XƏBƏR LENTİ

Bazar, 27 Oktyabr 2013 21:30

Dunya bu gun

 

 

 

Türkiyə RƏM sistemləri ilə bağlı qərarını dəyişir

Türkiyə uzaqmənzilli raket hücumundan müdafiə sistemləri ilə bağlı Qərb şirkətləri ilə danışıqları davam etdirməyə hazırdır. “APA”nın Türkiyənin “NTV” telekanalına istinadən verdiyi məlumata görə, oktyabrın 25-də baş nazir Rəcəb Tayyib Ərdoğan yeni təkliflərə baxmağa hazır olduqlarını açıqlayıb, bir gün sonra isə xarici işlər naziri Əhməd Davudoğlu ABŞ və Avropa şirkətləri daha yaxşı şərtlər təklif edəcəyi halda, bu istiqamətdə müzakirələrin davam etdiriləcəyini söyləyib.

Ə.Davudoğlu bildirib ki, əsas məqsəd uzaqmənzilli raket hücumundan müdafiə sistemlərinin Türkiyədə birgə istehsalıdır: “Türkiyədə birgə istehsal əsas şərtimizdir. Bizi də narahat edən məqam var. ABŞ və Avropa şirkətləri niyə birgə istehsaldan qaçırlar? Çinlə bərabər ABŞ və Qərb şirkətləri də hələ tenderin iştirakçısıdır, yalnız Rusiya şirkəti tenderdən çıxıb”.

Qeyd edək ki, Türkiyəyə 4 milyard dollara başa gələcək uzaqmənzilli raket hücumundan müdafiə sistemi ilə bağlı tenderə ABŞ (“Patriot”), Rusiya (“C-300”), Fransa-İtaliya (“Eurosamp-T”) və Çin qatılıb. Çin 3,5 milyard dollara Türkiyəyə bu sistemlərin birgə istehsalı təklifini verib.

Xatırladaq ki, sentyabrın 26-da Türkiyə Müdafiə Sənayesi İcra Komitəsinin toplantısında raket hücumundan müdafiə sisteminin Çinlə birgə istehsalına qərar verilib.

Ancaq Türkiyənin bu qərarı ABŞ başda olmaqla, NATO ölkələri tərəfindən etirazla qarşılanıb. İrəli sürülən arqument isə odur ki, Çin texnologiyası əsasında istehsal ediləcək sistemlər Türkiyənin üzvü olduğu NATO-nun müdafiə sistemlərinə uyğun olmayacaq, alyansın müdafiə qabiliyyətinə mənfi təsir göstərəcək.

Bununla yanaşı, “Hürriyet” qəzeti ABŞ və Avropa şirkətlərinin nümayəndə heyətlərinin artıq Türkiyəyə gəldikləri və müdafiə sənayesi qurumları ilə görüşlər keçirməyə başladıqları barədə məlumat yayıb. Çin isə baş verən prosesdən narahatdır. Çin Xarici İşlər Nazirliyi məsələnin siyasi mövzuya çevrilməməsini, bunun normal bir silah ticarəti kimi qəbul edilməsini istəyib.

 

İran-pakistan sərhədində atışma olub

İran Pakistanla sərhəddə atışmada 17 sərhədçinin öldürülməsinə cavab olaraq həbsdə olan 16 üsyançını edam edib. Ölüm hökmü sərhədçilərin həlak olduğu Zahidan şəhərindəki həbsxanada həyata keçirilib. Bu barədə “BBC” agentliyi xəbər verib.

Sistan-Bəlucistan əyalətinin baş prokuroru edam edilən şəxslərin “hakimiyyətə düşmən mövqedə duran qruplarla əlaqəli” olduğunu bildirib.

Qeyd edək ki, hadisə İranla Pakistan sərhədində şənbə gününə keçən gecə mərkəzi şiə hökuməti tərəfindən təqiblərə məruz qaldığını bildirən sünni müsəlmanların yaşadığı Saravan şəhəri yaxınlığında baş verib. 

Yerli qubernator Rəcəbəli Şeyxzadə hücumçuların Pakistan ərazisinə çəkildiyini bildirib.  Ölkənin cənub-şərq bölgəsində baş verən hadisəyə görə məsuliyyəti üzərinə götürən olmayıb.

Qeyd edək ki, Pakistanla sərhəd bölgəsində narkotik qaçaqmalçıları və silahlı qruplaşmalarla qarşıdurma əvvəllər də olub.

“Cindallah” adlanan qruplaşma son illər buna bənzər hadisələri dövlət rəsmilərinə qarşı müntəzəm olaraq yerinə yetirir.

“BBC” müxbiri xatırladıb ki, Əfqanıstandan Avropaya əsas narkotrafik marşrutlarından biri məhz İran ərazisindən keçir.

“Frans-Press” agentliyinin İran rəsmilərinə istinadən yaydığı xəbərə görə, son 30 il ərzində narkotik qaçaqmalçılığı ilə mübarizədə 4 min əsgər və təhlükəsizlik əməkdaşı öldürülüb.

 

Misirdə iqtisadi vəziyyət daha da ağırlaşıb

Misirdə hərbi çevrilişdən sonra iqtisadi vəziyyətin ağırlaşdığı və buna görə də insanların kommunal xərcləri ödəyə bilməməsi səbəbindən çevriliş əleyhinə olanların sayı sürətlə artmaqda davam edir. Bu barədə “TRT” xəbər verib.

“Müsəlman qardaşları” hərəkatının nümayəndələrindən Əhməd Yusif yaydığı açıqlamada iqtisadi vəziyyətin ağırlaşması səbəbindən çevriliş əleyhinə olanların sayının getdikcə artdığını və hərbi xunta hakimiyətinin çətin vəziyyətdə olduğunu qeyd edib.

İnsanların çevrilişi aylar öncə həyata keçirməyə başladığına və buna baxmayaraq, hələ də küçələrdə olduğuna işarə edən Əhməd Yusif universitetlərin açılmasından sonra gənclərin də aksiyalara qatıldığını və buna görə “inqilab coşqusunun” artacağını bildirib.

Hərbi xunta rəhbərliyinin xalqın dəstəyini itirdiyinə görə siyasi yolları bağlamağa cəhd göstərdiyi fikrini irəli sürən Əhməd Yusif insanların gözündə Məhəmməd Mursinin hələ də qanuni lider olduğunu qeyd edib.

 

Avropa rəsmi Vaşinqtona təzyiq göstərməyə başlayıb

Avropalı dövlət liderləri Amerika Birləşmiş Ştatlarının telefon danışıqlarının dinlənilməsi ilə bağlı məsələni öyrəndikdən sonra, Avropa rəsmi Vaşinqtona təzyiq göstərməyə başlayıb. Bu barədə “TRT” xəbər verib.

Almaniya ilə Fransa Barak Obama administrasiyasından cari ilin sonuna qədər xarici liderləri, iş adamlarını, günahsız vətəndaşları izləməyə son qoyacaq bir müqaviləni imzalamasını istəyir.

Bundan başqa, Almaniya Braziliya ilə birlikdə, Birləşmiş Millətlər Təşkilatının Baş Assambleyasından şəxsi həyatın məxfiliyi ilə bağlı bir qərar çıxarılması üçün hərəkətə keçib. Qərarda əsasən, “heç kimin şəxsi həyatına, ailəsinə, evinə, yazdıqlarına, şərəfinə internet vasitəsilə müdaxilə edilə bilməz” ifadəsi də xüsusi qeyd olunub.

Eyni zamanda, BMT-dəki alman və braziliyalı diplomatlar Avropa və Latın Amerikasından olan həmkarları ilə bir araya gələrək, layihə üzərində fikir mübadiləsi aparıblar.

Yayımlanan birgə bəyanatda Amerika ilə Avropa arasındakı yaxın əməkdaşlığa diqqət çəkilib, bunun qarşılıqlı hörmət və etimada söykənməsinin lazım olduğu vurğulanıb.

Almaniyanın kəşfiyyat əməkdaşları kansler Angela Merkelin mobil telefonunun dinlənildiyi ilə bağlı xəbərlərin ardından Amerika Birləşmiş Ştatlarına getməyə hazırlaşır.

Mətbuatda yer alan bəzi xəbərlərdə Amerikanın yalnız Fransada deyil, İspaniyada da milyonlarla telefon dinləməsi ilə bağlı xəbərlər mövcuddur.

 

G.Marqvelaşvili: Gürcüstan MDB-yə qayıtmayacaq

İqtidardakı “Gürcü Arzusu” koalisiyasının prezidentliyə namizədi Georgi Marqvelaşvili Gürcüstanın heç vaxt MDB-yə qayıtmayacağını bəyan edib. “APA”nın “Novosti-Qruziya” agentliyinə istinadən verdiyi məlumata görə, G.Marqvelaşvili xatırladıb ki, Gürcüstan öz gələcək inkişafı ilə bağlı mövqeyini 2008-ci il referendumunda bildirib: “Avropa və Avroatlantik strukturlara inteqrasiya hansısa siyasətçinin yox, gürcü xalqının arzusudur”.

Prezidentliyə namizəd qeyd edib ki, Gürcüstanın MDB-də üzvlüyü effektli olmayıb və MDB ölkəyə heç bir təminat verməyib: “Biz Belarus və digər ölkələrdən olan həmkarlarımızın bəyanatlarına hörmətlə yanaşırıq. Lakin Gürcüstan MDB istiqamətində yox, birmənalı şəkildə Avropaya doğru hərəkət edir”.

Qeyd edək ki, Belarus prezidenti Aleksandr Lukaşenko MDB sammitinin yekunları ilə bağlı keçirilən mətbuat konfransında Gürcüstanın MDB-yə qayıtmasını istədiyini bildirib.

 

ABŞ-Ermənistan hərbi məsləhətləşmələri keçiriləcək

Bu ilin dekabr ayında Yerevanda Ermənistan-ABŞ müdafiə məsləhətləşmələri keçiriləcək. “APA”nın  verdiyi məlumata görə, Ermənistan Müdafiə Nazirliyindən bildirilib ki, məsləhətləşmələr zamanı tərəflər əməkdaşlıq məsələlərini təfərrüatlı şəkildə müzakirə edəcəklər.

Məsləhətləşmələrin keçirilməsi barədə razılıq Ermənistan müdafiə nazirinin birinci müavini David Tonoyan və ABŞ müdafiə naziri müavininin Rusiya, Ukrayna və Avrasiya üzrə köməkçisi Evelin Farkasın Brüsseldə keçirilən görüşündə əldə olunub.

Tərəflər həmçinin Ermənistan hərbçilərinin ABŞ-ın hərbi tədris müəssisələrində və təlim mərkəzlərində fərdi, eləcə də bölmələrin tərkibində təlim və kurslarda iştirak imkanlarını müzakirə ediblər.

 

 

 

 

 

 

Oktyabrın 6-da Azərbaycan Respublikasının Prezidenti İlham Əliyevin sədrliyi ilə Nazirlər Kabinetinin 2013-cü ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş iclası keçirilmişdir. Dövlət başçısı, Azərbaycan iqtisadiyyatının uğurlu inkişafından, qarşıya qoyulmuş bütün vəzifələrin layiqincə yerinə yetirilməsindən söhbət açaraq, əminliklə bildirdi ki,gələcək illərdə də bu inkişaf və tərəqqi özünü göstərəcəkdir. Çünki bu günə qədər aparılan islahatlar və əldə olunmuş nəticələr deməyə əsas verir ki, bundan sonra da Azərbaycanın uğurlu inkişafı təmin ediləcəkdir. Bütün makroiqtisadi göstəricilər yüksək səviyyədədir. İqtisadiyyat doqquz ayda 5,4 faiz, kənd təsərrüfatı 5 faiz, əhalinin pul gəlirləri isə 7,6 faiz artmışdır. Bu isə insanların rifah halının yaxşılaşmasına əyani misaldır.

Bu günlərdə Yevlax şəhərində 2013-cü ilin 9 ayının sosial-iqtisadi inkişafının yekunlarına və qarşıda duran vəzifələrə həsr olunmuş geniş yığıncaq keçirilmişdir.Yığıncağı giriş sözü ilə şəhər icra hakimiyyətinin başçısı Qoca Səmədov açaraq, cari ilin doqquz ayında şəhərin sosial-iqtisadi inkişafının göstəricilərini təhlil etmişdir:

Belə ki, 2013-cü ilin doqquz ayında ümumdaxili məhsulun cəmi 366,4 milyon manat olmuşdur ki, bu 2012-ci ilin müvafiq dövrünə nisbətən 78,5 milyon manat və yaxud 27,3 faiz çox olmuşdur.

Ümumdaxili məhsulun 98,5 faizi qeyri-dövlət sektorunda istehsal olunmuşdur ki, bu artım əsasən məhsul istehsalının, tikinti işlərinin və xidmətlərin cəminin artması hesabına olmuşdur. Bunun 8,6 milyon manatını sənaye, 65,2 milyon manatını kənd təsərrüfatı, 77,9 milyon manatını tikinti, 172,0 milyon manatını ticarət, 3,8 milyon manatını nəqliyyat, 0,8 milyon manatını rabitə, 38,2 milion manatını digər xidmətlər təşkil etmişdir. İstehsal olunmuş 3 milyon 283,3 min manatlıq sənaye məhsulu ixrac olunmuşdur. Bu, satılmış sənaye məhsulunun 40,5 faizini təşkil edir.

Şəhər üzrə orta aylıq əmək haqqı 206 manat təşkil etmişdir. Əhalinin pul gəliri 201,5 milyon manat olmuşdur. Bu isə 2012-ci ilin doqquz ayına nisbətən 38,6 milyon manat və yaxud 23,7 faiz çoxdur .

2013-cü ilin doqquz ayında Dövlət Sosial Müdafiə Fondunun şəhər şöbəsi 18151 pensiyaçıya 22,1 milyon manat vəsait, aztəminatlı ailələrə diqqət və qayğı göstərilərək, Əhalinin Sosial Müdafiə Mərkəzi tərəfindən 5128 sosial müavinət alanlara 3,1 milyon manat vəsait, sosial müdafiəyə ehtiyacı olan 1878 ailəyə 2 milyon 473,9 min manat vəsait ünvanlı sosial yardım vaxtında ödənilmişdir.

Əhalinin işlə təmin olunması proritet məsələlərdən olmuşdur. Belə ki, 2013-cü ilin doqquz ayında 1159 iş yeri açılmışdır ki, onlardan 1027-si daimidir. Ümumilikdə 2004-2013-cü illərdə rayonda 15321 iş yeri yaradılmışdır ki, onlardan 9253-ü daimi iş yerləridir. Möhkəm əsaslar üzərində qurulmuş aqrar sahədə nailiyyətlər özünü büruzə verir. Belə ki, hesabat dövründə ümumilikdə 65,2 milyon manatlıq kənd təsərrüfatı məhsulları istehsal olunmuşdur ki, bu da əvvəlki illə müqayisədə faktiki qiymətlərlə 6,1 faiz çoxdur. 210 hektarda kartof, 652 hektarda tərəvəz, 3540 hektarda təzə yonca, 18 min 729 hektar taxıl, o cümlədən 14 min 613 hektar buğda əkilmişdir. Cari ilin 9 ayı ərzində təsərrüfat məhsulları istehsalçılarına 1 milyon 449 min manat dövlət yardımı verilmişdir. Sahələrdən 55988 ton taxıl məhsulu toplanmışdır. Əkin sahələrində məhsuldarlığın daha da yüksəldilməsi məqsədilə 200 hektar əkin sahəsinin suvarılması üçün Aran-2, Aran-6, Malbinəsi, Salahlı nasos stansiyalarında əsaslı təmir işləri aparılmışdır. Ərəbbəsrə, Meyvəli, Xanabad kəndlərinin 1100 hektar torpaq sahələrinin suvarılması üçün Əlican çayından 600 metr uzunluğunda beton kanal çəkilmişdir. Ümumiyyətlə, meliorasiya işçilərinin fəaliyyəti ürəkaçan olmuşdur.

