XƏBƏR LENTİ

Çərşənbə, 28 Dekabr 2016 16:22

Xaçmazın kəndlərinə içməli su verildi

Qurumun Mətbuat Xidmətindən aldığımız məlumata görə, “Azərsu” Açıq Səhmdar Cəmiyyəti Azərbaycan Respublikası regionlarının sosial-iqtisadi inkişafı Dövlət proqramlarına uyğun olaraq, içməli su çatışmazlığı müşahidə edilən kəndlərin su təchizatının yaxşılaşdırılması tədbirlərini davam etdirir. Heydər Əliyev Fondunun “Regional İnkişaf” İctimai Birliyinə və “Azərsu” ASC-yə bölgələrdən daxil olmuş müraciətlər əsasında 5 rayonda 13 kəndin içməli su təchizatının yaxşılaşdırılması Səhmdar Cəmiyyətin Təxirəsalınmaz Tədbirlər Planına daxil edilmiş və həmin kəndlərdə layihələr həyata keçirilmişdir. Xaçmaz rayonunun 7 kəndini əhatə edən içməli su layihəsinin icrası yekunlaşmış və suyun verilməsinə başlanılmışdır.

Rayonun Qaradağlı və Gülalan kəndlərində keçirilən açılış mərasimlərində Xaçmaz Rayon İcra Hakimiyyəti başçısının müavini Bəxtiyar Osmanov bölgələrdə həyata keçirilən infrastruktur layihələrinin əhəmiyyətindən danışmış, ölkə rəhbərliyinin şəhər və rayon mərkəzləri ilə yanaşı, kəndlərin də içməli su təchizatının yaxşılaşdırılmasını daim diqqətdə saxladığını vurğulamışdır .

“Azərsu” ASC-nin “Birləşmiş Sukanal” MMC direktorunun müavini Ramin Sadıqov kənd yaşayış məntəqələrinin içməli suya olan tələbatının ödənilməsi məqsədi ilə respublikada həyata keçirilən layihələr barədə məlumat vermiş və bu tədbirlərin gələcəkdə də davam etdiriləcəyini diqqətə çatdırmışdır: “Azərbaycan Respublikasının Prezidenti cənab İlham Əliyevin əhalinin içməli su ilə təminatının yaxşılaşdırılması barədə tapşırıqlarına uyğun olaraq bölgələrdə genişmiqyaslı işlər həyata keçirilir. İçməli su problemi müşahidə olunan kəndlərdən Heydər Əliyev Fondunun “Regional İnkişaf” İctimai Birliyinə və “Azərsu” ASC-yə daxil olmuş müraciətlər əsasında  kəndlərin su təchizatı imkanları araşdırılmış və qısa müddətdə layihələr işlənərək icra edilmişdir”.

Tədbirdə çıxış edən kənd sakinləri indiyədək içməli suyu böyük çətinliklərlə uzaq məsafədən gətirdiklərini və quyu sularından istifadə etdiklərini vurğulamışlar. Sakinlər içməli su probleminin həllinə göstərilən dəstəyə görə minnətdarlıqlarını bildirmişlər.

Xaçmaz rayonunun 7 kəndində həyata keçirilmiş layihə çərçivəsində Qaradağlı, Alıcqışlaq, Çiləgir, Manaf-Oba, Seyidlər, Aşağı Ləgər və Gülalan kəndlərində içməli su təchizatı sistemləri yaradılmışdır. Həmin kəndlərdə müxtəlif diametrli borularla 14 km içməli su xətti çəkilmiş, bulaqlar quraşdırılmışdır. Hazırda Xaçmaz rayonunun Gülalan, Aşağı Ləgər, Alıcqışlaq, Manaf-Oba və Seyidlər kəndlərinə içməli su artezian quyuları, Qaradağlı və Çiləgir kəndlərinə isə II Bakı Su Kəmərindən verilir. Yeni layihənin icrasından Xaçmaz rayonunun 7 kəndinin 4600-dək sakini faydalanmışdır.

Heydər Əliyev Fondunun “Regional İnkişaf” İctimai Birliyinə və “Azərsu” ASC-yə daxil olmuş müraciətlər əsasında Ağsu rayonunun Elabad və Yenilik, Şabran rayonunun Təzəkənd və Dəvəçi, Hacıqabul rayonunun Navahı və İsmayıllı rayonunun Kürdmaşı kəndlərində də layihələrin icrasına qərar verilmişdir. Artıq Elabad və Yenilik kəndlərində layihələrin icrası başa çatmış, Şabran rayonunun Təzəkənd və İsmayıllı rayonunun Kürdmaşı kəndlərində işlər yekunlaşma ərəfəsindədir. Şabran rayonunun Dəvəçi və Hacıqabul rayonunun Navahı kəndlərində layihələrin icrası davam etdirilir.

Ümumilikdə 5 rayonun 13 kəndində 30 km-dən artıq su xəttinin çəkilməsi nəzərdə tutulur. Bu layihələrdən həmin kəndlərin 6200-dək sakini faydalanacaqdır.

Nurəngiz ADİLQIZI,

“Respublika”.

 

 

 

Read 13 times