XƏBƏR LENTİ

Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq qərara alıram:

1. İyirmi dörd min nəfər əhalinin yaşadığı 20 yaşayış məntəqəsini birləşdirən Tərtər-Seydimli-Qaradağlı-Sarov avtomobil yolunun tikintisi məqsədi ilə Azərbaycan Respublikasının 2017-ci il dövlət büdcəsinin dövlət əsaslı vəsait qoyuluşu xərclərinin bölgüsündə avtomobil yollarının tikintisi və yenidən qurulması üçün nəzərdə tutulmuş vəsaitin 7,0 (yeddi) milyon manatı “Azəravtoyol” Açıq Səhmdar Cəmiyyətinə ayrılsın.

2. Azərbaycan Respublikasının Maliyyə Nazirliyi bu Sərəncamın 1-ci hissəsində göstərilən məbləğdə maliyyələşməni təmin etsin.

3. Azərbaycan Respublikasının Nazirlər Kabineti bu Sərəncamdan irəli gələn məsələləri həll etsin.

İlham ƏLİYEV,

Azərbaycan Respublikasının Prezidenti.

Bakı şəhəri, 5 iyul 2017-ci il.

Zati-aliləri.

Ölkənizin milli bayramı - Respublika Günü münasibətilə Sizə və Azərbaycan xalqına bütün kanadalılar adından ən xoş arzularımı çatdırmaq istərdim.

Kanada Azərbaycan ilə əlaqələrin inkişafına böyük önəm verir. Ölkələrimizin və xalqlarımızın beynəlxalq və iqtisadi maraqlarla bağlı məsələlərdə birgə işləmək səyləri məni ruhlandırır. Xüsusilə də ticarət əlaqələrinin genişləndirilməsi, eləcə də neft və qaz, kənd təsərrüfatı, tikinti, telekommunikasiya sahələri üçün çoxlu imkanlar qalmaqdadır. Bu sahələrdəki davamlı əməkdaşlıq ölkələrimiz üçün qarşılıqlı rifahı və inkişafı təmin edəcək.

Xahiş edirəm, ən səmimi təbriklərimi və Azərbaycan xalqının rifahı və inkişafı üçün ən xoş arzularımı qəbul edin.

Hörmətlə,

Devid Conston

Kanadanın General-Qubernatoru

Cənubi Koreyanın “Arirang” televiziya kanalının “Ürəkdən-ürəyə” verilişinin növbəti buraxılışı Azərbaycana həsr olunub.

Verilişdə Şərq ilə Qərbin qovşağında yerləşən Azərbaycanın tarixən öz mədəniyyəti, multikultural dəyərləri ilə dünya mədəni irsinə böyük töhfələr verdiyi vurğulanıb. Qədim İpək yolu üzərində yerləşən Azərbaycanın hazırda dünya turizm xəritəsində getdikcə daha çox qonaq cəlb edən bir ölkə olduğu, son illər bir çox dünya əhəmiyyətli tədbirlərin, idman yarışlarının, humanitar forumların keçirildiyi məkana çevrildiyi qeyd edilib.    

Proqramın qonağı olan Azərbaycanın Koreya Respublikasındakı səfiri Rəmzi Teymurov aparıcının və tamaşaçıların ölkəmizlə bağlı suallarını cavablandırıb. Bildirib ki, 1991-ci ildə müstəqilliyini bərpa edən Azərbaycan çətin siyasi və iqtisadi vəziyyətdən çıxaraq dinamik inkişaf edən ölkəyə çevrilib. Həm şərq, həm də qərb mədəniyyətini özündə cəmləşdirən Azərbaycan bir çox dinlərin və millətlərin nümayəndələrinin birgə dinc yaşadığı ölkə olaraq, tolerantlıq nümunəsi göstərir. Müasir dünyamızda bu baxımdan bir çox neqativ halların yaşandığı bir vaxtda burada heç bir ayrı-seçkilik yoxdur.

Verilişdə Azərbaycanın görməli yerlərindən, turistlər üçün maraq doğuran məkanlarından, o cümlədən UNESCO-nun Dünya İrsi Siyahısına daxil edilən İçərişəhər, Qobustan, “Yanardağ”, Xalça Muzeyi, palçıq vulkanları, müasir dünya memarlığının ən cazibədar nümunələrindən olan Heydər Əliyev Mərkəzi, Alov Qüllələri, habelə gözəl təbiəti, tarixi abidələri, müalicəvi yerləri ilə zəngin bölgələrimizin turizm imkanlarından söz açılıb.

