XƏBƏR LENTİ

Azərbaycanın Böyük Britaniyadakı səfirliyi və səfirliyin nəzdində fəaliyyət göstərən hərbi attaşelik aparatının təşkilatçılığı ilə Respublika və Silahlı Qüvvələr günləri münasibətilə rəsmi ziyafət təşkil edilib. Tədbir çərçivəsində, həmçinin Azərbaycan ilə Britaniya arasında diplomatik münasibətlərin qurulmasının 25 illik yubileyi qeyd olunub.

İngiltərə-Azərbaycan Cəmiyyətinin Azərbaycan tərəfdən həmsədri, M.V.Lomonosov adına Moskva Dövlət Universitetinin Bakı filialının rektoru, akademik Nərgiz Paşayeva tədbirdə iştirak edib.

Rəsmi ziyafətdə Britaniyanın dövlət və hökumət nümayəndələri, Londonda akkreditə olunmuş diplomatik korpusun təmsilçiləri, Britaniya ictimaiyyətinin, Azərbaycan və türk icmalarının nümayəndələri də daxil olmaqla 300-ə yaxın qonaq qatılıb.

Əvvəlcə azərbaycanlı skripkaçı Nəzrin Rəşidovanın ifasında Azərbaycanın və Britaniyanın dövlət himnləri səsləndirilib.

Tədbirdə çıxış edən Azərbaycanın Böyü

k Britaniyadakı səfiri Tahir Tağızadə əvvəlcə yaxın günlərdə Mançester şəhərində törədilən terror aktı qurbanlarının yaxınlarına başsağlığı verib.

Səfir 1918-ci il mayın 28-də Azərbaycan xalqının öz müstəqilliyini elan etdiyini və müsəlman Şərqində ilk demokratik respublikanın ölkəmizdə qurulduğunu bildirib. Uzun illər SSRİ-nin tərkibində olmasına baxmayaraq, dövlətçilik ənənəsini itirməyən Azərbaycan xalqının 1991-ci ildə Sovetlər Birliyinin dağılması ilə yenidən öz müstəqilliyinə qovuşduğu və ulu öndər Heydər Əliyevin səyləri nəticəsində ölkəmizin dünya birliyinin bərabərhüquqlu üzvünə çevrildiyi diqqətə çatdırılıb.

Britaniya ilə Azərbaycan arasındakı münasibətlərdən söhbət açan T.Tağızadə qarşılıqlı rəsmi səfərlərdən bəhs edib. O, diplomatik münasibətlərimizin 25 illiyi münasibətilə Britaniya Xarici İşlər Nazirliyi rəsmilərinin ölkəmizə səfərlərini misal çəkib. O, Azərbaycanın təhsil naziri Mikayıl Cabbarovun Britaniyaya səfəri və Oksford İslam Mərkəzi və Nizami Gəncəvi Elmi Mərkəzini ziyarətindən söhbət açıb. T.Tağızadə Oksford Universiteti nəzdində fəaliyyət göstərən Nizami Gəncəvi Elmi Mərkəzinin fəaliyyətinə, Azərbaycan və Qafqaz bölgəsini öyrənən Britaniya Fondunun yaradılmasına görə İngiltərə-Azərbaycan Cəmiyyətinin həmsədrləri Nərgiz Paşayevaya və Lord Germana xüsusi minnətdarlığını ifadə edib.

Britaniyada fəaliyyət göstərən diaspor təşkilatlarımıza təşəkkür edən diplomat Avropa Azərbaycan Cəmiyyətinin fəaliyyətini yüksək qiymətləndirib.

Səfir ölkələrimiz arasında siyasi, hərbi, təhlükəsizlik məsələlərinin, beynəlxalq təşkilatlar çərçivəsində əməkdaşlığın daha da inkişaf etdirilməsinin prioritet olduğunu bildirib. Azərbaycanın NATO-nun etibarlı tərəfdaşı olduğunu deyən diplomat qeyd edib ki, Britaniya ilə Azərbaycan arasında hərbi sahədə əməkdaşlıq da hər ötən il daha da genişlənir. T.Tağızadə Azərbaycan Silahlı Qüvvələrinin bütün şəxsi heyətinə minnətdarlığını ifadə edib.

Britaniya Baş nazirinin Azərbaycan üzrə ticarət elçisi Baronessa Emma Nikolson Azərbaycana səfəri haqqında məlumat verib. Xüsusilə Azərbaycan musiqisinin aşiqi olduğunu bildirən parlament üzvü musiqi sahəsində əlaqələrimizin daha da inkişafının tərəfdarı olduğunu qeyd edib. Səfəri çərçivəsində Azərbaycan tarixi, mədəniyyəti haqqında öyrəndiyini bildirən Nikolson xalqımızın qonaqpərvərliyindən xüsusi olaraq bəhs edib. İkitərəfli münasibətlərimizin bundan sonra da yüksələn xətlə inkişaf edəcəyinə əminlik ifadə olunub.

