XƏBƏR LENTİ

Respublica News - Items filtered by date: Bazar, 08 Yanvar 2017

2016-cı ildə enerji təhlükəsizliyi istiqamətində önəmli addımlar atıldı

Published in Digər xəbərlər

Rəşt-Astara dəmir yolunun çəkilişinə bu il başlanılacaq. Bu yol Azərbaycan ilə İranın dəmir yollarını birləşdirməklə yanaşı, hər iki dövlətin idxal və ixrac əməliyyatlarını və ticarət dövriyyəsini artıracaq.

Bu sözləri İranın yollar və şəhərsalma nazirinin müavini Xeyrullah Xadimi deyib. Astara dəmir yolu xəttinə baxış keçirdiyi zaman açıqlama verən nazir müavini bildirib ki, Qəzvin-Rəşt-Astara dəmir yolu xəttinin Qəzvin-Rəşt hissəsi qısa zamanda yekunlaşacaq. İşlərin 90 faizindən çoxu görülüb, tunellər və körpülər tam hazır vəziyyətdədir. Bu yolun Rəşt-Astara hissəsinin tikintisinə isə cari ildə başlanılacaq.

Şimal-Cənub beynəlxalq nəqliyyat dəhlizinin əsasını təşkil edəcək Qəzvin-Rəşt-Astara dəmir yolu xətti İranın Fars körfəzi sahilindəki Bəndər-Abbas limanı ilə Azərbaycanın Astara şəhərini birləşdirəcək. Bu dəhlizlə nəinki İran, eləcə də Hindistan, Çin və Fars körfəzi ölkələri Avropa ilə idxal və ixrac əməliyyatları aparacaqlar. Azərbaycan ərazisindən keçən dəhliz daha səmərəli və iqtisadi baxımdan əlverişlidir. 

AZƏRTAC

Published in Digər xəbərlər

Dövlətimizin başçısı vurğulayıb ki, idmanın inkişafı bizim dövlət siyasətimizdir və idman infrastrukturunun yaradılması prosesi davam edir

Son illər Azərbaycan həm regionda, həm də dünyada çox böyük nüfuz qazanmış, iqtisadi cəhətdən sürətlə inkişaf edən dövlətlər sırasına daxil olmuşdur. Ölkəmizin iqtisadi qüdrətinin ilbəil artması sosial sferanın bütün sahələrində olduğu kimi, idmanın inkişafında da mühüm rol oynayır. Məhz bunun nəticəsidir ki, müstəqil respublikamız istər infrastrukturun yaradılması, istərsə də dünya, Avropa çempionatlarında, Olimpiya Oyunlarında qazanılan nəticələrə görə dünyanın qabaqcıl idman ölkələri sırasında layiqli yerini tutmaqdadır. Bunu 1996-cı ildə Atlantada başlanan (1 bürünc), daha sonra 2000-ci ildə Sidneydə (3 medal), 2004-cü ildə Afinada (5 medal), 2008-ci ildə Pekində (7 medal), 2012-ci ildə Londonda (10 medal), 2015-ci ildə Bakıda keçirilən ilk Avropa Oyunlarında (56 medal) və nəhayət, 2016-cı ildə Rio-de Janeyroda (18 medal) keçirilən Yay Olimpiya Oyunları bir daha sübut edir.

 

Ümumiyyətlə, Azərbaycan 20 ildir ki, dünya Olimpiya hərəkatında fəal iştirak edir. Ölkəmiz “Atlanta-1996”dan başlayaraq Olimpiya yarışlarına daim artan heyətlə qatılır. Eyni zamanda əldə olunan göstəricilər onu sübut edir ki, qələbə rekordları oyunlardan-oyunlara təzələnmişdir. Məsələn, 1996-cı ildə Atlantada bir medal əldə olunmuşdursa, 20 il sonra 2016-cı ildə Braziliyada bu rəqəm 18-ə yüksəlmişdir.

Azərbaycanda idmanın inkişaf səviyyəsini göstərən faktorlardan biri də 2015-ci ilin iyun ayında Bakıda keçirilmiş birinci Avropa Oyunlarıdır. Bu Oyunlarda çox gərgin mübarizədə 50 Avropa ölkəsi arasında Rusiya Federasiyasından sonra ikinci yeri tutmaq, əlbəttə, böyük qələbədir. Böyüklər, gənclər və yeniyetmələr arasında keçirilən bütün beynəlxalq idman tədbirlərində Azərbaycan ləyaqətlə təmsil olunur. İdmançılarımız bu yarışlarda yüzlərlə medal qazanırlar. Hər bir qələbədə Azərbaycan bayrağı dalğalanır. Bildiyimiz kimi, müstəqilliyimizin yenidən bərpasının 25 ili tamam olub. Müstəqillik dövründə doğulan, yetişən idmançılarımız Azərbaycanın şöhrətini yüksəklərə qaldırır. Bununla yanaşı, həm də təcrübəli idmançıları əvəz edən gənclər də yetişir. Çünki paytaxt və iri şəhərlərlə yanaşı, bütün bölgələrdə Olimpiya İdman Kompleksləri, idman qurğuları və meydançalar fəaliyyət göstərir. Bu idman bazalarına uşaqlar və yeniyetmələr həvəslə gedirlər. Artıq regionlarda 40-dan çox Olimpiya İdman kompleksləri vardır.

Əvvəllərdə olduğu kimi, 2016-cı il də ölkəmizin idman tarixində xüsusi yer tutur. Bu barədə ötən il dekabrın 23-də Milli Olimpiya Komitəsində keçirilən mərasimdə ərtaflı söhbət açılıb. Qeyd edək ki, MOK-da idmançılara və idman mütəxəssislərinə mükafatların təqdim edilməsi mərasimində Azərbaycan Respublikasının Prezidenti, Milli Olimpiya Komitəsinin prezidenti İlham Əliyev də iştirak edib. Tədbirdə nitq söyləyən dövlətimizin başçısı deyib: “Bu gün Azərbaycan dünya miqyasında güclü idman dövləti kimi tanınır. Bizim idman uğurlarımız çox parlaqdır. Biz ildən-ilə idman nəticələrimizi, uğurlarımızı artırırıq. Əgər Yay Olimpiya Oyunlarının nəticələrinə fikir versək, görərik ki, hər oyundan-oyuna Azərbaycanın qazandığı medalların sayı artır. Yəni, bu müsbət dinamikadır. Əslində dinamika hər bir məsələnin təhlili üçün əsas amildir. Biz daim inkişafdayıq. Əminəm ki, müsbət dinamika bundan sonra da davam edəcək”.

Məlum olduğu kimi, hər ilin sonunda Milli Olimpiya Komitəsində ənənəvi olaraq idmançılarla görüş keçirilir. Bu tədbirdə ilə yekun vurulmaqla yanaşı, həm də idmançılar və idman mütəxəssisləri mükafatlandırılır. Tədbirdə millimizin Rio Yay Olimpiya Oyunlarında parlaq qələbə qazanması xüsusi vurğulanıb. Qeyd edək ki, Braziliyada keçirilən XXXI Yay Olimpiya Oyunlarında idmançılarımız 1-i qızıl, 7-i gümüş və 10-u bürünc olmaqla, 18 medal əldə edərək Vətənə rekord nəticə ilə qayıdıblar. Bu Oyunlarda 200-dən çox ölkə iştirak edib. Azərbaycan 18 medalla Avropa ölkələri arasında 7-ci, dünya miqyasında medalların sayına görə 14-cü, MDB və postsovet məkanında 2-ci və müsəlman aləmində 1-ci yerdə qərarlaşmışdır. Paralimpiyaçılarımız isə 11 medal qazanmışlar.

Azərbaycanın idman dövləti kimi tanınmasında ötən il Bakıda keçirilmiş “Formula-1” Avropa Qran-pri yarışması xüsusi yer tutur. Belə bir yarışın keçirilməsi hər bir ölkəyə nəsib olmur. Ancaq bu yarışın Azərbaycanda uğurla keçirilməsinin ölkəmizin dünyada tanıdılması üçün müstəsna əhəmiyyəti vardır. Bir faktı qeyd edək ki, 500 milyon tamaşaçı auditoriyası olan bu yarışa bütün qitələrdə baxmışlar. Bununla da paytaxtımızın gözəlliyini, insanlarımızın qonaqpərvərliyini bütün dünya görməklə ölkəmizə daha çox turist cəlb olunmasına stimul yaranmışdır.

Digər bir tədbir – 2016-cı ilin sentyabr ayında Bakıda təşkil olunan 42-ci Ümumdünya Şahmat Olimpiadası da ölkəmizin idman imicinə müsbət təsir göstərmişdir. Bu mötəbər yarışda 175 ölkədən 181 kişi və 142 qadın komandası mübarizə aparmışdır. Bu, iştirakçı ölkələrin sayına görə Olimpiada tarixində rekord göstəricidir. Azərbaycan bu yarışda 3 kişi və 3 qadın komandası ilə təmsil olunmuşdur.

ümumilikdə, yola saldığımız 2016-cı ildə idmançılarımızın uğurları sevindiricidir. Belə ki, ötən il idmançılarımız mötəbər beynəlxalq yarışlarda 837 medala sahib olublar ki, bunun da 297-si qızıl, 250-si gümüş, 290-nı isə bürüncdür. Gənclər və İdman Nazirliyindən verilən məlumatda bildirilir ki, 2016-cı ildə respublikamızda fəaliyyət göstərən federasiyalarla birlikdə Azərbaycanda 200-dən çox yarış təşkil olunub. Ötən il ərzində ölkəmizdə 203 respublika, 52 beynəlxalq yarış keçirilib. Həmçinin yığma komandalarımız 198 beynəlxalq yarışda mübarizə aparıb. İdmanın müxtəlif növləri üzrə yığma komandaların hər biri 12 gündən az olmayaraq 100-dən çox təlim-məşq toplantısında iştirak edib.

