XƏBƏR LENTİ

Fevralın 14-də Müdafiə Sənayesi Nazirliyinin (MSN) tabeliyində fəaliyyət göstərən “Aqreqat” İstehsalat Birliyinin Bakı cihazqayırma zavodunda müxtəlif döyüş tapşırıqlarının yerinə yetirilməsi məqsədilə yaradılan minaya davamlı ilk milli zirehli nəqliyyat vasitəsinin - “Tufan”ın təqdimatı olub.

AZƏRTAC xəbər verir ki, tədbirdə nəqliyyat vasitəsi ilə bağlı film nümayiş olunub.

Təqdimat mərasimində çıxış edən müdafiə sənayesi nazirinin müşaviri Azad Məmmədov bu nəqliyyat vasitəsinin layihəsinin və təcrübə-sınaq nümunəsinin MSN-in Milli Aerokosmik Agentliyi tərəfindən (MAKA) hazırlandığını bildirib.

Məlumat verilib ki, nəqliyyat vasitəsi

 döyüş şəraitində yerləşən şəxsi heyəti daşımaq üçün nəzərdə tutulub. Maşın NATO-nun “STANAG 4569” standartının üçüncü səviyyəsinin tələbinə uyğun daşınan şəxsi heyəti məhvedici təsirlərdən qoruyur. Müxtəlif sınaq işlərindən sonra bu avtomaşının seriyalı istehsalına başlanılacaq. Xarici ölkələrdən gələn qonaqlar tərəfindən “Tufan”a böyük maraq yaranıb.

MAKA-nın baş direktoru Alçın Şirinzadə deyib ki, Agentlik dövlət tapşırıqları çərçivəsində müdafiə təyinatlı məmulatların istehsalına xüsusi önəm verir. Son illər MAKA tərəfindən istehsal edilən məmulatların əksəriyyəti ordumuzda silahlanmaya tövsiyə olunub və müvafiq qurumlara təhvil verilib.

Bildirilib ki, dövlətimizin başçısının MSN-in qarşısında qoyduğu vəzifələrin icrası ilə əlaqədar və xüsusi təyinatlı maşınların yaradılması sahəsində agentlikdə qazanılmış təcrübəyə əsaslanaraq, nazirliyin rəhbərliyi 2016-cı ilin sonunadək “Tufan” şifrli milli zirehli nəqliyyat vasitəsinin yaradılmasını məhz MAKA-nın kollektivinə həvalə edib. MSN rəhbərliyinin təşəbbüsü və dəstəyi sayəsində 12,7 millimetrlik pulemyotlu döyüş modulu ilə təchiz olunmuş MRAP tipli (mine resistant ambush protected - minaya davamlı və pusqudan qorunmuş) milli zirehli maşının yaradılması barədə tapşırıq MAKA kollektivi tərəfindən qısa müddətdə yüksək səviyyədə yerinə yetirilib, “Tufan”ın təcrübi nümunəsi hazırlanıb. Maşının dizaynı yerli kadrlar tərəfindən hazırlanıb.

“Tufan” milli zirehli nəqliyyat vasitəsinin xüsusiyyətləri və göstəriciləri barədə geniş məlumat verən A.Şirinzadə qeyd edib ki, avtomaşın məsafədən idarə olunan xüsusi döyüş modulu ilə təchiz edilib. Bu modulun üzərində optik nişanlanma sistemləri, gündüz və gecə kameraları, həmçinin lazer məsafəölçəni quraşdırılıb. Döyüş modulunun əsas xüsusiyyəti isə onun bütün proqram təminatının yerli mütəxəssislər və mühəndisləri tərəfindən hazırlanmasıdır. Bu universal modul həm zirehli maşınlara, həm də zirehsiz xüsusi təyinatlı maşınlarda quraşdırıla bilər. Döyüş modulu düşmənin yüngül zirehli hədəfləri, atəş vasitələri və hava hədəfləri ilə səmərəli mübarizə aparmaq imkanına malikdir. Hazırda “Tufan”ın və döyüş modulunun müxtəlif şəraitlərdə poliqon yürüş sınaqları keçirilir. Peşəkar hərbçilərin və sahə üzrə mütəxəssislərin məsləhətlərindən sonra seriya öncəsi prototip real döyüş şəraitinə uyğunlaşdırılacaq və tarixdə ilk dəfə MSN-in istehsal etdiyi məmulatların sırasına tam milli məhsul olan “Tufan” zirehli nəqliyyat vasitəsi də daxil ediləcək. Cari ildə keçiriləcək sınaqlardan sonra, həmçinin tibbi yardım, radioelektron mübarizə, polis, kəşfiyyat versiyalarında belə maşınların yaradılması nəzərdə tutulub.

 

 

Diqqətə çatdırılıb ki, bu avtomaşının konsepsiyası “ADEX-2016” sərgisində nümayiş olunub. Yeni avtomaşın dizaynına görə, Silahlı Qüvvələrimizdəki və digər ölkələrin ordularında istifadə olunan hərbi avtomaşınlardan kifayət qədər fərqlənir. Nəqliyyat vasitəsi kəskin yoxuşlarda və enişlərdə, həmçinin müxtəlif relyef şəraitində rahat hərəkət etmək qabiliyyətinə malikdir.

MAKA-nın baş direktoru qeyd edib ki, Agentliyin kollektivi xüsusi təyinatlı avtomaşınların yaradılması və silahlanmaya qəbul edilməsi istiqamətində bundan sonra daha da səylə çalışacaq.

Sonra zavodun həyətindəki poliqonda “Tufan” avtomaşınına baxış keçirilib.

 

AZƏRTAC

 

 

 

 

Çərşənbə, 15 Fevral 2017 06:22

Xocalı soyqırımını unutma!

İllər keçir, zaman insan ağrı-acılarını unutdurur. Lakin tarixin elə yaraları, elə hadisələri vardır ki, hər bir insanın, vətənini sevənin qəlbində yeni yara kimi daim göynəyir, qaysaqlansa da, qan verir, baş verənlərdən dərs almağa, vətənini, millətini göz bəbəyi kimi qorumağa səsləyir. Tarix hər bir xalqın, dövlətin yaşamasını təmin edən ibrət məktəbi, mövcudluğunun zəmini, gələcək nəsillərə örnək, millətlər içində imzasını təsdiq edən pasportudur.  Azərbaycan qədimdən-qədim bir xalqdır. Tarix bizə qan yaddaşıdır.  Unutsaq - unudularıq. Bizi istəməyənlər, torpağımıza göz dikənlər də elə bunu istəyir. Tarixi səhifələrimiz qəhrəmanlıqla zəngindir. Biz döyüşə-döyüşə, şəhidlər verə-verə var olmuşuq, yaşamışıq, tarixə adımızı yazmışıq. Xalqımıza qarşı yadellilər zülmlər edib. Lakin onlar xalqımızın dəyanəti, mərdliyi, haqqa tapınması, ədaləti meydana qoyması, işğalçılığa qarşı, zülmə qarşı barışmazlığı qarşısında xar olmuşlar.

 

XIX əsrin əvvəllərindən Rusiya imperiyası tərəfindən ərazilərimizə köçürülmüş ermənilərin dünyanın böyük siyasi qüvvələri tərəfindən dəstək verilməsi ilə xalqımıza qarşı törətdikləri soyqırımı son tarixdə ən ədalətsiz işğalçılıq, etnik təmizləmə siyasətinin tərkib hissəsidir. Bu gün ərazimizin 20 faizi ermənilər tərəfindən zəbt olunub, 1 milyondan çox qaçqın və məcburi köçkünümüz var.  Bu işğal kütləvi qırğınla müşahidə olunub. Ermənilər bütün tarix boyu özlərini “əzilən, zülmə məruz qalan” xalq kimi dünyaya təqdim ediblər. Törətdikləri soyqırımını, terroru, qəddarlığı yerli türk-müsəlmanların adına yazmaqla! Hətta milli-mədəni abidələrimizi, əsərlərimizi və s.  öz adlarına çıxmaqla! İşğal olunmuş ərazilərimizdə mədəni və ekoloji soyqırımı törətməklə! Buna qarşı Azərbaycan Prezidenti İlham Əliyev informatik hücumla cavab verməyi bizə— hər bir azərbaycanlıya göstəriş verib.  Son illərdə bu  istiqamətdə aparılan iş dünya miqyasında  öz bəhrəsini verib. Erməni xislətinə mənsub olan yalan, iftira, böhtan artıq ifşa olunur və beynəlxalq ictimaiyyətin diqqətinə çatdırılır.  Bu informatik mübarizə nümunələrindən biri də dünyanın müxtəlif dillərində çap edilib yayılan Qarabağ  döyüşlərində erməni işğalçılarına qarşı vuruşmuş, azərbaycanlılara qarşı törədilən vandalizmin, qəddarlığın canlı şahidi, polis polkovniki, Bakı Slavyan Universitetinin dosenti Sadir Məmmədovun “Xocalı soyqırımı”  kitabçasıdır. Burada sənədlərlə təsdiq olunmuş erməni vandallarının vəhşiliyi, qeyri-insani hərəkətləri oxucuların diqqətinə çatdırılır: “Ermənistan hərbi birləşmələri qətlə yetirdikləri insanların üzərində xüsusi əməliyyat apararaq onların başlarının dərisini soymuş, müxtəlif əzalarını kəsmiş, körpə uşaqların gözlərini çıxarmış, hamilə qadınların qarınlarını yarmış, adamları diri-diri torpağa basdırmış və ya yandırmışlar. Ermənilərin bu vəhşiliklərini əks etdirən çoxsaylı sənədlərdən bir neçəsini verməklə kifayətlənirik.

Tibbi ekspertizanın rəyçisi F.Əfəndiyevin təqdim etdiyi materiallar və faktlar istər-istəməz insanı dəhşətə gətirir. Ekspertizanın rəyində qeyd olunur ki, 1992-ci il fevral ayının 25-dən 26-na keçən gecə Xocalı şəhərində erməni quldurları tərəfindən tarixdə analoqu olmayan işgəncəli qətllər törədilmişdir. Daha sonra “Qətlə yetirilən şəxslərin xəsarətinin təhlili” adlı bölmədə bildirilir: Xocalı hadisəsi zamanı bizim birliyin ekspertləri tərəfindən məhkəmə tibbi müayinədən 181 meyit keçirilmişdir. Həmin meyitlərdən 130 nəfəri kişi, 51 nəfəri isə qadındır. Müayinə olunan meyitlərdən 13 nəfəri azyaşlı uşaq olmuşdur. Xəsarətlərin əmələgəlmə mexanizminə görə bölünməsi aşağıdakı qaydada olmuşdur: a) qəlpə təsirindən —20 nəfər; b) güllə təsirindən —151 nəfər; c) küt alət təsirindən —10 nəfər.