Britaniya Xarici İşlər Nazirliyinin Şərqi Avropa və Mərkəzi Asiya İdarəsinin direktoru Maykl Tethem Mançesterdə baş verən bədbəxt hadisəyə görə Britaniya xalqına başsağlığı və həmrəylik mesajları göndərən Azərbaycan Prezidenti İlham Əliyevə və xalqımıza minnətdarlığını ifadə edib. O, eyni zamanda, Britaniyanın kədərinə şərik olan bütün ölkələrə və onların rəsmilərinə minnətdarlığını bildirib.

M.Tethem ikitərəfli münasibətlərimizin yüksələn xətlə inkişaf etdiyini diqqətə çatdırıb. Qeyd edilib ki, Britaniya Azərbaycanın ən böyük investorlarındandır. Britaniya şirkətlərinin Azərbaycanda fəaliyyətə böyük maraqları var. XİN rəsmisi əlaqələrimizin sadəcə enerji deyil, digər sahələrdə də sürətlə genişləndiyinin sevindirici hal olduğunu vurğulayıb. Bildirilib ki, Britaniya şirkətləri Azərbaycanın ev sahibliyi etdiyi beynəlxalq tədbirlərin təşkilatçılığında bu ölkə ilə sıx əməkdaşlıq edir. Azərbaycan IV İslam Həmrəyliyi Oyunlarını da layiqincə keçirdi.

M.Tethem qeyd edib ki, münasibətlərimizin daha da inkişafı üçün böyük potensial mövcuddur və Britaniya hökuməti Azərbaycan ilə əlaqələrin genişləndirilməsində maraqlıdır.

Sonda tədbir iştirakçıları Azərbaycan stendini ziyarət ediblər. Stenddə ölkəmizin iqtisadi, sosial inkişafından və turizm imkanlarından bəhs edən kitab və jurnallar nümayiş olunub.

 

 

 

 

 

 

AZƏRTAC

Azərbaycanın İspaniyadakı səfirliyi tərəfindən 28 May-Respublika Günü münasibətilə Madriddə qəbul təşkil edilib.

Mərasimdə İspaniyanın Xarici İşlər və Əməkdaşlıq Nazirliyinin nümayəndələri, bu ölkədə akkreditə olunmuş diplomatik korpusun təmsilçiləri, hərbi attaşelər, ispaniyalı iş adamları, həmvətənlərimiz, KİV nümayəndələri iştirak ediblər.

Təntənəli mərasimdə əvvəlcə Azərbaycanın və İspaniyanın dövlət himnləri səsləndirilib.

Tədbiri giriş sözü ilə açan səfir Anar Məhərrəmov Şərqdə ilk demokratik respublika olan Azərbaycan Xalq Cümhuriyyətinin yaranma tarixindən, mövcud olduğu qısa müddət ərzindəki fəaliyyətindən danışıb. O, ölkəmizin müstəqilliyini bərpa etdikdən sonra qazanılmış uğurlardan, dövlət quruculuğu sahəsində ümummilli lider Heydər Əliyevin əvəzsiz xidmətlərindən bəhs edib. Bildirilib ki, 1991-ci ildə dövlət müstəqilliyini bərpa edən Azərbaycan 1993-cü ildə hakimiyyətə ulu öndər Heydər Əliyevin xalqın təkidi ilə qayıtması ilə yeni inkişaf mərhələsinə qədəm qoyub. Ermənistan-Azərbaycan, Dağlıq Qarabağ münaqişəsində atəşkəs əldə olunub və ölkəmizdə bütün sahələrdə inkişafa nail olunub. Məhz bu anlamda 1994-cü ildə imzalanmış “Əsrin müqaviləsi” əvəzolunmaz dəyərə malik idi.

Bu gün də Ulu Öndərin siyasi xəttinin layiqli davamçısı Prezident İlham Əliyevin rəhbərliyi ilə ölkəmizin daxili və xarici siyasətdə əldə etdiyi nailiyyətlər davam edir.

Diplomat Azərbaycan ərazilərinin 20 faizinin Ermənistan tərəfindən işğal edildiyini, bunun nəticəsində bir milyondan çox azərbaycanlının qaçqın və məcburi köçkün vəziyyətinə düşdüyünü qeyd edib. Səfir bildirib ki, bununla belə bu gün Azərbaycan Cənubi Qafqazın aparıcı dövlətidir. Ölkəmiz bir çox beynəlxalq tədbirlərə, mötəbər idman yarışlarına və mədəniyyət festivallarına ev sahibliyi edir.