Ötən il idmanın müxtəlif növlərində yüksək nəticələr qazanan idmançılar və mütəxəssislər mükafatlandırılıb. “Rio-2016” Yay Olimpiya Oyunlarında parlaq qələbələrə görə 2 nəfər “Şöhrət” ordeni, bir nəfər 1-ci dərəcəli “Vətənə xidmətə görə”, 2 nəfər 2-ci dərəcəli “Vətənə xidmətə görə”, beş nəfər 3-cü dərəcəli “Vətənə xidmətə görə” ordenləri ilə təltif edilib. Həmçinin 18 nəfər “Tərəqqi” medalına, 16 nəfər isə Azərbaycan Respublikası Prezidentinin Fəxri Diplomuna layiq görülüb. XV Yay Paralimpiya Oyunlarının nəticələrinə görə, 2 nəfər “Şöhrət” ordeni, bir nəfər 2-ci dərəcəli “Vətənə xidmətə görə”, səkkiz nəfər 3-cü dərəcəli “Vətənə xidmətə görə” ordenləri, doqquz nəfər “Tərəqqi” medalı, bir nəfər isə Azərbaycan Respublikası Prezidentinin Fəxri Diplomu ilə təltif edilib.

Eyni zamanda 2016-cı ildə idmanın müxtəlif növləri üzrə 90 məşqçi-müəllimə ixtisas kateqoriyası verilib. Altı nəfər ali, 80 nəfər birinci, 4 nəfər ikinci kateqoriya alıb. Otuz beş nəfərə “Fəxri Bədən Tərbiyəsi və İdman İşçisi”, 49 nəfərə “Əməkdar məşqçi”, 23 nəfərə “Əməkdar İdman Ustası”, 10 nəfərə “Respublika dərəcəli hakim” fəxri adları verilib. Bundan başqa, 156 nəfər idman ustası normasını yerinə yetirib.

2017-ci il də Azərbaycanın idman tarixində yadda qalacaq. Belə ki, cari ilin iyun ayında Bakı IV İslam Həmrəyliyi Oyunlarına ev sahibliyi edəcək. Oyunların başlanmasına cəmi 6 ay vaxt qalsa da, hazırlıq işləri plana uyğun şəkildə aparılır. Çünki bu möhtəşəm tədbirin keçirilməsinə 2015-ci ildə ilk Avropa Oyunları zamanı möhkəm zəmin yaradılmışdır. Oyunların açılış və bağlanış mərasimləri Bakı Olimpiya Stadionunda baş tutacaq.

Azərbaycan Prezidenti cənab İlham Əliyev Milli Olimpiya Komitəsində 2016-cı ilin yekunları ilə bağlı keçirilən tədbirdəki nitqində IV İslam Həmrəyliyi Oyunları barədə deyib: “Əminəm ki, biz İslam Oyunlarını da ən yüksək səviyyədə keçirəcəyik, bizim təcrübəmiz var və oyunların başlamasına təqribən 6 ay vaxt qalıb. Demək olar ki, bütün əsas hazırlıq işləri görülübdür”.

 

Ramiz YUSİFLİ,

“Respublika”.

 

 

 

Published in Digər xəbərlər

Yanvarın 7-də beşinci çağırış Naxçıvan Muxtar Respublikası Ali Məclisinin dördüncü sessiyası keçirilib.

Naxçıvan Muxtar Respublikası Ali Məclisinin mətbuat xidmətindən AZƏRTAC-a bildirilib ki, sessiyanın müzakirəsinə aşağıdakı məsələlər verilib:

1. 2016-cı ildə Naxçıvan Muxtar Respublikasının sosial-iqtisadi inkişafının yekunları

2. Naxçıvan Muxtar Respublikasının 2017-ci il dövlət büdcəsinin təsdiq edilməsi

3. Naxçıvan Muxtar Respublikası Dövlət Sosial Müdafiə Fondunun 2017-ci il büdcəsinin təsdiq edilməsi

4. “İnsan orqan və ya toxumalarının transplantasiyası haqqında” Naxçıvan Muxtar Respublikası Qanununun qəbul edilməsi

5. Naxçıvan Muxtar Respublikasının İnsan Hüquqları üzrə Müvəkkilinin (Ombudsmanın) hesabatı

Naxçıvan Muxtar Respublikası Ali Məclisinin Sədri Vasif Talıbov 2016-cı ildə Naxçıvan Muxtar Respublikasının sosial-iqtisadi inkişafının yekunları ilə əlaqədar məruzə edib.

 

Beşinci çağırış Naxçıvan Muxtar Respublikası

Ali Məclisinin dördüncü sessiyasında Naxçıvan Muxtar Respublikası Ali Məclisinin Sədri Vasif Talıbovun

M Ə R U Z Ə S İ

Hörmətli deputatlar və sessiya iştirakçıları!

2016-cı ildə ölkəmiz dövlət müstəqilliyinin 25 illik yubileyini təntənə ilə qeyd etdi. Zaman baxımından qısa müddətdə Azərbaycan və onun Naxçıvan Muxtar Respublikası inkişafa, tərəqqiyə çatıb və buna görə xalqımız ümummilli lider Heydər Əliyevə borcludur. Məhz Ulu Öndərimizin fədakarlığı sayəsində Azərbaycan məhv olmaq, parçalanmaq təhlükəsindən xilas oldu. Bu gün dahi şəxsiyyətin siyasi xəttini uğurla davam etdirən ölkə Prezidenti cənab İlham Əliyevin rəhbərliyi altında dövlət müstəqilliyimiz daha da möhkəmlənmişdir.

Ulu Öndərimizin siyasi xəttinə sadiqlik, ölkə Prezidentinin göstərdiyi böyük diqqət və qayğı sayəsində Naxçıvan Muxtar Respublikası 2016-cı ili də müsbət nəticələrlə başa vurdu. Muxtar respublikada görülən işlərin əsasını insanların rahat yaşayışının və təhlükəsizliyinin təmin edilməsi, iqtisadi və sosial həyatın bütün sahələrində tərəqqi və inkişaf tempinin qorunub saxlanılması təşkil edir. 2016-cı ilin muxtar respublikamızda “Nizam-intizamın daha da möhkəmləndirilməsi ili” elan olunması bu məqsədə çatmaqda əhəmiyyətli rol oynamış, görülən işə görə məsuliyyət hissi daha da artmışdır.

Mövcud maddi və iqtisadi resurslardan səmərəli istifadə edilərək çoxşaxəli iqtisadiyyat formalaşdırılmış, qəbul olunmuş dövlət proqramlarının uğurlu icrası nəticəsində sosial-iqtisadi sahədə inkişaf təmin edilmişdir. 2016-cı ildə inkişafın əsas göstəricisi kimi ümumi daxili məhsul istehsalının həcmi bir il öncəki dövrlə müqayisədə artaraq 2 milyard 500 milyon manatdan çox olmuşdur. Onun hər bir nəfərə düşən həcmi isə 5 min 771 manat təşkil etmişdir ki, bu da 2015-ci ilin müvafiq göstəricisinə nisbətən 3,4 faiz çoxdur. Ümumi daxili məhsul istehsalının 60 faizə qədərinin real sektorun payına düşməsi dayanıqlı inkişafın təmin olunmasına öz təsirini göstərmişdir.

İqtisadi dayaqların möhkəmlənməsində investisiya fəallığının gücləndirilməsi, sahibkarlığın stimullaşdırılması və təşəbbüskarlığa geniş meydan verilməsi mühüm əhəmiyyət daşıyır. Ona görə də muxtar respublikada islahatların həyata keçirilməsi ilə yanaşı biznes və investisiya mühitinin yaxşılaşdırılmasına da diqqət artırılmışdır. Ötən il sahibkarlıq fəaliyyəti ilə məşğul olmaq üçün müraciət etmiş 33 hüquqi və 2173 fiziki şəxsin dövlət qeydiyyatına alınması təmin edilmiş, bank və kredit təşkilatları tərəfindən sahibkarlığın inkişafı məqsədilə 17 milyon manatdan çox kredit verilmişdir. Bunların nəticəsi olaraq 2016-cı ildə daha 47 yeni istehsal və xidmət sahəsi fəaliyyətə başlamış, ümumi daxili məhsul istehsalında özəl bölmənin xüsusi çəkisi 87 faizi ötmüşdür. Yeni istehsal müəssisələrinin istifadəyə verilməsi hesabına hazırda muxtar respublikada 366 növdə məhsul istehsal olunur. 107-si ərzaq, 237-si qeyri-ərzaq olmaqla 344 növdə məhsula olan tələbat tamamilə yerli istehsal hesabına ödənilir. İstehsal olunan məhsulların daxili bazarda dövriyyəsini təmin etmək və onların ixrac potensialını artırmaq məqsədilə “Naxçıvan Məhsulları” Məhdud Məsuliyyətli Cəmiyyəti yaradılmışdır.

Sahibkarlığın inkişafı yeni iş yerlərinin açılmasına və əhali gəlirlərinin artmasına da öz təsirini göstərmişdir. Bununla yanaşı, “2016-2020-ci illərdə Naxçıvan Muxtar Respublikasında əhalinin məşğulluğunun artırılması üzrə Dövlət Proqramı”nın icrası da nəticəsiz qalmamış, 2 min 818 yeni iş yeri açılmışdır ki, bunun da 98 faizi daimi iş yerləridir.

2016-cı ildə sənaye sektoruna xüsusi diqqət yetirilmişdir. Mövcud müəssisələrin fəaliyyətinin bərpası və ya yenidən qurulması, müasir texnologiyaların tətbiqinə əsaslanan yeni müəssisələrin yaradılması sənayenin inkişafına, onun ümumi daxili məhsulda 28 faizlik payla ilk yeri tutmasına səbəb olmuşdur. 2015-ci illə müqayisədə sənaye məhsulunun həcmi artaraq 942 milyon manatı ötmüşdür.

Muxtar respublika əhalisinin böyük əksəriyyətinin kənddə yaşaması kənd təsərrüfatının daim diqqət mərkəzində saxlanılmasını şərtləndirir. Aydındır ki, kənd təsərrüfatının inkişafı bilavasitə torpaqla bağlıdır. Ona görə də bu sahədə mütərəqqi və intensiv metodların tətbiqinə üstünlük verilmiş, əl əməyinin yüngülləşdirilməsi, əkinçilikdə və heyvandarlıqda məhsuldar sortlardan istifadə olunması istiqamətində tədbirlər həyata keçirilmişdir. 2016-cı ildə “Naxçıvan Aqrolizinq” Açıq Səhmdar Cəmiyyətinin xətti ilə muxtar respublikaya daha 66 ədəd müxtəlif kənd təsərrüfatı texnikası və texnoloji avadanlıq gətirilmiş, lizinq yolu ilə torpaq mülkiyyətçilərinə verilmişdir. Bundan əlavə, məhsul istehsalçılarına 4 min 923 tondan çox mineral gübrə verilmişdir.