Cari ilin doqquz ayında 2012-ci ilin müvafiq aylarına nisbətən iribuynuzlu mal-qaranın baş sayı 521 baş artaraq 73824, qoyunların baş sayı isə 2363 baş artaraq 169 min baş olmuşdur, 19 ton ət, 666 ton süd, 18 min ədəd yumurta çox istehsal edilmişdir. Ümumiyyətlə, ərzaq məhsullarının artımı dövlətin diqqət mərkəzində olmuş və iqtisadiyyatın ana xəttini təşkil etmişdir, çünki qida məhsulları insanın amilinin yaşayış kalorisini formalaşdırır və həyat fəaliyyətini təmin edir.

Şəhərin sosial-iqtisadi inkişafındakı irəliləyişlər, irimiqyaslı yenidənquma işləri həyata keçirilmiş, abadlıq-quruculuq işləri daha da genişlənmiş, şəhər sakinlərinin sosial-məişət problemlərinin həlli istiqamətində böyük addımlar atılmış, əhalinin rifah halının daha da yüksəldilməsi istiqamətində ardıcıl tədbirlər görülmüşdür.

Əhalinin rahatlığının təmin olunması məqsədilə, Yevlax Hava limanının inzibati binası əsaslı təmir olunaraq yenidən qurulmuş, uzunluğu 2520 metr, eni 40 metr olan yeni uçuş zolağı tikilmiş, müasir standartlara cavab verən infrastruktur yaradılmışdır. Hava limanının açılışında Azərbaycan Respublikasının Prezidenti cənab İlham Əliyev iştirak etmiş, şəhərdə görülən işlərdən məmnun qalaraq demişdir.”Yenidən Yevlaxda olmağımdan məmnunam. Mən son illər ərzində dəfələrlə Yevlax rayonunda olmuşam, müxtəlif tədbirlərdə, açılışlarda bərabər iştirak etmişik. Bu gün isə yeni aeroportun açılışını edirik. Çox gözəl hadisədir, böyük rəmzi məna daşıyır. Bütün Beynəlxalq standartlara cavab verən bir aeroportdur və Azərbaycanın nəqliyyat strukturunun yenidən qurulmasında bu aeroportun çox böyük rolu olacaqdır”.

Nizami prospektində (7 nömrəli məktəbdən —Kür çayı körpüsünədək) 55 ədəd, Nizami prospektini Aeroport ilə birləşdirən avtomobil yolunun kənarında 110, Heydər Əliyev prospektində (Bərdə istiqamətində şəhərə girişi) 74 ədəd, Dəmir yolu meydanında 11 ədəd, cəmi 250 ədəd işıqlandırma dayaqları və dayaqlarda 533 ədəd işıq nöqtələri quraşdırılmışdır. Qaramanlı-Köyük kəndlərarası avtomobil yolunun 5,5 km hissəsi tikilərək istifadəyə verilmişdir. Səmədabad-Bünyadabad kəndlərarası 4,5 kilometr, Səmədabad-İsmayılabad kəndlərarası 1,8 kilometr avtomobil yolları əsaslı təmir olunaraq asfaltlanmışdır. Heydər Əliyev Xiyabanında və Nizami parkında əsaslı təmir işləri aparılmış, səkilərə, meydanlara 2800 kvadratmetr aqlay üzlük və 9600 kvadratmetr tamet daşları döşənmiş, fontanlar 120 kvadratmetr mərmər ilə üzlənmiş, 65 ədəd yeni işıqlandırma dayaqları quraşdırılmışdır.

Heydər Əliyev və Nizami prospektlərində 1247 poqonmetr qranit mərmər, 3117 poqon metr dəmir beton səki daşları düzülmüş, səkilərə 782 kvadratmetr tamet plitəsi döşənmişdir.

Dəmir yolu meydanında divarları, daxili, ətrafı 250 kvadratmetr qranit mərmər ilə üzlənmiş yeni fontan tikilmişdir.

Nizami prospektində və şəhərin mərkəzini əhalisinin sayı 6000 nəfər olan Aeroport və Çənlibel əraziləri ilə birləşdirən avtomobil yolunu kənarlarında geniş abadlıq işləri aparılmışdır.

Həmin ərazidə 2176 metr istinad divarı tikilmiş, divarlarda 1319 kvadratmetr aqlay üzlük daşı ilə, 1411 kvadratmetr tam cilalanmış travertin ilə, 450 kvadratmetr qranit mərmər ilə, 281 kvadratmetr keramik kabançik ilə, 1700 kvadratmetr qayadaşı ilə, 3060 kvadratmetr profnastil ilə üzləmə, 2800 kvadratmetr rəngləmə işləri aparılmışdır.

Avtomobil yolunun kənarlarına, bataqlıqlara və çökəkliklərə 55200 kubmetr torpaq daşınmış, 25 min ədəddən çox müxtəlif ağaclar əkilmişdir. Yaşıllıqların suvarılması üçün suvarma xətləri çəkilmişdir.

4 kilometr uzunluğunda avtomobil yolu əsaslı təmir olunaraq asfaltlanmışdır.

2 ədəd 2 mərtəbəli 16 mənzilli yaşayış binalarının və 18 ədəd fərdi yaşayış evlərinin dam örtükləri təmir olunmuş və dam örtüklərinə metal kirəmit vurulmuşdur.

Şəhərin mərkəzində Dədə Qorqud parkının tikintisi aparılır.

Xaldan və Yuxarı Bucaq kəndlərinin mərkəzindən keçən avtomobil yolunun kənarlarında abadlıq işləri aparılmış, divarlarda 3000 kvadratmetr qaya daşı ilə üzləmə, 2600 kvadratmetr rəngləmə işləri görülmüşdür.

Bakı-Şamaxı-Yevlax avtomobil yolunun Yuxarı Qarxun va Aşağı Qarxun kəndləri arasındakı 4.2 km hissəsində tikinti işləri başa çatmaq üzrədir.

Hazırda Kür çayı sahilində 5 ulduzlu hotelin, Təhsil şöbəsinin, Regional referens Toksikologiya və karantin ekspertiza laboratoriyasının, “Azərbaycan Beynəlxalq Bank” ASC-nin Yevlax filialının, Qaz İstismar Sahəsinin, 11 saylı Ərazi Vergilər İdarəsinin, İqtisadi İnkişaf Nazirliyinin Aran Regional İdarəsinin tikintisi, Kür çayı üzərindəki Dəmir yol körpüsünün əsaslı təmiri işləri davam etdirilir.

Hazırda şəhər və kənd yaşayış məntəqələri 24 saat fasiləsiz elektrik enerjisi ilə təmin olunur.

Azərbaycan Respublikasının Prezidenti cənab İlham Əliyevin rəhbərliyi ilə keçirilən təhsil islahatları, yeni məktəb binalarının tikintisi, məktəblərin maddi-texniki bazasının əsaslı surətdə inkişafı, təhsilin səviyyəsinin yüksəldilməsi istiqamətində şəhər təhsilindəki uğurlar ürək açandır. Belə ki, şəhər təhsilinin təhsil sahəsində aparılan məqsədyönlü maariflənmənin yüksək səviyyədə təşkili öz bəhrəsini vermişdir. Cənab Prezidentin 4 oktyabr 2013-cü il tarixli sərəncamı ilə şəhər 4 N-li tam orta məktəbin müəllimi Aybəniz Musayeva “Əməkdar müəllim” fəxri adına layiq görülmüş, şəhər 9 N-li tam orta məktəbin müəllimi Sahibə Quliyeva və Xaldan kənd tam orta məktəbin müəllimi Nura Kərimova “Tərəqqi” medalı ilə təltif olunmuşdur. 685 bal toplamış, Azərbaycan Diplomatiya Akademiyasına qəbul olunmuş, Səmədabad kənd tam orta məktəbin məzunu Zeynəb Əhmədova Prezident təqaüdünə layiq görülmüşdür 10 nəfər müxtəlif ali hərbi məktəb və akademiyalara, 7 nəfər C.Naxçıvanski adına hərbi liseyə qəbul olunmuşdur.

Şagirdlərin ali məktəblərə qəbulu üzrə son 10 ildə ən yüksək göstərici əldə edilmiş, 321 nəfər ali məktəblərə qəbul olunmuşdur ki, onlardan 7 nəfəri 600-dən, 22 nəfəri 500-dən çox bal toplamışlar.

Uşaq, yaşlı əhaliyə tibbi xidmətin göstərilməsi işi yaxşılaşmışdır. Şəhər uşaq xəstəxanası tərəfindən 607 nəfər 1 yaşa, 4255 nəfər 1 yaşdan 6 yaşa, 6909 nəfər 6 yaşdan yuxarı uşaqlar müayinə və müalicə olunmuşdur.

2013-cü ilin 9 ayı ərzində 10702 nəfər xəstə ambulator müayinə olunmuşdur.

Bəli, Yevlax şəhəri bu gün inkişafının keyfiyyətcə yeni bir dövrünü yaşayır. Bu gün ölkəmizin hər bir guşəsində, eləcə də çiçəklənən Yevlaxda yaşayan vətəndaşlar, Prezident İlham Əliyevin rəhbərliyi altında qazanılan uğurların bəhrəsini gündəlik həyatında hiss edir və ölkə rəhbərliyinin yürütdüyü siyasəti birmənalı dəstəkləyir .

Yığıncağı Yevlax Şəhər İcra Hakimiyyətinin başçısı Qoca Səmədov yekunlaşdıraraq bir daha əminliklə bildirdi ki, Yevlax zəhmətkeşləri ölkə başçısının qarşıya qoyduğu vəzifələri uğurla yerinə yetirmək üçün var qüvvəsilə çalışacaq, müstəqil Azərbaycanın inkişafına öz töhfəsini verəcəklər.

Zabit XƏLİLOV,

“Respublika”.

 

 

 

 

 

 

Bu gün Azərbaycan iqtisadiyyatı durmadan inkişaf edir. Yeni-yeni layihələr, Dövlət proqramları reallaşır. Enerji daşıyıcılarla təminat yaxşılaşır. Azərbaycan Respublikasının Prezidenti möhtərəm İlham Əliyev andiçmə mərasimindəki nitqində demişdir: “Azərbaycanda bundan sonra da iqtisadi islahatlar davam etdiriləcəkdir. İqtisadi inkişaf templərinə görə son on il ərzində Azərbaycan qədər inkişaf edən ikinci ölkə olmamışdır”.

 

Azərbaycan Respublikası Prezidentinin 14 aprel 2009-cu il tarixli 80 saylı Fərmanı ilə təsdiq olunmuş “Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı”nın və 04 may 2011-ci il tarixli 1490 saylı Sərəncamı ilə təsdiq edilmiş “2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı”nın icrası ilə bağlı mühüm işlər görən ARDNŞ-nin “Azəriqaz” İstehsalat Birliyi 2013-cü ilin ilk 9 ayını da uğurlarla başa vurmuşdur. Bu dövrdə də əhalinin və digər istehlakçıların normal və təhlükəsiz qaz təchizatının təmin olunması, yaşayış məntəqələrinin qazlaşdırılması və qaz təminatının bərpası, qaz təchizatı şəbəkəsinin əsaslı təmiri istiqamətində bir sıra nailiyyətlər əldə edilmiş, Azərbaycan Respublikasının Prezidenti İlham Əliyevin qazlaşdırılma barədə tapşırığının uğurla yerinə yetiriləcəyinə inam daha da möhkəmlənmişdir.

Ötən illərdə olduğu kimi, bugün də birlikdə qaz təsərrüfatının inkişafı üçün görülən işlər davam etdirilir. Belə ki, istismar müddəti başa çatmış müxtəlif diametrli qaz kəmərləri təmir-bərpa edilir, həyətlərdə olan qaz xətləri küçəyə çıxarılır və qaz sayğaclarının küçə xətlərinin üzərində quraşdırılması işləri davam etdirilir. Təbii qaz itkilərinin azaldılması məqsədi ilə əhali istehlakçılarının mənzillərində istismar edilən istismar müddəti başa çatmış mexaniki sayğaclar yeni “smart-kart” tipli sayğaclarla əvəz olunur, sayğacsız təbii qazdan istifadə edən abonentlərin mənzillərinə yeni sayğaclar quraşdırılır, istismara yararsız vəziyyətdə olan qaz tənzimləyiciləri yeniləri ilə əvəz edilir. Bundan əlavə, qaz şəbəkəsində səmərəli texnika və texnologiyanın tətbiq edilməsinin əhatə dairəsi genişləndirilir.

Qeyd edək ki, “smart-kart” tipli qaz sağaclarının əhatə dairəsinin genişlənməsi və ödənişlərlə bağlı əməliyyatların artması ilə əlaqədar yarana biləcək texniki problemlərin meydana çıxmasının qarşısını almaq məqsədi ilə köklü şəkildə yeniliklər tətbiq edilmiş və müvafiq qaydada islahatlar aparılmışdır. Kütləvi ödənişlərin artması daha güclü proqram təminatına ehtiyac yaratdığından mart ayından etibarən yenilənmiş proqram təminatının tətbiqinə başlanılmışdır. Bu isə təxminən 1 milyon abonentə keyfiyyətli xidmət göstərməyə imkan verəcəkdir.

“Smart-kart” tipli qaz sayğaclarının ödəmə məntəqələrinin şəbəkəsi də genişləndirilmişdir. Belə ki, cari ilin mart ayından başlayaraq, ödənişləri hazırda mövcud olan ödəniş terminalları ilə yanaşı, digər bir şirkət — “Modenis” MMC-yə məxsus ödəniş terminallarında da həyata keçirmək mümkündür.

ARDNŞ, “Azəriqaz” İstehsalat Birliyi istehlakçıların fasiləsiz və keyfiyyətli təbii qazla təchiz edilməsi, eləcə də yaşayış məntəqələrinin qazlaşdırılması istiqamətində fəaliyyətini genişləndirməkdədir. Bunun nəticəsidir ki, təkcə cari ilin 9 ayı ərzində ölkə üzrə 6970,2 km uzunluğunda yeni qaz kəmərləri çəkilmiş, 1018,3 km uzunluğunda kəmərdə isə əsaslı təmir işləri aparılmışdır.

Ümumilikdə İstehsalat Birliyinin fəaliyyəti dövründə (2009-2013-cü illər) 23127,9 km uzunluğunda yeni qaz kəmərləri quraşdırılmışdır ki, bunun da 21735,2 km-i regionların payına düşür. Bakı şəhəri üzrə bu rəqəm 1210 km, magistral qaz kəmərləri üzrə isə 182,7 km təşkil edir. Bu dövrdə əsaslı təmir edilmiş qaz kəmərlərinin ümumi uzunluğu 6972,2 km-dir. Burada nisbət isə belədir: regionlar-2890,2 km, Bakı şəhəri - 3940,4 km, magistral gaz kəmərləri 141,6 km.