Bundan başqa, proqramda musiqi irsi, xalqımızın bayram mərasimləri, adət-ənənələri, xüsusən əcnəbilərin maraqla qarşıladıqları xüsusiyyətlər, ailə dəyərləri, habelə milli mətbəximiz, respublikamızda yetişdirilən ekoloji təmiz kənd təsərrüfatı məhsulları barədə də danışılıb.

Azərbaycan-Koreya münasibətlərindən söz açılan verilişdə qeyd olunub ki, bu il iki ölkə arasında diplomatik əlaqələrin qurulmasının 25-ci ildönümü tamam olur. Bununla belə, xalqlarımızın dostluq münasibətlərinin tarixi daha qədimdir. Oxşar cəhətlər və adət-ənənələr xalqlarımızı bir-birinə daha da yaxınlaşdırır.

 

 

 

AZƏRTAC

İyulun 5-də Minsk şəhərində ATƏT Parlament Assambleyasının növbəti sessiyasında Ermənistanın bu qurumda nümayəndə heyətinin rəhbəri Ermine Naqdalyan çıxış edərək avropalı deputatların diqqətini ölkəsinin işğalçı hərbi qüvvələri tərəfindən törədilən növbəti qanlı cinayətdən yayındırmağa, erməni xislətinə xas olan hiyləgərliklə yalanlar uydurmağa çalışıb.

AZƏRTAC xəbər verir ki, Ermine Naqdalyanın çıxışından sonra yenidən söz alan Azərbaycan Milli Məclisinin sədr müavini, ATƏT PA-da nümayəndə heyətimizin rəhbəri Bahar Muradova erməni deputata cavab verərək aşağıdakı fikirləri söyləyib:

“Ötən ilin aprel hadisələrindən sonra Ermənistanda, eləcə də bütün dünyada Dağlıq Qarabağ münaqişəsi ilə bağlı reallığa daha yaxın mövqelər yaranmağa başladı. Bir sıra fikirlər sırasında Assambleyada yeni həmkarımız, eyni zamanda, o vaxt öz ölkəsinin parlamentinin sədr müavini xanım Ermine Naqdalyanın status-kvonun davam etdirilməsinin qeyri-mümkünlüyü və yolverilməzliyi barədə dediyi sözlər Ermənistanda əməlli-başlı səs-küyə səbəb oldu.

O vaxt E.Naqdalyanın söylədiyi sözləri sitat gətirirəm: “Ermənistan tərəfi Dağlıq Qarabağ ətrafında işğal edilmiş ərazilərə iddia etmir. Biz sahib olmadığımız torpaqlarınızı qaytaracağıq. Bu torpaqları istəmirik. Bu, bizim üçün yalnız bufer zonadır”.

Naqdalyanın Ermənistan Milli Dirçəliş Partiyası üzrə həmkarları həmin vaxt onun bəyanatını pisləmiş, fikirlərini “arxadan vurulan zərbə” adlandırmışdılar.

Həmkarımız o böhranlı dövrdə həqiqəti demişdi. Hətta öz partiyası tərəfindən hücumlara məruz qalmasına baxmayaraq, cəsarətlə reallıqlar, Ermənistanın işğalçılıq mövqeyi barədə fikirlərini söyləmişdi. Fürsətdən istifadə edərək, gec də olsa, buna görə ona təşəkkür etmək istəyirəm. Bəs nə üçün bu gün - bir il keçəndən sonra tamamilə başqa yanaşma müşahidə olunur. Bunu başa düşmək olmur. 

Mənə belə gəlir ki, siz Azərbaycan ərazilərinin Ermənistan tərəfindən işğalından danışanda indikindən daha səmimi idiniz.

Burada hamı bilir ki, ərazinin işğal edilməsi beynəlxalq hüququn kobud şəkildə pozulması deməkdir və sonra baş verən bütün cinayətlərin səbəbi də budur.

Beləliklə, sizin qeyd etdiyiniz bütün halların tam və ətraflı araşdırılması, kimliyindən asılı olmayaraq günahkarların məsuliyyətə cəlb olunması üçün ilk növbədə işğalı dayandırmaq lazımdır.