Müasir meliorasiya və irriqasiya sistemlərinin qurulması su itkisini aradan qaldırmış, yeni torpaq sahələri əkin dövriyyəsinə cəlb olunmuşdur. Belə ki, Babək rayonunda yeni nasos stansiyasının, həmin rayonun Kərimbəyli və Kültəpə kəndlərində 217 hektar yeni torpaq sahəsinin əkin dövriyyəsinə qatılmasını təmin edən suvarma şəbəkəsinin, Şərur rayonunun Xanlıqlar, Vərməziyar və Ələkli kəndlərində 589 hektar sahənin su təminatını yaxşılaşdırmağa imkan verən suvarma boru xəttinin, Kəngərli rayonunun Böyükdüz və Xok kəndlərində 117 hektar ərazini əhatə edən qapalı suvarma şəbəkəsinin tikintisi başa çatdırılmışdır.

Qeyd olunanlarla yanaşı, əkinçiliklə məşğul olan mülkiyyətçilərə subsidiyaların və güzəştli şərtlərlə kreditlərin verilməsi hesabına 2016-cı ilin məhsulu üçün 61 min 526 hektar sahədə əkin aparılmışdır. 2016-cı ildə də bitkiçilik məhsulları içərisində taxılçılıq öz üstün mövqeyini qoruyub saxlamışdır. 31 min 579 hektar taxıl əkini sahəsindən 94 min 117 ton məhsul yığılmışdır. Bununla birlikdə kartofçuluğun inkişafı da diqqətdə saxlanmış, əkin keçirilmiş 3 min 53 hektar kartof sahəsindən 46 min 400 tondan çox məhsul tədarük olunmuşdur.

Ötən il qarğıdalı əkininə də maraq xeyli artmış, 1758 hektarda əkin həyata keçirilmişdir ki, bu da 2015-ci illə müqayisədə 63 faiz çoxdur. Məhsulun vaxtında toplanılmasını təmin etmək üçün yeni texnikalar alınaraq muxtar respublikaya gətirilmiş, əkin sahələrindən 10 min 500 tona yaxın məhsul yığılmışdır ki, bu da 2015-ci illə müqayisədə 2,3 dəfə çoxdur.

Muxtar respublikada ekoloji cəhətdən təmiz meyvə-tərəvəz məhsulları yetişdirilir. 2016-cı il fevralın 8-də qəbul olunmuş “2016-2020-ci illərdə Naxçıvan Muxtar Respublikasında meyvəçiliyin və tərəvəzçiliyin inkişafı üzrə Dövlət Proqramı” əhalinin bu məhsullara olan tələbatının yerli istehsal hesabına ödənilməsini təmin etmiş, tələbatdan artıq mövsümi məhsulların isə ixracına imkan yaratmışdır. 2016-cı ildə əkin sahələrindən 83 min tondan çox tərəvəz, meyvə bağlarından isə 52 min tona yaxın məhsul götürülmüşdür.

Meyvə-tərəvəz məhsullarına olan tələbatın ödənilməsində soyuducu anbarların yaradılması və istixana komplekslərinin istifadəyə verilməsi də öz müsbət təsirini göstərmişdir. 2016-cı ildə daha 4 soyuducu anbar yaradılmış, istismar olunan anbarların sayı 29-a, ümumi tutumu isə 13 min 280 tona çatdırılmışdır. Hazırda muxtar respublikada ümumi sahəsi 127 min 162 kvadratmetr olan 21 istixana kompleksi fəaliyyət göstərir.

Heyvandarlığın inkişafı üçün də tədbirlər davam etdirilmiş, 6 yeni heyvandarlıq təsərrüfatı yaradılmışdır. Heyvandarlıqda məhsuldarlığı artırmaq, mal-qaranın cins tərkibini yaxşılaşdırmaq məqsədilə süni mayalandırma tədbirləri diqqət mərkəzində saxlanılmış, 3584 cins bala alınmışdır. Ümumilikdə 2016-cı ildə bank və kredit təşkilatları tərəfindən heyvandarlığın inkişafına 8 milyon 27 min manat kredit verilmişdir. 

Arıçılıq iqtisadi cəhətdən yüksək gəlir gətirən, qida və müalicəvi baxımdan faydalı xüsusiyyətlərə malik təsərrüfat sahəsi kimi həmişə diqqət mərkəzindədir. Muxtar respublikanın əlverişli təbii iqlim şəraiti, zəngin yem ehtiyatları bazası, mövcud təsərrüfatçılıq ənənələri arıçılığın inkişafı üçün geniş imkanlar yaratmışdır. Naxçıvan şəhərində “Arıçılıq məhsulları və bal” festivalının keçirilməsi, “2017-2022-ci illərdə Naxçıvan Muxtar Respublikasında arıçılığın inkişafı üzrə Dövlət Proqramı”nın qəbul olunması muxtar respublikada bu sahənin inkişafını və imkanlarını daha da artıracaqdır.

Bütövlükdə kənd təsərrüfatının inkişafı üzrə göstəricilər artmış, 429 milyon 448 min manatlıq məhsul istehsal olunmuşdur ki, bu da 2015-ci illə müqayisədə 6 faiz çoxdur.

Ötən il ekoloji vəziyyətin qorunması, ətraf mühitin mühafizəsi və təbii resurslardan səmərəli istifadə olunması istiqamətində fəaliyyət də uğurla davam etdirilib. Meşə fondunun bərpası, yeni yaşıllıq zolaqlarının salınması tədbirləri çərçivəsində 546 hektar sahədə meşəsalma və meşəbərpa tədbirləri aparılmış, 452 minə yaxın ağac və bəzək kolları əkilmişdir.

Dinamik inkişafın təmin olunmasında investisiya qoyuluşlarından səmərəli istifadə mühüm əhəmiyyət daşıyır. 2016-cı ildə muxtar respublika üzrə bütün maliyyə mənbələri hesabına əsas kapitala investisiya qoyuluşlarının həcmi 2015-ci ilə nisbətən 5 faiz artaraq 997 milyon manatdan çox olmuşdur. İnvestisiya qoyuluşlarının 921 milyon manatından və ya 92 faizindən bilavasitə tikinti-quraşdırma işlərində istifadə olunması əhalinin mənzil şəraitinin yaxşılaşmasına, abadlaşdırma-bərpa işlərinin genişləndirilməsinə, kənd yerlərində infrastrukturun yenilənməsinə şərait yaratmış, 13 kənd və 14 xidmət mərkəzi tikilərək və ya yenidən qurularaq istifadəyə verilmişdir.

Əhalinin mənzil şəraitinin yaxşılaşdırılması tədbirləri davamlı xarakter almış, 2 ictimai yaşayış binası tikilərək istifadəyə verilmiş, 9 yaşayış binasında yenidənqurma və əsaslı təmir işləri aparılmışdır. Gənc ailələrin mənzillə təmin olunmasına kömək məqsədilə “Naxçıvan İpoteka Fondu” Açıq Səhmdar Cəmiyyəti yaradılmış və fondun xətti ilə 951 min manat həcmində kreditlərin verilməsi təmin olunmuşdur.

Əhalinin içməli su təminatının yaxşılaşdırılması ilə bağlı tədbirlər davam etdirilmiş, Naxçıvan şəhərinin Tumbul, Bulqan, Qaraçuq və Qaraxanbəyli kəndlərində içməli su və kanalizasiya şəbəkəsi, Culfa rayonunun Gülüstan kəndində içməli su sistemi istifadəyə verilmişdir. Bundan başqa, Şahbuz və Culfa şəhərlərində, onlara bitişik ətraf kəndlərdə içməli su və kanalizasiya şəbəkəsinin tikintisi başa çatdırılıb.

Artan tələbata uyğun olaraq müasir yol-nəqliyyat sisteminin qurulması, nəqliyyat sektorundan səmərəli istifadə tədbirləri davam etdirilmişdir. 2016-cı ildə muxtar respublika üzrə 62 kilometrlik yeni asfalt yollar salınmış, 5 körpü tikilərək və ya yenidən qurularaq istifadəyə verilmişdir. Azərbaycan Respublikası Prezidentinin 2016-cı il 20 may tarixli Sərəncamına əsasən Babək rayonunun 7 yaşayış məntəqəsini birləşdirən Şəkərabad-Babək qəsəbə-Nehrəm-Arazkənd dairəvi avtomobil yolunun yenidən qurulmasının ikinci mərhələsi başa çatdırılmışdır. Əhaliyə göstərilən nəqliyyat xidmətlərinin səviyyəsini yaxşılaşdırmaq məqsədilə Naxçıvan şəhərində avtomobil və ehtiyat hissələrinin satış mərkəzi və yeraltı qaraj tikilmişdir. Hava nəqliyyatında infrastrukturun yenilənməsi, xidmətin səviyyəsinin yüksəldilməsi tədbirləri çərçivəsində Naxçıvan Beynəlxalq Hava Limanının daha bir terminalı istifadəyə verilmişdir. Yenidənqurma tədbirlərindən sonra hava limanının illik sərnişin və yükdaşıma dövriyyəsi xeyli artmış, aerovağzal binasından istifadə imkanları saatda 600 sərnişinə çatdırılmışdır.

Muxtar respublikada informasiya və rabitə sahəsində yeni texnologiyaların tətbiqi göstərilən xidmətlərin əhatə dairəsini genişləndirmişdir. 2016-cı ildə Naxçıvanda dördüncü nəsil mobil rabitə şəbəkəsinin istifadəyə verilməsi əhalinin elektron xidmətlərə çıxışını, sürətli internetdən istifadə imkanlarını yaxşılaşdırmış, vaxt itkisinin və əlavə xərclərin qarşısını almışdır. Bundan başqa Vətəndaşların Müraciətləri üzrə Elektron Qeydiyyat və İdarələrarası Elektron Sənəd Dövriyyəsi sistemləri istifadəyə verilmişdir.