“Azəriqaz” İstehsalat Birliyinin İctimaiyyətlə əlaqələr şöbəsindən aldığımız məlumata görə, İstehsalat Birliyi tərəfindən istehlakçıların fasiləsiz və keyfiyyətli təbii qazla təchiz edilməsi, eləcə də abonent bazasının daha da genişləndirilməsi istiqamətində görülən işlərin nəticəsi olaraq, 1 oktyabr 2013-cü il tarixə ölkə üzrə təbii qazla təmin olunan abonentlərin sayı 1 580 474-ə çatmışdır ki, bunların da 1 561 399-u əhali, 19 075-i isə qeyri-əhali abonentidir. Həmin abonentlərin 684 154-ü Bakı şəhəri (674 291 əhali, 9 863 qeyri-əhali abonenti), 896 320-i isə regionların (887 108 əhali, 9 212 qeyri-əhali abonenti) payına düşür.

1 oktyabr 2013-cü il tarixə olan məlumata əsasən, əhali abonentlərinin mənzillərində 793 383 ədəd “smart-kart” tipli sayğac quraşdırılmışdır. Xatırladaq ki, 2013-cü il yanvarın 1-ə olan məlumata görə, bu rəqəm 594 min idi.

Cari ilin 9 ayı ərzində ARDNŞ-nin “Azəriqaz” İstehsalat Birliyində əhali sektoru üzrə 1 464 051 023 kubmetr həcmində təbii qaz satılmış və qarşılığında 103,96 faiz vəsait toplanmışdır. 2013-cü ilin sentyabr ayı ərzində 69 908 052 kubmetr təbii qaz satılmış və qarşılığında 121,08 faiz vəsait toplanmışdır. Bu onunla əlaqədardır ki, 2012-2013-cü illərin payız-qış mövsümündə tələbatın artması ilə əlaqədar əhaliyə satılan qazın həcmi çoxalmış və bu səbəbdən istehlak edilmiş qazın dəyəri abonentlər tərəfindən tam ödənilməmişdir. Həmin dövr ərzində yaranmış debitor borclar 2013-cü ilin yaz-yay mövsümündən başlayaraq abonentlər tərəfindən ödənilməkdədir. Nəticədə 2013-cü ilin sentyabr ayı ərzində debitor borc 3,0 faiz azalmışdır. 01 yanvar 2013-cü il tarixə mövcud olan debitor borc isə 9 ay ərzində 12,4 faiz azalmışdır.

Onu da qeyd edək ki, 01 oktyabr 2013-cü il tarixə olan məlumata görə, əhali sektoru üzrə 106 812 məcburi köçkün ailəsi fasiləsiz təbii qazla təmin olunmaqdadır.

Dünya praktikasında geniş yayılmış kart sisteminin ARDNŞ-nin “Azəriqaz” İstehsalat Birliyində tətbiqindən sonra əməyin mühafizəsi və təhlükəsizlik texnikası qaydalarının tələblərinin pozulması halları ilə mübarizə daha da güclənmişdir. Belə ki, sistemin tətbiqindən keçən 6 ay ərzində vəzifə və peşə təlimatlarının əməyin mühafızəsi və təhlükəsizlik texnikasına dair tələblərini lazımınca yerinə yetirməmiş və tapşırıqların həyata keçirilməsi zamanı pozuntulara yol vermiş 57 işçiyə xəbərdarlıq kartı verilmişdir.

Kart sisteminin tətbiqi əməyin mühafizəsi və təhlükəsizlik texnikası qaydalarına riayət olunması və icra intizamının möhkəmləndirilməsinə müsbət təsir göstərmişdir. Bunun nəticəsidir ki, sistemin tətbiqindən keçən dövrdə xüsusi təhlükəli işlərin icrasını yüksək keyfıyyətlə və təhlükəsizlik qaydalarının tələblərinə maksimum riayət etməklə icra etmiş 12 işçiyə fərqlənmə kartları təqdim olunmuşdur.

Qeyd edək ki, kart sisteminin tətbiqi istehsalatla bağlı baş verə biləcək qəza və bədbəxt hadisələrin qarşısının alınması, əməyin mühafizəsi və təhlükəsizlik texnikası qaydalarına riayət olunmasına nəzarətin gücləndirilməsi məqsədi daşıyır. Bununla əlaqədar “Əməyin mühafizəsinə nəzarətin gücləndirilməsi məqsədilə kart sisteminin tətbiq edilməsi Qaydaları” işlənib hazırlanmış və bu Qaydalar “Azəriqaz” İB və Birliyin Həmkarlar İttifaqı Komitəsinin 14.03.2013-cü il tarixli 149 N-li əmr-qərarı ilə təsdiq olunmuşdur. Bütün tabeli təşkilatların baş mühəndislərinin, əməyin mühafizəsi və təhlükəsizlik texnikası üzrə mühəndislərin iştirakı ilə geniş tərkibli iclas keçirilmiş, onlara sistemin tətbiqinə dair ətraflı məlumat verilmişdir.

ARDNŞ-nin “Azəriqaz” İstehsalat Birliyində layihə-smeta sənədlərinin ekspertizası, razılaşdırılması və texniki şərtlərin hazırlanması  sahəsi üzrə göstəricilər artmaqdadır. Belə ki, 2013-cü ilin 9 ayı ərzində fıziki və hüquqi şəxslərin müraciətləri əsasında qeyri-yaşayış sahələrinin (obyektlərin) qazlaşdırılması üçün 3164 ədəd texniki şərt verilmişdir. Birliyin sifarişi əsasında tikintisi nəzərdə tutulan qaz təchizatı obyektlərinin və qurğularının, eləcə də yaşayış məntəqələrinin, daşıyıcı qaz kəmərlərinin və digər təyinatlı bina, tikili və qurğuların layihələndirilməsi üçün 568 ədəd texniki şərt, texniki tapşırıq və layihə tapşırığı hazırlanmışdır.

Layihə-smeta sənədlərinin hazırlanması sahəsi üzrə də mühüm işlər görülmüşdür. Cari ilin yanvar-sentyabr aylarında “Azəriqaz” İB-nin Layihə-Konstruktor Bürosu tərəfindən 3770 layihə-smeta sənədi hazırlanaraq, Birliyə və digər sifarişçilərə təhvil verilmişdir ki, bunun da 123-ü fərdi yaşayış evləri, 674-ü kənd və qəsəbələrin qazlaşdırılması, 804-ü obyektlərin təmiri, 2134-ü sənaye və kommunal, məişət obyektləri və qeyri-yaşayış sahələri, 35-i inzibati binalar, anbar binaları və s. tikinti işləri üzrədir.

Cari ilin 9 ayı ərzində 2290 ədəd fiziki və hüquqi şəxslərin müraciətləri əsasında hazırlanan qeyri-yaşayış sahəsinin (obyektləri) layihə-smeta sənədləri razılaşdırılmışdır. Bundan başqa, 9 ayda 1446 ədəd Birliyin sifarişi ilə hazırlanmış layihə-smeta sənədi razılaşdırılmışdır.

“Azəriqaz” İB-nın kollektivi bundan sonra qarşıda duran məsul və şərəfli vəzifələrin icrası istiqamətində öz səylərini artırır, ili uğurla başa vurmaq əzmilə çalışır.

T.Əbdüləzizoğlu,

“Respublika”.

 

 

 

 

 

 

Bütün sahələrdə dinamik inkişafa nail olan Xaçmaz rayonunda ötən ilin 9 ayında xeyli iş görülmüşdür. İqtisadiyyatda uğurlu nəticələr əldə olunmuş, sosial-mədəni, tikinti-quruculuq sahəsində bir sıra yeniliklər baş vermişdir. Bu günlərdə sosial-iqtisadi inkişafın yekunları rayon icra hakimiyyətinin yığıncağında geniş müzakirə olunmuş, qarşıda duran vəzifələr müəyyənləşdirilmişdir. Yığıncağı giriş sözü ilə rayon icra hakimiyyətinin başçısı Şəmsəddin Xanbabayev açmış, hesabat məruzəsi dinlənilmişdir.

 

Məruzəçi demişdir ki, 2013-cü il möhtərəm Prezidentimiz cənab İlham Əliyev tərəfindən təsdiq edilmiş regionlarin inkişafı 2-ci Dövlət Proqramının (2009-2013-cü illər) sonuncu ilidir. Proqram çərçivəsində rayonumuzda sənaye və kənd təsərrüfatı istehsalının genişləndirilməsi, yol təsərrüfatında ciddi işlərin görülməsi, elektrik enerjisi, istilik, qaz və su təchizatının yaxşılaşdırılması, səhiyyə, mədəniyyət, idman və təhsil müəssisələrinin tikintisi və yenidən qurulması üzrə nəzərdə tutulmuş tədbirlərin böyük əksəriyyəti həyata keçirilmişdir. 2-ci Dövlət Proqramının qəbulundan keçən müddət ərzində rayonumuzda həyata keçirilmiş tədbirlər nəticəsində 7249 yeni iş yeri açılmışdır ki, onun da 4271-i daimi iş yeridir. Təkcə 2013-cü ilin 9 ayında rayonda 1004 yeni iş yeri açılmışdır.

2013-cü ilin 9 ayında rayon üzrə ümumi məhsul buraxılışı 281,8 milyon manat, sənaye məhsulu 21,5 milyon manat, kənd təsərrüfatının ümumi məhsulunun həcmi 163,7 milyon manat, əhaliyə göstərilən pullu xidmətlərin həcmi 38,5 milyon manat, pərakəndə əmtəə dövriyyəsi 194,2 milyon manat, adambaşina düşən pul gəlirləri 940 manat, orta aylıq əmək haqqı 278,7 manat təşkil etmişdir. Əsas kapitala yönəldilən investisyaların həcmi 22,5 milyon manat, budcə gəlirləri 13,8 milyon, xərcləri 19,9 milyon manat olmuşdur. Dövlət büdcəsindən yerli xərclərə ayrılmış dotasiya 7,9 milyon manat təşkil etmişdir. 9 ay ərzində ümumi sahəsi 11839 kvadratmetr mənzil tikilib istifadəyə verilmişdir.

2013-cü ilin 9 ayında rayonumuzda tikinti-quruculuq və abadlıq sahəsində kifayət qədər böyük həcmli işlər həyata keçirilmişdir. Ötən il Xaçmaz şəhərinin giriş hissəsində əvvəllər tamamilə baxımsız olan, 7 hektardan artıq bir ərazidə salınmış “Çənlibel” parkında bu il də genişləndırmə işləri aparılmışdır. Bildiyiniz kimi, Mədəniyyət və Turizm Nazirliyi tərəfindən Xaçmaz şəhəri 2013-cü il üçün “Əfsanələr Paytaxtı” elan edilmişdir. “Çənlibel” parki yaxınlıgında şəhərə təqdim olunmuş kubokun maketi yaradılmışdır. Bu gün artıq “Çənlibel” parkı da şəhərimizin digər istirahət yerləri kimi xaçmazlıların və şəhərimizin çoxsaylı qonaqlarının sevimli istirahət məkanlarından birinə çevrilmişdir.

Xudat şəhərində də tikinti-quruculuq işləri davam edir. Heydər Əliyev parkında, şəhərin mərkəzi Axundov, Heydər Əliyev küçələrində yenidənqurma işləri həyata keçirilmiş, Heydər Əliyev parkında yaşıllaşdırma və işıqlandırma işləri, eləcə də binaların üzlənməsi aparılmışdır. Bu ilin aprel ayında möhtərəm Prezidentimizin sərəncamı ilə Xudat şəhərinin sosial-iqtisadi inkişafının sürətləndirilməsi məqsədilə ayrılmış vəsait hesabına 155 ailə içməli su ilə təmin olunmuş, 3 binanın dam örtüyü yenilənmiş, 2 küçəyə 14400 kvadratmetr asfalt döşənmış, 3200 kvadratmetr səki tikilmiş və işıqlandırma sistemi yaradılmışdır.

Bu il Xaçmaz şəhərində Qarabağ müharibəsi əlilləri və şəhid ailələri üçün 36 mənzilli, 4 mərtəbəli yaşayış binası tikilmiş, buradakı mənzillər növbəlilik üzrə əlil və şəhid ailələrinə paylanmışdır. Bakı- Rusiya Federasiyası sərhədi avtomobil yolunun Xaçmaz rayonu ərazisindən keçən hissəsində işlər sürətlə davam etdirilir. Möhtərəm Prezidentimizin 27 mart tarixli sərəncamı ilə 10 kilometr uzunlugunda Qımılqışlaq-Mollabürhanlı avtomobil yolunun tikintisi üçün 3,7 milyon manat vəsait ayrılmışdır. Bu yolun tikintisi ilə ərazidə olan 9 kəndin 6 minədək əhalisi və yolun digər istifadəçiləri üçün yol problemi aradan qalxmışdır.

Hesabat dövründə rayonun xidmət sahələri tərəfindən müəyyən işlər görülmüşdür. Bu gün əhalinin təbii qazla təchizatı sahəsində işlər təqdirəlayiqdir. Xaçmaz rayonunun 151 yaşayiş məntəqəsindən cəmi 25705 abonent təbii qazdan istifadə edir. 9 ay ərzində 728 abonent üçün təbii qaz çəkilmişdir. Xudat şəhəri 2-ci şöbə, Şixlar, Maşioba, Çuxuroba, Çiləgir, Şıxhaput, Dədəli və Bostançı kəndləri qazlaşdırılmışdır. Daha 5 kənddə qazlaşma işləri davam edir.

Əhalinin elektrik enerjisi ilə təchizatı, ümumən rayonun elektrik təsərrüfatı sahəsində ötən dövrdə müəyyən işlər görülmüşdür. Bu dövrdə 55 dayaq, 15,4 kilometr naqil və 1 ədəd 25 meqavat gücündə transformator yenisi ilə əvəz olunmuşdur. Əhali sektorundan elektrik enerjisinin dəyərinin yıgımı 9 ay ərzində 94,13 faiz təşkil etmişdir.

Ötən il “Azərsu” SC və Yaponiya Əməkdaşlıq Təşkilatının birgə layihəsi olan Xaçmaz şəhəri və ətraf kəndlərin su və kanalizasiya sistemlərinin yenidən qurulmasına başlanmışdır. Hazırda layihəyə əsasən Xaçmaz şəhərini içməli su ilə təmin edəcək 2000 və 3000  kubmetr tutumlu 2 anbarın tikintisi davam edir. Cari ildə layihə üzrə Xaçmaz şəhərinin ərazisində tikinti-quraşdırma işlərinin aparılması nəzərdə tutulur.

2013-cü il möhtərəm Prezidentimiz cənab İlham Əliyev tərəfindən İnformasiya və Kommunikasiya Texnologiyaları ili elan edilmişdir. Bu, rayonumuzun da rabitə işçilərininin üzərinə məsul vəzifələr qoyur. Bu sahədə 9 ay ərzində xeyli iş görülmüşdür. Bu dövrdə 1124 abonent üçün yüksək sürətli internet xətti, 197 abunəçi üçün telefon xətti çəkilmiş, 13 kənd ATS binası əsaslı təmir olunmuş və Yalama, Həsənqala, Yergüc kəndlərində yeni ATS binası tikilib istifadəyə verilmişdir. Həmçinin rayonun 20-dən çox kənd ATS-də yüksək sürətli internet avadanlıqları quraşdırılmışdır. Müzəffəroba kəndinə 3,5 kilometr uzunluğunda yeni xətt çəkilərək 30 abonent telefon rabitəsi ilə təmin olunmuşdur.

2013-cü ilin məhsulu üçün rayonda, bütün təsərrüfat qurumları daxil olmaqla 35843 ha sahədə taxıl əkilmişdir ki, bunun 29631 hektarı buğda, 6212 hektarı arpa olmuşdur. Rayon üzrə ilk dəfə olaraq 103221 ton taxıl istehsal olunmuşdur ki, bu da ötən ilə nisbətən 22072 ton çoxdur. Hər hektardan taxılın məhsuldarlığı 28,5 sentner təşkil etmişdir ki, bu da ötən ilə nisbətən 5,9 sentner yüksəkdir. Bütün bunlar əhalinin taxılçılıq sahəsinə olan marağının artması, habelə son illər taxılçılığa, xüsusilə də buğda məhsulu istehsalçılarına dövlət dəstəyinin artması səbəb olmuşdur.