ATƏT PA-nın tribunası cəsarətli bəyanatlar və çağırışlar üçün daha münasib yerdir”.

 

AZƏRTAC

İyulun 5-də Müdafiə Nazirliyinin Şəxsi Heyət Baş İdarəsində Türkiyədən gəlmiş ehtiyatda olan bir qrup yüksək rütbəli zabitlə görüş keçirilib.

Müdafiə Nazirliyinin mətbuat xidmətindən AZƏRTAC-a bildiriblər ki, müdafiə nazirinin şəxsi heyət üzrə müavini, general-leytenant Kərim Vəliyev qardaş xalqlarımız arasında əməkdaşlıq əlaqələrinin möhkəmlənməsi prosesinin təməlinin ümummilli liderimiz Heydər Əliyev tərəfindən qoyulduğunu, hazırda bu siyasətin Azərbaycan Prezidenti, Silahlı Qüvvələrin Ali Baş Komandanı İlham Əliyevin rəhbərliyi ilə bu gün də uğurla davam etdirildiyini söyləyib. 

Tədbirdə belə görüşlərin müntəzəm keçirilməsinin qabaqcıl təcrübə mübadiləsi, eləcə də gənc nəslin vətənpərvərlik ruhunda tərbiyəsi baxımından vacibliyi vurğulanıb, faydalı fikir mübadiləsi aparılıb və qarşılıqlı maraq doğuran məsələlər geniş müzakirə olunub.

Türkiyə Ehtiyatda olan Zabitlər Təşkilatının sədri, istefada olan korpus generalı Ərdoğan Karakuş səmimi qarşılandıqları üçün Müdafiə Nazirliyinin rəhbərliyinə minnətdarlığını bildirib. O deyib ki, türk xalqı həmişə olduğu kimi, bu gün də Azərbaycan ilə həmrəydir və bütün problemlərin həllinə dəstək verməyə hazırdır.

 

 

AZƏRTAC

Hazırda Azərbaycanda 35-40 min ton bərk buğdaya ehtiyac var.

AZƏRTAC xəbər verir ki, bu barədə Fövqəladə Hallar Nazirliyi (FHN) Dövlət Material Ehtiyatları Agentliyi Dövlət Taxıl Fondunun rəisi Zülfüqar Məmmədov iyulun 5-də keçirilən mətbuat konfransında deyib.

O bildirib ki, uzun illərin müşahidəsi bizim yerli buğda istehsalçılarının buğdanın keyfiyyətinə az önəm verdiyini göstərir. Bəzi buğdanın keyfiyyət göstəriciləri qəbul olunmuş standartlara cavab vermir. Buna səbəb fermerlərin buğdanın becərilmə prosesi zamanı yol verdikləri yanlışlıqlardır. Bəzən istehsalçılar buğdanı becərmə prosesində ciddi nöqsanlara yol verirlər ki, bu da xəstəliyin yaranmasına gətirib çıxardır. Əsasən də bu, dərmanlama prosesi ilə bağlı olur.

Z.Məmmədovun sözlərinə görə, buğdanın elə növləri var ki, onlar çörək üçün, makaron üçün və spirt üçün nəzərdə tutulur. Buna görə də, sortun seçimində diqqətli olmaq lazımdır. “Dünyada qəbul olunmuş normalar var. Azərbaycan vətəndaşı daha keyfiyyətli çörəklə qidalanmalıdır. Azərbaycanda istehsal olunan buğdanın hamısı ərzaqlıq, çörək bişirilməsi üçün nəzərdə tutulan buğda deyil. Azərbaycanda fermerlər bərk buğda istehsalında maraqlı deyillər. Hazırda Azərbaycanda 35-40 min ton bərk buğdaya ehtiyac var. Bu buğda növləri, həmçinin baha qiymətə alınır”, - deyə Z.Məmmədov bildirib.