Xəsarətlər yerləşdiyi nahiyəyə görə aşağıdakı kimi olmuşdur: a) baş nahiyəsi —40; b) döş qəfəsi —74; c) qarın nahiyəsi —17; d) ətrafları —11.

Bununla yanaşı, müayinə olunmuş meyitlərdən 3 nəfərində ətrafların donması, 33 nəfərində işgəncə əlamətləri, yəni başın dərisinin soyulması, qadınlarda döşlərin kəsilməsi, burun və qulaq qığırdaqlarının kəsilməsi, qadınların cinsiyyət üzvlərinə odlu silahdan atəş açılması əlamətləri aşkar edilmişdir. Eyni zamanda, göz almalarının çıxarılması, dişlərin sındırılması, kişilərin cinsiyyət üzvlərinin kəsilməsi müşahidə olunmuşdur. Müayinə olunmuş 31 meyitdə isə konbinə olunmuş, yəni bədənin müxtəlif nahiyələrinin güllə yarası və küt alətlə, kəsici-deşici alətlə yetirilmiş xəsarətlər olmuşdur. Müayinə olunmuş meyitlərdən 13 nəfərində bədənin bütün səthini əhatə edən yanıq, kömürləşmə aşkar edilmişdir. Eyni zamanda müayinə edilən meyitlərdən 10 nəfərində güllə yarası ilə birlikdə onların üzərindən hərbi texnikanın keçməsi əlaməti olmuşdur”.

Dünyanın 12 ölkəsinin dilində nəşr olunmuş bu kitabça Xocalı soyqırımınında erməni barbarlığının bütün vəhşiliyi ilə diqqətə çatdırılması sahəsində erməni dezinformasiyasının ifşası istiqamətində informatik mübarizədə dəyərli addımlardan biridir.

 

Ataş CƏBRAYILOV,

“Respublika”.

 

 

 

Azərbaycanın Türkiyədəki səfiri Faiq Bağırovun Xocalı soyqırımının 25-ci ildönümü ilə bağlı məqaləsi nüfuzlu “Diplomatik gözləm” jurnalında dərc olunub.

“Xocalı soyqırımının 25-ci ildönümü” sərlövhəli məqalədə Xocalı soyqırımının səbəbləri və ağır nəticələri barədə türkdilli oxuculara ətraflı məlumat verilir.

Məqalədə Xocalı soyqırımının törədilməsində təcavüzkar Ermənistanın indiki və keçmiş rəhbərliyinin iştirakı barədə təkzibolunmaz faktlar göstərən müəllif yazır ki, bu cinayət erməni millətçiliyinin iç üzünü dünya ictimaiyyətinə nümayiş etdirir. Qeyd olunur ki, ümummilli lider Heydər Əliyevin təşəbbüsü ilə Xocalı faciəsinin dünya ictimaiyyəti tərəfindən soyqırımı olaraq qəbul edilməsi istiqamətində əhəmiyyətli işlər görülüb. O cümlədən Prezident İlham Əliyevin rəhbərliyi ilə Xocalı soyqırımının dünya birliyi tərəfindən tanınması istiqamətində böyük nəticələr əldə olunub. Heydər Əliyev Fondunun vitse-prezidenti Leyla Əliyevanın təşəbbüsü ilə həyata keçirilən “Xocalıya ədalət!” beynəlxalq kampanıyası dünya ictimaiyyətini ayağa qaldırıb.

Məqalədə diqqətə çatdırılır ki, Meksika, Kolumbiya, Çexiya, Bosniya və Herseqovina, Peru, Honduras, Panama, İordaniya və Rumıniya, o cümlədən ABŞ-ın bir çox ştatı Xocalı soyqırımını tanıyıb.

AZƏRTAC

 

 

 

Fevralın 13-də Azərbaycanın İordaniyadakı səfirliyində Xocalı soyqırımının 25-ci ildönümü ilə əlaqədar anım mərasimi keçirilib.

Səfirlikdən AZƏRTAC-a bildiriblər ki, mərasimdə İordaniya Senatında fəaliyyət göstərən Azərbaycan ilə qardaşlıq komitəsinin sədri və üzvləri, İordaniya Xarici İşlər Nazirliyinin məsul şəxsləri, İordaniya Diplomatik Akademiyasının rektoru və rəhbər işçiləri, müxtəlif ölkələrin Əmmanda akkreditə olunmuş səfirləri, sabiq nazirlər və deputatlar, ayrı-ayrı səfirliklərin nümayəndələri, İordaniya-Azərbaycan Dostluq Cəmiyyətinin sədri və üzvləri, keçmiş SSRİ-də təhsil almış iordaniyalı məzunlar klubunun rəhbərləri, yerli televiziya, mətbuat və ictimaiyyət təmsilçiləri, İordaniyada yaşayan azərbaycanlılar iştirak ediblər.

Əvvəlcə Xocalı qurbanlarının xatirəsinin birdəqiqəlik sükutla yad edilib.

Ölkəmizin İordaniyadaki səfiri Sabir Ağabəyov 25 il əvvəl işğalçı Ermənistan silahlı qüvvələri tərəfindən törədilmiş Xocalı faciəsinin insanlığa qarşı cinayət və xalqımıza qarşı soyqırımı olduğunu vurğulayıb. Diplomat Xocalı soyqırımı nəticəsində 63-ü uşaq, 106-sı qadın, 70-i qoca olmaqla, 613 dinc Xocalı sakininin vəhşiliklə qətlə yetirildiyini diqqətə çatdırıb.

Səfir erməni işğalı nəticəsində Azərbaycan torpaqlarının 20 faizinin zəbt edildiyini, bir milyondan artıq vətəndaşın doğma yurd-yuvalarından didərgin düşdüyünü qeyd edib. S.Ağabəyov Ermənistanın təcavüzkar siyasətinin beynəlxalq təşkilatlar tərəfindən pisləndiyini, işğalçı qüvvələrin Azərbaycan ərazisindən dərhal çıxarılmasının tələb olunduğunu bildirib. Buna baxmayaraq, Ermənistanın öz işğalçılıq niyyətlərindən əl çəkmir, beynəlxalq təşkilatların bu xüsusda qəbul etdiyi qətnamələrə əməl etmir.

S.Ağabəyov İordaniya Senatının Xocalı soyqırımının tanınması və qətiyyətlə pislənməsi barədə sənəd qəbul etdiyini, habelə BMT, İƏT və digər beynəlxalq təşkilatlar çərçivəsində Azərbaycanla bağlı keçirilən səsvermələrdə İordaniya tərəfinin daim dost mövqe nümayiş etdirdiyini məmnunluqla vurğulayıb, Kral II Abdullaha, İordaniya xalqına və hökumətinə Azərbaycan xalqı və hökuməti adından minnətdarlığını ifadə edib.

Sonra səfirliyin müşaviri İlham Əliyev çıxış edərək Ermənistan-Azərbaycan, Dağlıq Qarabağ münaqişəsi, Xocalı soyqırımı, XX əsrin əvvəllərindən başlayaraq ermənilər tərəfindən xalqımıza qarşı aparılan etnik təmizləmə siyasəti, azərbaycanlıların erməni silahlı dəstələri tərəfindən qətliamlara məruz qalması, kəndlərin, şəhərlərin, dini, tarixi abidələrin, məktəblərin, məscidlərin, qəbiristanlıqların dağıdılması və yandırılması, bu təcavüzün hələ də davam etməsi barədə məlumat verib. Bildirilib ki, Xocalı soyqırımı 1905-1907-ci, 1918-ci, 1948-1950-ci illərdə ermənilərin Azərbaycan xalqına qarşı törətdikləri silsilə qırğınların davamıdır və bu qətliamlar işğalçı Ermənistanın irqçi və soyqırımı siyasətini əks etdirir, “böyük Ermənistan” kimi sərsəm bir ideyanın həyata keçirilməsinə xidmət edir.

Ermənistanın bölgədə davam edən təxribatları, Azərbaycan Ordusunun uğurlu aprel əməliyyatı və həmin döyüşlər nəticəsində düşməndən azad edilmiş ərazilərdə yenidənqurma işlərinə başlanması barədə məlumat verən müşavir Azərbaycan xalqının öz torpaqlarının işğalı ilə heç zaman barışmayacağını, Azərbaycan ərazisində ikinci erməni dövlətinin yaradılmasına imkan verilməyəcəyini, işğal altında olan bütün torpaqlarımızın sülh yoluna həll olunmayacağı təqdirdə güc yolu ilə tezliklə azad ediləcəyini vurğulayıb.

Daha sonra İordaniya Senatının İordaniya-Azərbaycan qardaşlıq komitəsinin sədri, senator Mərvan əl-Hmud, İordaniya Baş nazirinin sabiq müavini Saleh Ərşidat, Nümayəndələr Palatasının sabiq üzvü Hazem Qaşou, iordaniyalı diplomat, səfir Muvaffaq əl-Acluni, sabiq mədəniyyət naziri Samir Habaşne, yazıçı, Tədqiqatlar və İnformasiya Məsləhətləşmələri üzrə “Ərəbçilk evi”nin (“Dar əl-Arubə”) baş direktoru Sultan Haşim Xəttab, yazıçı-jurnalist, tarixçi Ömər əl-Armuti və başqaları Ermənistanın Azərbaycana qarşı işğalçılıq siyasətini pisləyən, respublikamıza qarşı erməni təcavüzünə son qoyulmasını və işğal olunmuş Azərbaycan torpaqlarının tam azad edilməsini tələb edən çıxışlar ediblər.

Sonda Heydər Əliyev Fondunun dəstəyi ilə çəkilmiş “Xocalı soyqırımı” sənədli filmi nümayiş olunub. Xocalı soyqırımını əks etdirən foto stendlər, kitab və jurnal sərgisi də qonaqlar tərəfindən maraqla qarşılanıb. Tədbir Xocalı soyqırımı qurbanlarının xatirəsinə açılmış ehsan süfrəsi ilə davam etdirilib.

 

AZƏRTAC

 

 

 

Almaniya Bundestaqının nəzdində fəaliyyət göstərən Alman Parlament Cəmiyyətində Xocalı soyqırımının 25-ci ildönümü ilə əlaqədar “Cənubi Qafqazda Təhlükəsizlik və Sabitlik. Almaniya-Azərbaycan əməkdaşlığının perspektivləri” adlı beşinci simpozium keçirilib.