“Kənd təsərrüfatı məhsulları istehsalçılarına dövlət dəstəyi haqqında” Azərbaycan Respublikası Prezidentinin 2007-ci il 23 yanvar tarixli sərəncamına əsasən bu vaxtadək rayonun kənd təsərrüfatı məhsulları istehsalçılarına 17,7 milyon manat məbləğində subsidiya verilmiş, həmçinin istehsalçılara güzəştli qiymətlərlə mineral gübrələr, lizinq yolu ilə kənd təsərrüfatı texnikası satılmışdır.

Bu ilin 9 ayında 3593 hektar sahədən 9

1661 ton tərəvəz, 82898 ton meyvə, 4496 ton üzüm, 10886 ton kartof, 947 ton bostan məhsulu istehsal olunmuşdur. Həmçinin 9 ayda 28539 ton süd, 7184 ton ət, 15,4 milyon ədəd yumurta, 189,7 ton yun istehsal olunmuşdur. Müvafiq dövrdə iribuynuzlu mal-qaranın sayı 92287 baş, xırdabuynuzlunun sayı isə 57477 baş olmuşdur. Hazırda bağlarda meyvə yığımı, 2014-cü ilin əkini üçün torpaqların şumlanması və taxıl səpini işləri görülür. Bu günədək rayonumuzda 10350 hektar sahədə şum aparılmış, 1100 hektar sahəyə taxıl səpilmişdir.

Təhsil sahəsi həmişə olduğu kimi bu gün də ölkə rəhbərliyi tərəfindən ən vacib sahələrdən biri kimi qiymətləndirilir. Təhsilin maddi-texniki bazasının gücləndirilməsi sahəsində işlər hesabat dövründə Xaçmaz rayonunda da uğurla davam etdirilmişdir. 2004-2012-ci illər ərzində rayonda 8356 şagird yerlik 30 yeni məktəb binası tikilib istifadəyə verilmiş, 2260 yerlik 4 məktəb binası əsaslı təmir edilmişdir. Təhsilin maddi-texniki bazasının gücləndirilməsi istiqamətində bu il də dövlətimiz tərəfindən çox mühüm işlər görülür. Belə ki, Dövlət İnvestisiya Proqramı ilə ümumiyyətlə, ərazisində məktəb olmayan, şagirdlərin avtomobillərin həddən artıq intensiv hərəkət etdiyi Xaçmaz-Quba magistral yolunu keçməklə qonşu ərazilərdəki məktəblərə getdiyi Arzu kəndində 220 şagird yerlik yeni, müasir məktəbin tikintisinə başlanmışdır. Qəzalı vəziyyətdə olan Qıraqlı kənd ümumi orta məktəbi üçün 180 şagird yerlik, Qaraçı kəndində 120, Qaradağ buduq kəndində 80 şagird yerlik yeni məktəb binalarının, eləcə də Xaçmaz şəhərində 60 yerlik körpələr evi-uşaq bağçasının tikintisi aparılır.

Hesabat dövründə səhiyyənin maddi-texniki bazasının möhkəmləndirilməsi istiqamətində bir sıra işlər görülmüşdür. Mərkəzi rayon xəstəxanasında binaları istismar müddətini başa çatdırmış İnfeksion xəstəliklər şöbəsi, mətbəx, camaşırxana, qazanxana yenidən tikilmiş, Ağ ciyər xəstəlikləri şöbəsi, Təcili Yardım Stansiyası, Patoloji Anatomiya şöbəsi və Qadın məsləhətxanasının binaları əsaslı surətdə yenidən qurularaq müasir inventar və avadanlıqlarla təchiz edilmişdir. Azərbaycan Respublikası Səhiyyə Nazirliyi tərəfindən MRX-də 7 çarpayılıq hemodializ şöbəsi yaradılmışdır.

Rayonda yeni mədəniyyət obyektləri də tikilir. Hazırda şəhərin N.Nərimanov küçəsində, Telekommunikasiya Qovşağının qarşısında 200 kvadratmetr sahəsi olan Əziz Əliyev muzeyinin tikintisi aparılır.

Zəngin turizm potensialı olan Xaçmazda son illər kifayət qədər müasir turizm istirahət obyektləri istifadəyə verilmişdir. Rayonumuzun dəniz sahili zonasında müasir turizm infrastrukturunun yaradılması üçün dövlət səviyyəsində xarici şirkətlərin iştirakı ilə yeni layihələrin hazırlanmasına artıq başlanmışdır. Bu layihələrin yaxın dövrdə gerçəkləşməsi bölgəmizin iqtisadi və mədəni həyatında böyük yüksəlişə səbəb olacaqdır.

Ziyafəddin BAYRAMOV,

“Respublika”.

 

 

 

 

 

 

Azərbaycan Prezidenti İlham Əliyevin sədrliyi ilə  Nazirlər Kabinetinin 2013-cü ilin doqquz ayının sosial-iqtisadi inkişafının yekunlarına həsr olunmuş geniş iclasında aparılan müzakirələr ölkənin  son illər ərzində çox sürətlə inkişaf etdiyini bir daha aydın şəkildə nümayiş etdirmişdir. Bütövlükdə son on ildə olduğu kimi, cari ildə də Azərbaycan iqtisadiyyatının yüksək sürətlə inkişafı davam etmiş, bütün potensial qüvvələr xalqın həyat səviyyəsinin yüksəldilməsinə yönəldilmişdir. Respublikanın bölgələri də sosial-iqtisadi inkişaf yolunda uğurlu addımlar atmışdır. Ümumilikdə respublikaya xas olan inkişaf tempini Neftçala  rayonunun timsalında da aydın görmək olar.

 

Rayon icra hakimiyyətinin başçısı İsmayıl Vəliyev fəalların iştirakı ilə keçirilmiş yığıncaqda iqtisadi və sosial quruculuq sahəsində rayonda həyata keçirilən tədbirlər haqqında geniş məlumat verərək söylədi ki, Nazirlər Kabinetinin iclasının materialları rayonda işgüzar şəraitdə müzakirə olunmuş, görülən tədbirlərə və onların nəticələrinə yüksək qiymət verilmiş, gələcək vəzifələr müəyyənləşdirilmişdir.

Rayon rəhbəri göstərdi ki, həmişə olduğu kimi, bu il də Neftçala rayonunun sosial-iqtisadi və mədəni həyatında uğurlu nəticələr əldə olunmuş, əhalinin rifahının yüksəldilməsi sahəsində səmərəli tədbirlər həyata keçirilmişdir. “2009-2013-cü illərdə Azərbaycan Respublikası regionlarının sosial-iqtisadi inkişafı Dövlət Proqramı” çərçivəsində müvafiq tədbirlərin həyata keçirilməsi nəticəsində bütün sahələrdə inkişaf tempi daha yüksək olmuş, əldə olunan istehsal göstəriciləri və gəlirlər əvvəlki ildəki səviyyəni xeyli ötüb keçmişdir. Cari ilin doqquz ayında əsas makroiqtisadi göstərici olan ümumi məhsul istehsalının həcmi çoxalmışdır. Müxtəlif xidmətlərin göstərilməsində, tikinti-quraşdırma işlərində də artım müşahidə olunmuşdur ki, bunlar rayon əməkçilərinin yüksək əmək fəallığına, ölkə rəhbərliyinin qarşıya qoyduğu vəzifələrin yerinə yetirilməsi üçün səylərini artırdıqlarına dəlalət edir. 

2013-cü ilin 9 ayında rayonda ümumi məhsul istehsalının həcmi ötən ilin müvafiq dövründəkinə nisbətən 7,7 faiz artaraq 147,1 milyon manat olmuşdur.

Kənd təsərrüfatı sahəsində çalışanlar arasında böyük ruh yüksəkliyi hökm sürür. Ötən ilin müvafiq dövrü ilə müqayisədə kənd təsərrüfatının ümumi məhsulu artaraq 62 milyon 516 min manat olmuşdur. Azərbaycan Respublikası Prezidentinin müvafiq sərəncamları əsasında fermerlərə güzəştli şərtlərlə mineral gübrələr, buğda toxumu satılmış, pul yardımı göstərilmişdir. Bu tədbirlərin faydası böyük olmuşdur. 2013-cü ilin məhsulu üçün taxıl əkinləri xeyli artırılaraq təqribən 42944 hektara çatdırılmışdır. Məhsul yığımı qısa müddətdə başa çatdırılmış, 111 min tondan çox məhsul istehsal edilmişdir.

Heyvandarlıqda ciddi nailiyyətlər qazanılmış, ötən ilin müvafiq dövrü ilə müqayisədə  iribuynuzlu mal-qaranın sayı 760 baş, davarların sayı 4197 baş çoxalmış, ət istehsalı 2793 ton, süd istehsalı 399 ton, yumurta istehsalı 236  min ədəd, yun istehsalı 16,8 ton artmışdır. “Aqrolizinq” ASC-nin rayon filialı kənd təsərrüfatı işçilərinin yaxın köməkçisinə çevrilmişdir. Burada inzibati bina, gübrə anbarları, kənd təsərrüfatı texnikalarını saxlamaq üçün talvar və təmir emalatxansı tikilmiş, müxtəlif növ texnikanın sayı artırılmışdır.

Əkinlərin məhsuldarlığını artırmaq məqsədilə suvarma sistemlərinin sahmana salınmasına diqqət artırılmışdır. Kür çayından Xol zonasına 25 kilometr uzunluqda magistral suvarma kanalının çəkilməsi sürətlə davam etdirilmiş, artıq bu irimiqyaslı işə 10 milyon manatdan çox vəsait sərf olunmuşdur. Suvarma kanalları, kollektor-dren sistemi lildən təmizlənmiş, hidrotexniki qurğu və nasos aqreqatları təmir edilmişdir.

Sənaye müəssisələrində 21 milyon manatlıq məhsul istehsal olunmuşdur. Rayonda fəaliyyət göstərən 3 nərə balıqartırma zavodunda 3 milyon 462 min körpə balıq yetişdirilərək Xəzər dənizinə buraxılmışdır.

Neftçalada tikinti-abadlıq işləri gündən-günə genişlənməkdədir. Rayonda hər gün təmizlik işləri görülür, küçələrin və yolların abadlaşdırılması və təmiri işləri aparılır,  yaşıllıqlar salınır.  Əvvəllər mövcud olmuş qanunsuz tikililər sökülərək yerində milli memarlıq üslubunda obyektlər inşa olunur. Cari ilin doqquz ayında təmir-tikinti təşkilatları və xidmətləri tərəfindən yerinə yetirilmiş işlərin həcmi 5 milyon 475 min manat olmuşdur ki, bu da 2012-ci ilin müvafiq dövründəkinə nisbətən xeyli artıqdır.

Heydər Əliyev prospektinin yenidən qurulması, yeni parkların salınması, yol kənarlarının abadlaşdırılması, Heydər Əliyev Mərkəzinin, RİH inzibati binasının, Bayraq meydanının, Şəhidlər kompleksinin, Kür sahili bulvarının, müasir saat qülləsinin, “Axmazgöl” ekoloji sağlamlıq zonasının,  Bankə qəsəbəsində mini-futbol meydançasının tikintisi uğurla davam etdirilmişdir. Hüseyn Cavid adına parkda yeni idman meydançası gənclərin və yeniyetmələrin istifadəsinə verilmişdir.

Rayon ərazisində olan magistral və daxili yolların çəkilişi, bərpası və yenidən qurulması, yol kənarlarında piyada səkilərinin təzələnməsi, yol nişanlarının qurulması, bu səpkidə olan digər işlər yüksək səviyyədə icra edilmişdir. Şorsulu-Xolqarabucaq-Xəzərkənd avtomobil yolu istifadəyə verilmiş, Bankə, Xıllı, Həsənabad qəsəbələrində, kəndlərin bir çoxunda yolların asfaltlaşdırılması tədbirləri həyata keçirilmişdir.

Özəl bölmənin inkişaf etdirilməsi rayon rəhbərliyinin diqqət mərkəzində durmuş və bunun üçün münbit şərait təmin olunmuşdur. 2003-2013-cü illərdə yüzlərlə kiçik sahibkarlıq obyektləri tikilmiş, istehsal sexləri, ticarət və xidmət obyektləri fəaliyyətə başlamışdır.  Sahibkarlığın inkişafına maliyyə yardımı göstərmək məqsədilə fiziki və hüquqi şəxslərə kreditlər verilməsi davam etdirilmişdir.  Sahibkarlara və ayrı-ayrı vətəndaşlara 4,6 milyon manat kredit verilmişdir. Sahibkarlığa Kömək Milli Fondu tərəfindən isə 20 iş adamına 220 min manat məbləğində kredit ödənilmişdir.

Bunun nəticəsində regional inkişaf planlarının əsas konsepsiyalarından olan yeni iş yerlərinin açılması proqnozları təmin olunmuşdur. “Vahid pəncərə” sistemi uğurla tətbiq olunur, yeni sahibkarlıq subyektləri yaradılır. Son doqquz ay ərzində rayonda 3 yeni müəssisə yaradılmış, 1 müəssisənin fəaliyyəti bərpa olunmuş, 466 fiziki şəxs işə başlamışdır. Bu hesaba 518 daimi iş yeri açılmışdır.

Cari ildə xidmət sahələrinin inkişaf etdirilməsinə və xidmətlərin keyfiyyətinin yüksəldilməsinə xüsusi fikir verilmişdir. Rayon əhalisinin rabitə sistemlərindən istifadəsini yaxşılaşdırmaqdan ötrü xeyli iş görülmüş, əhaliyə ötən ildəkindən 17,4 faiz çox xidmət göstərilmiş, ATS-lərin işi sahmana salınmış, peyk avadanlıqları quraşdırılmışdır.  Nəqliyyatda yük daşınması 6,6 faiz, sərnişin daşınması 7,8 faiz artmışdır. İlin əvvəlindən bəri əhaliyə 112 milyon manatlıq istehlak malları satılmış və xidmətlər göstərilmişdir. Əhalinin elektrik enerjisi, təbii qaz və içməli su ilə təminatının yaxşılaşdırılması məqsədilə müxtəlif tədbirlər həyata keçirilmişdir. Əhaliyə və təşkilatlara 104,8 milyon kilovat-saat elektrik enerjisi, 7,2 milyon kubmetr təbii qaz verilmişdir. Qaz təchizatını yaxşılaşdırmaq məqsədilə 5830 metr boru xətti çəkilmişdir.

Dövlət başçısının apardığı siyasətə uyğun olaraq əhalinin sosial şəraitinin yaxşılaşdırılması rayon rəhbərliyinin əsas fəaliyyət sahəsidir, əldə edilən uğurların əsas meyarı da məhz bu sahədir. Müşahidələr göstərir ki, rayon əhalisi əsasən yaxşı yaşayır. Nominal pul gəlirləri 38,5 milyon manat olmuş,  ötən ilin müvafiq dövrü ilə müqayisədə təqribən 4 faiz artmışdır. Adambaşına düşən pul gəlirləri isə 2,8 faiz çoxalaraq 467,7  manata çatmışdır. Hər bir işçinin orta aylıq əməkhaqqı 253 manat təşkil edir ki, bu, keçən ildəkindən çoxdur.