O xatırladıb ki, Dövlət Taxıl Fondunun yaradılmasının məqsədi ölkədə qıtlığın, çörəyin qiymətinin bahalaşmasının qarşısını almaqdır. “Bundan başqa, biz ölkədə fəaliyyət göstərən elevatorların reyestrlərini hazırlamışıq ki, Azərbaycanda eyni vaxtda nə qədər taxıl saxlama imkanları var onu müəyyənləşdirək. Həmçinin fermerlərin istehsal etdikləri məhsulun kateqoriyasının müəyyən edilməsi üçün Kənd Təsərrüfatı Nazirliyinin rayonlardakı idarələrində laboratoriyalarını yaradılmasını təklif etmişik”, - deyə Z.Məmmədov vurğulayıb.

Z.Məmmədov qeyd edib ki, ərzaq səbətinin tərkibinə görə il ərzində hər adama 186 kiloqram buğda tələb olunur. 2016-cı ildə Azərbaycana 1,6 milyon ton buğda idxal olunub. Ərzaq təhlükəsizliyinin əsas şərtlərindən biri kadr çatışmazlığıdır. Yerli və bacarıqlı kadrlara ehtiyac var. Bu keyfiyyətli və daha çox buğda əldə etmək üçün vacib amildir.

 

 

AZƏRTAC

Azərbaycan Respublikası baş prokurorunun müavini - Baş Prokuror yanında Korrupsiyaya Qarşı Mübarizə Baş İdarəsinin rəisi Kamran Əliyevin rəhbərlik etdiyi nümayəndə heyəti Moldova rəsmilərinin dəvəti ilə iyulun 3-4-də bu ölkədə səfərdə olub.

Baş Prokurorluğun mətbuat xidmətindən AZƏRTAC-a bildiriblər ki, səfər çərçivəsində ölkəmizin nümayəndə heyəti Moldovann Milli Antikorrupsiya Mərkəzinin inzibati binası və fəaliyyəti ilə yaxından tanış olublar.

Nümayəndə heyətini qəbul edən Mərkəzin rəisi Viorel Ketraru ilə görüşdə Moldova Milli Antikorrupsiya Mərkəzinin nümayəndə heyətinin 2016-cı ilin dekabrında ölkəmizə səfəri xatırlanıb.

Baş Prokuror yanında Korrupsiyaya Qarşı Mübarizə Baş İdarəsinin rəisi Kamran Əliyev qarşı tərəfə Prezident İlham Əliyevin rəhbərliyi ilə ölkəmizdə korrupsiyaya qarşı aparılan məqsədyönlü institusional və qanunvericilik islahatları barədə məlumat verib. Görüşdə ölkələrimiz arasında korrupsiyaya qarşı mübarizə sahəsində əməkdaşlığın perspektivləri barədə geniş fikir mübadiləsi aparılıb.

Bununla yanaşı, Baş İdarənin nümayəndə heyətinin Moldovanın Baş Prokurorluğuna səfəri çərçivəsində bu ölkənin baş prokuroru Eduard Xarunjena ilə ikitərəfli görüş keçirilib.

Görüşdə Moldova Respublikasının Baş Prokurorluğu ilə Azərbaycan Respublikasının Baş Prokurorluğu arasında münasibətlərin hazırkı vəziyyəti və inkişaf perspektivləri barədə müzakirələr aparılıb, prioritet əməkdaşlıq sahələri müəyyənləşdirilib.

Sonra ölkəmizin nümayəndə heyəti Moldovanın Antikorrupsiya Prokurorluğunun inzibati binasını ziyarət edib.

Antikorrupsiya Prokurorluğunun baş prokuroru Viorel Morar ilə ikitərəfli görüşdə ölkələrimizdə korrupsiya və digər mənfi hallara qarşı mübarizə sahəsində həyata keçirilmiş tədbirlər barədə müzakirələr aparılıb. Eləcə də qarşı tərəfə “ASAN xidmət” mərkəzlərinin fəaliyyəti barədə geniş məlumat verilib. Azərbaycanın bu sahədə qazandığı nailiyyətlər Moldova rəsmiləri tərəfindən yüksək qiymətləndirilib. Bu istiqamətdə ölkəmizin təcrübəsinin öyrənilməsinə maraq ifadə edilib.

Görüşlərdə, həmçinin Azərbaycanın Moldovadakı səfiri Qüdsi Osmanov da iştirak edib.

 

 

AZƏRTAC

İyulun 5-də Minsk şəhərində ATƏT Parlament Assambleyasının növbəti sessiyası işə başlayıb.