Ənənəvi olaraq Xocalı soyqırımının ildönümü ilə bağlı keçirilən simpozium Azərbaycan Respublikasının Almaniya Federativ Respublikasındakı səfirliyi, Alman-Azərbaycan Forumu, Alman Atlantik Cəmiyyətinin birgə təşkilatçılığı və SOCAR-ın Almaniya nümayəndəliyinin dəstəyi ilə baş tutub.

Alman-Azərbaycan Forumunun sədr müavini Helqa Daub tədbiri açaraq Ermənistanın Azərbaycan ərazilərini işğal etdiyini və dinc əhaliyə divan tutduğunu söyləyib, bu tədbirin həm də Xocalı faciəsi qurbanlarının xatirəsinin anılması məqsədilə keçirildiyini bildirib. O, eyni zamanda, Avropa İttifaqının büdcə və kadr məsələləri üzrə komissarı Günter Ottingerin tədbir iştirakçılarına salamlama məktubu göndərdiyini qeyd edib. G.Ottingerin məktubunda Azərbaycan Respublikasının Prezidenti İlham Əliyevin fevralın 6-da Brüsselə səfəri zamanı Azərbaycan və Avropa İttifaqı arasında münasibətlərin daha da inkişaf etdirilməsinə dair fikir mübadiləsi aparıldığı qeyd edilib, Avropa İttifaqının Azərbaycanla enerji sahəsində mövcud olan strateji tərəfdaşlığın genişləndirilməsində maraqlı olduğu bildirilib. Azərbaycanı tərəfdaş və müxtəlif mədəniyyətlər arasında körpü adlandıran Avropa İttifaqının komissarı ölkəmizin müstəqilliyini, suverenliyini və ərazi bütövlüyünü dəstəklədiklərini qeyd edib.

Azərbaycanın Almaniyadakı səfiri Ramin Həsənov Ermənistanın Azərbaycana qarşı hərbi təcavüzü, Xocalıda azərbaycanlı mülki əhaliyə qarşı törədilmiş soyqırımı, Ermənistan-Azərbaycan, Dağlıq Qarabağ münaqişəsinin həlli yolları barədə danışıb. Səfir ölkəmizin inkişafı, regionda aparıcı gücə çevrilməsi, regional inkişafa və sabitliyə töhfə verən böyük layihələr həyata keçirməsi barədə məlumat verib. O, Ermənistan-Azərbaycan, Dağlıq Qarabağ münaqişəsinin bu proseslər üçün ciddi təhlükə yaratdığını qeyd edib.

Səfir Azərbaycan-Almaniya ikitərəfli münasibətlərinin tarixi və bugünkü dinamikasına toxunaraq 2017-ci ilin iki dövlət arasında diplomatik münasibətlərin qurulmasının 25 illiyi və Azərbaycanda alman məskənlərinin 200 illiyi ilə yadda qalacağını diqqətə çatdırıb. O, dövlət başçısı İlham Əliyevin Cənubi Qafqaz regionunda alman məskənlərinin salınmasının 200 illiyi haqqında Sərəncam imzaladığını xatırladıb. R.Həsənov Azərbaycan üçün dost və tərəfdaş ölkə olan Almaniyanın Ermənistan-Azərbaycan, Dağlıq Qarabağ münaqişəsinin həllinə daha böyük səylə töhfə verəcəyinə ümid etdiyini bildirib.

Almaniya Xarici İşlər Nazirliyində siyasi idarənin direktor müavini, Mərkəzi və Şərqi Avropa ölkələri üzrə xüsusi nümayəndə, səfir Andreas Peşke ölkələrimiz arasında diplomatik münasibətlərin qurulmasının 25 illiyindən, Azərbaycanın müstəqillik illərində qazandığı nailiyyətlərdən, dünyaya səs salan iqtisadi və mədəni layihələrindən bəhs edib.

A.Peşke Ermənistan-Azərbaycan, Dağlıq Qarabağ münaqişəsini bütün region üçün maneə adlandırıb. O, Xocalı hadisələrinin sözügedən münaqişədə ən qəddar qırğınlardan biri və zorakılığın simvolu olduğunu qeyd edib. Alman diplomat Ermənistan-Azərbaycan, Dağlıq Qarabağ münaqişəsində status-kvonun həll yolu olmadığını vurğulayıb, Almaniyanın münaqişə tərəflərini danışıqlar masasına gətirmək üçün əlindən gələni etdiyini və bu səyləri gələcəkdə də ATƏT troykasının və Minsk qrupunun üzvü qismində davam etdirəcəyini bildirib.

Daha sonra Boxum Rur Universitetinin professoru, beynəlxalq hüquq üzrə mütəxəssis Hans Yoaxim Hayntse “Beynəlxalq hüquqda dövlət ərazisinin işğalına reaksiya vermək imkanları” mövzusunda məruzə ilə çıxış edib. Alman mütəxəssis beynəlxalq hüquqda güc tətbiqinin qadağan olunduğunu və Ermənistanın Azərbaycan ərazilərini işğala məruz qoymaqla bu prinsipi pozduğunu qeyd edib. O, Dağlıq Qarabağ regionunun və ətraf rayonların işğalını qanunsuz adlandırıb və yaranmış vəziyyətin davamlı olmasının mümkün olmadığını diqqətə çatdırıb. Alman professor işğal kimi qeyri-qanuni halların aradan qaldırılması üçün məsuliyyətin BMT-nin Təhlükəsizlik Şurasının üzərinə düşdüyünü qeyd edib və sözügedən qurumun Ermənistan-Azərbaycan, Dağlıq Qarabağ münaqişəsinə dair qəbul etdiyi qətnamələrdə Azərbaycanın ərazi bütövlüyünə dəstək ifadə olunduğunu bildirib.

H.Y.Hayntse xalqların öz müqəddəratını təyinetmə hüququnun Azərbaycanın Dağlıq Qarabağ bölgəsindəki ermənilərə şamil edilməsinin beynəlxalq hüquq nöqteyi-nəzərindən mümkün olmadığını, Dağlıq Qarabağ ermənilərinin Azərbaycanın ərazi bütövlüyü çərçivəsində milli azlıq hüquqlarından yararlanmalı olduqlarını bildirib.

Çıxışlardan sonra Almaniya Bundestaqının deputatlarının iştirakı ilə Ermənistan-Azərbaycan, Dağlıq Qarabağ münaqişəsinə dair panel müzakirə keçirilib. Müzakirəyə Azərbaycan Respublikasının Almaniyanın Ştutqart şəhərindəki fəxri konsulu Otto Hauzer moderatorluq edib.

Bundestaqın deputatı, ATƏT Parlament Assambleyasında alman nümayəndə heyətinin rəhbəri Doris Barnet Azərbaycanı Almaniyanın mühüm tərəfdaşı adlandırıb. Ermənistan-Azərbaycan, Dağlıq Qarabağ münaqişəsinə toxunan alman deputat Azərbaycanın münaqişənin həllində həqiqətən çox maraqlı olduğunu vurğulayıb. D.Barnet ATƏT Parlament Assambleyası çərçivəsində münaqişənin həllinə dair müəyyən təşəbbüslərin olduğunu, ötən il alman nümayəndə heyətinin təşəbbüsü ilə ATƏT PA-nın Azərbaycan, Ermənistan, Gürcüstan və Rusiyadan olan üzvlərinin iştirakı ilə Almaniyada görüş keçirildiyini və orada Cənub Qafqazdakı münaqişələrin müzakirə edildiyini bildirib.

Bundestaqın iqtisadiyyat və enerji komitəsinin üzvü Mark Hauptman Azərbaycanın müstəqillik illərində qazandığı nailiyyətləri vurğulayıb, “ASAN xidmət” vasitəsilə Azərbaycanın sosial xidmətlər sahəsində yaratdığı səmərəli və şəffaf sistemin Almaniya üçün nümunə ola biləcəyini qeyd edib. M.Hauptman Azərbaycan və Almaniya arasında iqtisadi və enerji əməkdaşlığını yüksək qiymətləndirib. O, Ermənistan-Azərbaycan, Dağlıq Qarabağ münaqişəsinə digər ərazi münaqişələri ilə eyni yanaşma tətbiq olunmasının vacibliyini vurğulayıb. Azərbaycanın ərazi bütövlüyünə dəstək ifadə edən deputat son 25 ildə sülh danışıqlarının nəticəsiz qaldığını təəssüflə qeyd edib və bunun məsuliyyətinin bütünlüklə Ermənistanın üzərinə düşdüyünü bildirib.

Almaniya-Cənubi Qafqaz parlament qrupunun sədr müavini Yohannes Kars Ermənistan-Azərbaycan, Dağlıq Qarabağ münaqişəsinə toxunaraq burada beynəlxalq hüquqi vəziyyətin tam aydın olduğunu, Azərbaycanın ərazi bütövlüyünün Ermənistan tərəfindən pozulduğunu, münaqişənin həlli naminə ümumi maraqların tapılması üçün intensiv iş aparılmalı olduğunu qeyd edib.

Bundestaqın xarici siyasət komitəsinin üzvü Karl-Qeorq Velman Azərbaycanın regional və beynəlxalq əhəmiyyətini vurğulayaraq, ölkəmizlə əməkdaşlığın Almaniyanın iqtisadi və təhlükəsizlik maraqlarında olduğunu qeyd edib. O, xarici siyasətdə ikili standartlarla yanaşmanın yolverilməz olduğunu bildirib.

Daha sonra simpoziumda Berlin Azad Universiteti və Qissen Universitetinin müəllimi Mixael Hessin “Cənnətdə tanklar: Ermənistan və Azərbaycan arasında Dağlıq Qarabağ münaqişəsi” adlı kitabının təqdimatı keçirilib. Alman-Azərbaycan Forumunun icraçı direktoru Pərviz Yəzdaninin aparıcılığı, müəllif və Berlin Humboldt Universitetinin Azərbaycan tarixi kafedrasının müdiri professor Eva-Maria Auxun iştirakı ilə sözügedən kitab barədə fikir mübadiləsi aparılıb.