2016-cı ilin Azərbaycanda “Multikulturalizm İli” elan olunduğunu qeyd edən səfir Anar Məhərrəmov bu çərçivədə İspaniyanın Madrid və Mursiya şəhərlərində keçirilmiş konfransları, həmçinin “Rey Juan Carlos” universitetində təşkil olunmuş “Azərbaycandakı multikulturalizm modeli” adlı ilk seminarı xatırladıb. Bildirilib ki, iki ölkə arasında diplomatik əlaqələrin qurulmasından 25 il ötür və bu gün mövcud olan münasibətlər uğurla inkişaf edir.

2017-ci ilin “İslam Həmrəyliyi İli” elan olunduğu Azərbaycanın müsəlman ölkələri arasında əməkdaşlığın inkişafına verdiyi töhfəni vurğulayan səfir Bakıda keçirilmiş IV İslam Həmrəyliyi Oyunlarının müsəlman ölkələri arasında həmrəyliyin daha da gücləndirilməsindəki rolunu diqqətə çatdırıb. Bu yarışlar Azərbaycanda əsrlərboyu formalaşmış tolerantlıq və multikulturalizm mühitinin dünyaya tanıdılması baxımından əlverişli imkan idi.

Respublika Günü münasibətilə keçirilən tədbirdə çıxış edən İspaniyanın Xarici İşlər və Əməkdaşlıq Nazirliyinin xarici siyasət və təhlükəsizlik baş idarəsinin rəhbəri Enrike Mora bayram münasibətilə tədbir iştirakçılarını təbrik edib. O, çıxışında İspaniya və Azərbaycan arasında ikitərəfli münasibətlərin yüksələn xətt üzrə inkişaf etdiyini vurğulayıb. Bildirilib ki, 2014-cü ildən Azərbaycanda İspaniya nümayəndəliyi fəaliyyət göstərir və gələcəkdə səfirliyin də açılması mümkün olacaq. O, İspaniyanın Azərbaycanın ərazi bütövlüyünü daim dəstəklədiyini, Dağlıq Qarabağı yalnız Azərbaycan sərhədləri daxilində tanıdığını xüsusi vurğulayıb. Enrike Mora İspaniyanın Cənubi Qafqaz regionuna böyük əhəmiyyət verdiyini və bu səbəbdən əsas marağın Azərbaycana yönəldiyini, ölkəsinin müxtəlif sahələrdə əməkdaşlığa hazır olduğunu da deyib.

Daha sonra tədbir iştirakçıları Azərbaycanın mədəniyyətini, idman sahəsindəki uğurlarını və iqtisadi inkişafını əks etdirən filmi izləyiblər.

Tədbirdə milli “Sarı gəlin” və “Mirzəyi” rəqsləri, klassik musiqi nümunələri ifa olunub. Qonaqlar Azərbaycan mətbəxinin ən gözəl təamlarından dadıblar.

 

 