AZƏRTAC xəbər verir ki, “ATƏT regionunda sülh və inkişaf naminə qarşılıqlı etimad və əməkdaşlığın möhkəmləndirilməsi” mövzusunda keçirilən sessiyada Milli Məclis sədrinin müavini, ATƏT PA-da Azərbaycan nümayəndə heyətinin rəhbəri Bahar Muradova çıxış edərək Ermənistan ordusunun növbəti təxribatından və Füzuli rayonunun Alxanlı kəndinin dinc sakinlərinin qətlə yetirilməsindən danışıb. Azərbaycan parlament sədrinin müavini deyib:

- Həm beynəlxalq katibliyin, həm də bütövlükdə Parlament Assambleyasının fəaliyyətinin təkmilləşdirilməsi ilə bağlı səylərinə, ATƏT-in digər qurumları ilə daha səmərəli əməkdaşlıq qurmaq cəhdlərinə görə Cənubi Qafqaz üzrə xüsusi nümayəndəmiz cənab Viqeninə və baş katib Roberto Montellaya dərin minnətdarlığımı bildirirəm. Həmçinin sessiyamıza ATƏT-in Minsk qrupunun həmsədrlərini dəvət etmək cəhdlərini vurğulamaq istəyirəm.

Xatırladım ki, 2011-ci ildə Xorvatiyada sessiyada həmsədrlərin Dağlıq Qarabağ münaqişəsinin həllinə dair fəaliyyətləri barədə onların hesabatlarını dinlədik. Müzakirələr aparıldı, deputatların onların işinə münasibət bildirmək, sual vermək imkanı oldu. Biz ümid edirik ki, bu təcrübədən gələcəkdə də istifadə olunacaq. Çünki deputatların məlumatlandırılması bu baxımdan faydalı ola bilər ki, biz də öz tərəfimizdən müəyyən töhfə verə, həmsədrlərin üzləşdikləri bu və ya digər məsələnin həllinə kömək edə bilərik. Mən ürəkdən inanıram ki, bütün təsisatlar arasında belə əməkdaşlıq və qarşılıqlı fəaliyyət bizim ümumi işimizə sanballı töhfə verə bilər.

Biz dinc vətəndaşların, oğullarımızın, qadınlarımızın və uşaqlarımızın həyatına son qoyan reallığı hər gün hiss edirik. Ölkəmin parlamentində təmsil etdiyim Füzuli rayonunun dinc kəndi iyulun 4-də Ermənistan silahlı qüvvələri tərəfindən yenə də minaatanlardan və qumbaraatanlardan atəşə tutulub. Bu atəş nəticəsində bir ailənin iki üzvü - qadın və onun iki yaşlı nəvəsi öz həyətlərində həlak olublar, yaralılar var. Təmas xətti boyunca sıx yaşayan dinc vətəndaşlara, o cümlədən qadınlara, qocalara və uşaqlara Ermənistan silahlı qüvvələri tərəfindən hücumlar təəssüf ki, sistemli xarakter daşıyır.

Konkret olaraq iyulun 4-də tökülən qana görə bütün məsuliyyət yenə də Ermənistanın hərbi-siyasi rəhbərliyinin üzərinə düşür.

Əlavə informasiya, o cümlədən şəkillər, Azərbaycan Xarici İşlər və Müdafiə nazirliklərinin rəsmi bəyanatları ilə müvafiq saytlarda tanış ola bilərsiniz. Yəqin ki, katibliyimiz də bu materialları sizə paylayacaq. Bu gün, ATƏT regionunda sülh və tərəqqi naminə qarşılıqlı etimadın möhkəmləndirilməsi məsələsini müzakirə etdiyimiz bir vaxtda mənim ölkəmdə, mənim torpağımda mənim həmvətənlərimin - qadınların və uşaqların qanının axıdıldığını görmək dəhşətlidir. Həlak olanları şəxsən tanımağım bu ağrını daha da şiddətləndirir.

Xatırladım ki, mən özüm də Füzuli rayonundan məcburi köçkünəm. Təmas xəttində yaşayan seçicilərim daim təhlükə altındadırlar.

O kəndlərdə ancaq dinc əhali yaşayır. Düşmən tərəfində isə Ermənistandan olan çağırışçılardan təşkil edilmiş silahlı qüvvələr yerləşir.