Enerji təhlükəsizliyinin təmin olunması bu gün müasir dünyanın ən aktual məsələlərindəndir. Blokada şəraitində yaşayan muxtar respublikada son illər istifadəyə verilən yeni elektrik stansiyaları nəinki daxili tələbatı ödəyib, hətta elektrik enerjisinin ixracı üçün də geniş imkanlar yaradıb. Bununla bərabər, alternativ və bərpaolunan enerji mənbələrindən istifadəyə də diqqət artırılıb. İstismara verilən Günəş Elektrik Stansiyasının gücünün artırılması ilə bağlı tədbirlər davam etdirilir.

Son illər muxtar respublika iqtisadiyyatının çoxşaxəli inkişafı yerli istehsal məhsullarının xarici bazarlara çıxış imkanlarını xeyli yaxşılaşdırmış, xarici ticarət əməliyyatlarının həcmi əhəmiyyətli dərəcədə artmışdır. 2016-cı ildə xarici ticarət dövriyyəsinin həcmi 457 milyon 421 min ABŞ dolları təşkil etmişdir. Ticarət əməliyyatlarının 92 faizi ixracın, 8 faizi idxalın payına düşmüşdür. 2015-ci illə müqayisədə ixracın həcmi artmış, idxalın həcmi isə 61 faizədək azalmışdır. Bu isə yerli istehsalın inkişafının, daxili bazarın xarici məhsullardan asılılığının azalması deməkdir.

Müasir iqtisadi şəraitdə elektron ödəniş sistemi maliyyə sabitliyinin və ümumi iqtisadi inkişafın təmin edilməsində mühüm əhəmiyyətə malikdir. Bu baxımdan 2016-cı il martın 2-də təsdiq olunmuş “2016-2020-ci illərdə Naxçıvan Muxtar Respublikasında elektron ödəniş xidmətlərinin və nağdsız hesablaşmaların genişləndirilməsi üzrə Proqram”da nəzərdə tutulan tədbirlərin icrası maliyyə vəsaitləri dövriyyəsinin sürətlənməsinə, nağd ödənişlərin azalmasına yeni imkanlar açıb. Nağdsız ödənişlərin əhatə dairəsinin genişləndirilməsi dövriyyədəki nağd pul kütləsinin həcminin azalmasına səbəb olmuş, məxaricdə emissiyanın xüsusi çəkisi 41 faizdən 36 faizə enmişdir.

İqtisadi inkişafla yanaşı sosial inkişaf da diqqət mərkəzində saxlanıb. Bu gün muxtar respublikada təhsilin səviyyəsinin yüksəldilməsi istiqamətində kompleks tədbirlər həyata keçirilir. Hər bir kənddə, yaşayış məntəqəsində yeni məktəb binaları tikilir, şagirdlərin müasir dövrün tələbləri səviyyəsində təhsil almaları üçün hərtərəfli şərait yaradılır. Yeniyetmə və gənclərin təhsili üçün yaradılan imkanlar mühüm strateji məqsədə xidmət edir. Belə ki, təhsil olmadan savadlı, hərtərəfli inkişaf etmiş gənc nəsil yetişdirmək mümkün deyil. Məhz bu səbəbdən bu gün nəinki Naxçıvan şəhərində, hətta ən ucqar dağ və sərhəd kəndlərində də müasir tədris avadanlıqları, sürətli internetə çıxışı olan kompüterlər, elektron lövhələr, zəngin fonda malik kitabxanalar və idman zalları ilə təmin olunmuş məktəb binaları tikilib istifadəyə verilir. Bu tədbirlərin davamı olaraq 2016-cı ildə Şərur rayonunun Oğlanqala kəndində 576, Arbatan kəndində 234, Babək rayonunun Yarımca kəndində 342, Məzrə kəndində 270, Xəlilli kəndində 144, Ordubad rayonunun Baş Dizə kəndində 156, Culfa rayonunun Saltaq kəndində 306, Xanəgah kəndində 198, Gülüstan kəndində 156, Kəngərli rayonunun Şahtaxtı kəndində 594, Yurdçu kəndində 270, Şahbuz rayonunun Daylaqlı kəndində 168 şagird yerlik olmaqla, ümumilikdə, 3414 şagird yerlik 12 məktəb binası istifadəyə verilmişdir. Bundan başqa, 380 şagird yerlik Şərur Şəhər Fizika-Riyaziyyat Təmayüllü Liseyin, Naxçıvan Dövlət Texniki Kollecinin və Ordubad Texniki Peşə və Sürücülük Məktəbinin binaları da yenidən qurularaq gənc nəslin istifadəsinə verilmişdir. Naxçıvan şəhərində 640 şagird yerlik 3 nömrəli tam orta məktəbdə yenidənqurma işləri başa çatdırılmışdır.

Muxtar respublikada sağlamlıq imkanları məhdud uşaqların təhsilinin təmin edilməsi sahəsində də müvafiq tədbirlər görülür. 2016-cı il yanvarın 11-də təsdiq olunmuş “2016-2020-ci illərdə Naxçıvan Muxtar Respublikasında sağlamlıq imkanları məhdud uşaqların təhsili və reabilitasiyası üzrə Dövlət Proqramı” onların cəmiyyətə inteqrasiyasında böyük əhəmiyyətə malikdir.

Təhsilə göstərilən qayğı, yaradılan şərait bəhrəsiz qalmır. Hər il ali məktəblərə sənəd verən abituriyentlərin yüksək nəticə göstərmələri qeyd olunanların əyani sübutudur. Belə ki, 2016-cı ildə qəbul imtahanlarında iştirak edən məzunlardan 1737-si ali məktəblərin, 567-si isə orta ixtisas məktəblərinin tələbəsi adını qazanmışdır. Ali məktəblərə qəbul olunan məzunlardan 338-i imtahanlarda 500-dən çox bal toplamışdır. Yüksək nəticə əldə edərək tələbə adını qazananlardan 4-ü ölkə başçısının sərəncamı ilə Prezident təqaüdünə layiq görülmüşdür.

Zəruri elmi infrastrukturun formalaşdırılması, elmi kadrların hazırlanması tədbirləri də diqqətdən kənarda qalmamışdır. Azərbaycan Milli Elmlər Akademiyası Naxçıvan Bölməsinin maddi-texniki bazasının gücləndirilməsi tədbirlərinin davamı olaraq Seysmoloji Xidmət Mərkəzində ən müasir proqram təminatlı seysmoloji avadanlıqların quraşdırılması seysmoloji aktivliyə tam nəzarət imkanı yaratmışdır.

2016-cı il Naxçıvan tarixinin öyrənilməsi, tədqiqi və təbliği ilə bağlı tədbirlərlə əhəmiyyətli olub. İlin əvvəlində üç cildlik “Naxçıvan tarixi” kitabının təqdimatı keçirilmişdir. Bundan başqa muxtar respublikanın tarixi ilə bağlı ölkə arxivlərindən yeni sənədlər gətirilərək Naxçıvan Muxtar Respublikasının Dövlət Arxiv İdarəsinə təhvil verilmişdir.

Qədim tariximizi özündə yaşadan abidələrin bərpası da mühüm əhəmiyyət daşıyır. 2016-cı ildə xalqımızın mübarizlik və vətənpərvərlik əzminin simvoluna çevrilən Əlincəqalada bərpa işləri başa çatdırılmış, “Əlincəqala” Tarix-Mədəniyyət Muzeyi yaradılmışdır. Memarlığın nadir incilərindən sayılan Gülüstan türbəsinin bərpası başa çatdırılmış, Şərur rayonunun Xanlıqlar kəndindəki “İmamzadə” dini-tarixi abidəsində yenidənqurma işləri aparılmış, Qarabağlar Türbə Kompleksində bərpa işləri davam etdirilmişdir. “Naxçıvan qalaları: tarixdə və günümüzdə” mövzusunda beynəlxalq konfransın keçirilməsi isə tariximizin öyrənilməsi və təbliği işinə çox mühüm töhfə olmuşdur.

Eyni zamanda böyük ziyalı, yazıçı-publisist və pedaqoq Eynəli bəy Sultanovun 150 illik yubileyi təntənəli şəkildə qeyd olunmuş, görkəmli rəssam Bəhruz Kəngərlinin adını daşıyan Rəssamlar Parkı istifadəyə verilmiş, parkda böyük sənətkarın abidəsi ucaldılmışdır.

Cəmiyyətin iqtisadi və mədəni tərəqqisinin, xalqlar arasında humanitar əlaqələrin və tolerantlığın göstəricisi kimi turizmin inkişafı diqqət mərkəzində saxlanılır. Naxçıvanın qədim tarixi və müasir inkişafı, zəngin təbii ehtiyatları, unikal müalicə məkanları, mövcud turizm infrastrukturu turistlərin sayının ildən-ilə artmasına səbəb olub. Əvvəlki illə müqayisədə 2016-cı ildə muxtar respublikaya gələn turistlərin sayı artaraq 403 mini keçmişdir.

Əhali sağlamlığının qorunması, tibbi xidmətin keyfiyyətinin daha da yaxşılaşdırılması həyata keçirilən sosial siyasətin başlıca istiqamətlərindən biridir. Son illər səhiyyə sahəsində aparılan islahatlar nəticəsində tibb müəssisələrinin maddi-texniki bazası xeyli yaxşılaşdırılıb, yeni səhiyyə ocaqları tikilərək istifadəyə verilib. 2016-cı il də bu baxımdan istisna təşkil etməmiş, Şərur rayonunun Oğlanqala, Babək rayonunun Yarımca, Culfa rayonunun Saltaq və Xanəgah kəndlərində həkim ambulatoriyaları, Naxçıvan şəhərinin Bulqan, Şərur rayonunun Arbatan, Babək rayonunun Xəlilli, Məzrə və Hacıvar, Culfa rayonunun Gülüstan, Şahbuz rayonunun Daylaqlı və Kiçikoba, Kəngərli rayonunun Yurdçu kəndlərində feldşer-mama məntəqələri əhalinin istifadəsinə verilmişdir.