AZƏRTAC

Müsəlman Şərqində ilk demokratik respublika kimi adını tarixə yazan Azərbaycan Xalq Cümhuriyyəti ölkəmizin çoxəsrlik sosial-iqtisadi, ictimai-siyasi və mədəni inkişafının, xalqımızın milli oyanışı və dirçəlişi proseslərinin məntiqi nəticəsi və tarixi zərurət kimi yarandı.
Birinci dünya müharibəsinin sona çatması, Rusiyada oktyabr inqilabı və çarizmin süqutundan sonra yaranmış gərgin vəziyyət, Rusiyanın tərkibində saxladığı bütün ərazilərə lazımi qədər nəzarət edə bilməməsi Azərbaycan Xalq Cümhuriyyətinin yaranması üçün əlverişli şərait yaratmışdı. Bununla belə, 1918-ci ildə Azərbaycanı müstəqilliyə aparan yollar heç də asan və hamar deyildi. Lakin qabaqcıl ziyalılarımızın yorulmaz səylərinin nəticəsi olaraq azadlığa aparan yollardakı bütün maneələr dəf edildi. Məhz onların milli və müstəqil dövlətçiliyin bərpa olunmasına xidmət edən əqidə və məslək birliyi son nəticədə öz sözünü dedi. Bu ziyalılar 1918-ci ildə yaranmış vəziyyətdə birləşərək Tiflisdə Azərbaycanın “İstiqlal Bəyannaməsi”ni elan etdilər və Azərbaycan Xalq Cümhuriyyətinin, müasir respublikamızın müstəqilliyinin əsasını qoydular.
Azərbaycan Xalq Cümhuriyyətinin dövlətçilik tariximizdəki rolunu hər zaman yüksək qiymətləndirən ümummilli lider Heydər Əliyev 1918-ci ildə dövlət müstəqiliyimizin qazanılmasında böyük xidmətləri olmuş şəxslərin adlarının Azərbaycan xalqının yaddaşına əbədi həkk olunduğunu bildirmişdir: “1918-ci il mayın 28-də Azərbaycanın istiqlaliyyətinin elan edilməsində, Xalq Cümhuriyyətinin təşəkkül tapmasında və fəaliyyət göstərməsində cümhuriyyətə rəhbərlik etmiş şəxslərin - Əlimərdan bəy Topçubaşovun, Məmmədəmin Rəsulzadənin, Fətəli xan Xoyskinin, Nəsib bəy Yusifbəylinin, Səməd bəy Mehmandarovun, Əliağa Şıxlinskinin və başqalarının böyük xidmətləri olmuşdur. Bu görkəmli dövlət xadimlərinin, vətənpərvər ziyalıların, peşəkar hərbçilərin adları xalqımızın yaddaşına əbədi həkk olunmuşdur”.
Azərbaycan Xalq Cümhuriyyətinin yaranması, tariximizə bəxş etdiyi müstəqillik müsibətlər və çətin mübarizələr hesabına başa gəldi. Çünki məlum olduğu kimi, müstəqilliyin elan olunmasına kənardan mane olmaq istəyən qüvvələr də çox idi, elə Azərbaycanın özünün siyasi-ictimai həyatında da vəziyyət rəvan deyildi. Bütün bu çətinliklərə baxmayaraq, qarşısına müstəqil, azad və demokratik respublika qurmaq kimi şərəfli vəzifə qoymuş ilk milli hökumət cəmi 23 aylıq fəaliyyəti dövründə xalqımızın milli mənlik şüurunu özünə qaytardı, onun öz müqəddəratını təyin etməyə qadir olduğunu əyani şəkildə bütün dünyaya nümayiş etdirdi. Həyata keçirilən tədbirlər xalqımızın dövlətçilik ənənələrinin bərpasına və milli mənlik şüurunun güclənməsinə böyük təsir göstərdi. Qısa müddətdə Azərbaycan Xalq Cümhuriyyətinin bütün dövlətçilik atributları yaradıldı, dövlət quruculuğu sahəsində mühüm addımlar atıldı, Azərbaycan milli ordusu formalaşdırıldı. 1918-ci ilin iyunun 27-də isə Azərbaycanın tarixində ilk dəfə olaraq Azərbaycan dili rəsmən dövlət dili elan edildi. Həmin il noyabrın 9-da Azərbaycanın indiki üçrəngli dövlət bayrağı qəbul edildi, eyni zamanda, Azərbaycan vətəndaşlığı haqqında qanun da qəbul olundu. Dövlətçilik göstəricilərinə və prinsiplərinə görə, Şərqdə ilk demokratik respublika olan Azərbaycan artıq özünün parlamenti, hökuməti, ordusu və pul vahidi olan müstəqil, suveren bir dövlət idi.
Azərbaycan Xalq Cümhuriyyəti az bir müddətdə mövcud olsa da, öz başlıca tarixi missiyasını yerinə yetirdi: Azərbaycan xalqının dövlətçiliyinin bərpasında, dövlət müstəqilliyinin əldə edilməsində, demokratik quruluş yaratmaq istiqamətində tarixi rol oynadı. Ən əsası, Xalq Cümhuriyyətinin yaranması ilə vaxtilə itirilmiş dövlətçiliyimiz bərpa edildi, Azərbaycanın müstəqil gələcəyinin əsası qoyuldu. Eyni zamanda, bu hadisə xalqımızın tarixində ilk dəfə demokratik prinsiplər əsasında müstəqil Azərbaycan dövlətinin və hökumətinin yaradılmasının təməlini qoymuş oldu. Sovet Rusiyasının hərbi təcavüzü nəticəsində 1920-ci il aprelin 28-də süqut etməsinə baxmayaraq, qısa bir müddət ərzində həyata keçirdiyi tədbirlər, dəyərli işlər xalqın dövlətçilik tarixində böyük izlər buraxdı. Bu tədbirlər xalqımızın milli mənlik şüurunun güclənməsinə də böyük təsir göstərdiyi üçün bolşevik işğalından sonra da müstəqillik hissləri azərbaycanlıları heç zaman tərk etmədi, azadlıq ideyaları şüurlara hakim kəsildi. Cümhuriyyətin süqutu onu göstərdi ki, müstəqilliyi qoruyub saxlamaq, müdafiə etmək onu əldə etməkdən daha da çətindir.
Ötən əsrin 70-ci illərindən başlayaraq hər şey dəyişdi. 1969-cu ildə Heydər Əliyevin rəhbərliyə başlamasından sonra respublikada xalqın mənəvi dəyərləri özünə qayıtdı, ölkə xammal bazasından istehsalçıya çevrildi. Heydər Əliyevin sayəsində tezliklə Azərbaycanı və onun mədəniyyətini bütün dünyada daha yaxından tanımağa başladılar. Bu gün haqlı olaraq Heydər Əliyevin Azərbaycanda hakimiyyətinin birinci dövrü ölkəmizin intibah dövrü adlandırılır. Hazırda müstəqil Azərbaycanın iqtisadi yüksəlişində baza rolunu oynayan sənaye və kadr potensialı ulu öndər Heydər Əliyevin o illərdəki məqsədyönlü, düşünülmüş, uzaqgörən fəaliyyəti sayəsində təşəkkül taparaq formalaşdı. Ulu öndər sanki Azərbaycanın gələcəkdə müstəqil dövlət olacağını hiss edirdi. Nəhayət, 1991-ci ildə xalqımız özünün dövlət müstəqilliyini bərpa etdi, cümhuriyyətin dövlətçilik ənənələrini davam etdirərək bu tarixi varislik üzərində yeni Azərbaycan dövlətini yaratdı. Ulu öndər Heydər Əliyevin dediyi kimi, “Bu dövlət, bu quruluş 1918-ci ildə yaranmış ilk Xalq Cümhuriyyətinin varisidir. Bütün dövlət onun varisidir, bütün respublika onun varisidir, bütün xalq onun varisidir”.