Simpoziumda Almaniya Müdafiə Nazirliyində dövlət katibi Markus Qrübel, Xarıcı İşlər Nazirliyinin nümayəndələri ilə yanaşı, hökumətin digər yüksək rütbəli təmsilçiləri, Bundestaqın deputatları, ictimai-siyasi, iqtisadi, mədəni dairələrin, Berlindəki xarici diplomatik missiyaların, Almaniyadakı Azərbaycan diasporunun və KİV-lərin təmsilçiləri iştirak ediblər.

AZƏRTAC

 

 

 

Ötən il Qubadlı rayonu üzrə büdcə vəsaitindən səmərəli istifadə olunması üçün ardıcıl iş aparılıb. Cari ildə respublika üzrə mərkəzi büdcədən dotasiya almayacaq 33 rayondan biri də Qubadlı rayonudur. Bu o deməkdir ki, rayonda sahibkarlığın inkişafı istiqamətində aparılan işlər öz nəticəsini verməkdədir.

AZƏRTAC xəbər verir ki, bu barədə fevralın 14-də Qubadlı rayonunun 2016-cı ilin sosial-iqtisadi inkişafının yekunlarına və qarşıda duran vəzifələrə həsr olunan hesabat yığıncağında icra hakimiyyətinin başçısı Malik İsaqov məlumat verib.

Hüquq-mühafizə orqanlarının, idarə, müəssisə və təşkilatların rəhbərlərinin, ictimaiyyət nümayəndələrinin iştirak etdiyi hesabat yığıncağında məruzə ilə çıxış edən M.İsaqov 2016-cı ildə qubadlılı məcburi köçkünlərin mənzil-məişət şəraitinin yaxşılaşdırılması, kommunal problemlərinin həlli istiqamətində mühüm işlərin görüldüyünü diqqətə çatdırıb. Bildirib ki, Saatlı rayonunda məskunlaşan 2 ailə, Sabirabad rayonunda isə 3 ailə rayon rəhbərliyinin müraciəti əsasında Qaçqınların və Məcburi Köçkünlərin İşləri üzrə Dövlət Komitəsi tərəfindən yeni mənzillərlə təmin edilib, Sumqayıt şəhər 10 saylı Peşə Liseyində 3 ailə üçün mənzillər tikilib. “Şəfa” sanatoriyasında və Kimyaçılar qəsəbəsində 2 məcburi köçkün ailəsinin mənzil şəraiti yaxşılaşdırılıb. Rayon icra hakimiyyəti tərəfindən 47-ci məhəllə və 12-ci mikrorayon ərazisində əvvəllər tikilmiş iki sosial obyektdə qaz sayğacları quraşdırılaraq “mavi yanacağ”ın müntəzəm verilməsi təmin edilib.

Hesabat ilində 15 ailənin yaşadığı mənzillərin dam örtüyü, 42-ci məhəllədə bir şəhid ailəsinin mənzili, 15-ci məhəllədəki yeddi yataqxanada ümumi istifadə sahələri, 40-cı məhəllədə isə iki binada su və kanalizasiya xətləri təmir olunub. “Şəfa” sanatoriyasındakı məclis evində və həyətində təmir-abadlıq işləri aparılıb, 10 saylı Texniki Peşə Liseyinin həyətinə asfalt döşənib. Aşağı Mollu və Çardaqlı tam orta məktəblərinin həyətində təmir və abadlıq işləri görülüb, 40-cı məhəllədəki 1 və 2 saylı binaların dam örtükləri təmir olunub.

Rayon icra hakimiyyətinin başçısı aprel döyüşlərindən danışaraq, həmin döyüşlərdə qubadlılı hərbçilərin də qəhrəmanlıq göstərdiyini bildirib, Şükür Həmidovun Milli Qəhrəman adına layiq görülməsini, Mais Bərxudarovun isə general-mayor rütbəsi ilə təltif olunmasını bütün əsgər və zabitlərimizin hünərinə verilən dəyər kimi qiymətləndirib.  

Diqqətə çatdırılıb ki, hesabat ilində məcburi köçkünlərin məskunlaşdığı Ceyranbatan qəsəbəsi və bağlar yaşayış massivində Sumqayıt Regional Elektrik Şəbəkəsi tərəfindən ərazidə bir ədəd yeni transformator quraşdırılıb, Xızının Sitalçay qəsəbəsində yaşayan köçkünlərin elektriklə bağlı problemləri aradan qaldırılıb.

Ötən il Sarıqaya ərazisində sanatoriya binasında yanğın zamanı yararsız hala düşmüş bina qısa vaxtda əsaslı təmir edilərək yenidən köçkünlərin istifadəsinə verilib. Yanğından zərər çəkən 14 ailənin hər birinə daxili imkanlar hesabına maddi yardım və Nazirlər Kabinetinin xətti ilə 5 min manat pul köməkliyi edilib.

2016-cı ildə rayonda 7 min 885 nəfər pensiyaçı qeydiyyatda olub, Dövlət Sosial Müdafiə Fondunun rayon şöbəsi tərəfindən bütün müavinət və pensiyalar vaxtlı-vaxtında ödənilib. İl ərzində 344 ailənin hər birinə 142,8 manat olmaqla, ünvanlı sosial yardım verilib. Hesabat ilində rayonda işsizlik səviyyəsinin aşağı salınması istiqamətində müəyyən işlər görülüb, 215 yeni iş yeri yaradılıb.

Yığıncaqda təhsil, səhiyyə, mədəniyyət

, gənclər, idman sahələrində görülən işlər barədə də məlumat verilib.

Tədbirdə problemlərdən də danışılıb, onların həlli ilə bağlı təkliflər səsləndirilib.

Çıxış edənlər Prezident İlham Əliyevin Cəbrayıl rayonunun Cocuq Mərcanlı kəndinin bərpası ilə bağlı imzaladığı Sərəncamı yüksək qiymətləndirib, işğal altındakı digər torpaqlarımızın da tezliklə azad olunacağına əminliklərini bildiriblər.

Hesabat yığıncağında Prezident Administrasiyasının məsul işçisi Ağaəli Əhmədov və Milli Məclisin deputatı İmamverdi İsmayılov iştirak ediblər.

Sonra rayonun sosial-iqtisadi, mədəni inkişafında, ictimai həyatında və digər sahələrdə fərqlənən bir qrup şəxsə  fəxri fərmanlar verilib.

Hesabat yığıncağında Prezident İlham Əliyevə müraciət qəbul olunub.

 

AZƏRTAC

 

 

 

 

Azərbaycan Prezidenti cənab İlham Əliyevin sədrliyi ilə Nazirlər Kabinetinin 2016-cı ilin sosial-iqtisadi inkişafının yekunlarına və qarşıda duran vəzifələrə həsr olunmuş iclasında ölkə həyatının bütün sahələri təhlil olunmuşdur. Aqrar sektorun ölkə iqtisadiyyatında böyük rol oynadığını vurğulayan cənab Prezident demişdir ki, keçən il heyvandarlıqla bağlı ciddi addımlar atılıb. İndi yeni layihələr icra edilir. Biz bundan sonra heyvandarlığı ancaq qapalı şəraitdə inkişaf etdirməliyik. Bu, daha səmərəlidir və eyni zamanda bizə imkan verəcək ki, bu gün səmərəsiz istifadə olunan örüş torpaqlarından səmərəli şəkildə istifadə edək. Onların təyinatı dəyişdirilməlidir. İndi harada mümkündür işlər gedir və biz onları da əkinə cəlb etməliyik.

 

Ölkəmizin bütün bölgələrində çalışan aqrar sahənin insanları yaxşı başa düşürlər ki, heyvandarlıq kənd təsərrüfatının əsas sahələrindən biridir. Məhz bu sahənin inkişaf etdirilməsi ilə ölkədə ət, yağ, yumurta, süd və digər ərzaq məhsullarının bolluğuna nail olmaq, həmin məhsulların idxaldan asılılığını minimuma endirmək olar.

Kənd Təsərrüfatı Nazirliyi yanında Dövlət Baytarlıq Nəzarəti Xidməti (DBNX) Azərbaycan Respublikası ərazisində heyvanların (mal-qaranın, quşların, balıqların, vəhşi heyvanların və başqalarının) müxtəlif xəstəliklərdən qorunması və onların müalicəsi, əhalinin insan və heyvanlar üçün ümumi olan xəstəliklərdən mühafizəsi, ölkə ərazisinə xarici dövlətlərdən keçə biləcək təhlükəli xəstəliklərin qarşısının alınması, öz səlahiyyətləri çərçivəsində Azərbaycan Respublikasının daxili bazarına nəzarəti həyata keçirmək üçün heyvan mənşəli məhsulların, xammalın, baytarlıq preparatlarının, yem və yem əlavələrinin idxalı, ixracı, istehsalı, emalı, tədarükü, daşınması, saxlanması, satışı zamanı istehlakçıların keyfiyyətsiz, təhlükəli və saxtalaşdırılmış məhsullarla təminatının qarşısını almaq məqsədilə zəruri baytarlıq-sanitariya nəzarətini həyata keçirir.

Başa vurduğumuz il ərzində Kənd Təsərrüfatı Nazirliyinin müvafiq əmri ilə təsdiq olunmuş 2016-cı il üçün “Epizootiya əleyhinə profilaktik və diaqnostik tədbirlər planı”na uyğun olaraq nəzərdə tutulmuş baytarlıq tədbirləri vaxtında yerinə yetirilərək ölkənin epizootik sabitliyi qorunub saxlanmışdır. Belə ki, qarayara xəstəliyinə qarşı 2868246 baş iribuynuzlu, 7583684 baş xırdabuynuzlu, 7532 baş donuzlarda və 95580 baş təkdırnaqlı heyvanlarda, taun xəstəliyinə qarşı 6463 baş donuzlarda, dabaq xəstəliyinə qarşı 5130920 baş iribuynuzlu, 6392949 baş xırdabuynuzlu heyvanlarda, quduzluq xəstəliyinə qarşı 247947 baş itdə, nodulyar dermatit xəstəliyinə qarşı 3147794 baş iribuynuzlu heyvanda, qoyunların çiçəyinə qarşı 8112645 baş davarda, həmçinin quşların nyukasl xəstəliyinə qarşı 18270983 baş quşda “H” vaksini ilə, 19865086 baş quşda “La-sota” vaksini ilə, leptospiroz xəstəliyinə qarşı 428612 baş iribuynuzlu heyvanlarda, rinopnevmaniya xəstəliyinə qarşı 2013 baş, eləcə də qrip xəstəliyinə qarşı 2011 baş təkdırnaqlı heyvanlarda profilaktik peyvəndləmələr aparılmışdır.