Gənc nəslin fiziki inkişafında və sağlam böyüməsində, asudə vaxtının səmərəli təşkilində bədən tərbiyəsi və idman mühüm rol oynayır. Muxtar respublikada idman infrastrukturunun yenilənməsi tədbirləri çərçivəsində 2016-cı ildə Şərur rayonunun Mahmudkənd, Aşağı Yaycı və Arbatan, Culfa rayonunun Bənəniyar kəndlərində stadionlar yenidən qurularaq gənclərin istifadəsinə verilmişdir. Yaradılmış şərait nəticəsində muxtar respublikamızda müxtəlif beynəlxalq və ölkə səviyyəli idman yarışları keçirilmiş, idmançılarımız nüfuzlu yarışların mükafatçıları sırasına düşmüşdür.

Kütləvi informasiya vasitələrinin maddi-texniki bazasının möhkəmləndirilməsi və onların fəaliyyətinin səmərəli təşkili istiqamətində də tədbirlər görülüb. Belə ki, Naxçıvan televiziyası internet üzərindən canlı yayıma başlamış, yeni çap avadanlıqları alınaraq “Əcəmi” Nəşriyyat Poliqrafiya Birliyində quraşdırılmışdır.

Muxtar respublikada ərzaq, enerji və informasiya təhlükəsizliyi ilə yanaşı, müdafiə sahəsində təhlükəsizlik məsələləri də diqqətdə olmuşdur. Silahlı qüvvələrimizin muxtar respublikada yerləşən ordu, birləşmə və hissələrinin maddi-texniki bazasının gücləndirilməsi, hərbi qulluqçuların mənzil şəraitinin yaxşılaşdırılması tədbirləri 2016-cı ildə də davam etdirilmişdir.

Göstərilən qayğı təkcə ordu quruculuğu ilə məhdudlaşmamış, ölkəmizin ərazi bütövlüyü uğrunda döyüşlərdə iştirak edərək şəhidlik zirvəsinə ucalmış vətən oğullarının ailə üzvlərinin və öz sağlamlıqlarını itirmiş şəxslərin sosial müdafiəsi üçün də müəyyən tədbirlər görülmüş, 4 şəhid ailəsinə və sağlamlıq imkanı məhdud 7 Azərbaycan Vətən Müharibəsi iştirakçısına yeni mənzil, 2 nəfərə isə minik avtomobili verilmişdir. 

Bu gün qeyd etmək xoşdur ki, gənc nəslin hərb sənətinə marağı getdikcə artır. 2016-cı ildə Heydər Əliyev adına Hərbi Liseyə 191 şagird qəbul olunmuş, liseyin məzunlarından 199-u müxtəlif ali hərbi məktəblərin, ümumtəhsil məktəblərinin məzunlarından isə 63-ü xüsusi təyinatlı ali təhsil müəssisələrinin tələbəsi adını qazanmışdır.

Hüquq-mühafizə orqanlarının iş şəraitinin yaxşılaşdırılması məqsədilə Dövlət Təhlükəsizliyi Xidmətinin Culfa Rayon İdarəsinin inzibati binası yenidən qurulmuş, Dövlət Miqrasiya Xidmətinin Miqrantların Müvəqqəti Saxlanma Mərkəzi fəaliyyətə başlamışdır.

İqtisadi sahədə əldə olunan nailiyyətlərin, əhali arasında hüquq maarifinin, profilaktik tədbirlərin gücləndirilməsinin nəticəsidir ki, muxtar respublikada cinayətkarlıq üzrə göstəricilər aşağı səviyyədədir.

Yeni iş yerlərinin yaradılması, əhali gəlirlərinin həcminin artması məskunlaşmaya və demoqrafik vəziyyətə də müsbət təsir göstərmiş, əhalinin sayı 2015-ci illə müqayisədə artaraq 448 min nəfərdən çox olmuşdur.

Sosial-iqtisadi inkişafa töhfəsini verənlərin əməyi həmişə olduğu kimi, 2016-cı ildə də yüksək qiymətləndirilmiş, Azərbaycan Respublikası Prezidentinin sərəncamları ilə 63 nəfər Azərbaycan Respublikasının müxtəlif orden, medal və fəxri adları ilə təltif edilmiş, 2 nəfərə ali hərbi rütbə verilmiş, 1 nəfər Azərbaycan Respublikası Prezidentinin fəxri diplomuna, 1 nəfər Prezident təqaüdünə, 9 nəfər Prezident mükafatına layiq görülmüşdür. Həmçinin 12 nəfərə Naxçıvan Muxtar Respublikasının fəxri adları verilmiş, 1 nəfər “Naxçıvan Muxtar Respublikasına xidmətlərə görə”, 15 nəfər “Rəşadətli əməyə görə” nişanları ilə təltif olunmuşdur.

Bütün bu işlərin həyata keçirilməsində, muxtar respublikamızın inkişafında əməyi olanlara, sabitliyin, əmin-amanlığın və sərhədlərin qorunmasını təmin edənlərə təşəkkür edirəm!

Hörmətli deputatlar və sessiya iştirakçıları!

Muxtar respublikada 2016-cı il müsbət nəticələrlə yekunlaşır. Biz bu nəticələri daha da artırmalı, ümummilli Liderimizin yolu ilə gedərək muxtar respublikamızın, doğma Azərbaycanımızın inkişafına öz töhfəmizi verməliyik.

Sağ olun!

***

Məruzədən sonra Naxçıvan Muxtar Respublikasının iqtisadiyyat naziri Famil Seyidov və Naxçıvan Muxtar Respublikası Dövlət Statistika Komitəsinin sədri Kamal Cəfərov çıxış ediblər.

“Naxçıvan Muxtar Respublikasının 2017-ci il dövlət büdcəsinin təsdiq edilməsi” və “Naxçıvan Muxtar Respublikası Dövlət Sosial Müdafiə Fondunun 2017-ci il büdcəsinin təsdiq edilməsi” barədə məsələlərin müzakirəsi ilə əlaqədar Naxçıvan Muxtar Respublikasının maliyyə naziri Xalid İsgəndərov və Naxçıvan Muxtar Respublikası Dövlət Sosial Müdafiə Fondunun sədri Əli Quliyev çıxış ediblər.

Sessiyada “Naxçıvan Muxtar Respublikasının 2017-ci il dövlət büdcəsi” və “Naxçıvan Muxtar Respublikası Dövlət Sosial Müdafiə Fondunun 2017-ci il büdcəsi” təsdiq olunub.

Sonra “İnsan orqan və ya toxumalarının transplantasiyası haqqında” Naxçıvan Muxtar Respublikasının Qanunu oxunub və səsə qoyularaq qəbul edilib.

Sessiyanın gündəliyində duran beşinci məsələ ilə bağlı Naxçıvan Muxtar Respublikasının İnsan Hüquqları üzrə Müvəkkili (Ombudsman) ülkər Bayramovanın hesabatı dinlənilib və bununla əlaqədar qərar layihəsi qəbul edilib.

Ali Məclisin Sədri sessiyaya yekun vuraraq 2016-cı ildə muxtar respublikanın inkişafında, sabitliyin və sərhədlərin qorunmasında əməyi olanların hamısına təşəkkürünü bildirib, Ali Məclisin deputatlarını, Azərbaycan Respublikası Silahlı Qüvvələrinin Naxçıvan Muxtar Respublikası ərazisindəki ordu, birləşmə və hissələrinin şəxsi heyətlərini və onların ailələrini, şəhid ailələrini və müharibə veteranlarını, sessiya iştirakçılarını, muxtar respublika əhalisini yeni ilin başlanması münasibəti ilə təbrik edib və 2017-ci ildə uğurlar arzulayıb.

Bununla da beşinci çağırış Naxçıvan Muxtar Respublikası Ali Məclisinin dördüncü sessiyası öz işini başa çatdırıb.

AZƏRTAC

Published in Digər xəbərlər
Bazar, 08 Yanvar 2017 08:18

Bölgə xəbərləri

Tərtər

Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin göstərişinə və müdafiə naziri general-polkovnik Zakir Həsənovun təsdiq etdiyi tədbirlər planına uyğun olaraq Tərtər rayonu ərazisində yerləşən hərbi hissələrdə Dünya Azərbaycanlılarının Həmrəyliyi Günü və Yeni il bayramı münasibətilə “Açıq qapı” günü keçirilib.

Bayram tədbirlərində rayon icra hakimiyyətinin nümayəndələri, əsgər valideynləri və doğmaları, müharibə veteranları, şəhid ailələri, təhsil, səhiyyə, mədəniyyət işçiləri, məktəblilər və rayon ictimaiyyətinin təmsilçiləri iştirak ediblər.

Nümayəndələr əvvəlcə hərbi hissələrdə əsgərlərin yaşayışı, məişət şəraiti ilə tanış olublar, xidməti və inzibati binalara, əsgər yataqxanalarına, yeməkxanalara baş çəkiblər.

“Açıq qapı” günündə iştirak edən Tərtər Rayon İcra Hakimiyyətinin başçısı Müstəqim Məmmədov hərbi hissələrin şəxsi heyətini və əsgər valideynlərini 31 Dekabr – Dünya Azərbaycanlılarının Həmrəyliyi Günü və Yeni il bayramı münasibətilə təbrik edib. Bildirib ki, Azərbaycanda ordu quruculuğu işi 1993-cü ildə ulu öndər Heydər Əliyevin xalqın təkidli tələbi ilə yenidən siyasi hakimiyyətə qayıdışından sonra başlayıb. Azərbaycan Ordusu ümummilli lider Heydər Əliyevin sərkərdəlik bacarığı sayəsində formalaşıb, döyüşkən bir orduya çevrilib. Hazırda Azərbaycan Ordusu regionun ən güclü, nizam-intizamlı və müasir silahlarla təchiz olunmuş, hərbi-texniki strukturlara, bacarıqlı hərbçi kadr potensialına malik ordusudur.

Hərbi hissə ilə tanışlıq zamanı valideynlər güclü ordusu olan Azərbaycanla fəxr etdiklərini söyləyib, Ali Baş Komandan cənab İlham Əliyevə minnətdarlıqlarını bildiriblər.