Cari ildə əsas diqqət yoxsulluğun ləğvinə yönəldilmişdir. Pensiyaların və müavinətlərin ödənilməsində problem qalmamışdır. Aztəminatlı ailələrə sosial yardımların verilməsi tam nizama düşmüşdür. Hazırda ünvanlı sosial yardım alan ailələrin sayı 1135-yə çatmışdır. İlin birinci yarısında rayonda 13251 nəfər pensiyaçı və müavinət alan olmuş, şəhid ailələri, əlillər, qocalar və tənha insanlar hər cür qayğı ilə əhatə olunmuşlar. 

Təhsil, səhiyyə və mədəni quruculuq sahələrində xeyli iş görülmüşdür. Pedaqoji kollektivlərdə tədrisin keyfiyyətinin yaxşılaşdırılmasına daha yüksək səviyyədə diqqət yetirilmiş, xüsusilə buraxılış sinif şagirdlərinin bilik səviyyəsinin yüksəldilməsi rayon təhsil şöbəsinin və məktəb rəhbərlərinin gündəlik diqqət mərkəzində saxlanılmış, buraxılış imtahanları uğurla başa çatdırılmışdır. 733 nəfər orta təhsil haqqında, 1007 nəfər doqquzuncu sinfi bitirmək üzrə şəhadətnamə almışdır. Məzunlardan 384 nəfər ali məktəblərə qəbul olunmuş, 33 nəfər 500-600, 10 nəfər 600-dən yuxarı bal toplamışdır. Şəhər 1 və 4 saylı, Qədimkənd, Ərəbqardaşbəyli, Mürsəqulu kənd, Xıllı qəsəbə 1 saylı orta məktəblərinin kollektivləri bu sahədə xüsusilə fərqlənmişlər. Yeni dərs ilində 1037 uşaq birinci sinfə qəbul olunmuşdur.

Səhiyyə xidmətinin keyfiyyətinin yüksəldilməsinə xüsusi diqqət yetirilir. Rayon mərkəzi xəstəxanasının bir neçə korpusunda əsaslı təmir işləri davam etdirilir.  Rayonda 160 çarpayılıq 2 xəstəxana, 15 həkim məntəqəsi, 4 tibb ambulatoriyası fəaliyyət göstərir. Doqquz ayda bu müəssisələrə 113430 ambulator müraciət olunmuş, 1773 xəstə qəbul edilmişdir. Hazırda mərkəzi xəstəxanada təmir işləri aparılır. Tibb xidməti müəssisələrinə kifayət qədər bərk və yumşaq inventar verilmişdir. Rayonda sakinlərə mədəni xidmətin səviyyəsinin gücləndirilməsi, maddi-mənəvi irsin mühafizəsi, tarixi abidələrin qorunması daim diqqət mərkəzində saxlanılır. Gənclərin fiziki tərbiyəsində, bədən tərbiyəsi və idmanın inkişaf etdirilməsində xeyli  yeniliklər vardır.

Sabir MUSTAFAYEV,

“Respublika”.

 

 

 

 

 

 

Gəncə daha bir ili yola salmağa hazırlaşır. Ötən dövr qədim şəhərin tarixinə yazılacaq, şüurlarda, qəlblərdə dərin iz buraxacaq möhtəşəm işlərlə zəngindir. Şəhər addım-addım, küçə-küçə böyüyür, gözəlləşir, memarlıq siması Qədim Şərq və müasir Avropa memarlığını özündə birləşdirən binalarla zənginləşir. Cari ilin doqquz ayının yekunları və qarşıda duran vəzifələrlə bağlı keçirilən fəallar yığıncağında yüksəlişin geniş panoramı canlandırıldı, ili uğurla başa vuraraq ölkəmizdə əldə olunan nailiyyətlərə sanballı töhfə vermək məqsədilə daha böyük perspektivlər müzakirə olundu.

 

Fəallar yığıncağında 2013-cü ilin 9 ayı ərzində şəhərin sosial-iqtisadi inkişafının yekunları və qarşıda duran vəzifələr haqqında şəhər icra hakimiyyətinin başçısı Elmar Vəliyev geniş məruzə etdi. Şəhərdə həyata keçirilmiş işlər barədə söhbət açmazdan əvvəl natiq Azərbaycanın son illər, xüsusən də bu il əldə etdiyi möhtəşəm nailiyyətlərdən danışaraq diqqəti prezident seçkilərinə yönəltmiş, demokratik, şəffaf və azad keçirilən seçimin nəticələrini ölkə əhalisinin istək və arzularının ifadəsi kimi dəyərləndirmişdir.

Şəhərdə istehsal edilmiş ümumi məhsul buraxılışı əvvəlki ilin eyni dövrü ilə müqayisədə 18,1 faiz artaraq, müqayisəli qiymətlərdə 495,2 milyon manatlıq məhsul istehsal olunmuş və xidmətlər göstərilmişdir. İqtisadiyyatda çalışan işçilərin orta aylıq əməkhaqqı 296,7 manat, 2012-ci ilin müvafiq dövründə isə 258,4 manat təşkil etməklə 14,8 faiz artmışdır.

Bu dövrdə orta aylıq əməkhaqqı

maliyyə və sığorta bölməsində 753,4 manat, elektrik enerjisi, qaz, buxar istehsalı, bölüşdürülməsi və təchizatı bölməsində 400,2 manat, tikintidə 329,0 manat, dövlət idarəetməsi və müdafiə, icbari sosial təminat bölməsində 330,4 manat təşkil etmişdir.

9 ay ərzində istehlakçılara 8,1 faiz çox məhsul göndərilmiş, xidmətlər göstərilmişdir. 2013-cü il oktyabr ayının əvvəlinə sənaye müəssisələrinin anbarlarında 5 milyon 186,0 min manatlıq hazır məhsul ehtiyatı olmuşdur. Ümumi istehsalın 88,7 faizi sənaye məhsulu istehsalının, 11,3 faizi sənaye xarakterli xidmətlərin hesabına yaranmışdır.

“Azərbaycan Polad İstehsal Kompleksinin yaradılması haqqında” ölkə başçısının sərəncamı ilə Gəncə şəhərinin və Daşkəsən rayonunun ərazilərində dəmir filizinin hasilatından polad istehsalına qədər bütün mərhələləri əhatə edən Polad istehsalı kompleksi yaradılacaqdır. Bu, minlərlə yeni iş yerlərinin yaradılması deməkdir. Bu barədə danışan natiq demişdir ki, “Gəncə DET.AL” Alüminium MMC-nin Alüminium zavodunda metaltökmə və fasiləsiz yayma, həmçinin təzyiqlə yayma və boyama istehsal sahələri tam hazır vəziyyətə gətirilmiş və hazırda sınaq məhsulları istehsal edilir. Bu sahələrin istismara verilməsi ilə əlavə olaraq 200 nəfərdən çox işlə təmin edilmişdir.

“Gəncə-Qənnadı” ASC-nin Süd emalı zavodunda texnoloji prosesin və quraşdırılmış avadanlıqların tam işçi vəziyyətinə gətirilməsi işləri aparılır. Müəssisənin inzibati binasında, həmçinin istehsalat sahəsində yenidənqurma və təmir işləri sürətləndirilmişdir.

“Elba” Kəsim və Emal Fabrikası” MMC-nin tikintisi davam etdirilir. Burada iri və xırdabuynuzlu mal-qaranın avtomatlaşdırılmış üsulla kəsimi ilə yanaşı, quş kəsimi də həyata keçiriləcəkdir. Müəssisənin ilin sonuna istifadəyə verilməsi nəzərdə tutulur.

“Gəncə Şərab-2” ASC-də gündəlik istehsal gücü 5 ton olan spirtin emalından yaranan tullantıların təkrar emalı sexi fəaliyyətə başlamışdır. Şərab emalı sahəsində İtaliya və Xorvatiya respublikalarından alınan daha müasir avadanlıqların quraşdırılması işləri davam etdirilir.

“Gəncə Əlvan Metal emalı” ASC-də neft sənayesinin tələbatına uyğun olaraq dərin özlüklərin, estakadaların korroziyadan qorunması məqsədilə alüminium əsaslı protektorlardan başqa maqnezium əsaslı, daha mürəkkəb, daha keyfiyyətli protektorların istehsalına başlanılmışdır. Bununla yanaşı, digər çeşiddə, növdə məhsul istehsalı üçün işlər görülür.

Son illər Gəncə şəhəri əsl tikinti meydançasını xatırladır. Şəhər dinamik inkişaf edir,

həyata keçirilən genişmiqyaslı yenidənqurma və abadlıq-quruculuq işləri özünün möhtəşəmliyi ilə diqqəti cəlb edir. Ötən 9 ayda şəhərin iqtisadi və sosial sahələrinin inkişafına bütün maliyyə mənbələrindən əsas kapitala 164,2 milyon manatdan çox vəsait yönəldilmişdir.

Məruzəçi bu barədə danışarkən demişdir ki, istifadə edilmiş vəsaitin 97,4 faizi bilavasitə tikinti-quraşdırma işlərinin yerinə yetirilməsinə sərf olunmuşdur. 2012-ci illə müqayisədə tikinti-quraşdırma işlərinə yönəldilmiş vəsaitin miqdarı 2,2 dəfə artmışdır.

Dövlət mülkiyyətinə məxsus müəssisə və təşkilatlar inşaat işlərinə 151,9 milyon manat, qeyri-dövlət mülkiyyətinə məxsus müəssisələr isə 12,3 milyon manat vəsait sərf etmişdir.

Əsas kapitala yönəldilmiş sərmayənin ümumi həcmində büdcə vəsaitləri 78,5 faiz, müəssisə və təşkilatların vəsaitləri 11,9 faiz, bank kreditləri 4,3 faiz, büdcədənkənar fondların vəsaitləri 3,7 faiz, əhalinin şəxsi vəsaitləri 1,6 faiz təşkil etmişdir.

Tikinti müəssisələrinin öz gücləri ilə yerinə yetirdikləri inşaat işlərinin həcmi 44 milyon 912,4 min manat təşkil etmiş və bunun 96,3 faizi qeyri-dövlət müəssisələrinin payına düşmüşdür. Görülmüş işlərin 96,6 faizini yeni tikinti, yenidənqurma və genişləndirmə, 0,7 faizini əsaslı təmir, 2,6 faizini cari təmir, 0,1 faizini isə sair təmir işləri təşkil etmişdir.

Aparılmış inşaat işləri nəticəsində bir sıra sosialyönümlü obyektlər istifadəyə verilmiş, ötən 9 ay ərzində ümumi sahəsi 20,8 min kvadratmetr fərdi yaşayış evləri, 5 min 986 şagird yerlik ümumtəhsil məktəbləri və digər qeyri-istehsal təyinatlı obyektlər istifadəyə verilmişdir.  Ulu öndərin adını daşıyan parkda nadir, möhtəşəm memarlıq abidəsi olan Heydər Əliyev Mərkəzinin, burada həmçinin Müasir İncəsənət Muzeyi, Gənclər Mərkəzi, 3800 yerlik “Amfiteatr”, “Şəlalələr” kompleksi, “Zəfər Tağı”nın inşası başa çatdırılmışdır.

Nizami Gəncəvi Muzeyinin, Uşaq Yaradıcılıq və Məhsəti Gəncəvi mərkəzlərinin tikintisi başa çatdırılmış, Gəncə Dövlət Filarmoniyasının, “İmamzadə” dini kompleksinin tikintisi davam etdirilir.

Ölkə başçısının bilavasitə təşəbbüsü ilə yaradılan Azərbaycan Respublikasının Prezidenti yanında Vətəndaşların Xidmət və Sosial İnnovasiyalar üzrə Dövlət Agentliyinin nəzdində Gəncə şəhərində fəaliyyət göstərəcək “ASAN” Xidmət Mərkəzinin tikintisi başa çatdırılmışdır.

Mərkəz şəffaflığın artırılmasına, vətəndaşların əlavə xərclərinin və vaxt itkisinin azalmasına, elektron xidmətlərdən daha geniş istifadə edilməsinə xidmət edir.

Heydər Əliyev prospektində şəhərin memarlıq üslubuna uyğun Nizami Polis İdarəsinin inzibati binasının inşası davam etdirilir. Kəpəz Polis İdarəsinin inzibati binasının inşası isə başa çatdırılmışdır.

Əttarlar küçəsində yerləşən 86, 96, 109, 113, 116, 125, 133 ünvanlarda, həmçinin Ozan küçəsi ilə Təbriz küçəsinin kəsişməsindəki fərdi yaşayış evinin, Atatürk prospekti, 254 və 281 N-li evlərin, Ə.Əşrəfzadə küçəsində Hərbi hospitalın və Veteranlar küçəsində Gəncə Hərbi Məhkəməsinin, H.Əliyev küçəsi ilə Atatürk prospektinin kəsişməsində yerləşən qədim binaların fasadlarında təmir-bərpa işləri başa çatdırılmışdır.

Son bir ildə 92 fərdi ev, ondan 69-u Nizami prospektində, 23-ü Ş.İ.Xətai prospektində inşa edilmişdir. Həmin prospektlərdə yollar genişləndirilmişdir.

Regionların sosial-iqtisadi inkişafı II Dövlət Proqramı çərçivəsində Gəncəçay çayının şəhər ərazisindən keçən hissəsində sahilboyu bərkitmə işlərinin aparılması və çayın məcrasının yenidən qurulması davam etdirilir. Sahil boyu park salınır, mövcud parklar yenidən qurulur, sosial obyektlər inşa edilir.

Hacıkənd qəsəbəsində aparılan abadlıq və quruculuq işlərinin davamı olaraq qəsəbənin mərkəzi yolunun kənarında 1 min 200 poqonmetr bordür qoyulmuş, 450 kvadratmetr səki daşı döşənmiş, 1 min 600 kvadratmetr istinad divarı hörülmüş, 375 kvadratmetr aqlay və 160 ədəd səlcukdan istifadə edilmişdir.

Qəsəbədə 3 min 800 kvadratmetr sahədə abadlıq işləri aparılmış, kitabxananın çardaq hissəsi yenidən qurulmuş, Qəsəbə İcra Nümayəndəliyinin binasının fasad hissəsi aqlayla üzlənir, H. Zeynalabdin adına parkda abadlıq-quruculuq işləri aparılır, yol kənarında 125 ədəd işıq dayaqlarının bünövrəsi qoyulmuş və bu istiqamətdə işlər davam etdirilir.

Dövlət başçısının sərəncamı ilə 5 yaşayış qəsəbəsini Gəncə şəhəri ilə birləşdirən avtomobil yollarının tikintisi cari ildə də davam etdirilmiş və Şıxzamanlı qəsəbəsində 1,6 kilometr uzunluğu olan Azərbaycan, Ağamalıoğlu və Həmid Sultanov küçələri asfaltlaşdırılmış, 70-ə yaxın işıqlandırma sistemi quraşdırılıb, yol kənarına həmişəyaşıl ağaclar əkilib, qəsəbənin ictimai nəqliyyat işləyən küçələrində dayanacaqlar quraşdırılmışdır.

Sakinləri narahat edən mənzil-məişət problemləri istiqamətində irimiqyaslı tədbirlər görülərək qısa müddət ərzində yaşayış binalarının dam örtükləri əsaslı təmir olunur, həyətyanı sahələr abadlaşdırılır, lift təsərrüfatı yenidən qurulur.

Mənzil fonduna məxsus 250-yə yaxın yüksək mərtəbəli binanın dam örtüyü dəyişdirilmiş və bu işlər hazırda da davam etdirilir.