Dünya Bankının maliyyə dəstəyi ilə “Kənd Təsərrüfatının Rəqabət Qabiliyyətinin Gücləndirilməsi” layihəsi çərçivəsində respublikamızda ilk dəfə olaraq xırdabuynuzlu heyvanların bruselyoz xəstəliyinə qarşı bütün ölkəni əhatə edən “tam sürü prinsipi” ilə peyvəndləmə kampaniyası həyata keçirilmişdir. Bu məqsədlə 6 milyon 500 min doza miqdarında “Rev-1” (göz damcı üsulu) vaksini alınaraq yerlərdə heyvanlara tətbiq edilmişdir. İribuynuzlu heyvanlar arasında bruselyoza qarşı peyvəndləmənin aparılması isə 2017-ci ildə nəzərdə tutulmuşdur. Heyvanlar arasında bruselyoz xəstəliyinə qarşı aparılan tədbirlər insanlar və heyvanlar arasında bu xəstəliyin tədricən azalmasına və kökünün kəsilməsinə səbəb olacaqdır.

Dövlət Baytarlıq Nəzarəti Xidməti hazırlanmış tədbirlər planına uyğun xırdabuynuzlu heyvanlar arasında peyvəndləmənin mütəşəkkil səviyyədə həyata keçirilməsi üçün əməkdaşlarını bölgələrə ezam etmişdir. Xidmətin əməkdaşları yerlərdə vaksinlərin heyvanlara vurulması üçün baytarlıq mütəxəssislərinə təlimlər keçərək vaksinin tətbiq qaydaları onlara ətraflı izah edilmişdir. Rayon (şəhər) baytarlıq idarələri və sahə baytarlıq məntəqələri “Rev-1” vaksini, biotəhlükəsizlik vasitələri və dezinfeksiya maddələri ilə tam təmin olunmuşlar. Bruselyoz xəstəliyinə qarşı mübarizə tədbirləri çərçivəsində əhalinin maarifləndirilməsi məqsədi ilə videoçarx və bukletlər hazırlanaraq kütləvi informasiya vasitələrində (KİV) yayımlanmışdır.

Həssas heyvanlar arasında bruselyoz xəstəliyini aşkar etmək, xəstəliyin yayılmasının qarşısını almaq məqsədi ilə 924116 baş iribuynuzlu, 25454 baş xırdabuynuzlu heyvanlardan, o cümlədən 134669 baş qoçdan qan nümunəsi alınaraq seroloji müayinə edilmişdir. Bununla yanaşı, epididimit xəstəliyinə görə 114561 baş törədici qoç (seroloji), vərəmə görə 356985 baş iribuynuzlu heyvan (allerji), manqoya görə 55444 baş təkdırnaqlı heyvan (göz malleinizasiyası) diaqnostik müayinəyə cəlb olunmuşdur.

2016-cı ildə “quş qripi”nə görə 4 dəfə seromonitorinq keçirilmiş, 88 baş çöl quşunun patmaterialı və 6994 baş ev quşunun qan nümunələri Respublika Baytarlıq Laboratoriyasında müvafiq qaydada müayinə edilmiş, nəticədə “quş qripi” aşkar edilməmişdir.

Cari ildə də Azərbaycan Respublikasında heyvanlar arasında xüsusi təhlükəli xəstəliklərə qarşı aparılan profilaktik tədbirlərin səmərəliliyini və effektivliyini təmin etmək məqsədi ilə Kənd Təsərrüfatı Nazirliyi tərəfindən təsdiq edilmiş “Epizootiya əleyhinə profilaktik və diaqnostik tədbirlər planı”na uyğun olaraq 2017-ci ilin müalicə-profilaktik və epizootik tədbirlərin aparılmasına start verilmişdir.

Nazirlik tərəfindən təsdiq edilmiş tədbirlər planına uyğun dövlət vəsaiti hesabına maliyyələşən xəstəliklərə qarşı ilin birinci rübü ərzində profilaktik aparılması nəzərdə tutulur. Bu iribuynuzlu, dəvə, donuz və təkdırnaqlı heyvanlar arasında qarayara, ev itləri arasında quduzluq, atlarda qrip və rinopnevmoniya, donuzlarda klassik taun, quşlar arasında nyukasl, həmçinin iribuynuzlu heyvanlar arasında dabaq xəstəliyinə qarşı profilaktiki peyvəndləmə, iribuynuzlu heyvanlar arasında bruselyoza görə seroloji müayinələrin aparılmasını əhatə edəcəkdir.

Bu məqsədlə dövlət büdcəsi vəsaiti hesabına baytarlıq preparatları və lazımi vasitələr tender əsasında alınaraq rayon (şəhər) baytarlıq idarələrinə göndərilmişdir. Şəffaflığı təmin etmək məqsədilə 2017-ci il üçün heyvanlar və quşlar arasında “Epizootiya əleyhinə profilaktik və diaqnostik tədbirlər planı”na uyğun olaraq istifadə ediləcək biopreparatların, dezinfeksiya, dezinseksiya və müalicəvi dərman preparatlarının üzərində “SATILA BİLMƏZ” ifadəsi yazılıb.

Büdcə vəsaiti hesabına alınmış baytarlıq preparatlarının istifadəsinin tənzimlənməsi, şəffaflığın təmin edilməsi və nəzarətin gücləndirilməsi məqsədilə rayon (şəhər) baytarlıq idarələrinə müvafiq tapşırıqlar verilib. Həmin tapşırıqlarda baytarlıq preparatlarının sahə baytarlıq məntəqələrinə bölgüsünə, onların yerlərdə tətbiqinə rayon (şəhər) baytarlıq idarələri tərəfindən ciddi nəzarət edilməsi, dövlət büdcə vəsaiti hesabına alınmış və üzərində “SATILA BİLMƏZ” sözləri yazılmış biopreparatlar, dezinfeksiya, dezinseksiya və müalicəvi dərman preparatlarının özəl baytarlıq aptekləri, baytar həkimləri, digər fiziki və hüquqi şəxslər tərəfindən satışına qəti şəkildə yol verilməməsi, dövlət büdcə vəsaiti hesabına alınmış və üzərində “SATILA BİLMƏZ” sözləri yazılmış preparatların işlədilməsi zamanı epizootik və ambulator kitablarda qeydiyyatının aparılaraq istifadə edilməsi tapşırılıb.

Baytarlıq idarələrinə göndərilən müvafiq tapşırıqda, eləcə də Dövlət Baytarlıq Nəzarəti Xidmətinin əməkdaşları tərəfindən reydlər aparılan zaman hər hansı rayon (şəhər) ərazisindəki özəl baytarlıq aptekində, fiziki və hüquqi şəxslərdə dövlət büdcə vəsaiti hesabına alınmış və üzərində “SATILA BİLMƏZ” sözləri yazılmış baytarlıq preparatları aşkarlanarsa bu işdə məsuliyyəti olan şəxslər haqqında ciddi inzibati cəza tədbirlərinin görüləcəyi bildirilib.

Yeri gəlmişkən, əhaliyə müraciət edərək

 bildiririk ki, qarayara xəstəliyi bütün növ kənd təsərrüfatı heyvanlarının, vəhşi heyvanların iti gedişli yoluxucu xəstəliyidir. Qarayara xəstəliyinə insanlar da yoluxur. Bu gün ölkədə qarayara xəstəliyinə qarşı aparılan peyvəndləmədə əsas məqsəd heyvan və insanların sağlamlığı qorumaqdır. Nyukasıl xəstəliyi quşların yüksək kontagiozlu virus xəstəliyi olmaqla yüksək tələfat verməsi ilə səciyyələnir və xeyli miqdarda iqtisadi ziyan törədir. Ona görə də bu tədbirlərin aparılmasında insanların, təsərrüfat sahiblərinin baytar həkimlərinə yaxından köməklik göstərmələri vacibdir. 

Başa vurduğumuz ildə əhalinin təhlükəsiz və sağlam heyvandarlıq məhsullarından istifadəsi üçün qida təhlükəsizliyinin təmin olunması sahəsində də bir sıra tədbirlər görülmüşdür. Belə ki, heyvan xəstəliklərinin, idxal olunan və ölkədə istehsal edilən heyvandarlıq məhsullarının laborator müayinələrinin beynəlxalq standartlar səviyyəsinə çatdırılması üçün Respublika Baytarlıq Laboratoriyası 2-ci Bioloji Təhlükəsizlik Səviyyəsində (BTS-2) yenidən qurulmaqla müasir laboratoriya avadanlıqları ilə təmin edilmişdir. Respublika Baytarlıq Laboratoriyasında xəstəliklərin müayinəsi ilə yanaşı heyvandarlıq məhsullarının təhlükəsizliyinin müayinəsi üçün yeni laboratoriya şöbələri yaradılmış, heyvandarlıq məhsullarında antibiotiklərin, pestisidlərin, hormonların, ağır zəhərli metalların, QMO-nun, kimyəvi maddələrin qalıq miqdarının və s. təyin olunması üçün yeni laboratoriya avadanlıqları alınaraq istifadəyə verilmişdir. Yeni alınmış laboratoriya avadanlıqlarında aparılan müasir müayinə metodlarının mənimsənilməsi və müayinələrin beynəlxalq standartlara uyğun aparılmasının təşkili məqsədi ilə Türkiyənin Kənd Təsərrüfatı Nazirliyi ilə Azərbaycan Respublikasının Kənd Təsərrüfatı Nazirliyi arasında əldə olunmuş razılığa əsasən Respublika Baytarlıq Laboratoriyasının 38 nəfər mütəxəssisi Türkiyənin İstanbul, Ankara və Bursa şəhərlərində yerləşən müasir laboratoriyalarında təlim kurslarında olmuş və müasir müayinə metodlarını tam mənimsəmişlər.

Heyvan mənşəli ərzaq məhsullarının keyfiyyətinin və təhlükəsizliyinin müasir tələblər səviyyəsində müayinə etmək məqsədi ilə DTRA təşkilatının dəstəyi çərçivəsində Respublika Baytarlıq Laboratoriyasının mütəxəssislərindən 3 nəfər ELİSA və 3 nəfər PZR üzrə, 2 nəfər də biotəhlükəsizlik üzrə milli təlimçilər hazırlanmışdır. DTRA tərəfindən zona baytarlıq laboratoriyaları və şəhər, rayon baytarlıq idarələrində “Yoluxucu Xəstəliklərin Elektron Müşahidə Sistemi” (YXEMS) yaradılmış, şəhər (rayon) baytarlıq idarələrinin aylıq və rüblük hesabatlarının elektron ötürülməsi bu sistemdə öz əksini tapmışdır. Şəhər (rayon) baytarlıq idarələrinin və zona baytarlıq laboratoriyalarının mütəxəssislərindən 150 nəfərə YXEMS üzrə, 120 nəfərə epidemiologiyanın əsasları üzrə, 120 nəfərə isə təhlükəli heyvan xəstəliklərinin klinikası üzrə təlimlər keçirilmişdir.