Odur ki, biz deputatlar qan tökülməsinə son qoymaq  və regionda həqiqətən sülhə və tərəqqiyə nail olmaq üçün sülh dialoquna yollar tapmalı və bu işə öz töhfəmizi verməliyik. Mən sizi bu cinayəti təkidlə pisləməyə çağırıram. Bu məsələdə Parlament Assambleyası xüsusi rol oynamalıdır.

AZƏRTAC

XİN-də Ermənistan silahlı qüvvələrinin Füzuli rayonunun Alxanlı kəndində mülki şəxslərin qəsdən qətlə yetirilməsi ilə bağlı mətbuat konfransı keçirilib

İyulun 5-də Azərbaycan Respublikasının Xarici İşlər Nazirliyində Ermənistan silahlı qüvvələri tərəfindən Füzuli rayonunun Alxanlı kəndində törədilən təxribatla bağlı mətbuat konfransı keçirilib.

AZƏRTAC xəbər verir ki, əvvəlcə Müdafiə Nazirliyinin mətbuat xidmətinin rəhbəri Vaqif Dərgahlı törədilmiş təxribatla bağlı ətraflı məlumat verib. Qeyd edilib ki, iyulun 4-də saat 20:40 radələrində Ermənistan silahlı qüvvələri Azərbaycanın Füzuli rayonunun Alxanlı kəndinin mülki əhalisini və mülki obyektləri qəsdən 82 və 120 millimetrlik minaatanlardan və dəzgahlı qumbaraatanlardan atəşə tutublar. Hadisə nəticəsində kəndin iki sakini həlak olub, bir nəfər yaralanıb.

Hadisədən dərhal sonra Silahlı Qüvvələrimizin bölmələrinin operativ cavab tədbirləri gördüyünü bildirən V.Dərgahlı deyib: “Ermənistan tərəfi də itkilər verib. Ancaq həmişə olduğu kimi, düşmən bu dəfə də öz itkilərini gizlədir. Bu təxribatdan sonra Ermənistan tərəfi yenə də beynəlxalq ictimaiyyəti çaşdırmaq məqsədilə heç bir əsası olmayan məlumatlar yayıb: guya Azərbaycan tərəfi mülki əhalidən sipər kimi istifadə edərək Alxanlı kəndində qərargah qurub və ya guya orada hər hansı atəş nöqtəmiz olub. Bunu qəti olaraq rədd edirik və bildiririk ki, Ermənistan tərəfi həmişə olduğu kimi, yenə də mülki əhaliyə qarşı müharibə aparır və onları atəşə tutur. Alxanlıda Silahlı Qüvvələrimizin nə qərargahı, nə də atəş nöqtəsi var”.

Azərbaycan Silahlı Qüvvələrinin cəbhənin bu istiqamətində guya ABŞ istehsalı olan “TR-107” yaylım atəşli reaktiv sistemlərdən istifadə etməsi barədə də Ermənistanın yalan məlumatlar yaydığını vurğulayan V.Dərgahlı bildirib: “Bu, ağ yalandır və onu qəti şəkildə təkzib edirik. Qeyd etmək istərdim ki, bu yaylım sistemi ABŞ yox, Türkiyə istehsalıdır. Burada da ermənilərin növbəti yalanları üzə çıxır. Dünənki hadisələr zamanı Silahlı Qüvvələrimiz bu sistemlərdən istifadə etməyib”.

Beynəlxalq qurumların hadisə ilə bağlı məlumatlandırıldığını diqqətə çatdıran Müdafiə Nazirliyinin rəsmisi qeyd edib ki, Ermənistan tərəfinin bu cür əməllərinin qarşısı qətiyyətlə alınacaq. Azərbaycan Respublikası Müdafiə Nazirliyi bəyan edir ki, baş verə biləcək hər hansı hadisə ilə bağlı bütün məsuliyyət Ermənistan tərəfinin üzərinə düşür.