Mahir MUSAYEV,
“Caspian Catering Service”
MMC-nin direktoru.

Şənbə, 27 May 2017 08:33

RESPUBLİKA GÜNÜ İLƏ BAĞLI TƏDBİR

28 May Azərbaycan Respublikasının müstəqillik arzularının gerçəkləşdiyi gün olaraq hər zaman xatırlanır. 99 il öncə ölkəmizdə Şərqin ilk demokratik respublikası yaranmışdır.

Mayın 26-da Bakının Yasamal Rayon İcra Hakimiyyəti Heydər Əliyev Mərkəzində Respublika Günü ilə bağlı geniş tədbir keçirdi. İlk öncə Azərbaycan Respublikasının Dövlət Himni səsləndi.

Mərasimi rayon icra hakimiyyəti ictimai-siyasi və humanitar məsələlər şöbəsinin müdir müavini Vaqif Məmmədov açaraq vurğuladı ki, Azərbaycan Xalq Cumhuriyyəti 23 ay ərzində maarifçilik, səhiyyə, mədəniyyət, incəsənət, kənd təsərrüfatı kimi sahələrdə mühüm nailiyyətlərə imza atmışdır.

Bayram tədbirində 21 saylı tam orta məktəbin tarix müəllimi məruzə ilə çıxış etdi. Bildirdi ki, xalqımız 18 oktyabr 1991-ci ildə yenidən müstəqilliyini bərpa etmiş xalqımızın qarşısında geniş üfüqlər açılmışdır.

Lakin ilk vaxtlar ölkənin müstəqilliyi təhlükə qarşısında qalmışdı. 1993-cü ilin iyununda ulu öndərimiz, dahi şəxsiyyət Heydər Əliyev xalqın təkidli tələbi ilə yenidən hakimiyyətə qayıtdıqdan sonra ölkəmizdəki hakimiyyət çəkişmələrinə son qoydu, hərc-mərclik aradan qaldırıldı. Heydər Əliyevin Milli Məclisin sədri seçilməsi ilə dövlət müstəqilliyi qətiyyətlə qorunub saxlanıldı.

1995-ci ildə Heydər Əliyevin müəllifliyi ilə müstəqil Azərbaycanın yeni Konstitusiyası qəbul olundu.

Azad və demokratik şəraitdə prezident, parlament və bələdiyyə seçkiləri keçirildi. Ölkəmizdə demokratik dəyişikliklər baş verdi. Hüquq-mühafizə, məhkəmə sistemi yenidən quruldu.

“Əsrin müqaviləsi” Azərbaycanın nüfuzunu daha da artırdı, sosial-iqtisadi sahədə müsbət dəyişikliklər baş verdi. Heydər Əliyevin titanik səyi nəticəsində dünya azərbaycanlıları vahid ideya ətrafında birləşdi.

