də xurma, çay, şərab, üzüm, tütün, pambıq lifi, polietilen, metanol, alüminium ixrac edə bilər. Azərbaycanın tranzit imkanları barədə məlumat verən Şahin Mustafayev qeyd edib ki, ölkəmiz Ukrayna ilə tranzit sahəsində də əməkdaşlıq edir və bu sahədə əlaqələrin genişləndirilməsi üçün imkanlar genişdir.

Əməkdaşlıq perspektivlərinə gəlincə, Azərbaycanın iqtisadiyyat naziri qeyd edib ki, Ukrayna iş adamları Azərbaycanda yaradılan sənaye parklarına və aqroparklara investisiya yatıra, Pirallahı Sənaye Parkında investorlar üçün yaradılmış imkanlardan və güzəştlərdən yararlanmaqla əczaçılıq sahəsində birgə müəssisə yarada bilərlər. Artıq əczaçılıq sahəsində birgə əməkdaşlığa dair Ukraynanın bir sıra şirkətləri ilə danışıqlar aparılır. Maşınqayırma sahəsində əməkdaşlıq imkanları genişdir. Bundan başqa, kənd təsərrüfatı məhsullarının emalı, qida sənayesi, tikinti materiallarının istehsalı sahələrində də əməkdaşlıq üçün geniş perspektivlər mövcuddur.

Görüşdə iqtisadi-ticarət əlaqələrinin inkişaf istiqamətləri, qarşılıqlı maraq doğuran digər məsələlər barədə müzakirələr aparılıb.

Ukraynanın infrastruktur naziri Vladimir Omelyan ilə keçirilmiş görüşdə infrastruktur, xüsusilə avtomobil və dəmir yolları, limanlardan istifadə sahələrində ikitərəfli əməkdaşlıq məsələləri müzakirə edilib. Azərbaycanın iqtisadiyyat naziri Şahin Mustafayev ölkəmizdə yaradılmış müasir infrastruktur, bu sahədə həyata keçirilən layihələr barədə məlumat verib, Ukrayna ilə müvafiq sahədə əməkdaşlıq imkanlarına dair fikirlərini bölüşüb. Bildirilib ki, Bakı-Tbilisi-Qars dəmir yolu, Bakı Beynəlxalq Dəniz Ticarət Limanı, Şimal-Cənub nəqliyyat dəhlizi kimi layihələr iqtisadi-ticarət, turizm və tranzit sahələrində əlaqələrin genişləndirilməsi baxımından əhəmiyyətlidir.

Ukraynanın infrastruktur naziri ölkəsində nəqliyyat sahəsində, xüsusilə də yol tikintisi və limanların özəlləşdirilməsi sahəsində həyata keçirilən layihələrdə Azərbaycan şirkətlərinin iştirakında maraqlı olduqlarını bildirib. Görüşdə Azərbaycan şirkətlərinin yol tikintisi sahəsində digər ölkələrdəki müsbət təcrübəsi xüsusilə vurğulanıb.

AZƏRTAC

 

 

 

4 -dən səhifə 1141