Hərbi hissələrdə rayonun musiqi kollektivləri maraqlı konsert proqramları ilə çıxış ediblər.

Maarif RZAYEV,

“Respublika”.

 

Lənkəran

Lənkəran Dövlət Universitetinin 1 saylı tədris korpusunda yeni il ərəfəsində 100 yerlik tələbə yeməkxanası istifadəyə verilmişdir. Yeni ilin atributları ilə bəzədilmiş yeməkxanada Dünya Azərbaycanlılarının Həmrəyliyi Günü və Yeni il münasibətilə bayram tədbiri keçirilmidir.

Universitetin rektoru vəzifəsini icra edən, riyaziyyat elmləri doktoru, professor Natiq İbrahimov şənlik iştirakçılarını salamlamış, onlara bayram arzularını söyləmişdir.

Tədrisdə və universitetin ictimai həyatında fərqlənən müəllim və tələbələrin bir qrupuna fəxri fərmanlar təqdim olunmuşdur. Fakültələr arasında keçirilmiş idman yarışlarının qalibləri mükafatlandırılmışlar.

Sonra yüksək təhsil göstəriciləri qazanmış tələbə və magistrlərə universitet təqaüdünün verilməsi barədə rektorluğun əmri oxunmuşdur.

Tədbirdə universitetin bədii yaradıcılıq qruplarının çıxışları alqışlarla qarşılanmışdır. Tələbələrin ifasında Vətən, müstəqillik, Yeni il haqqında mahnılar səslənmiş, rəqslər ifa edilmişdir. Şaxta baba və Qar qız viktorina qaliblərinə hədiyyələr vermişdir.

Əlisəfa HƏSƏNOV,

“Respublika”.

 

 

 

Published in Region

... Səhər tezdən olsa da, paytaxtın dənizkənarı parkında, mavi Xəzərin nəğməli sahillərində coşqunluq, bayram təntənəsi duyulur, hiss olunurdu ki, Səbail rayonundan hərbi xidmətə yola salınacaq gənclər həyatlarının ən gözəl anlarını yaşayır, qüdrətli Azərbaycan ordusunda xidmət edəcəklərindən qürur duyurlar.

Dövlət Bayrağı Meydanını əmək və müharibə veteranları, valideynlər, gənclər üzük qaşı kimi dövrəyə almışdılar. Buradakı növ-növ gül-çiçək kolları, dünyanın müxtəlif ölkələrindən gətirilən ağaclar hamıda xoş ovqat yaradırdı. Əsgəri xidmətə yola düşən gənclərlə xatirə şəkilləri çəkdirənlərin ardı-arası kəsilmirdi.

Çox keçmir ki, milli musiqimizin sədaları altında tədbirə qatılan çoxsaylı insanlar Qurban Abbasov küçəsində yerləşən Səfərbərlik və Hərbi Xidmətə Çağırış üzrə Dövlət Xidmətinin Səbail rayon idarəsinə üz tuturlar.

İdarənin həyətində gəncləri hərbi vətənpərvərlik tərbiyəsinə səsləyən müxtəlif plakat və şüarlar diqqəti cəlb edir, sabahın əsgərlərinə tövsiyə olunurdu ki, onlar xidmət dövründə Vətənin ərazi bütövlüyünü şərəflə qorumalı, ataların şanlı döyüş ənənələrinə sadiqlik nümayiş etdirilməlidir.

Gənclərin hərbi xidmətə yolasalınma mərasimində çıxış edən Səfərbərlik və Hərbi Xidmətə Çağırış üzrə Dövlət Xidmətinin Səbail rayon İdarəsinin rəisi, polkovnik Polad İbrahimov ilk öncə tədbirə qatılan insanları salamladı və ürək sözlərini onlarla bölüşərək dedi:

- Azərbaycan xalqı öz ordusunu sevir, ona arxalanır, ona güvənir, onun gücünə inanır. Fəxr edirik ki, bu gün bizim güclü dövlətimiz, güclü ordumuz vardır. Bu ordunun gücü isə mənsub olduğu güclü texnikaların: təyyarələrin, gəmilərin, tankların, artilleriya qurğularının, hava hücumundan müdafiə komplekslərinin çoxluğu, müasirliyi, effektivliyi ilə yanaşı, həm də şəxsi heyətin peşəkarlığında, vətənpərvərliyində, mənəvi-psixoloji, siyasi, fiziki hazırlığının yüksəkliyindədir.

Ordumuzun gücü həm də xalq ilə onun monolit birliyində, hər bir döyüşçünün ruh yüksəkliyindədir. Bu gün xalqımızın və dövlətimizin yalnız bir şüarı vardır: “Hər şey ordu üçün, hər şey qələbə üçün!”

Vaxtilə ulu öndərimiz, dahi şəxsiyyət Heydər Əliyev demişdir: “Hər bir gənc, hər bir ata-ana, hər bir valideyn öz oğlunu böyüdərkən ona ən əvvəl nəsihət verməlidir ki, sənin birinci borcun orduda xidmət etməkdir. Vətəni müdafiə etməyə hazır olmaqdır, döyüş qabiliyyəti əldə etməkdir”.

Son illərdə ordu quruculuğu ilə bağlı strateji xətt Azərbaycanda prioritet istiqamətlərdən biri olaraq qalır. Orduda islahatların aparılması və hərbi hissələrin maddi-texniki bazasının möhkəmləndirilməsi Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin daim diqqət mərkəzindədir. Güclü iqtisadi potensial və güclü ordu Azərbaycanın bölgədə lider ölkə olmasını şərtləndirən əsas amillərdəndir.

Biz hərbi gücümüzü artırmalıyıq və artırırıq. Bu gün Azərbaycan Ordusu qarşıda duran bütün vəzifələri yerinə yetirməyə hazırdır. Biz bunu 2016-cı ilin aprel döyüşlərində bir daha şahidi olduq. Erməni işğalçıları qüdrətli, peşəkar Azərbaycan ordusunun gücü qarşısında aciz qaldı. “Lələtəpə” yüksəkliyi və digər ərazilərimiz çox qısa zamanda daşnak quldurlarından azad olundu.

Polad İbrahimov son olaraq vurğuladı ki, ordunun qüdrətini, onun döyüş qabiliyyətini, qələbə iradəsini təşkil edən döyüşçülərin vətənpərvərlik hissidir. Hər bir əsgər, zabit, döyüşçü vətənpərvərlik hissini, Vətənə, torpağa, müstəqil dövlətimizə, xalqımıza sədaqət hissini hər şeydən üstün tutmalıdır. Məhz bu keyfiyyətləri özündə cəmləşdirən Azərbaycan ordusu hər an işğal altında olan torpaqlarımızı azad etməyə hazırdır!

Gənclərin həqiqi hərbi xidmətə yolasalınma mərasimində Taleh Əşrəfov valideynlər adından çıxış edərək qürurla bildirdi ki, Azərbaycanda ordu quruculuğu prosesi sürətlə və çox uğurla gedir. Azərbaycanda nizami ordunun yaradılması prosesi ölkəmizə böyük faydalar gətirir. Ölkəmiz hərbi potensialını gücləndirir, inanırıq ki, bu proses gələcəkdə daha da sürətlə gedəcəkdir. Son illlər ərzində orduda maddi-texniki bazanın möhkəmləndirilməsində böyük işlər görülmüşdür.

Mərasimdə çıxış edən Rüfət İsmayılov əminliklə bildirdi ki, xidmət dövründə onlar Vətənin ərazi bütövlüyünü şərəflə qoruyub saxlayacaq, hərbi texnikanın sirlərini mükəmməl öyrənəcək, yeri düşərsə düşmənə sarsıdıcı zərbə endirəcəklər.

Vaxt gəlib çatır. Meydan yenidən musiqiyə verilir. Gənclərdən Beyrək Məmmədov, Seymur Muradzadə, Cavid Əşrəfli və başqaları mərasim iştirakçılarının xeyir-duası ilə ordu sıralarına yola düşürlər...

Qədir ASLAN,

“Respublika”.

 

 

 

Published in Digər xəbərlər

Azərbaycan Dillər Universitetinin(ADU) Elmi Şurasının 28 dekabr 2016-cı il tarixli qərarına əsasən universitetdə 13 nəfərdən ibarət İctimai Nəzarət Şurası yaradılıb. Qeyd edək ki, ali təhsil müəssisəsində ictimai iştirakçılığın daha da gücləndirilməsi, şəffaflığın artırılması, universitetlə ictimaiyyət arasında qarşılıqlı əlaqələrin səmərəli təşkili məqsədilə yaradılan Şurada qeyri-hökumət təşkilatları və media nümayəndələri, eləcə də təhsil sahəsi üzrə ekspertlər təmsil olunur.

Bu günlərdə ADU-nun rektoru vəzifəsini icra edən professor Əfqan Abdullayev Şura üzvləri ilə görüş keçirib. Görüş zamanı təşkilati məsələlərə baxılıb.

Universitetdə aparılan islahatlar və tədris prosesinin keyfiyyətinin yaxşılaşdırılması istiqamətində görülən işlərdən danışan Ə.Abdullayev bu istiqamətdə bir sıra vacib qərarların qəbul olunduğunu, mühüm yeniliklərin tətbiq edildiyini diqqətə çatdırıb. ADU-nun bütün kurslarında təhsil alan tələbələrlə, həmçinin professor-müəllim heyəti ilə çoxsaylı görüşlər keçirdiyini deyən Ə.Abdullayev bu görüşlərin qarşılıqlı müzakirə şəraitində keçdiyini, bir sıra maraqlı təkliflərin irəli sürüldüyünü diqqətə çatdırıb.

Ə.Abdullayev bildirib ki, İctimai Nəzarət Şurasının öz işini səmərəli təşkil etməsi üçün universitetin əsas binasında xüsusi otaq ayrılıb. O, Şura üzvlərinin imtahan sessiyasının gedişini izləməsi üçün hər cür şərait yaradılacağını vurğulayıb.

