XƏBƏR LENTİ

Bazar, 11 Dekabr 2016 22:30

Yeni yaranan “Rebus” teatr truppasının növbəti uğuru

Azərbaycan teatr məkanında ilk addımlarını atan “Rebus” teatr truppası klassik teatr ənənələrindən bəhrələnərək müasir sənət dünyamıza yeni rəngarəng səhnə əsərləri təqdim etməyi qarşısına məqsəd qoyub. Ceyhun Dadaşov, Elnur İsmayılov və Əli Əlizadənin yaratdığı bu teatr truppası qısa müddət ərzində nəinki tanınır, sevilir, həm də ölkəmizi yaxın-uzaq məmləkətlərdə tanıtmağı hədəfləyir. Artıq truppa bu istiqamətdə ilk addımlarını atıb. Belə ki, yaradıcı qrup bu günlərdə Türkiyədə keçirilən beynəlxalq festivaldan Vətənə mükafatla qayıdıb.

Bu barədə AZƏRTAC-a  “Rebus” teatr truppasının rejissoru və aktyoru Ceyhun Dadaşov geniş məlumat verib.

 

Ankarada 21-ci Beynəlxalq Teatr Festivalına iştirak məqsədilə tamaşaları haqqında kiçik məlumat göndərdiklərini bildirən C.Dadaşov deyib ki, festival rəhbərliyi tərəfindən onların iki tamaşası nümayiş olunmaq üçün təsdiqlənib. Bunlardan biri “Mən və mən” monotamaşası, digəri isə “Tesserakt” tamaşası idi.

Onun sözlərinə görə, “Tesserakt” meydan tamaşası olduğundan festivalda hava şəraitinə görə yalnız “Mən və mən” monotamaşasını nümayiş etdiriblər. Eyni zamanda, festival çərçivəsində Ankarada “Cermodern” sənət mərkəzində “Rebus” teatr truppasının aktyorları Elnur İsmayılov və Ceyhun Dadaşov “Biomexanika” və aktyor yaradıcılığında “bədən dili” mövzusunda ustad dərsi keçiblər. Bu uğurlu iştirakdan sonra festivala qatılan bütün iştirakçılar kimi onları da mükafatlandırıblar.

Bu festival həm də “Rebus” teatr truppası üçün yeni əməkdaşlıq əlaqələrinin qurulması baxımından düşərli olub.

Ceyhun Dadaşovun sözlərinə görə, bu festivaldan sonra onlar İstanbul teatr festivalına dəvət alıblar: “Bu festivalda adətən dövlət teatrları iştirak edir. İl ərzində bəzən bir-iki özəl truppaları cəlb edirlər. Festivalın təşkilatçısı ilə əlaqə yaratdıq və gələn il festivalda iştirak etmək istədiyimizi söylədik. Bu istəyimiz onlar tərəfindən müsbət qarşılandı”.

Ceyhun Dadaşov qeyd edib ki, bu heç də ilk addım deyil. Belə ki, “Rebus” teatr truppası ilk tamaşasını 2015-ci il avqustun 14-də İranın Təbriz şəhərində təqdim edib. “Tesserakt” tamaşası ilə böyük tamaşaçı sevgisi qazanan truppa İrandan Vətənə mükafatla qayıdıb. Bu ilk uğur teatrın növbəti festivallarda iştirakına təkan verib. Belə ki, elə həmin il İranın Mərivan şəhərində keçirilən festivalda eyni tamaşa ilə iştirak ediblər.

Teatr truppasının məqsəd və fəaliyyət istiqamətlərindən danışan Ceyhun Dadaşov bildirib ki, teatr biomexanika, klassik teatr, pantomima elementlərini özündə cəmləşdirmək yolunda çalışır. “Rebus” teatrı konkret bir janrda işləmir. Müxtəlif janrlarda, modern rəqs, hərəkət istiqamətində işləyərək, sözlü, psixoloji, hətta uşaq tamaşaları hazırlayır. Bu yaxınlarda uşaqlar üçün “Ürək planetinin sakinləri” adlı tamaşaları olub. Tamaşanın müəllifi Əməkdar Artist Nargilə Qəribovadır. Kurt Hörtenhuberin əsərlərinin motivləri əsasında yazılan səhnə əsəri böyük maraq doğurub.

Hazırda yeni tamaşalar üzərində işlədiklərini söyləyən gənc rejissor deyib ki, yaxın vaxtlarda teatrsevərlər “Rebus” teatr truppasının ifasında “Kaliqula” monotamaşasına və “Hamlet”ə baxa biləcəklər.

Həmsöhbətimizin sözlərinə görə, onlar həm də aktyor olmaq istəyənlər üçün studiya yaradıblar. 30-a yaxın tələbəni ətrafında birləşdirən studiya başqalarından fərqli olaraq ödənişsiz fəaliyyət göstərir.

Qeyd edək ki, teatr truppası tamaşalarını, məşqlərini və yaratdığı studiyada keçirilən dərslərini “Megafun” əyləncə mərkəzində yerləşən “Modern” özəl teatrının səhnəsində təqdim edir.

 

AZƏRTAC

 

 

 

 

Read 46 times