Məruzədə şəhərdə yeni yaradılan qəsəbələrdə həyata keçirilmiş işlər də yer almışdır. Natəvan qəsəbəsində telefon abonentlərinə göstərilən rabitə xidmətinin keyfiyyətini yüksəltmək məqsədilə, eləcə də yolun genişləndirilməsi ilə əlaqədar burada 5 min metr hava rabitə xətti yeraltı xətlə əvəz edilmiş, 130 ədəd azbes borudan, 8 ədəd rabitə quyusundan istifadə edilmiş, 120 ədəd rabitə ağac dayağı ləğv edilmişdir.

Cavad xan qəsəbəsində tutumu 2 min 48 nömrə yeni elektron ATS-in inşası davam etdirilir. Sadıllı qəsəbəsində isə 1 min 24 nömrə tutumu olan elektron ATS layihələndirilmiş və avqust ayında onun tikintisinə başlanılacaqdır.

Bu gün ölkəmizdə həyata keçirilən ən başlıca vəzifələrdən biri də vətəndaşların sosial müdafiəsinin və layiqli həyat səviyyəsinin təmin olunmasıdır.

Son illər Azərbaycanda makroiqtisadi sabitliyə, dinamik iqtisadi artıma nail olunmuş, yoxsulluğun azaldılmasında və əhalinin sosial rifahının yüksəldilməsində ciddi irəliləyişlər olmuşdur.

Bu sahədə həyata keçirilən tədbirlərdən danışan məruzəçi demişdir ki, şəhər əhalisinin gəlirləri 2012-ci ilin 9 ayı ilə müqayisədə 9,8 faiz artmışdır.

Bir nəfərə düşən gəlir isə 9,1 faiz artaraq orta hesabla 2 min 855,8 manat təşkil etmişdir.

Əhalinin sosial müdafiəsinə xidmət edən ünvanlı dövlət sosial yardımı proqramı çərçivəsində ailə üzvlərinin sayı 16 min 816 nəfər olan 4 min 115 aztəminatlı ailəyə 4 milyon 793 min manat vəsait ödənilmişdir. Bu, bir ailəyə hər ay orta hesabla 119 manat dövlət yardımı deməkdir.

Qarabağ müharibəsi əlilləri və şəhid ailələri ilə yanaşı, məcburi köçkünlərə diqqət, qayğı və mənəvi dayaq olmaqla onlara müxtəlif formada maddi və mənəvi yardımlar edilir, qaldırılan məsələlərin həllində köməklik göstərilir.

Gəncə Şəhər İcra Hakimiyyəti tərəfindən cari ilin 9 ayı ərzində 43 nəfər Qarabağ müharibəsi əlili və şəhid ailəsinə fərdi mənzil inşası və sahibkarlıq fəaliyyəti ilə məşğul olmaq məqsədilə torpaq sahəsi ayrılmış, 4 nəfərə isə ayrılmış torpaq sahəsində ev inşa edilmişdir.

Hesabat dövründə 28 nəfər Qarabağ müharibəsi əlili və şəhid ailəsinə, həmçinin aztəminatlı ailələrə təmənnasız mərasim xidmətləri göstərilmişdir.

Cari ilin əvvəlindən Yeni Gəncə yaşayış massivində əlillər və şəhid ailələri üçün inşa edilmiş 9 mərtəbəli binanın istismara verilməsi ilə 81 ailə, o cümlədən 34 nəfər Qarabağ müharibəsi əlili, 33 nəfər şəhid ailəsi, 12 nəfər Çernobıl əlili və 1 nəfər Böyük Vətən müharibəsi əlili mənzillə təmin edilmişdir.

Əhalinin məşğulluğunun təmin edilməsi, dövlət siyasətinin prioritet istiqamətlərindən biri kimi daim diqqət mərkəzindədir. Şəhərin sosial-iqtisadi həyatının dinamik inkişafının təmin edilməsi bu məsələdə vacib rol oynayır.

2012-ci ilin 9 ayı ilə müqayisədə şəhərdə iqtisadi əmək fəaliyyəti ilə məşğul olanların sayı 0,7 faiz artmaqla 159 min 560 nəfərə çatmışdır.

“Məşğulluq haqqında” Azərbaycan Respublikası Qanunundan irəli gələn vəzifələrin və “Məşğulluq Strategiyasının həyata keçirilməsi üzrə 2011-2015-ci illər üçün Dövlət Proqramı”nda nəzərdə tutulmuş tədbirlərin icrası ilə əlaqədar Gəncə Şəhər Məşğulluq Mərkəzi cari ilin əvvəlindən müəyyən işlər görmüş və bir sıra tədbirlər həyata keçirmişdir.

Əmək qabiliyyətli əhalinin 71,3 faizi iqtisadiyyatın və sosial bölmənin müxtəlif sahələrində məşğul olmuşdur.

Ölkə iqtisadiyyatının stabil və dinamik inkişafı qeyri-neft sektorunun tərəqqisi üçün əlverişli şərait yaratmış və bu sahə dövlət siyasətinin prioriteti kimi müəyyən olunmuşdur.

Sahibkarlara göstərilən hərtərəfli dövlət dəstəyinin bariz nümunəsi kimi Sahibkarlığa Kömək Milli Fondu tərəfindən 2013-cü ilin 9 ayı ərzində Gəncədə 19 sahibkarlıq subyektlərinə müvəkkil kredit təşkilatları vasitəsilə 8,0 milyon 342 min manat məbləğində güzəştli kredit vəsaiti ayrılmışdır.

Əhalinin və digər istehlakçıların normal və təhlükəsiz qaz təchizatı ilə təmin edilməsi, yeni salınmış yaşayış qəsəbələrinin qazlaşdırılması, qaz təchizatı şəbəkəsinin əsaslı təmiri istiqamətində bir sıra mühüm işlər görülmüşdür.

Hesabat dövründə əhalinin və digər istehlakçıların standarta uyğun və fasiləsiz təbii qazla təmin edilməsi məqsədilə 28 min 138 poqonmetr uzunluğunda əlavə qaz xətti çəkilmişdir.

Yeni yaradılmış Cavad xan və Məhsəti qəsəbələrində qaz təchizatının yaxşılaşdırılması və nəql olunan qazın itkisiz istehlakçılara çatdırılması məqsədilə polad borularla 30 min 666 poqonmetr uzunluğunda qaz xətti çəkilmişdir.

2013-cü ilin 9 ayı ərzində istehlakçılara 91 milyon 957 min 33 kubmetr həcmində realizə olunmuş ümumi qazın 105,5 faizi ödənmiş, toplanan vəsaitin həcmi ötən ilin müvafiq dövrü ilə müqayisədə eyni səviyyədə qalmışdır.

“Açıq Kommunal İnfrastruktur Proqramı II” çərçivəsində Gəncə şəhər əhalisinin keyfiyyətli su ilə təminatı və kanalizasiya xidmətlərinin yenidənqurulması sahəsində aparılan genişmiqyaslı işlər davam etdirilməkdədir.

Payız-qış mövsümünə hazırlıqla əlaqədar 18 nömrəli tam orta məktəb və Xarici dillər təmayüllü gimnaziya istisna olmaqla bütün təhsil müəssisələrində müasir istilik sistemləri və qazanxanalar quraşdırılmışdır.

2012-2013-cü tədris ilində 2960 şagird yerlik 4 məktəb binası əsaslı təmir olunmuşdur. Cari ilin mart ayında 840 şagird yerlik 16 nömrəli tam orta məktəb və 16 sentyabr 2013-cü il tarixdə 31 N-li tam orta məktəbdə bərpa-gücləndirmə işləri aparıldıqdan sonra istifadəyə verilmişdir.

68 nəfər xarici ölkələrin (Rusiya, Türkiyə, ABŞ, Gürcüstan və s.) ali məktəblərinə qəbul olmuşdur. Ali məktəblərə qəbul olanların 141 nəfəri 500-dən, 40 nəfəri isə 600-dən yuxarı nəticələr göstərmişdir. 17 nəfər 650-dən yuxarı bal toplamışdır.

Məruzədə qeyd edilmişdir ki, ötən müddətdə səhiyyə ocaqlarında da yenidənqurma və təmir-tikinti işləri davam etdirilmişdir. Bu sahədə görülən işlərin davamı olaraq Abbas Səhhət adına 1 saylı şəhər və Yoluxucu xəstəliklər xəstəxanalarında əsaslı təmir işləri sürətləndirilmiş, Təcili Tibbi Yardım xəstəxanasında və 2 saylı Poliklinikada yeni istilik sistemi quraşdırılmış, Təcili Tibbi Stansiyanın və 2 saylı uşaq xəstəxanasının dam örtüyü əsaslı təmir olunmuşdur.

A.Səhhət adına Xəstəxananın nəzdində Rayonlararası Hemodializ Mərkəzi ən müasir avadanlıqlarla təchiz olunaraq açılmışdır, Psixiatriya xəstəxanasında, 2 və 5 saylı, 1 və 2 saylı Uşaq poliklinikalarında təmir işləri başa çatdırılaraq istifadəyə verilmişdir. Vərəm əleyhinə xəstəxanada yeni müasir tələblər səviyyəsində qurulmuş Rayonlararası Bakterioloji Laboratoriya fəaliyyətə başlamışdır.

Azərbaycan Prezidenti İlham Əliyevin yürütdüy

ü dövlət siyasətinin əsas prioritetlərindən biri kimi mədəni irsimizin mühüm tərkib hissəsi olan tarix-memarlıq abidələrinin təmir-bərpa işləri aparılmış, mədəniyyət müəssisələrinin maddi-texniki bazasının möhkəmləndirilməsi və qorunub saxlanılması sahəsində Gəncə Şəhər İcra Hakimiyyəti rəhbərliyinin təşkilatçılığı ilə mühüm işlər görülmüş və bu sahədə müəyyənləşdirilmiş kompleks işlərin icrası gündəlik nəzarətdə saxlanılmışdır.

Heydər Əliyev Fondunun prezidenti, YUNESKO və İSESKO-nun xoşməramlı səfiri, millət vəkili Mehriban xanım Əliyevanın gərgin əməyi nəticəsində YUNESKO-nun bəşəriyyətin qeyri-maddi mənəvi irsinin reprezentativ siyahısına daxil edilmiş “Novruz” bayramı şənlikləri hər il olduğu kimi, bu il də öz xüsusi özəlliyi ilə təşkil olunmuşdur.

Martın 20-də bayram şənlikləri şəhərin Cavad xan küçəsindən başlayaraq rəngarəng milli oyunlar və sərgilərin nümayişi ilə Heydər Əliyev meydanında davam etdirilmiş, burada “Bahar toyu” musiqili ədəbi-bədii kompozisiya, “Göygöl” Mahnı və Rəqs Ansamblının ifasında konsert proqramı bayram şənliyinin iştirakçılarına təqdim olunmuşdur.  21 martda isə bu meydanda Xalq artisti Brilyant Dadaşovanın, Əməkdar artist Abbas Bağırovun, Teymur Əmrahın və digər incəsənət ustalarının iştirakı ilə keçirilən konsert “Novruz” atəşfəşanlğı ilə başa çatmışdır.

Gəncə Şəhər İcra Hakimiyyətinin rəhbərliyinin təşkilatçılığı ilə gəncəlilər ulu öndər Heydər Əliyevin 90 illik yubileyinə xüsusi hazırlaşmışlar. Şanlı yubileyin ölkə miqyaslında layiqincə keçirilməsini təmin etmək məqsədilə Prezident İlham Əliyev “Azərbaycan xalqının ümummilli lideri Heydər Əliyevin 90 illik yubileyi haqqında” sərəncam imzalamışdır. Şəhərimizdə ulu öndərin yubileyinin müxtəlif formada, yüksək səviyyədə, geniş miqyasda qeyd olunması üçün tədbirə start verilmişdir.

Şəhər icra hakimiyyəti başçısının səyyar qəbulu zamanı qaldırılan məsələlərin sayı 16,0 faiz artmış, hər bir məhəllə və qəsəbənin ümumi problemləri sakinlərin birbaşa iştirakı ilə müzakirə edilərək onların həlli üçün operativ tədbirlər görülmüşdür.

Bu ilin əvvəlindən şəhərin qəsəbə və yaşayış massivlərində 42 səyyar qəbul keçirilmişdir. Həmin qəbullarda 832 nəfər vətəndaş tərəfindən irəli sürülmüş 188 məsələnin hamısı öz müsbət həllini tapmışdır.

Elmar Vəliyev məruzəsinin sonunda iştirakçıları əmin etmişdir ki, Gəncə şəhərinin sosial-iqtisadi inkişafı, əhalinin həyat səviyyəsinin yaxşılaşdırılması, geniş abadlıq və quruculuq işlərinin aparılması, həyata keçirilən kommunal və digər xidmətlərin səviyyəsinin yüksəldilməsi istiqamətində işlər ilin qalan dövrü ərzində müvəffəqiyyətlə davam etdiriləcək, dövlət başçısı İlham Əliyevin Nazirlər Kabinetinin məlum iclasında qarşıya qoyduğu vəzifələrin icrası naminə bütün imkanlar səfərbər olunacaqdır.

Məruzə ətrafında müzakirələrdə çıxış edənlər şəhərdə həyata keçirilmiş işləri ölkə başçısının diqqət və qayğısının nəticəsi kimi dəyərləndirdi və respublikamızda əldə edilən möhtəşəm uğurlara gəncəlilərin də öz sanballı töhfələrini verəcəyinə əminlik ifadə etdilər.

Y.TANRIVERDİYEV,

“Respublika”.

 

 

 

 

 

 

Paris, 26 oktyabr (AzerTAc). Avropa Şurası Parlament Assambleyasının (AŞPA) komitə iclaslarının vaxtaşırı olaraq 47 üzv ölkənin bu qurumla daha fəal və səmərəli əməkdaşlıq edən paytaxtlarında keçirilməsi xoş ənənəyə çevrilmişdir. AŞPA-nın mədəniyyət, elm, təhsil və media komitəsinin növbəti toplantısı həmin ənənəyə müvafiq olaraq oktyabrın 25-də Lissabonda keçirilmişdir. Toplantıda Azərbaycanı Milli Məclisin deputatı, AŞPA-dakı nümayəndə heyətinin üzvü Rafael Hüseynov təmsil etmişdir. R.Hüseynov toplantı ilə əlaqədar Lissabondan müsahibəsində bildirmişdir ki, bu iclasda komitə üzvlərindən başqa Almaniyadan, İsveçdən, Niderlanddan dəvət edilmiş ekspertlər, Portuqaliya parlamentinin üzvləri, hökumətinin yüksək vəzifəli təmsilçiləri də iştirak etmişlər. O, demişdir ki, iclasda ümumavropa əhəmiyyəti daşıyan bir sıra mədəniyyət, elm və təhsil problemləri ətrafında geniş müzakirələr aparılmışdır.