İctimai Nəzarət Şurasının yaradılmasını yüksək qiymətləndirən Ə.Abdullayev universitetdə ədalətlilik prinsipinin qorunacağını vurğulayıb və bu istiqamətdə birgə əməkdaşlıqdan səmərəli nəticələr əldə olunacağına əminliyini bildirib.

Görüş zamanı tələbələr arasında sorğular keçirilməsi, imtahan sessiyasının gedişində “qaynar xətt”in fəaliyyəti və digər məsələlər ətrafında da fikir mübadiləsi aparılıb.

Müzakirələrin sonunda İctimai Nəzarət Şurasının fəaliyyət planının hazırlanması ilə bağlı İşçi qrupunun yaradılması barədə qərar qəbul edilib.

ADU-nun İnformasiya

Departamenti

 

 

 

Published in Digər xəbərlər
Bazar, 08 Yanvar 2017 08:16

Ürək doğma Vətənlə döyünəndə

O, İngiltərənin hüquq sistemində vəkillik pilləsinə yüksələn ilk azərbaycanlıdır

Published in Digər xəbərlər
Bazar, 08 Yanvar 2017 08:16

Rənglər aləmində əbədi imza

Xalq rəssamı Nadir Axundov 1925-ci ildə ecazkar təbiəti, yamyaşıl zəmiləri, laləli çölləri, bağçalı-bağlı həyətləri, bumbuz çeşmələri olan qədim Naxçıvan şəhərində dünyaya gəlib. Hələ uşaq yaşlarından doğulduğu torpağın ecazkarlığı, gözəlliyi ona yaşayıb-yaratmaq həvəsi vermişdir. Hər səhər əzəmətli Elanlı dağının başı üzərində nur saçan, axşamlar zirvəsi qarlı Ağrı dağının ətəyində qürub edən günəşi seyr etdikcə, qəlbində sönməz bir hiss oyanmışdı: Vətən, torpaq, təbiət və yurd sevgisi. Həmin hisslərlə balaca Nadir əlinə qələm alıb bu əsrarəngiz təbiəti, zəhmətsevər insanları ağ vərəqlər üzərinə köçürməyə başlayıb. Onun istedadı ailədə və məktəbdə hamının diqqətini çəkirdi.

Çox keçmir ki, Nadirə rəssamlıqla məşğul olmaq üçün lazımi ləvazimatlar alınır. 6 yaşlı balaca rəssam o gündən gördüklərini, xəyalında canlandırdıqlarını əbədiləşdirmək üçün fırçaya sarılır. O, məktəbdə yaxşı oxumağı ilə bərabər, insanlara qarşı münasibətində, xasiyyətində hamıdan fərqlənirdi. Bütün bu cəhətlərinə görə o, həmişə nümunəvi şagird kimi qiymətləndirilirdi. Rəssamlıq qabiliyyətinə yaxşı bələd olan müəllimləri divar qəzetləri üçün rəsmlərin hazırlanmasını məhz ona həvalə edirdilər. Bütün bu işlərin öhdəsindən ustalıqla gəlməyi bacaran Nadirin rəssamlığa olan marağı gündən-günə artırdı.

Getdikcə daha da dərinləşən rəssamlıq həvəsi onu Leninqrad Orta Rəssamlıq Məktəbinə gətirib çıxardı. O, burada dəzgah rəngkarlığı və qrafika sahəsində təhsil alır və sənətin sirlərinə yiyələnməyə başlayır. Yaradıcılıqla zəngin olan tələbəlik illəri bir-birini əvəz etdikcə, gənc rəssam sənətini püxtələşdirir, rənglər aləminə dalaraq onları duymağa və hiss etməyə can atırdı. Lakin Nadirin təhsil illəri cəmi üç il çəkdi. Hər şeyi alt-üst edən müharibə Nadiri məhz bu məqamda yaxaladı. O, kifayət qədər cilalanmış fırçasını silahla əvəz etməli oldu.

Müharibə qələbə ilə bitdi. Nadirin sinəsini orden və medallar bəzədi. Ömür yolu elə gətirdi ki, hələ uşaqlıqdan bəri arzuladığı rəssamlıq təhsilini davam etdirə bilmədi. O müstəqil olaraq öz üzərində işləməyə başladı. Tanınmış rəssamların sərgilərində olur, rəsm əsərlərini diqqətlə izləyir, onlardan məsləhətlər alırdı. Qarşısında isə bir məqsəd var idi : öz dəsti-xəttini tapmaq. Nəhayət, gərgin əmək öz bəhrəsini verdi. İlk dəfə 1958-ci ildə mənzərə janrında olan əsərləri respublika sərgisində nümayiş olunanda bir çox sənətşünasları, rəssamları, sənətsevərləri öz əl işləri ilə təəccübləndirməyi bacardı. Bu təəccübə səbəb hələ o qədər də tanınmayan Nadir Axundovun əsərlərinin mayasına hopmuş realizm və müasirlik idi.

Yaradıcılığının əsasını təşkil edən bu mənzərələrdə Azərbaycan təbiətinin zənginliyi, gözəlliyi aydın şəkildə görünür. Yaratdığı tablolarda təbiətin müxtəlif hadisələrini və rəngarəng gözəlliyini inandırıcı boyalarla vermişdir. O, təbiətin coşqun sevincini, güllü baharını və həzin xəzan güllərini dərin bir həssaslıqla əks etdirmişdir. Dərin məzmuna malik yaradıcılığı olan sənətkar öz mənzərələrində yalnız müəyyən bir əhval-ruhiyyəni verməklə kifayətlənmir, əsərləri ilə tamaşaçını düşünməyə sövq edir. Təbiətə sənət gözü ilə baxan Nadir Axundovun mənzərələrində böyük bir gözəllik, incə bir şeiriyyət var. Zaman keçdikcə müxtəlif mövzulu rəsm əsrləri Gəncədə, Bakıda və Naxçıvanda təşkil olunan sərgilərdə nümayiş olunur. “Kitab oxuyan qız”, “Qarpız yeyən oğlan”, “Görüş”, “Rəfiqələr”, “Çadralı qadınlar”, “Violençel çalan Rable Kazuls”, “Qoca bağban” kimi tablolar müəllifə daha çox uğur gətirir.

Rəssamın əsərləri nəinki ölkə daxilində, həmçinin xarici ölkələrdə maraqla izlənilirdi. 1960-cı illərin əvvələrindən etibarən Leninqrad, Daşkənd və Tbilisidə qrafik əsərlərindən ibarət sərgidə “Çay süfrəsi”, “Çoban qız”, “Kənd musiqiçiləri”, “Dəniz kənarında qala”, “Köhnə Bakı”, “Dənizdə neft buruqları”, “İçərişəhər”, “Dəniz kənarında” və başqa rəsmləri nümayiş olunur.

Rəssamın geniş diapazonlu yaradıcılığında məişət və portret janrı əsas yerləri tuturdu. “Qoca qadın”, “Kişi portreti”, “Rəssam Rasim Babayev”, “Fikrət Əmirov”, “Mərziyə Davudova”, “Tibb bacısı A. Qasımova”, “Tələbə qız”, “Mirzə Ələkbər Sabir”, “Cəfər Cabbarlı”, “Üzeyir Hacıbəyov” kimi əsərlərində nəinki insanın xarici görünüşünü, həmçinin daxili aləmini, fikir və hisslərini də təsvir etmişdi. Bir rəssam kimi Nadirin yaratdığı obrazlar sanki tamaşaçı ilə həmsöhbətə çevrilir. Onun dəsti-xəttinə xas olan cəhətlərdən biri insan obrazlarını təbiətlə bir vəhdətdə verməsi idi. Bu cəhətdən “Sahildə” əsəri xüsusilə fərqlənir. Tabloda təsvir edilmiş ata və oğul dənizlə təmasdadır. Rəsmdəki tutqunluq, dənizin kimsəsizliyi, səssizliyi ilə atanın üzündəki iztirab eynilik təşkil edir. Əsərdə personajların hərəsi öz dünyası ilə yaşasa da, rəssam onları bir-birindən təcrid edilmiş tərzdə çəkməmişdir. Ata və oğul arasında üzvi bağlılıq məhz uğurlu kompozisiyadan irəli gəlir. Rəssam hər gün təsadüf edilən bu sadə məişət səhnəsini çox orijinal şəkildə tamaşaçılara təqdim edə bilmişdir.

Nadir Axundov cəsarətli rəssam olmağı ilə fərqlənirdi. Çünki o, fırçasını bütün janrlarda sınamışdı. Məhz buna görə də, yaradıcılığında mövzu məhdudiyyəti yoxdur. Məişət, əmək motivləri, təbiət mənzərələri, portret janrı onun fırçasında fərqli ovqatlarla tərənnüm edilir. Bütün yaradıcılığı boyu axtarışda olan rəssamın əsərlərində düşünən və tamaşaçını da düşündürməyə vadar edən həyat motivlərinə rast gəlirik. Rəsmlərinin xarakterik cəhəti isə onların paklığı, saflığı, həyat dolu yaşamından ibarət olması idi. Dövrünün ruhunu, gözəllik idealını mənzərələr dünyasında əks etdirmiş böyük sənətkar, nəcib və sadə insan Nadir Axundovun yaradıcılığı gənc rəssamlar üçün olduqca ibrətamizdir.

Belə bir deyim var: “Rəssam öz əsərləri haqqında danışmamalı, əsərlər rəssam haqqında danışmalıdır”. Məhz Nadir Axundovun da əsərləri onun düşüncələri, ideyaları, dünyaya baxışı haqqında geniş məlumat verir.

 

Arzu MƏMMƏDNAĞIYEVA.

 

 

 

Published in Mədəniyyət
Bazar, 08 Yanvar 2017 08:15

DÜNYA BU GÜN

ABŞ KƏŞFIYYATI: PUTIN TRAMPA KÖMƏK ETMƏYƏ ÇALIŞIB

ABŞ kəşfiyyatının bugünlərdə dərc edilmiş hesabatına görə, Rusiya prezidenti Vladimir Putin Donald Trampın prezident seçkilərində qalib gəlməsi üçün “səy göstərməyə” çalışıb. Bu barədə “BBC” agentliyi məlumat yayıb.