Vurğulamaq lazımdır ki, bu gün ölkəmiz müstəqillik yolunda uğurla irəliləyir. Azərbaycan Cənubi Qafqazda lider dövlətə çevirilmişdir. İstər paytaxtımız, istərsə də regionlar gözəllik libasına bürünmüşdür.

Ölkəmiz həm də bu gün dünyada idman ölkəsi kimi tanınmışdır.

Hazırda Azərbaycan Prezidenti İlham Əliyevin rəhbərliyi altında ölkəmizin qüdrəti artır, iqtisadiyyatı möhkəmlənir, əzəmətli layihələr həyata keçirilir. Azərbaycan bir çox dövlətlərin strateji tərəfdaşı, beynəlxalq məsələlərdə söz sahibi olan ölkəyə çevrilmişdir.

Mərasimdə 28 May – Respublika Günü ilə bağlı şagirdlərin ifasında şeirlər səsləndirildi.

Qədir ASLAN,

“Respublika”.

Azərbaycan Xalq Cümhuriyyətinin yaranmasının 99-cu ildönümü ilə əlaqədar Dövlət Təhlükəsizliyi Xidmətinin (DTX) Mədəniyyət Mərkəzində təntənəli tədbir keçirilib.

DTX-nin ictimai əlaqələr şöbəsindən AZƏRTAC-a bildiriblər ki, mərasimdə 28 May - Respublika Günü münasibətilə Dövlət Təhlükəsizliyi Xidmətinin Mədəniyyət Mərkəzinin nəzdində fəaliyyət göstərən şahmat dərnəyinin üzvləri - DTX əməkdaşlarının uşaqları arasında ənənəvi olaraq keçirilən turnirin qaliblərinə medallar və diplomlar təqdim olunub.

Sonra Dövlət Təhlükəsizliyi Xidmətinin struktur bölmələrinin əməkdaşları arasında təşkil olunmuş üçnövçülük yarışının (velosiped yürüşü 10 kilometr, qaçış 3 kilometr, üzgüçülük 500 metr) qaliblərinə DTX-nin rəisi, general-leytenant Mədət Quliyev tərəfindən kubok, medallar və qiymətli hədiyyələr verilib.

Bayram tədbiri DTX-nin əməkdaşları və onların övladlarının iştirakı ilə hazırlanmış geniş və maraqlı konsert proqramı ilə davam edib.

 

 

AZƏRTAC

Şənbə, 27 May 2017 08:32

İki əsrin qovuşağında

Cənubi Azərbaycan ədəbiyyatının tədqiqi son 40 ildə

Mayın 26-da Qubadlı Rayon İcra Hakimiyyətinin inzibati binasında müxtəlif nailiyyətlər qazanan idmançılarla, o cümlədən “Bakı-2017” IV İslam Həmrəyliyi Oyunlarının qızıl medalçısı İslam Abbasovla görüş keçirilib.

AZƏRTAC xəbər verir ki, rayon icra hakimiyyətinin başçısı Malik İsaqov idmançıları IV İslam Həmrəyliyi Oyunlarında qazanılan yüksək nailiyyət münasibətilə təbrik edib. Qeyd olunub ki, dövlətimizin başçısının idmançılara xüsusi qayğı ilə yanaşması, müasir Olimpiya idman komplekslərinin və arenalarının tikilməsi ölkəmizdə idmanın kütləviləşməsinə əlverişli şərait yaradıb. Son illərdə Azərbaycanda 50-dək yeni olimpiya idman kompleksi, bir sıra idman növləri üçün möhtəşəm arenalar istifadəyə verilib. Bunun nəticəsidir ki, Azərbaycan idmanı çiçəklənmə dövrünü yaşayır.

M.İsaqov “Bakı-2017” IV İslam Həmrəyliyi Oyunlarından danışaraq deyib ki, Azərbaycan daha bir mötəbər beynəlxalq idman tədbirinə uğurla ev sahibliyi edərək tarix yazıb. Bu yarışlarda 54 ölkəni təmsil edən 3 mindən çox idmançı, 2 minədək komanda rəsmisi və texniki nümayəndə iştirak edib. Atletlər idmanın 24 növü üzrə keçirilən yarışlarda 269 dəst medal uğrunda mübarizə aparıblar. Oyunların yekunlarına görə, 75 qızıl, 50 gümüş və 37 bürünc medal qazanan Azərbaycan iştirakçı ölkələr arasında birinci olub.