Beynəlxalq Epizootik Büronun (BEB) tövsiyəsi ilə “Tvinninq” layihəsi çərçivəsində Respublika Baytarlıq Laboratoriyası ilə BEB-in referens Laboratoriyası sayılan İtaliyada yerləşən Zooprofilaktika İnstitutu (İZSAM) arasında əməkdaşlıq edilir. Bu əməkdaşlıq çərçivəsində “Qida təhlükəsizliyi” mövzusunda Respublika Baytarlıq Laboratoriyasının mütəxəssisləri üçün referens laboratoriyasında təlimlərin keçirilməsi, laboratoriya işlərinin təkminləşdirilməsi ilə bağlı referens laboratoriyanın peşəkar mütəxəssislərinin Respublika Baytarlıq Laboratoriyasına səfərləri və laboratoriyanın beynəlxalq akkreditasiyadan keçirilməsinin 2017-ci ildə başa çatdırılması üçün hazırlıq işlərinin təşkili nəzərdə tutulmuşdur. Artıq bu məsələlərlə əlaqədar BEB-in 3 nəfər beynəlxalq eksperti (İZSAM-ın peşəkar mütəxəssisləri) ötən ilin noyabr ayında Respublika Baytarlıq Laboratoriyasında olmuşlar.

Xidmətin strukturuna daxil olan 47 rayon baytarlıq diaqnostika kabinetləri müasir otaqlarda yerləşdirilməklə hamısı mebel və laboratoriya avadanlıqları ilə təmin olunmuşdur.

Ölkə daxilində heyvan mənşəli qida məhsullarının təhlükəsizliyinin təmin olunması məqsədi ilə respublikanın ticarət bazarlarında fəaliyyət göstərən 115 baytarlıq-sanitariya ekspertiza laboratoriyasının (BSEL) hər birinə 27 adda müasir laboratoriya avadanlığı verilmişdir.

12 zona baytarlıq laboratoriyasından 5-i (Göygöl, Bərdə, Qax, Quba və Sabirabad) beynəlxalq standarların tələblərinə cavab verən səviyyədə yenidən qurulmaqla müasir laboratoriya avadanlıqları ilə təmin olunmuşdur. Qalan 7 zona baytarlıq laboratoriyasının (Salyan, Lənkəran, Beyləqan, Ucar, Şəki, Tovuz və Şamaxı) da heyvan xəstəlikləri və qida təhlükəsizliyi üzrə beynəlxalq standartların tələblərinə cavab verən 2-ci Bioloji Təhlükəsizlik Səviyyəsində (BTS-2) tikintisi başa çatmaq ərəfəsindədir. Lənkəran Zona Baytarlıq laboratoriyasının avadanlıqlarla təmin edilməsi üçün tender keçirilmiş və müasir avadanlıqlar alınmışdır. 6 zona baytarlıq laboratoriyasının (Salyan, Lənkəran, Ucar, Şəki, Tovuz və Şamaxı) müasir laboratoriya avadanlıqları ilə təmin edilməsi 2017-ci ildə nəzərdə tutulmuşdur.

Qida təhlükəsizliyi ilə əlaqədar olaraq 2016-cı ildə Respublika Baytarlıq Laboratoriyasında 11187 ədəd bakterioloji, 3293 ədəd biokimyəvi, 25193 ədəd radioloji, 1685 ədəd kimya-toksikoloji, 1231 ədəd parazitoloji, 22233 ədəd virusoloji, 8078 ədəd hormonal, 18958 ədəd seroloji, həmçinin 2503198 ədəd iri və xırdabuynuzlu heyvan dərisi müayinə edilmişdir.

2016-cı il ərzində dövlət baytarlıq nəzarətində olan heyvan mənşəli qida məhsullarının təhlükəsizliyinin təmin olunması və keyfiyyətinə nəzarətin gücləndirilməsi məqsədi ilə bazarlarda, kəsim sexlərində və ticarət mərkəzlərində fəaliyyət göstərən baytarlıq-sanitariya ekspertiza laboratoriyalarında (BSEL) aparılan 1247528 müayinə nəticəsində 13 tondan artıq müxtəlif növ heyvan və quş ətinin, 33 tondan artıq iri və xırdabuynuzlu heyvanların daxili orqanlarının, 3,6 tondan artıq balığın, 9 tondan artıq süd və süd məhsullarının, 21 min ədəddən artıq yumurtanın və 185 kq balın insan qidası üçün yararsız olması aşkar edilərək baytarlıq qanunvericiliyinə uyğun zərərsizləşdirilib məhv edilmişdir.

Bununla yanaşı heyvan mənşəli qida məhsullarının təhlükəsizliyi ilə əlaqədar keçirilən reydlər nəticəsində aşkar edilənmənşəyi məlum olmayan, Respublika Baytarlıq Laboratoriyasının müvafiq saylı baytarlıq-sanitariya ekspertizalarına əsasən insan qida üçün yararsız hesab edilən 20,3 ton müxtəlif növ heyvan ətləri (o cümlədən 5,3 ton at əti) və yararlıq müddəti ötmüş 53 tondan artıq müxtəlif növ kolbasa-sosis məmulatları Dövlət Baytarlıq Nəzarəti Xidmətinin mütəxəssisləri tərəfindən kütləvi informasiya vasitələri əməkdaşlarının iştirakı ilə qanunvericiliyə uyğun zərərsizləşdirilməklə məhv edilmişdir.

2016-cı ildə baytarlıq-sanitariya qaydalarının pozulmasına görə 174 nəfərə inzibati protokol tərtib edilib.

Ölkə Prezidentinin ixrac məhsullarının təşviqi ilə bağlı müvafiq tapşırığına uyğun 2016-cı il ərzində ölkə üzrə heyvanların və heyvandarlıq məhsullarının ixracı 2015-ci ilin eyni dövrü ilə müqayisədə xeyli artmışdır. Belə ki, ət və ət məhsullarının ixracı 52 faiz, süd və süd məhsullarının (quru süd, kərə yağı, pendir, qaymaq, yoqurt-xama, ayran və s.) ixracı isə 142 faiz, diri heyvanların ixracı (kəsim və damazlıq üçün iribuynuzlu heyvanlar) 100 faiz artmışdır.

Dövlət Baytarlıq Nəzarəti Xidm

ətinin əməkdaşları beynəlxalq təşkilatların, o cümlədən BMT-nin Ərzaq və Kənd Təsərrüfatı Təşkilatının (FAO), Ümumdünya Ticarət Təşkilatının (ÜTT) və Ümumdünya Heyvan Sağlamlığı Təşkilatının (BEB) təşkil etdiyi beynəlxalq konfranslarda, seminarlarda, təlim kurslarında mütəmadi olaraq iştirak edirlər.

Kənd Təsərrüfatı Nazirliyi yanında Dövlət Baytarlıq Nəzarəti Xidməti bildirir ki, həyata keçirilmiş hərtərəfli və planauyğun baytarlıq tədbirləri nəticəsində iti yoluxucu xəstəliklərə görə Azərbaycan Respublikasında epizootik vəziyyət sabitdir və vəziyyətə nəzarət olunur.

 

Azər SÜLEYMANOV,

Kənd Təsərrüfatı Nazirliyi

yanında Dövlət Baytarlıq Nəzarəti Xidməti rəisi vəzifəsini icra edən. 

 

 

 

Hər bir meqapolis, xüsusən içməli su mənbələrindən uzaqda yerləşən Bakı kimi şəhər üçün su həyati əhəmiyyətə malikdir. Odur ki, bu problem bütün dövrlərdə diqqət mərkəzində olub, paytaxtın su təchizatını yoluna qoymaq üçün davamlı addımlar atılıb. Bakının su tarixçəsinə nəzər salsaq nə görəcəyik? Vaxt vardı, sakinlər evlərinə suyu vedrə ilə daşıyırdılar. Şəhərin cüzi hissəsi istisna olmaqla, mənzillərə su qrafiklə - sutkada 4-5 saat verilirdi. Lakin bu gün “Azərsu” ASC-dən verilən son məlumata görə, paytaxt sakinlərinin 80,6 faizi, ölkə əhalisinin isə 65,6 faizi fasiləsiz içməli su ilə təmin olunur. “Azərsu”da deyirlər ki, bu göstərici tezliklə 100 faizə çatacaq.

Bakının həqiqətən də maraqlı su tarixçəsi var. Gəlin, bu tarixçənin bəzi səhifələrini vərəqləyək.

 

Yüz il əvvəl Bakıya su gəmilərlə,

tuluqlarla daşınırdı

İnanılmaz görünsə də, həqiqətdir: XX əsrin əvvəllərində Bakıya suyu Kür və Volqa çaylarından gəmirlərlə, barjlarla daşıyıb gətirirdilər. Neft bumu ilə əlaqədar əhalinin sürətlə artması su böhranını daha da dərinləşdirirdi.

Bir qədər əvvələ qayıdaq.

1865-ci ilədək şəhər əhalisini içməli su ilə təmin edən üç quyu-kəmər sistemi içməli su qıtlığının qarşısını almaq iqtidarında deyildi. İlkin olaraq yeni quyuların qazılması, köhnə su hövzələrinin tutumunun artırılması və yenilərinin tikilməsi üçün tədbirlər görülməyə başlandı. Həmin vaxt Bakıda su quyularının sayı artırılaraq 600-ə çatdırılsa da, problem həll olunmamış qalırdı.

1879-cu ildə neft milyonçusu, şəhər dumasının üzvü Hacı Zeynalabdin Tağıyevin təklifi ilə su kəmərləri komissiyası yaradıldı və Bakını su ilə təmin etmək məqsədilə yeni mənbələrin axtarışına başlandı. Tədqiqatlar nəticəsində məlum oldu ki, Bakı ətrafında yetərincə içməli su ehtiyatı yoxdur.

Hacı Zeynalabdin Tağıyev

Avropadan ən yaxşı su mühəndisi

çağırmağı təklif etdi

Bakının su tarixini araşdırarkən bu sahənin tədqiqatçısı, Əməkdar Mühəndis, “Azərsu” ASC sədrinin müşaviri Telman Ağayevlə həmsöhbət olduq.