“Təhsildə müsbət idarəçilik və yüksək keyfiyyət”, “Çoxmədəniyyətli cəmiyyətlərdə ümumi cəhətlər və fərqlər”, “Ümumavropa evi çərçivəsində əməkdaşlıq” mövzularındakı məruzələrin müzakirələri zamanı Rafael Hüseynov problemlərlə bağlı Azərbaycanın dövlət və millət maraqları baxımından mühüm olan məqamlarını diqqətə çatdırmışdır. Daha müfəssəl diskussiyalar isə “Avropanın təhlükə altında olan mədəni irsi” mövzusu ətrafında getmişdir. Bu problem üzrə Serbiyadan olan məruzəçi xanım Vesna Maryanoviç və Avropa Nostra təşkilatının baş katibi xanım Sneska Quadvileq-Mihayloviçin təqdimatlarından sonra Rafael Hüseynov çıxış etmişdir. R.Hüseynov Ermənistanın Azərbaycana qarşı 20 ildən artıq  davam edən təcavüzünün göründüyündən də geniş miqyaslar daşıdığını, yalnız Azərbaycan ərazilərinin zəbt edilməsi ilə məhdudlaşmadığını, həm də mənəviyyat sahəsinə ciddi zərbələr vurduğunu bildirərək demişdir: “Bu gün Avropa Şurasının Portuqaliya paytaxtında, özlüyündə qiymətli mədəni abidə və sənət incisi olan tarixi Senat binasında mədəni irslə bağlı müzakirələr aparması çox rəmzidir. Mədəniyyət nümunələrini ayrı-ayrı xalqlar yaradırlar. Təbii ki, bu sərvətlər ilk növbədə onların irsidir, lakin böyük ölçüdə bu dəyərlər heç vəchlə yalnız həmin xalqların mülkiyyəti olmaqla məhdudlaşmır, bütün bəşəriyyətin ortaq dəyərləri hesab edilir. Məsələn, mənim ölkəmdə - Azərbaycanda yaşı milyon yarım ildən artıq olan Azıx mağarası vardır. Bu, Azərbaycan mədəniyyətinin ən qədim izlərini yaşadan nadir bir məkandır. Amma, eyni zamanda, bu mağara mədəni Avropa insanının ən ilk sivilizasiya ocaqlarındandır. Yəni Azıx mağarası mənim, hər bir azərbaycanlının sərvəti olmaqla bərabər, həm də sizin - hər bir ingilisin, fransızın, almanın, italyanın, portuqalın, başqa sözlə, bütün avropalıların ortaq irsi, dünya mədəniyyətinin ayrılmaz parçasıdır. Ona görə də biz belə sərvətlərə hamımız ortaq həssas münasibət bəsləməli, onlarla müştərək iftixar etdiyimiz kimi, həm də onları birlikdə qorumalıyıq.

Azərbaycan 2001-ci ildən Avropa Şurası Parlament Assambleyasının üzvüdür. Bu mötəbər qurumda fəaliyyətə başladığımız vaxtlarda mənim hazırladığım ilk sənədlərdən biri elə mədəniyyətlə bağlı olub. Çünki biz mədəniyyətə, mədəni irsin qoruması işinə yalnız kulturoloji problem kimi deyil, ilk növbədə, insan haqları ilə bilavasitə bağlı olan siyasi məsələ kimi yanaşırıq. On iki il əvvəl tövsiyə üçün qətnamə şəklində hazırladığımız həmin sənəd “Azərbaycanın işğal altındakı ərazilərindəki mədəni sərvətlərinin Ermənistan tərəfindən qəsb edilməsi və dağıdılması” adlanırdı. Məsələ bundadır ki, Azərbaycanın 20 faiz ərazisini zəbt etmiş Ermənistanın təcavüzkar siyasəti çoxşaxəli fəsadlar doğurmuşdur. Bu işğal həm Azərbaycan mədəniyyətinə, həm ölkənin ekologiyasına, həm təhsil sisteminə, həm də demoqrafik inkişafına ciddi zərərlər yetirmiş və acınacaqlısı odur ki, bu proses dayanmadan davam etməkdədir. Adını çəkdiyimiz, bütün Avropa mədəniyyətinin beşiklərindən hesab edilən Azıx mağarası Azərbaycanın hazırda Ermənistanın işğalı altında olan və Dağlıq Qarabağdan kənardakı Füzuli rayonu ərazisindədir. Bu misilsiz mədəniyyət incisini erməni vandalları bir müddət silah anbarına çevirmiş, bir ara silahatma təlimləri keçirilən atəşgaha döndərərək saysız zədələrə məruz qoymuş, abidənin müstəsna dəyəri haqqında Azərbaycan tərəfinin qaldırdığı həyəcanlı çağırışlardan sonra oranı özününküləşdirmək cəhdində olmuş, xarici arxeoloqları cəlb etməklə mağarada tədqiqatlar aparmağa səy göstərmişdilər. Bütün bunları söyləməkdə məqsədim ondan ibarətdir ki, ümumbəşəri əhəmiyyətə malik bu qəbil təhlükə altında olan abidələri mühafizə etmək üçün məruzələr hazırlamaq, bəyanatlar vermək azdır. Bəla ondadır ki, təhlükə altındakı mədəni abidələri qorumaq, xilas etmək üçün UNESCO, Avropa Şurası və bir sıra digər dünya təşkilatları nə qədər çalışsalar da, həmin niyyətləri reallaşdırmaq üçün on illərdən bəri mövcud olan konvensiyalar mövcuddursa da, beynəlxalq hüququn tələblərinə, könüllü olaraq imzaladığı ümumavropa qanunlarına riayət etməkdən boyun qaçıran Ermənistan kimi ölkələrin intizamsızlığı və başıpozuqluğu vəziyyətin nizama düşməsində böyük əngəllər yaradır. Nəticədə konvensiyalar da, Avropa Şurasının hazırladığı dəyərli məruzələr də işləməyən kağız parçalarına çevrilir. Bunlar isə həm Avropa Şurasının nüfuzuna xələl gətirir, həm də ciddi Avropa konvensiyalarını hörmətdən salır. Ona görə də biz gerçək səmimiyyətlə Avropada təhlükə altında olan mədəni sərvətlərin qorunmasını arzulayırıqsa, konvensiyaların işləməsinə, Ermənistan kimi qanunlara zidd hərəkət xəttini həyat normasına çevirmiş ölkələrə qarşı yetərincə sərt mövqe nümayiş etdirilməsinə nail olmalıyıq”.

Problem üzrə əsas məruzəçilərin hər ikisi deputat Rafael Hüseynovun fikirlərinə şərik çıxdıqlarını bildirmiş, hərbi münaqişə bölgələrində müzakirə edilən məsələnin köklü həlli istiqamətində bu yanaşmanın ən təsirli amillərdən ola biləcəyini təsdiqləmişlər.

 

 

 

 

 

 

Müstəqil Azərbaycan dövlətinin dünyadakı nüfuzu daim artmaqdadır. Bu baxımdan, Prezident İlham Əliyevin rəhbərliyi ilə Azəbaycanın yürütdüyü məqsədyönlü xarici siyasət nəinki keçmiş İttifaq respublikaları, eləcə də bütün region üçün bir nümunə, model sayıla bilər. Son on ildə qazanılan nailiyyətlərdən danışarkən Azərbaycanın regionun lideri olduğunu xüsusi qeyd etmək lazımdır.

Ölkəmiz siyasi və iqtisadi güc mərkəzi kimi hətta regional çərçivədən kənara çıxmağa başlayıb. Azərbaycan müstəqil, balanslaşdırılmış, düşünülmüş xarici siyasət yürüdür. Bu siyasət dünya ölkələri, beynəlxalq təşkilatlarla əməkdaşlığın möhkəmləndirilməsinə, Qərbə, Avratlantik strukturlara, dünya iqtisadiyyatına inteqrasiya prosesinin sürətləndirilməsinə yönəlib. Bu, bir daha sübut edir ki, gənc dövlətlər həmişə yalnız güclü dövlət başçısının rəhbərliyi altında öz müstəqiliklərini qoruya, onu daha da möhkəmləndirə bilərlər. Müstəqil Azərbaycan dövlətinin, onun bugünkü möhtəşəm uğurlarının timsalında bu reallıq özünü tam aydın göstərir. Azərbaycan son illərdə öz sürətli iqtisadi inkişaf tempini saxlamış və yürüdülən düzgün siyasətin məntiqi nəticəsi birmənalı olaraq təsdiqləyir ki, Azərbaycanda bu siyasi kursa alternativ yoxdur.

Cənab İlham Əliyevin seçkilərdəki qələbəsi ötən on ildə ölkəmizdə əldə edilən möhtəşəm uğurların məntiqi nəticəsidir. Bu gün tam əminliklə deyə bilərik ki, cənab İlham Əliyev prezident seçkisi öncəsi xalqla görüşlərində vəd etdiyi işlərin hamısı reallığa çevrilib.

Ötən 10 ildə regionların sosial-iqtisadi inkişafı ilə bağlı həyata keçirilən iki Dövlət Proqramı və ayrı-ayrı regionlar üzrə inkişaf proqramları Azərbaycanın simasını büsbütün dəyişdirdi. İndi elə bir gün olmaz ki, hansısa  bir müəssisə işə düşməsin, yeni iş yerləri yaradılmasın, abadlıq-quruculuq işləri aparılmasın.  Yollar, körpülər salınır, su problemləri, ekoloji problemlər həllini tapır, ərzaq təhlükəsizliyi həyata keçirilir, aqrar sahənin inkişafı üçün dövlət tərəfindən yardımlar edilir. Səhiyyə ocaqları, məktəblər inşa olunur.

Təbii ki, görülmüş işləri saymaqla qurtarmaq olmaz. Çünki hər gün yeniliklə, sosial-iqtisadi inkişafımızı əks etdirən göstəricilərlə zəngindir. Xalq bunları görür, qiymətləndirir. Odur ki, oktyabrın 9-da bu inkişafa, bu tərəqqiyə, bunu reallaşdıran düzgün siyasətə səs verdi, onu bir daha müdafiə etdi. Güclü və qüdrətli Azərbaycanın gələcəyinə tam təminat verən cənab İlham Əliyevə səs verdi. Çünki bu liderin alternativi yoxdur. Təcrübəli ekspertlər də birmənalı olaraq təsdiqləyirlər ki, Heydər Əliyevin müəyyən etdiyi strategiyanı, siyasi kursu başqa heç kim cənab İlham Əliyev kimi uğurla davam və inkişaf etdirə bilməzdi.

Bu məqamda on il əvvəli xatırlayaq. 2003-cü il prezident seçkiləri ərəfəsində ümummilli liderimiz Heydər Əliyev Azərbaycan xalqına ünvanladığı müraciətində cənab İlham Əliyev haqqında demişdir: “O, yüksək intellektli, praqmatik düşüncəli, müasir dünya siyasətini və iqtisadiyyatını gözəl bilən, enerjili və təşəbbüskar bir şəxsiyyətdir. Sizi əmin edirəm ki, həm İlham Əliyev, həm də Yeni Azərbaycan Partiyası bundan sonra da xalqımızın ən layiqli övladlarını öz ətrafında sıx birləşdirəcək, Azərbaycan dövlətinin inkişafı və xalqımızın firavanlığı yolunda çox işlər görəcəklər.

(əvvəli 1-ci səhifədə)

İnanıram ki, mənim axıra çatdıra bilmədiyim məsələləri, planları, işləri sizin köməyiniz və dəstəyinizlə İlham Əliyev başa çatdıra biləcək. Mən ona özüm qədər inanıram və gələcəyinə böyük ümidlər bəsləyirəm”. O zaman xalqımız böyük səs çoxluğu ilə cənab İlham Əliyevin namizədliyini dəstəklədi və andiçmə mərasimində dövlət başçısı dedi: “Azərbaycanı qüdrətli dövlətə çevirmək üçün, ən başlıcası ölkədə Heydər Əliyevin siyasəti davam etdirilməlidir. Bu gün yüksək kürsüdən çıxış edərək, mən Azərbaycan xalqına söz verirəm ki, bu siyasətə sadiq qalacağam, heç vaxt bu yoldan dönməyəcəyəm, Heydər Əliyevin siyasətini davam etdirəcəyəm”.

Bəli, ötən on il Heydər Əliyev uzaqgörənliyi İlham Əliyevin realist, praqmatik olduğunu dönə-dönə sübuta yetirdi. Həmçinin, xalq müdrikliyi bir daha təsdiqini tapdı. Və indiki prezident seçkilərində də xalq cənab İlham Əliyevin əməli fəaliyyətini, şəxsi keyfiyyətlərini bir daha təsdiqlədi və bütün dünya yenidən ümummilli liderimiz Heydər Əliyev siyasətinin, işıqlı ideyalarının təntənəsini gördü. Xalq əmindir ki, növbəti  illərdə də ölkəmiz öz inkişafında daha böyük zirvələr fəth edəcək, demokratik prinsiplər möhkəmlənəcək, iqtisadi qüdrətimiz qat-qat artacaqdır.

On ildə iqtisadiyyatın liberallaşdırılması, haqsız rəqabətin aradan qaldırılması, özəl sektorun dəstəklənməsi, sahibkarlara güzəştli kreditlərin verilməsi sahəsində ciddi addımlar atılıb. Prezident İlham Əliyevin bu illərdə imzaladığı “Sahibkarlığa dövlət maliyyə dəstəyinin göstərilməsi sahəsində əlavə tədbirlər haqqında”, “Azərbaycan Respublikası Sahibkarlığa Kömək Milli Fondunun vəsaitinin istifadəsi qaydalarının təkmilləşdirilməsi haqqında”, “Azərbaycan Respublikasında sahibkarlığın inkişafı ilə bağlı bəzi tədbirlər haqqında” və digər fərmanları, sərəncamları, dövlət proqramları sahibkarlığın inkişafına güclü təkan vermiş, bu sahədə yeni mərhələ yaratmışdır.

Bu gün respublikamızda sahibkarlığın inkişafı mühüm dövlət siyasətinə çevrilib. Ölkəmizin uğurlarında sahibkarların rolunu xüsusi dəyərləndirən Prezident İlham Əliyev onlara süni problemlərin yaradılmasının yolverilməzliyini qətiyyətlə bəyan edib. Ölkəmizdə sahibkarlığın inkişafına geniş imkanlar yaradılıb. Sahilbkarları gərəksiz müdaxilələrdən himayə edən dövlət başçısı demişdir: “Dövlət strukturları yersiz yoxlamaları dayandırmalıdırlar. Buna ehtiyac yoxdur. Artıq Azərbaycanda iqtisadi islahatlar sahəsində bütün işlər görülüb. Biz şəffaflığa nail ola bilmişik. Şəffaflıq bizim üçün, iqtisadi inkişaf üçün və ümumiyyətlə, ölkəmizin inkişafı üçün mühüm əhəmiyyət daşıyır”.

Əlbəttə, dövlət başçısının uğurlu siyasətinə, cəsarətli mövqeyinə güvənib biz iş adamları da yeni qlobal layihələrin həyata keçirilməsinə təşəbbüskarlıq göstərir, Azərbaycanda sahibkarlığın inkişafı üçün münbit şəraitin olduğuna inanırıq. Bu gün ölkəmizdə həm şəffaf biznes mühiti var, həm də fəaliyyətimizi tənzimləyən güclü qanunvericilik bazası yaradılıb. Ölkəmizdə hər bir işgüzar insan, sağlam təfəkkürə və məntiqə güvənən iri və xırda sahibkarlar perspektivli iş strukturu yaradır, fəaliyyətlərini daha da genişləndirə bilirlər. Hər kəs məşğul olduğu sahədə geniş imkanlardan qədərincə, ən başlıcası isə, şəffaflıq prinsiplərini qorumaqla faydalanır.

Bizim üçün ən böyük təsəlli, gələcəyə inam üçün etibarlı zəmanət budur ki, ümummilli liderin layiqli siyasi davamçısı — Prezident İlham Əliyev onillik fəaliyyəti ilə hər bir vətəndaşın Prezidenti olduğunu sübut və təsdiq etdi.

İş adamı olaraq son illər Azərbaycanda müşahidə olunan yüksəlişi, milli sahibkarlığa göstərilən diqqət və qayğını vətəndaş təəssübkeşliyi ilə dəyərləndirirəm. Bir faktı qeyd edim ki, uğurlu iqtisadi siyasət nəticəsində özəl sektorun ümumi daxili məhsulda payı 85 faizə yüksəlib. Azərbaycan Prezidenti bu sahəyə dəstəyini artırmaqla sahibkarların güvənc və kömək yeri, himayədarı olduğunu bir daha təsdiqlədi. Hökumət iş adamlarının fəaliyyətinə yaxından kömək məqsədilə onlara ayrılan güzəştli kreditlərin miqdarını xeyli artırdı.