İcra hakimiyyətinin başçısı xüsusi qürur hissi ilə diqqətə çatdırıb ki, Qubadlı idmançısı İslam Abbasov yunan-Roma güləşi üzrə yarışlarda 85 kiloqram çəki dərəcəsində bütün rəqiblərinə qalib gələrək İslamiadanın çempionu olub. “Rayonumuzda da idmançılar üçün əlverişli şərait yaradılıb. Lazımi idman avadanlıqları, idman zalı atletlərimizin istifadəsinə verilib”, - deyə M.İsaqov vurğulayıb.

Tədbirdə çıxış edən idmançılar, məşqçilər, ictimaiyyət nümayəndələri bildiriblər ki, bu uğurlar təməli ümummilli lider Heydər Əliyev tərəfindən qoyulan və Prezident İlham Əliyevin davam etdirdiyi məqsədyönlü siyasətin nəticəsidir. İdmanın inkişafı üçün yaradılan münbit şərait ölkəmizin beynəlxalq yarışlarda daha böyük qələbələrə imza atmasını şərtləndirən əsas amildir. Təsadüfü deyil ki, Qubadlı idmançıları ilbəil yüksək nailiyyətlər qazanır, rayonu və ölkəni müxtəlif mötəbər idman yarışlarında layiqincə təmsil edirlər.

Sonra çıxış edən IV İslam Həmrəyliyi Oyunlarının qızıl mükafatçısı İslam Abbasov, idmançının atası Əzim Abbasov idmançılara və gənclərə göstərilən dəstəyə görə Prezident İlham Əliyevə və rayon rəhbərliyinə minnətdarlıqlarını bildiriblər.

Sonda İslam Abbasova fəxri fərman və qiymətli hədiyyələr təqdim olunub.

 

 

 

AZƏRTAC

Bu günlərdə Azərbaycan Xalça Muzeyində “Ortaq qaynaqdan çeşidli yollar” mövzusunda II Beynəlxalq “Türk dünyasının ortaq dili - naxışlar” simpozium keçirildi. Simpozium Azərbaycan Respublikası Mədəniyyət və Turizm Nazirliyi, Yunus Emre İnstitutu Bakı Türk Mədəniyyət Mərkəzi və Azərbaycan Xalça Muzeyinin təşkilatçılığı, Türkiyə Respublikasının Azərbaycandakı Səfirliyi, TÜRKPA (Türkdilli Ölkələrin Parlament Assambleyası), Türkiyə Respublikasının Azərbaycandakı Mədəniyyət və Tanıtma müşavirliyi, “Z Company 2007”, ATİB (Azərbayan Türkiyə İş Adamları Birliyi) və Azərbaycan Dillər Universitetinin dəstəyi ilə təşkil olunmuşdu.

Simpoziumda Azərbaycan, Gürcüstan, İran, İtaliya, Qazaxıstan, Qırğızıstan, Özbəkistan, Rusiya, Serbiya, Türkiyə, Türkmənistan və Ukraynadan aparıcı tədqiqatçılar, kolleksiyaçılar, xalçaçı rəssamlar və bu sahə üzrə digər mütəxəssislər iştirak edirdilər.

Məqsəd simpozium vasitəsilə türk xalqlarının ortaq mirası olan xalça naxışlarının araşdırılması sahəsində aparılan tədqiqat işlərini daha da zənginləşdirmək, xalqımızın öz milli-mədəni dəyərlərinə olan qayğı və diqqətini, bu sahədə olan biliklərini yüksəltməkdir.

Simpozium istənilən tarixi dövrləri - bizim eradan əvvəl, İslam və digər tarixi dövrlərdən başlayaraq bu günümüzədək olan böyük bir zamanı əhatə edirdi. Akademik sessiyalarda türkdilli xalqların ortaq dili olan ornamentlərin semantikası və onların ümumi kökləri; türkdilli xalqların ortaq xalça mədəniyyətində yer alan naxışlarla bağlı terminlər və bu sahədə yaşanan problemlər; xalça sənətində istifadə edilən naxışların digər sənət növləri ilə əlaqəsi, qarşılıqlı təsiri və onların zənginləşdirməsi; naxışın xüsusi bədii dili; müasir dünya incəsənətindən naxışların əhəmiyyəti və digər mövzularda məruzələr oxundu, müzakirələr və fikir mübadiləsi aparıldı.

Naxışların tipoloji təsnifatındakı özəllikləri, coğrafi ərazi baxımından yayılması, bu maddi-mənəvi irsin qorunması və digər sahələrdə çalışan elm adamlarının məruzələri kitab şəklində kitabxanalara və iştirakçılara paylanıldı.