Telman Ağayevin dediklərindən: XIX əsrin sonlarında Bakıda vəba epidemiyası yayılmışdı. Epidemiyanın qarşısını almaq üçün şəhərdə kəhrizlərin suyundan istifadə qadağan olunmuşdu. O vaxt mühəndislər bir sıra layihələr irəli sürdülər. Bakının su təchizatı probleminin həllinə yerli şəraitə yaxşı bələd olan neft milyonçusu Hacı Zeynalabdin Tağıyev də qoşulmuşdu. O, Avropa ölkələrinə səfərləri zamanı su və kanalizasiya qurğuları sistemi, bu işlə məşğul olan mühəndislərlə maraqlanırdı. Ona görə də Bakı şəhər dumasına Avropanın ən yaxşı su mühəndisi sayılan Uilyam Lindleyin Bakıya dəvət olunmasını təklif etdi. Ata və oğul Lindleylər Avropanın 35 şəhəri üçün su kəməri və kanalizasiya xətti inşa etmişdilər.

Hacı Zeynalabdinin təklifi bəyənildi və Uilyam Lindley 1899-cu ilin payızında Bakıya gəldi.

 

Uilyam Lindleyin Bakı üçün

su mənbəyi axtarışları

Avropalı mühəndis Bakıya nisbətən yaxın ərazilərdə su mənbələri axtarmağa başladı. Şahdağ, Qusar yaylası və Qusar çayının yatağı onun diqqətini cəlb etdi. Lindleyin Şollar suyu ilə bağlı ideyası Bakı dumasında qızğın müzakirələrə səbəb oldu. İngilis mühəndis həmin ərazinin bulaq suları ilə zəngin olduğunu bildirirdi. Lakin Şollar suyunun nəhəng bir şəhəri təmin edə biləcəyinə çox az adam inanırdı. Şəhər duması vəsait çatışmazlığını əsas gətirərək  təklifi qəbul etmədi. Məsələni belə görən Hacı Zeynalabdin Tağıyev ilkin işlərin görülməsinə şəxsi hesabından 25 min rubl kredit ayırdı. Hacının bu addımı Bakının gələcək su təminatında həlledici rol oynadı.

Telman Ağayev: Şahdağın ətəklərində yerləşən su mənbəyinin daha dərindən tədqiq olunması üçün geoloji ekspedisiya yaradıldı. Mühəndis Şollun rəhbərlik etdiyi ekspedisiya Şahdağ rayonunda və ona bitişik Qusar yaylasında genişmiqyaslı kəşfiyyat işləri apardı. Məlum oldu ki, dəniz kənarı boyunca içməli su quyuları, Xudatdan şimal-şərqə doğru meşədə isə saf sulu bulaqlar var. Onlardan götürülən su nümunələri Tağıyevin qızlar gimnaziyasının zirzəmisində yaradılmış laboratoriyada kimyəvi-bakterioloji analiz olundu. Şollun ekspedisiyası suyun mənbəyi, miqdarı və keyfiyyəti barədə Lindleyin proqnozlarını təsdiqlədi.

Duma uzun sürən müzakirələrdən sonra 1903-cü ildə Şollar-Bakı su kəmərinin çəkilişi barədə çoxdan gözlənilən qərarı qəbul etdi. Şəhər rəhbərliyi kəmərin çəkilişi məqsədilə 23 milyon 500 min rubl məbləğində dövlət istiqraz vərəqələrinin buraxılması üçün hökumət qarşısında vəsatət qaldırdı. Çar II Nikolay məbləği 27 milyon rubla qədər artıraraq vəsatəti təmin etdi. Lakin Birinci Dünya müharibəsi və tikinti zonasında yayılmış vəba epidemiyası kəmərin çəkilişini bir neçə il ləngitdi.

Tarixi gün: 1917-ci il yanvarın 22-də Şollar suyu Bakıya gəlib çatdı

Nəhayət, 1917-ci il yanvarın 22-də Şollar suyunun ilk şırnağı 187 kilometrlik məsafəni 63 saata qət edərək Bakıya çatdı. Çənlərin dolması, yuyulması bir aydan artıq vaxt apardı və martın 1-dən Şollar su kəmərinin (Birinci Bakı su kəməri) istismarına başlandı.

Telman Ağayev: 1917-ci ildə Bakıda təxminən 250 min əhali yaşayırdı. Şollar suyunun təxminən 60 faizi sənayeyə, 20 faizi əhaliyə, digər 20 faizi isə dəmir yolu və hərbi hissələrə paylanılırdı. Həmin kəmərdən gün ərzində 1 milyon vedrə su daxil olurdu. Bir qədər sonra şəhərdə 163 kilometrlik su şəbəkəsi çəkildi və 1108 evə birləşmə verildi. Bununla yanaşı, şəhərdə 100-ə yaxın su satış köşkləri fəaliyyət göstərirdi. Həmin köşklərdən 3-4-ü indiyədək qalmaqdadır. Onlardan biri Nəsimi rayonunda Şamil Əzizbəyli küçəsi ilə Rəsul Rza küçəsinin kəsişməsində yerləşir. Belə köşklər Keşlə, Balaxanı, Sabunçuda da tikilmişdi. Camaat suyu arabalarla, səhənglərlə, vedrələrlə daşıyırdı. Bir vedrə su (təxminən 12 litr) əhaliyə 0,75, sənaye müəssisələrinə isə 1 qəpikdən satılırdı.

Beləliklə, əbədi həyat mənbəyi olan Şollar suyu hazırda Xaçmaz, Ceyranbatan və Oğuz-Qəbələdən gələn su ilə anbarlarda qarışır və paytaxta paylanılır. Bu il 100 illik yubileyi tamam olan Şollar su kəməri paytaxtın içməli suya tələbatının 15-17 faizini ödəyir.

Azərbaycan xalqı onun tarixində iz qoyan insanları heç vaxt unutmur. Aradan bir əsr ötməsinə baxmayaraq, Bakıya ilk su kəməri çəkən ingilis mühəndis Uilyam Lindleyin xatirəsi bu gün də ehtiramla anılır. Ötən ilin aprelində xüsusi dəvətlə Bakıya gələn Lindley nəslinin nümayəndələri Karin Maria Marta, Eugen Jozef, Katerina Morvin, Aleksandr Horst, həmçinin Polşa Elmlər Akademiyasının siyasi araşdırmalar üzrə Elmi-Tədqiqat İnstitutunun direktoru və Lindley irsini araşdıran professor Riçard Zeliçovski ilə “Azərsu” Açıq Səhmdar Cəmiyyətində (ASC) keçirilən görüş də bu baxımdan qeyd olunmalıdır. Səhmdar Cəmiyyətin sədri Qorxmaz Hüseynov məşhur mühəndis Uilyam Lindleyin Azərbaycanın su təchizatı tarixində böyük xidmətlərini xatırladıb, qonaqları Şollar su kəmərinin bu il keçiriləcək 100 illik yubiley tədbirlərinə dəvət edib.

Xaçmaz-Bakı su kəməri

və Ceyranbatan su anbarı

XX əsrin 20-ci illərinin sonunda Abşeronda sənayenin inkişafı, əhalinın artımı Bakıya yeni mənbədən içməli su gətirilməsi məsələsini yenidən aktuallaşdırdı. Bu məsələ 1929-cu ildə Su təchizatı və sanitariya qurultayında müzakirə edildi və Xaçmazdan Abşerona yeni kəmərin çəkilişinə qərar verildi. 1934-cü ildə SSRİ Xalq Komissarları Sovetinin qərarı ilə İkinci Bakı su kəmərinin tikintisinə başlandı. İkinci Dünya müharibəsi ilə əlaqədar kəmərin inşasında fasilə yarandı və tikinti işləri 24 ildən sonra, 1958-ci ildə başa çatdırıldı. Uzunluğu 175 kilometr olan dəmir-beton konstruksiyalı kəmər hazırda Siyəzən və Şabran rayonlarını da içməli su ilə təmin edir.

Abşeron yarımadasının içməli su təchizatında Samur-Abşeron kanalından qidalanan Ceyranbatan su anbarı və burada tikilmiş sutəmizləyici qurğular kompleksi də böyük paya malikdir. Bu anbar ingilis mühəndis Uilyam Lindleyin 1900-cü illərin əvvəlində hazırladığı layihə əsasında yaradılıb və Samur çayının suyunun Ceyranbatan anbarına gətirilməsini və təmizlənərək istehlakçılara çatdırılmasını nəzərdə tuturdu. Layihənin reallaşdırılmasına təxminən yarım əsr sonra başlandı. İlkin olaraq Samur-Dəvəçi kanalının Abşeron yarımadasınadək uzadılmasına qərar verildi. Paralel olaraq Dəvəyatağı və Ceyranbatan göllərinin yerində ümumi tutumu 186 milyon kubmetr olan anbar yaradıldı və 1957-ci ildə  hövzənin su ilə doldurulmasına başlandı.

Heydər Əliyev Kür suyunu

4 ayın içərisində Bakıya gətirdi

Paytaxt Bakının və ümumiyyətlə, Abşeron yarımadasının inkişafı, əhalinin sayının sürətlə artması yeni içməli su mənbələrinin axtarılmasını tələb edirdi. 1969-cu ildə Heydər Əliyevin respublika rəhbərliyinə gəlişindən sonra digər sahələr kimi, su təchizatı sektorunda da dönüş yarandı. Ulu Öndər Kür su kəmərinin birinci növbəsində işlərin sürətləndirilməsi ilə bağlı SSRİ rəhbərliyi qarşısında məsələ qaldırdı. Onun nüfuzu və qətiyyəti sayəsində layihənin maliyyə, material və texniki təminatı ilə bağlı məsələlər qısa müddətdə həllini tapdı. Kür su təmizləyici qurğularının və Kür-Bakı magistral su kəmərinin inşası ümumxalq tikintisinə çevrildi, 30 aya görülməli olan işlər 4 aya başa çatdırıldı: 1972-ci ildə yekunlaşması planlaşdırılan layihənin açılışı 1970-ci il sentyabrın 27-də reallaşdı. Ümumilikdə isə layihə üzrə birinci növbənin inşası 1971-ci ildə tam başa çatdı. Hacıqabul rayonunun Kiçik Talış kəndi yaxınlığında yerləşən kompleksdən Bakıya 2 magistral kəmər çəkildi.