Son on ildə Bakıda həyata keçirilən yeni tikinti layihələrində milli üsluba üstünlük verilməsi, abadlıq-quruculuq işlərinin keyfiyyətcə yeniləşməsi, müasirliyin qədim Şərq memarlıq üslubu ilə uzlaşması dövlət başçısının bu sahəyə daha çox maraq göstərməsi ilə bağlıdır. Bu gün Azərbaycanda sahibkar ondan tələb olunan vəzifəni həm müstəqil təhlil edə bilir, həm də hüquqi məsuliyyətini tam dərk edir. Ona görə də ayrı-ayrı vətəndaşlarla bağlanan müqavilənin şərtlərini və tələblərini, cəmiyyət qarşısındakı mənəvi məsuliyyətini heç vaxt unutmur. Yaxşı bilirik ki, hər bir iş adamı sosial tədbirlərin adi iştirakçısı yox, əsl təşkilatçısından biri olmalıdır. Azərbaycan Prezidenti hər birimizdən eyni məsuliyyətlə, tələbkarlıqla, işgüzarlıqla çalışmağı tələb edir. Heç də təsadüfi deyil ki, dövlət başçısı cənab İlham Əliyev iş adamlarına müraciətlə demişdir: “İş adamları, dövlətin bütün yerli icra orqanları — hamımız birgə işləməliyik. Əlbəttə ki, təbiidir, — bütün ölkələrdə belədir, — iş adamları öz biznesləri haqqında düşünməli, biznesi inkişaf etdirməlidirlər. Eyni zamanda, imkan olanda çətin vəziyyətdə yaşayanlara da əl uzatmalıdırlar. Mən belə biznesi, iş adamlarını təqdir edirəm və sizi də bu işlərə çağırıram. Sizə deyə bilərəm ki, mən bundan sonra da ölkədə biznesin inkişafı üçün əlimdən gələni edəcək və bütün lazımi tədbirləri görəcəyəm”.

Bu gün Azərbaycanda özəl sektor sərbəst bazar iqtisadiyyatının əsas aparıcı qüvvəsinə çevrilib. Sərbəst bazar müasibətlərinin güzəştsiz tərəfdarı kimi  Prezident İlham Əliyev sahibkarlığın inkişafını — kiçik və orta biznes şəbəkəsinin genişlənməsini təmin etmək üçün ardıcıl tədbirlər görür. Güzəştli kreditlərin ayrılması, sahibkarların iş əmsalını yüksəltmək üçün yersiz müdaxilələrin qarşısının alınması və digər problemlərin həlli yolları düzgün araşdırılır, milli iqtisadiyyatın dinamik inkişafına hərtərəfli zəmin yaradılır.

Azad sahibkarlığın inkişafına yönəldilmiş sabitlik, tərəqqi və demokratikləşmə prosesi ildən-ilə daha da güclənir, davamlı inkişafa çevrilir. Halal yolla maddi imkanlarını artıran hər bir insan üçün maneəsiz və sərhədsiz biznes mühiti yaradılıb, özəl sektorun imkanları genişləndirilib.

Azərbaycan iqtisadiyyatının dinamikası bazar mexanizminin hərəkətverici qüvvəsi hesab edilən sahibkarlığın inkişafı ilə uzlaşdırılır. Daha doğrusu, sahibkarlara işgüzar şərait yaratmadan sosial xarakterli ciddi problemlərin həllinə nail olmaq çətindir. Təcrübə sübut edir ki, infrastrukturun yeniləşməsi, iş yerlərinin açılması, rəqabət qabiliyyətli məhsul istehsalının artırılması, bir sözlə, əsaslı iqtisadi islahatların aparılması ölkədə sağlam biznes mühitinin yaradılmasından daha çox asılıdır. Ona görə də sahibkarlara elə imkan yaradılmalıdır ki, onların hər biri sərbəst rəqabətə tablaşa bilsin, şəffaf biznes mühitinin formalaşmasında güclərini sınasınlar.

Azərbaycanda çoxpilləli biznesə keçid prosesi də uğurla davam edir. Ona görə ki, bu prosesə mane olan hər cür bürokratik əngəllərin qarşısı qabaqlayıcı tədbirlərlə alınır, sahibkarlıq subyektlərinin çevik fəaliyyətinə geniş imkanlar yaradılır. Azərbaycan Prezidenti cənab İlham Əliyev biznesin inkişafı üçün bundan sonra da faydalı və gərəkli addımlar atacağını bildirmişdir. Bunun üçün ölkəmizdə potensial imkanlar mövcuddur. O ki qaldı ondan faydalanmaq mexanizminə, bunun üçün də geniş perspektivlər var. İş adamlarına — biznesin inkişaf dayaqlarına dəfələrlə müraciət edən Azərbaycan Prezidenti birmənalı bəyan edib ki, ölkəmizdə sağlam biznes mühitini genişləndirmək üçün heç bir məhdudiyyət yoxdur. Ona görə də bizim hər birimiz gələcəkdə də yeni layihələrin reallaşmasına ümid və inamla baxırıq, etibarlı dövlət dəstəyini hər an hiss edirik.

Azad İBRAHİMOV,

“ANT İnşaat” MTK-nın sədri.

 

 

 

 

 

 

Bakı, 26 oktyabr (AzərTAc). Oktyabrın 26-da Azərbaycan Respublikasının daxili işlər naziri, general-polkovnik Ramil Usubov Gəncə şəhərində növbəti qəbul keçirmişdir.

Daxili İşlər Nazirliyinin mətbuat xidmətindən bildirmişlər ki, şəhər baş  polis idarəsində Gəncə, Göygöl, Samux, Şəmkir, Ağstafa, Tovuz, Gədəbəy, Qazax, Daşkəsən şəhər və rayonlarından olan sakinləri, eyni zamanda, bölgədə məskunlaşmış Kəlbəcər və Xocalıdan olan bir qrup məcburi köçkünü qəbul edən nazir onların müraciətlərini dinləmiş, qaldırılan məsələlərin operativ şəkildə həll edilməsi üçün konkret tapşırıqlar vermişdir.

Müraciətlərin böyük əksəriyyəti elə yerindəcə öz həllini  tapmışdır. Polis fəaliyyətinə aid olmayan ərizələrin aidiyyəti üzrə digər dövlət orqanlarına göndəriləcəyi və onlara mövcud qanunvericiliyə uyğun şəkildə baxılacağı nəzərə çatdırılmışdır.

Sakinlər göstərilən diqqət və qayğıya, bölgələrdə mütəmadi olaraq vətəndaşların qəbulunun təşkilinə, icra orqanlarının rəhbərləri tərəfindən müraciətlərinə operativ münasibətə və həssas yanaşılmasına görə dövlətimizin başçısına minnətdarlıq etmiş, Azərbaycan Prezidentinin ölkəmizin tərəqqisinə, iqtisadi dirçəlişinə, beynəlxalq imicinin daha da yüksəldilməsinə yönəlmiş siyasətini daim dəstəkləyəcəklərini bildirmişlər.

Daha sonra daxili işlər naziri Ramil Usubov Gəncə Şəhər Baş Polis İdarəsi Kəpəz Rayon Polis İdarəsinin yeni inzibati binasının açılış mərasimində iştirak etmişdir.

Məlumat verilmişdir ki, tikintisinə ötən ilin aprelində başlanmış beşmərtəbəli inzibati binanın ümumi sahəsi 3300 kvadratmetrdir. Ən müasir standartlara uyğun tikilmiş binanın bütün otaqları zəruri avadanlıq, inventar və kommunikasiyalarla təchiz edilmişdir. Yeni tikilidə 52 xidməti otaq, 120 yerlik akt zalı vardır. Binada mərkəzləşdirilmiş ventilyasiya-istilik sistemləri, ayrıca qazanxana və transformator istifadəyə verilmiş, rabitə-kommunikasiya və elektrik xətləri quraşdırılmış, abadlaşdırma, yaşıllaşdırma və xarici işıqlandırma işləri yerinə yetirilmişdir. İnzibati binada qeydiyyat və şəxsiyyət vəsiqəsi, dövlət yol polisi  bölmələri, növbətçi hissə və digər xidməti otaqlar yaradılmışdır.   

General-polkovnik Ramil Usubov növbətçi hissəyə, xidməti otaqlara, o cümlədən virtual təlim keçirilməsi üçün xüsusi avadanlıq və kompyuter sistemi ilə təchiz edilmiş tədris otağına, akt zalına baxmış, foyedə ümummilli lider Heydər Əliyevin zəngin dövlətçilik fəaliyyətini, Azərbaycan Respublikasının Prezidenti İlham Əliyevin daxili və xarici siyasət sahəsində əldə etdiyi uğurları, daxili işlər orqanlarına xüsusi diqqət və qayğısını əks etdirən guşə və fotostendlərlə tanış olmuşdur.

Görülən işləri yüksək qiymətləndirən nazir şəxsi heyətin normal fəaliyyət göstərməsi üçün lazım olan bütün şəraitin yaradılmasından məmnunluğunu bildirmişdir.

Daxili işlər naziri yeni inzibati binanın akt zalında şəxsi heyətlə görüşmüş, əlamətdar hadisə münasibətilə onları təbrik etmiş, konkret tapşırıq və tövsiyələrini vermişdir. O, xüsusilə vurğulamışdır ki, Azərbaycan Respublikasının Prezidenti İlham Əliyev ictimai qaydanın və ictimai təhlükəsizliyin təminində, cinayətkarlıqla qətiyyətli mübarizədə, insan hüquq və azadlıqlarının qorunmasında daxili işlər orqanlarının rolunu  daim yüksək  qiymətləndirir, onun lazımi texniki vasitələr və avadanlıqlarla təchizatına xüsusi diqqət yetirir. Bütün bunlar isə polis əməkdaşlarını daha yaxşı işləməyə ruhlandırır, eyni zamanda, vətəndaşların rahatlığına xidmət edir.

General-polkovnik Ramil Usubov Azərbaycan Prezidentinin rəhbərliyi altında ölkəmizdə gedən geniş quruculuq işlərinin ölkənin ikinci böyük şəhərinin də simasını büsbütün dəyişdiyini, Gəncənin daha da gözəlləşdiyini diqqətə çatdırmışdır.

Qeyd olunmuşdur ki, son illər Gəncədə cinayətkarlıqla mübarizədə, ictimai asayişin təmin edilməsində bir sıra uğurlar əldə edilmişdir və bu, şəhər polisinin yerli hüquq mühafizə orqanları ilə birgə fəaliyyətinin nəticəsidir.

Nazir əmin olduğunu bildirmişdir ki, idarənin şəxsi heyəti bu diqqət və qayğıya layiqli xidməti ilə cavab verəcək, rayonda sabitliyin, əmin-amanlığın nümunəvi qorunması və cinayətkarlıqla qətiyyətli mübarizə işində səylərini əsirgəməyəcəkdir.

Tədbirdə Gəncə Şəhər İcra Hakimiyyətinin başçısı Elmar Vəliyev iştirak etmişdir.

 

 

 

 

 

 

Bakı, 26 oktyabr (AzərTAc). Misirin nüfuzlu “Əl-Aləm əl-yaum” qəzetində səfir Şahin Abdullayevin Azərbaycanda keçirilmiş prezident seçkiləri ilə bağlı məqaləsi dərc edilmişdir.

Azərbaycanın Misirdəki səfirliyindən bildirmişlər ki, məqalədə ölkədəki seçkiqabağı vəziyyət, namizədlər üçün yaradılmış şərait haqqında ətraflı məlumat verilmişdir. Səfir seçkiləri çoxlu sayda beynəlxalq və yerli müşahidəçinin izlədiyini vurğulamış, prezidentliyə namizədlərin seçkiqabağı təşviqat üçün ödənişsiz efir vaxtından və digər mətbuat vasitələrindən istifadə etmək hüququna malik olduqlarını qeyd etmişdir. Diplomat 10 namizəd arasında İlham Əliyevin digər namizədləri böyük səs çoxluğu ilə üstələyərək yenidən Azərbaycan Respublikasının Prezidenti seçildiyini vurğulamışdır.

Məqalədə, həmçinin Azərbaycanın enerji təhlükəsizliyi sahəsində Avropanın regiondakı əsas tərəfdaşı olduğu, eyni zamanda, ölkənin xarici siyasətinin əsas prioritetlərindən birinin Ərəb-İslam dünyası ilə əməkdaşlığın təşkil etdiyi oxucuların diqqətinə çatdırılmışdır.

Səfir məqalədə son 10 ildə Azərbaycanın əldə etdiyi uğurlardan da bəhs etmiş, borc alan ölkədən borc verən ölkəyə çevrildiyini bildirmişdir.

Diplomat kifayət qədər mürəkkəb, eyni zamanda, strateji əhəmiyyətli bölgədə yerləşdiyinə görə Azərbaycanın xarici siyasət kursunu müəyyənləşdirərkən bir tərəfdən özünün milli maraqlarını qorumaq və bölgənin aparıcı dövləti statusunu saxlamaq, digər tərəfdən də bölgədə maraqları olan bütün dövlətlərlə, habelə qonşularla bərabərhüquqlu tərəfdaşlıq münasibətlərinə malik olmaq meyarlarından çıxış etdiyini bildirmişdir.

Müəllif Azərbaycan hökumətinin ötən 10 ildə həyata keçirdiyi islahatlardan, iqtisadi sahədə əldə etdiyi nailiyyətlərdən söz açmış, bütün bu nailiyyətlərin əsas səbəbi kimi ölkədəki daxili siyasi sabitliyin təmin olunmasını göstərmişdir. O, həmçinin əldə edilmiş uğurları dövlətin iqtisadi qüdrətinin artması və xarici asılılığın tamamilə aradan qalxması ilə əlaqələndirmişdir.

Azərbaycanın neft-qaz ölkəsi kimi tanınması ilə yanaşı, qeyri-neft sektorunun da inkişafını vurğulayan səfir artıq xarici valyuta ehtiyatlarının 48 milyard manatı keçdiyini, bununla da ötən illər ərzində ölkə iqtisadiyyatının çoxşaxəli inkişafına yönəlmiş islahatların nəticəsində qeyri-neft sektorunda 2,7 dəfə real artımın olduğunu bildirmişdir. 2003-2012-ci illərdə qeyri-neft sektorunda artımın dünyada ən yüksək göstəricilərdən birini təşkil edərək ildə orta hesabla 10 faiz olduğu, bundan əlavə, son 10 ildə ölkədə açılan 1 milyon 200 mindən artıq yeni iş yerinin 90 faizdən çoxunun qeyri-neft sektorunun payına düşdüyü qeyd edilmişdir.

Ş.Abdullayev Azərbaycanda ötən 10 il ərzində turizm sektorunun inkişafına yönəlmiş dövlət proqramları, bu sahəyə yatırılan investisiyalar haqqında ətraflı məlumat vermiş, 2012-ci ildə Azərbaycana gələn xaricilərin sayının iki milyondan çox olduğunu bildirmişdir.

Əhalinin sosial rifahının və həyat şəraitinin yüksəldiyini vurğulayan müəllif qeyd etmişdir ki, 2003-cü ildə səhiyyəyə ayrılan xərclər cəmi 69 milyon manat olduğu halda, 2013-cü ildə bu rəqəm 666,3 milyon manata, təhsilə ayrılan xərclər isə 2003-cü ildəki 243 milyon manatdan 1,5 milyard manata çatdırılmışdır.