II Beynəlxalq “Türk dünyasının ortaq dili - naxışlar” simpoziumu çərçivəsində D. Kara Çoban adına Milli Qaqauziya Tarix və Etnoqrafiya Muzeyinin eksponatlarından ibarət sərgi keçirildi. Sərgidə qaqauz türklərinin böyük zövqlə hazırladıqları xalça, tikmə, milli geyim və digər dekorativ-tətbiqi sənət nümunələri nümayiş olundu.

Mehparə ƏLİYEVA,

“Respublika”.

Kiyev şəhərindəki Fairmont mehmanxanasında Azərbaycanın Ukraynadakı səfirliyinin təşəbbüsü ilə 28 may – Respublika Gününə həsr olunmuş təntənəli tədbir keçirilib. Ukraynanın hökumət və dövlət rəsmilərinin, elm və mədəniyyət xadimlərinin, xarici diplomatik korpus rəhbərlərinin iştirak etdiyi tədbirdə Milli Məclisin deputatı, əməkdar jurnalist Elmira Axundovanın Ukrayna dilinə tərcümə olunmuş “İlham Əliyev. Prezidentin portreti dəyişikliklər fonunda” kitabı geniş oxucu auditoriyasına təqdim olunub.

Azərbaycanla Ukraynanın dövlət himnlərinin sədaları altında başlanan tədbirdə, Azərbaycanın Ukraynadakı səfiri Azər Xudiyev çıxış edərək, 1918-ci ildə şərqdə ilk dəfə yaradılmış Azərbaycan Demokratik Respublikasının tarixi nailiyyətlərindən söz açıb. Ötən əsrin sonlarında 2-ci dəfə dövlət müstəqilliyini əldə edən ölkəmizin ulu öndər Heydər Əliyevin dəmir iradəsi və müdrik uzaqgörənliyi ilə böyük inkişaf yolu keçdiyini vurğulayıb.

Millət vəkili Elmira Axundovanın qələmə aldığı “İlham Əliyev. Prezidentin portreti dəyişikliklər fonunda” kitabının tarixi faktlarla zəngin olduğunu diqqətə çatdıran səfir, əsərdə Prezident İlham Əliyevin rəhbərliyi ilə ölkəmizdə və bölgədə həyata keçirilən qlobal sosial-iqtisadi islahatlardan, Azərbaycanın qərblə şərqin multikulturalizm və tolerantlıq mərkəzinə çevrilməsindən ,əsasən də, xalqla dövlət başçısı arasındakı qarşılıqlı etimad və hörmətin vəhdətindən bəhs olunduğunu bildirib.

Azərbaycanla Ukrayna arasındakı tarixi dostluq əlaqələrindən söz açan Ukrayna-Azərbaycan parlamentlərarası dostluq qrupunun rəhbəri Maksim Kuryaçiy, Ukrayna iqtisadi inkişaf və ticarət nazirinin müavini Mixaylo Titarçuk və digər şəxslər tarixin bütün dönəmlərində dövlətçilik ənənələrinə sadiq qalan Azərbaycan xalqına Respublika Günü münasibəti ilə xoş və səmimi arzularını çatdırıblar. Bünövrəsi dahi Heydər Əliyev tərəfindən qoyulmuş müstəqil Azərbaycan dövlətinin inkişaf strategiyasının Prezident İlham Əliyev tərəfindən çox böyük uğurla davam etdirildiyini vurğulayan natiqlər, Prezident İlham Əliyevin xalqı və dövləti qarşısındakı xidmətlərini özündə əks etdirən kitabın Ukrayna dilinə tərcümə olunmasının tarixi əhəmiyyətindən danışıblar. Əsərin dövlət quruculuğu və siyasətlə məşğul olan hər bir kəs üçün dəyərli töhfə olduğunu bildiriblər. Kitaba verdikləri yüksək dəyərə görə tədbirə qatılanlara minnətdarlığını bildirən Milli Məclisin üzvü Elmira Axundova, qələmə aldığı əsərdə postsovet məkanında ən praqmatik siyasi xadimlərdən biri olan Prezident İlham Əliyev haqda real faktlara söykənən təhlillərin verildiyini qeyd edib. Kitabın Ukrayna dilinə tərcümə olunmasına verdikləri dəstəyə görə Azərbaycanın Ukraynadakı səfirliyinə və kitabın tərcüməçisi Mehman Salmanova dərin təşəkkürünü bildirib.

Ukraynanın aparıcı televiziya və kütləvi İnformasiya vasitələrinin işıqlandırdığı bayram şənliyi geniş konsert proqramı ilə başa çatıb.

Qədir ASLAN,

“Respublika”.

2 -dən səhifə 1216