Abşeronun içməli su təchizatını yaxşılaşdırmaq üçün bir müddət sonra, 1980-ci illərdə Kür su kəmərləri sisteminin ikinci növbəsinin tikintisinə başlandı. Üç mərhələdə (1984, 1986 və 1988-ci illərdə) Bakıya daha 3 magistral su kəməri çəkildi. Kür su kəmərlərin birinci növbəsinin məhsuldarlığı saniyədə 3,3 kubmetr, ikinci növbənin məhsuldarlığı isə saniyədə 6,2 kubmetr təşkil edirdi.

Oğuz-Qəbələ-Bakı su kəməri

Şollar su kəməri çəkiləndən sonra da Bakıda hamıya su çatmırdı. Su qıtlığı çəkmiş insanlar aza qane olur, Kür suyuna “şükür” edirdilər. Rusiyadan, yaxud SSRİ-dən asılı olan Azərbaycanın əli bundan yaxşısına çatmırdı. İndi əhalinin sayı dəfələrlə artıb, üstəlik hamımız istəyirik ki, kranımızdan su daim axsın, özü də təmiz su.

Azərbaycanın müstəqillik qazanması və inkişaf etməsi, maliyyə imkanlarının artması insanların bu arzusunu həyata keçirməyə imkan yaratdı. 2002-ci ildə ulu öndər Heydər Əliyev Bakıya yüksək keyfiyyətli bulaq suyu gətirmək təşəbbüsünü irəli sürdü. Bu məqsədlə Oğuz və Qəbələnin yeraltı su mənbələrindən istifadə olunması qərara alındı.

Azərbaycanın müstəqillik tarixində ən iri infrastruktur layihəsi olan Oğuz-Qəbələ-Bakı su kəməri Prezident İlham Əliyevin müvafiq Sərəncamı ilə reallaşdı. 2010-cu il dekabrın 28-də istifadəyə verilən kəmər vasitəsilə 262,5 kilometr məsafədən Bakıya saniyədə 4 kubmetr yüksək keyfiyyətli su ötürülür.

Hədəf: gündə 24 saat təmiz içməli su

Qeyd etdiyimiz kimi, hazırda Bakının fasiləsiz su təminatı 80 faizi ötüb. Halbuki müvafiq proqramın icrasına başlanılanda bu göstərici təqribən 25-30 faiz idi.

Əhalinin fasiləsiz və yüksəkkeyfiyyətli su ilə təmin olunmasına xüsusi önəm verən Prezident İlham Əliyev “Azərsu” ASC-nin qarşısına belə bir vəzifə qoyub: Yaxın bir neçə il ərzində əhaliyə 24 saat fasiləsiz, Dünya Səhiyyə Təşkilatının standartlarına uyğun içməli su verilməlidir. 2015-ci ilin sonlarında məhsuldarlığı saniyədə 6,5 kubmetr olan Ceyranbatan Ultrasüzgəcli Su Təmizləyici Qurğular Kompleksinin istifadəyə verilməsi bu istiqamətdə atılan çox mühüm addım oldu.

Kompleksin açılışında çıxış edən Prezident İlham Əliyev Bakı şəhərinin su təsərrüfatının daha da sürətlə yeniləşməsinin vacibliyini vurğulayaraq deyib: “Şəbəkə sistemi hələ ki, bizim standartlarımıza tam uyğun deyil. Ancaq bu istiqamətdə də işlər aparılır və əlbəttə, biz hamımız istəyirik ki, tezliklə bütün şəhərimizdə hər bir vətəndaş kranı açıb oradan suyu birbaşa içə bilsin. Artıq biz buna yaxınlaşırıq və bu qurğunun xüsusi əhəmiyyəti ondan ibarətdir ki, bizə bu imkanı yaradacaq”.

***

Beləliklə, Bakının bir əsrlik su tarixçəsini vərəqlədik. Görülən işləri bir daha yada saldıq, perspektivlərdən söz açdıq. Ötən yüz ildə, necə deyərlər, çox sular axıb. İndi söhbət təkcə suyun bolluğundan deyil, təmizliyindən gedir. Sosial siyasətinin mərkəzində insan amili dayanan Prezident İlham Əliyev bu məqsədlə yeni layihələrin həyata keçirilməsinə dair tapşırıqlar verib. Azərbaycan dövləti insanların sağlamlığına yönəlmiş heç bir layihədən vəsait əsirgəmir. Təmiz su bu baxımdan xüsusi önəm daşıyır. Bakının su şəbəkəsinin yenilənməsi istiqamətində atılan addımlar tam əminlik yaradır ki, əhalinin hamısının təmiz içməli su ilə fasiləsiz təmin olunacağı gün uzaqda deyil.

Ceyhun RüstƏmov,

AZƏRTAC-ın müxbiri.

 

 

 

 

Nəqliyyat, Rabitə və Yüksək Texnologiyalar Nazirliyinin və Avropa İttifaqının Azərbaycan Respublikasındakı Nümayəndəliyinin birgə təşkilatçılığı ilə “Elektron xidmətlərin və elektron ticarətin inkişafı” mövzusunda “dəyirmi masa” keçirilib. Tədbirdə beynəlxalq ekspertlərlə yanaşı müvafiq dövlət orqanlarının və digər təşkilatların nümayəndələri iştirak edib.

Nəqliyyat, Rabitə və Yüksək Texnologiyalar Nazirliyinin təşəbbüsü və Avropa İttifaqının Azərbaycan Respublikasındakı Nümayəndəliyinin dəstəyi ilə elektron xidmətlər və elektron ticarət sahəsində vəziyyətin təhlili üçün beynəlxalq ekspert Kristian Rup ölkəmizə dəvət olunub. Avropa İttifaqının eksperti yerli mütəxəssislərlə birgə elektron xidmətlər sahəsində hüquqi və institusional bazanın cari vəziyyətini təhlil edib, mövcud boşluq və ehtiyacları müəyyənləşdirib, hüquqi və institusional bazanın təkmilləşdirilməsinə dair tövsiyələr hazırlayıb.

Bu sahədə ölkəmizdə aparılan işləri yüksək qiymətləndirən Kristian Rup tədbirdə təqdimatla çıxış edib.

Tədbirdə Azərbaycanda elektron xidmətlərin və elektron ticarətin mövcud vəziyyəti və inkişaf perspektivləri mövzusunda geniş müzakirələr aparılıb.

Qeyd olunub ki, ölkəmizdə elektron xidmətlərin təkmilləşdirilməsi və genişləndirilməsi üçün Nəqliyyat, Rabitə və Yüksək Texnologiyalar Nazirliyi tərəfindən davamlı işlər görülür və bu sahədə beynəlxalq əməkdaşlığa xüsusi önəm verilir.

Xatırladaq ki, “Elektron hökumət” portalının operatoru Nəqliyyat, Rabitə və Yüksək Texnologiyalar Nazirliyinin Məlumat Hesablama Mərkəzidir. Nəqliyyat, Rabitə və Yüksək Texnologiyalar Nazirliyi bu sahədə görülən işlərin əlaqələndiricisi olaraq “Elektron hökumət”in formalaşması üzrə digər dövlət orqanları ilə sıx əməkdaşlıq edir və müvafiq infrastrukturun yaradılması üzrə fəaliyyət həyata keçirir.

“Elektron hökumət” portalında 89 qurumun, o cümlədən 41 dövlət təşkilatının 427 növ xidməti aktivdir. Nazirlər Kabineti tərəfindən təsdiq edilmiş 458 xidmətdən 332-si portala  inteqrasiya edilib.

2015-ci ildə portalın “iOS” və 2016-cı ildə isə  “Android” əməliyyat sistemləri üçün mobil versiyaları vətəndaşların ixtiyarına verilib.

 

Xaqani KOSAYEV,

“Respublika”.

 

 

 

Formula-1 Azərbaycan Qran-prisinə hazırlıq plana uyğun olaraq davam edir. Fevral ayından pit-binasında tikinti işlərinə başlanacaq. Əsas tikinti işlərinə isə maydan start veriləcək. Həmçinin Qran-prinin təbliği istiqamətində lazımi işlər görülür.

AZƏRTAC xəbər verir ki, bu sözləri “Bakı Şəhər Halqası” Əməliyyat Şirkətinin marketinq və kommunikasiya şöbəsinin rəhbəri Nigar Arpadarai fevralın 14-də jurnalistlərə müsahibəsində deyib.

N.Arpadarai bildirib ki, Azərbaycanda Formula-1 yarışının promouteri - “Bakı Şəhər Halqası” Əməliyyat Şirkətinin təşkilatçılığı ilə fevralın 15-də Bakıda “İrimiqyaslı idman yarışlarının keçirilməsinin ev sahibi ölkəyə faydaları-2017” mövzusunda beynəlxalq konfrans keçiriləcək. Bu mövzuda konfrans MDB məkanında və regionda ilk dəfə olaraq Azərbaycanda təşkil ediləcək.

“Konfransa dövlət qurumlarının, biznes və xidmət sahələri ilə məşğul olan şirkətlərin təmsilçiləri, media nümayəndələri dəvət olunacaq. Tədbirə, həmçinin Gənclər və İdman, Mədəniyyət və Turizm nazirliklərinin rəsmiləri də qatılacaqlar. Abu-Dabi, Soçi və Bəhreyn Qran-prilərinin yüksək vəzifəli nümayəndələri də konfransda iştirak edəcəklər. Qonaqlar Formula-1 yarışlarının təşkilatçılığı, bu mühüm turnirin öz ölkələrinə iqtisadi və sosial faydaları barədə məlumat verəcəklər”, - deyə BŞH rəsmisi əlavə edib.

N.Arpadarai deyib: “Azərbaycan artıq neçə ildir irimiqyaslı yarışlara yüksək səviyyədə ev sahibliyi edir. Ölkəmizdə ilk Avropa Oyunları, Formula-1 Avropa Qran-prisi, 42-ci ümumdünya Şahmat Olimpiadası mükəmməl şəkildə təşkil olunub. Həmçinin cari ildə paytaxtımız IV İslam Həmrəyliyi Oyunlarını qəbul etməyə hazırlaşır. Bütün bunların ətrafında bir dialoqun qurulması maraqlı olar. Konfransda irimiqyaslı yarışların müsbət nəticələri, ortaya çıxa bilən problemlərin həlli və ölkəmizdə biznesin buna hazırlıq vəziyyəti istiqamətlərində müzakirələr aparılacaq”.

 

AZƏRTAC

 

 

 

10 -dən səhifə 1111