Məxfiliyi açılmış hesabatda bildirilir ki, Rusiya lideri seçkilərə müdaxilə etmək məqsədilə aparılan kampaniyaya “göstəriş” verib.

Donald Tramp kəşfiyyatın hesabatı ilə tanış edildikdən sonra, Rusiyanı müdaxiləyə görə tənqid etməyib, lakin bildirib ki, müdaxilə seçkilərin nəticəsinə təsir göstərməyib.

Eyni zamanda, D.Tramp Demokratlar Partiyasının Milli Komitəsini haker müdaxiləsinə “imkan verdiyinə” görə səhlənkaralıqda günahlandırıb.

Bu hesabatın ardınca ABŞ-ın Daxili Təhlükəszilik Nazirliyi bidlirib ki, bundan sonra seçki mexanizmləri və başqa seçki məlumat bankları “mühüm infrastruktur” kimi təsnif ediləcək və bu avadanlıqlar kiberhücumlardan daha etibarlı qorunacaq.

Məlumata görə, 25 səhifəlik hesabatda bildirilir ki, Kreml “aşkar şəkildə” Donald Trampın qələbəsinə səy göstərib. “Bizim təhlilimizə görə, Rusiya prezidenti Vladimri Putin 2016-cı ildə ABŞ-da keçirilən prezident seçkilərinin nəticələrinə təsir göstərmək məqsədilə kampaniyanın aparılmasına göstəriş verib” - deyə hesabatda bildirilir.

Bununla yanaşı, xəbər verilir ki, sənədin məxfiliyi açılmış versiyasında Vladimir Putinin iddia edilən rolu barədə təfərrüatlı dəlillər yoxdur. Hesabatda qeyd olunduğuna əsasən Vladimir Putin Donald Trampı ona görə “dəstəkləyir” ki, o Rusiya lideri ilə əməkdaşlıq edəcəyini vəd edib.

Rəsmi Moskva ABŞ kəşfiyyatının son hesabatına hələlik reaksiya verməsə də,  əvvəllər bu iddiaları qəti şəkildə rədd edib.

 

SƏUDIYYƏ ƏRƏBISTANI VƏ BƏƏ NEFT SATIŞINI MƏHDUDLAŞDIRIR

OPEK üzvlərinin neft hasilatını azaltmağa dair razılaşmaya əməl etməsi dünya birjalarında neftin yüksək dəyər qazanmasını təmin edir. Həftənin son hərraclarında “Brent” markalı neftin bir barreli 56,83 dollardan satılıb, gün ərzində ən yüksək qiymət isə 57,44 dollar olub.

Xəbər verilir ki, Qərbi Texas nefti də dəyərini qorumaqda davam edib. Son seansda 53,71 dollardan təklif olunan “WTI” neftinin sutkalıq maksimum qiyməti 54,27 dollara qədər yüksəlib.

Həmçinin bildirilir ki, neftin həftə ərzində dəyərini qorumasının bir neçə səbəbi var. Səudiyyə Ərəbistanı artıq gündəlik hasilatı 486 min barrel azaldaraq 10,058 milyon barrelə salıb.

Bununla yanaşı, “Saudi Aramco” şirkəti müştərilərlə fevralda neft satışını 3-7 faiz azaltmağa dair danışıqlara başlayıb. Birləşmiş Ərəb Əmirliklərinin də bazara neft nəqlini azaltdığına dair xəbərlər var.

Eyni zamanda, bütün OPEK üzvlərinin razılaşmaya əməl edəcəyinə şübhələr hələ də qalmaqdadır. Xüsusilə İraqın razılaşmaya əməl edəcəyinə inam azdır.

Məlumata əsasən, həftə ərzində neftin bahalaşmasına təsir göstərən yeganə amil OPEK üzvlərinin hasilatı azaltması deyil. ABŞ dollarının altı əsas valyutaya nisbətən dəyər itirməsi, ABŞ-da Federal Ehtiyat Sisteminin uçot dərəcəsini artırmasının zəruriliyinə şübhələr yaranması da neftin yüksək qiymətini dəstəkləyir. Digər tərəfdən, ABŞ-ın xam neft ehtiyatlarının azalması da qiymətlərə müsbət təsir göstərib.

 

FES: DOLLARIN MÖHKƏMLƏNMƏSI ABŞ ÜÇÜN TƏHLÜKƏDIR

ABŞ-ın Federal Ehtiyat Sistemi (FES) rəhbərliyi baza uçot dərəcəsinin tədricən artırılmasını proqnozlaşdırır, lakin hesab edir ki, inflyasiyanın sürətlənməsi pul-kredit siyasətinin sərtləşdirilməsi tempini də sürətləndirə bilər. “APA”nın məlumatına görə, bu barədə FES-in 13-14 dekabr tarixlərində baş tutan iclasının protokolunda bildirilir.

Protokola əsasən, yuxarıda qeyd edilən fikirlə FES-in az qala bütün rəhbər şəxsləri razıdır. ÜDM-in və istehlak qiymətlərinin artmasının əsas səbəbi kimi infrastruktur layihələrinə investisiyaların artırılması və vergi yükünün azaldılması ilə bağlı planların olmasıdır. Qeyd edək ki, bu təklif ABŞ-ın yeni seçilmiş prezidenti Donald Tramp tərəfindən səsləndirilib və Ağ Evin gələcək rəhbəri təklifin reallaşdırılmasında israrlıdır. D.Trampın inauqurasiyası yanvarın 20-də olduğu üçün hələlik təklifin detalları açıqlanmır.

Protokolun mətninə əsasən, FES-in son iclasının iştirakçılarının bir çoxu işsizliyin səviyyəsi ilə bağlı proqnozlarında tərəddüd edir. İştirakçıların çoxu hesab edir ki, “işsizliyin səviyyəsi azalmaqda davam edəcək”, lakin bu azalma uzunmüddətli perspektiv üçün normadan cüzi aşağı olacaq.

Qeyd edək ki, noyabr ayında ABŞ-da işsizliyin səviyyəsi gözlənilmədən 4,6 faizədək enib. Bu isə 2007-ci ilin may ayından etibarən ən aşağı göstəricidir.

FES-in rəhbər şəxsləri son iclasda qeyd ediblər ki, möhkəmlənən dollar ABŞ iqtisadiyyatının əsas təhlükələrindən biridir. D.Tramp prezident seçilən gündən FES-in dekabr iclasınadək dolların indeksi 5,2 faiz, sonradan isə 1,1 faiz möhkəmlənib. Dolların bahalaşması ABŞ-da istehsal olunan məhsulların rəqabət qabiliyyətliliyinə mənfi təsir edir. Bununla yanaşı, idxalın ucuzlaşması inflyasiyaya təzyiq göstərir.

Noyabrda ABŞ-da baza inflyasiya 1,6 faiz olub. FES-in proqnozuna əsasən, bu göstərici 2017-ci ildə 2 faizədək artacaq.

Xatırladaq ki, dekabr iclasında FES baza uçot dərəcəsini 0,25 faiz artıraraq 0,75 faizə çatdırıb. İclasdan sonra FES-in açıqladığı bəyanatda deyilir ki, 2017-ci ildə uçot dərəcəsi üç dəfə artırıla bilər.

Məlumat üçün qeyd edək ki, FES-in növbəti iclası 31 yanvar-1 fevral tarixlərində baş tutacaq. Bu iclasda uçot dərəcəsinin artırılması ehtimalı 12 faizdir.

 

SƏRNIŞIN DAŞIYAN DRONLAR 2020-CI İLDƏN ISTIFADƏYƏ VERILƏ BILƏR

İlk uçuşunu aşağı yüksəklikdə noyabr ayında həyata keçirən sərnişin dronu 2020-ci ildən xidmət göstərə bilər. Bu barədə “BBC” agentliyi cihazı hazırlayan İsrailin “Urban Aeronautics” şirkətinə istinadən məlumat yayıb.

Xəbər verilir ki, 500 kiloqram ağırlıqda yükü saatda 185 kilometr sürətlə daşıya bilən və dəyəri 14 milyon ABŞ dolları olan “Comorant” dronunun xilasetmə və hərbi xidmətlərdə istfiadə edilməsi nəzərdə tutulub.

Eyni zamanda, “Urban Aeronautics” şirkəti dronun pərlərinin qapalı olması səbəbindən cihazı vertolyotdan daha təhlükəsiz hesab edir. Şaquli qalxıb və enməkdən başqa, bu dron həmçinin binaların arasından və elektrik xəttlərin altından uça bilir.

Dronlar üzrə ekspert Ravi Vaidyanatan İsrail dronunun ilk uçuşunun aşağı yüksəklikdə naviqasiya üçün “dönüş nöqtəsi” ola biləcəyini və aparatın humanitar xilasetmə və hərbi xidmətdə istifadə edilə biləcəyinə ümidvardır.

 

YARALI ƏSGƏRLƏR ÜÇÜN “AĞILLI SAAT” TEXNOLOĞIYASI

İsrail ordusu cəbhədə yaralanan əsgərlər üçün “ağıllı saat” texnologiyasından istifadə edəcək. Bu barədə “TRT” telekanalı məlumat yayıb.

Xəbər verilir ki, İsrail ordusunun sözçüsü Ovijaa Adraei İsrail Müdafiə Qüvvələrinin cəbhə xəttində və döyüşlərdə yaralanan əsgərlərinin sağlamlıq vəziyyətləri haqqında məlumat ötürəcək “ağıllı saat” texnologiyasının inkişaf etdirməsi işlərinin aparıldığını bildirib.

“Ağıllı saat” sensorlar vasitəsilə yaralı əsgərin qızdırmasını, nəbzini və qandakı oksigen səviyyəsini ölçmə və sağlamlıq mərkəzlərinə köçürmə kimi funksiyalara sahib olacaq.

Məlumata görə, İsrail ordusu bu texnologiyayla döyüş sahələrindəki yaralı əsgərlərə daha sürətli və uyğun müalicə xidməti çatdırmağı planlaşdırır.

İsrail mətbuatındakı xəbərlərə görə, ağıllı saat texnologiyasının orduda istifadəsinə üç il ərzində başlanacaq.

 

 

 

Published in Dünya bu gün
1 -dən səhifə 2