Ermənistanın törətdiyi təxribatla bağlı açılmış cinayət işi barədə məlumat verən Baş Prokurorluğun mətbuat xidmətinin rəhbəri Eldar Sultanov bildirib ki, təxribat nəticəsində iki şəxsin həlak olması, bir nəfərin yaralanması faktları ilə bağlı dərhal Füzuli rayon prokurorluğunda Cinayət Məcəlləsinin silahlı münaqişə zamanı hərbi zərurətdən irəli gəlməyən geniş miqyaslı dağıntılar törətməklə beynəlxalq humanitar hüquq normalarını pozma, iki və ya daha çox şəxsi qəsdən öldürmə, iki və ya daha çox şəxsi qəsdən öldürməyə cəhd və digər maddələri ilə cinayət işi başlanıb. Respublikanın hüquq-mühafizə orqanlarının peşəkar əməkdaşlarından ibarət istintaq-əməliyyat qrupu yaradılıb. Hadisə yerinə və cəsədlərə baxış keçirilərkən tank əleyhinə qumbaraatan mərminin qəlpələri aşkarlanıb. Hazırda cinayət işi üzrə məhkəmə tibb-ekspertizaları və digər ekspertizalar təyin olunub. 

Xarici İşlər Nazirliyinin mətbuat xidmətinin rəhbəri Hikmət Hacıyev bildirib ki, Ermənistan silahlı qüvvələri tərəfindən qoşunların təmas xəttinə yaxın ərazilərdə kompakt şəkildə yaşayan mülki əhalinin atəşə tutulması Ermənistanın dövlət siyasətinin tərkib hissəsidir. Erməni silahlı qüvvələrinin bu cür təxribatlar törətməsi, mülki insanları hədəfə alması Ermənistanın beynəlxalq humanitar hüquq əsasında üzərinə götürdüyü öhdəliklərin kobud şəkildə pozulmasıdır. Bu, həmçinin 1949-cu il Cenevrə konvensiyalarının və ona 1 saylı Əlavənin və hərbi münaqişələr zamanı sivil davranış qaydaları haqqında beynəlxalq sənədlərin, o cümlədən uşaqların hüquqlarına və insan hüquqlarının müdafiəsi və fundamental azadlıqlara dair Konvensiyanın ciddi şəkildə pozulmasıdır.

Ötən gün Ermənistan silahlı qüvvələrinin bölmələri tərəfindən törədilmiş təxribatla bağlı Xarici İşlər Nazirliyi tərəfindən xarici ölkələrdəki diplomatik nümayəndəliklərimizə akkreditə olunduqları ölkələrin müvafiq strukturlarına, beynəlxalq təşkilatlara Azərbaycanın məsələ ilə bağlı narahatlığını və mövqeyini çatdırmaq tapşırılıb. “Biz gözləyirik ki, dünya ictimaiyyəti tərəfindən beynəlxalq hüququn kobud şəkildə pozulması faktı olan bu hadisəyə, xüsusilə azyaşlı uşağın öldürülməsi faktına birmənalı şəkildə münasibət bildiriləcək”, - deyə XİN-in mətbuat xidmətinin rəhbəri vurğulayıb.

O, həmçinin bildirib ki, bu hadisə status-kvonun dəyişdirilməsinin vacibliyini bir daha sübut edir. ATƏT-in Minsk qrupunun həmsədrlərinin regiona səfərindən dərhal sonra bu cür hadisənin baş verməsi göstərir ki, Ermənistanın siyasi hakimiyyətinin niyyəti münaqişənin həllinə maneə yaratmaq və gərginliyi artırmaqdır. Bununla əlaqədar Azərbaycanın xarici işlər naziri Elmar Məmmədyarovun ATƏT-in fəaliyyətdə olan sədrinin şəxsi nümayəndəsi Anje Kaspişikin ofisi ilə, o cümlədən  ATƏT-in Minsk qrupunun rusiyalı və fransalı həmsədrləri ilə danışığı olub və ölkəmizin narahatlığı onların diqqətinə çatdırılıb.

H.Hacıyev məlumat verib ki, hadisə ilə bağlı ATƏT-in Minsk qrupunun həmsədrlərinin təlimatları əsasında hazırda ATƏT-in fəaliyyətdə olan sədrinin şəxsi nümayəndəsi Anje Kaspişik və onun nümayəndələri təmas xəttinin hər iki istiqamətində araşdırmalar aparırlar. İnanmaq olar ki, bu araşdırmaların yekununda hadisələrə obyektiv və real qiymət veriləcək.

 

 

 

AZƏRTAC

9 -dən səhifə 1261