XƏBƏR LENTİ

Hörmətli cənab Prezident,

Əziz Qardaşım,

Ad gününüz münasibətilə Sizə ən səmimi təbriklərimi və xoş arzularımı yetirməkdən məmnunluq duyuram.

Bu gün Türkiyə Respublikası əhəmiyyətli sosial-iqtisadi və elmi tərəqqi, hərtərəfli inkişaf yolu keçərək dünya miqyasında müstəqil siyasət yürüdən güc mərkəzinə çevrilmişdir. Heç şübhəsiz ki, qazanılmış bütün bu uğurlar bilavasitə Sizin böyük dövlət xadimi kimi gərgin fəaliyyətinizin nəticəsidir.

Fəxr hissi ilə qeyd edə bilərik ki, qırılmaz tellərlə bir-birinə bağlı olan xalqlarımızın iradəsindən qaynaqlanan və “Bir millət, iki dövlət” prinsipinə əsaslanan Azərbaycan-Türkiyə münasibətləri hazırda özünün ən yüksək səviyyəsindədir.

Dostluq və qardaşlıq üzərində qurulmuş dövlətlərarası münasibətlərimizin bu səviyyəyə gəlib çatmasında şəxsən Sizin misilsiz rolunuz var. Çoxşaxəli ikitərəfli əlaqələrimizin və strateji müttəfiqliyimizin daha da möhkəmləndirilməsi yolunda qətiyyətiniz, Azərbaycanın əzəli torpaqlarının işğaldan azad edilməsi uğrunda haqq işinə bütün müstəvilərdə açıq, tərəddüdsüz mənəvi və siyasi dəstəyiniz xalqımız tərəfindən çox yüksək qiymətləndirilir.

İnanıram ki, bütün sahələrdə genişmiqyaslı, səmərəli və fəal əməkdaşlığımız, beynəlxalq məsələlərdə qarşılıqlı inam, etimad və dəstəyə əsaslanan ardıcıl mövqeyimiz və fəaliyyətimiz bundan sonra da ölkələrimizin tərəqqisinə və xalqlarımızın rifahına xidmət edəcəkdir.

Sizə möhkəm cansağlığı, xoşbəxtlik, qardaş Türkiyə xalqının əmin-amanlığı və firavanlığı naminə ali dövlətçilik fəaliyyətinizdə uğurlar diləyirəm.

Hörmətlə,

 

İlham ƏLİYEV,

Azərbaycan Respublikasının Prezidenti.

Bakı şəhəri, 24 fevral 2021-ci il.

Artıq tarixə qovuşan 2020-ci il şanlı Qələbəmiz kimi yadda qalacaqdır. Azərbaycan 30 ilə yaxın 20 faiz ərazilərimizi işğal altında saxlayan Ermənistanı 44 gün ərzində məğlub edərək öz doğma torpaqlarını azad etmişdir. Bu Qələbə onilliklər, yüzilliklər ötsə də, xalqımızın yaddaşında əbədi yaşayacaqdır.

Azərbaycan Respublikasının Prezidenti İlham Əliyev 3 dekabr 2020-ci il tarixdə Azərbaycan Respublikasında 8 noyabrın Zəfər Günü kimi təsis edilməsi haqqında sərəncam imzalamış, 2020-ci il dekabrın 10-da isə ikinci Qarabağ müharibəsində (Vətən müharibəsi) Azərbaycanın qələbəsi şərəfinə paytaxtın Azadlıq Meydanında Zəfər Paradı keçirilmişdir. Paradda Azərbaycan Silahlı Qüvvələrinin Ali Baş Komandanı Azərbaycan Prezidenti İlham Əliyev və fəxri qonaq qismində dəvət olunmuş Türkiyə Prezidenti Rəcəb Tayyib Ərdoğan iştirak etmişlər. Onu da qeyd edək ki, 1993-cü ildə ikinci dəfə siyasi hakimiyyətə qayıdan ümummilli liderimiz Heydər Əliyevin ən böyük arzusu Dağlıq Qarabağı azad etmək idi. Ulu öndər bu məqsədlə dünya ölkələrinə səfəri zamanı əlində Azərbaycanın xəritəsi, Dağlıq Qarabağdakı vəziyyəti, onun yerləşməsi haqqında bütün məlumatları, arxiv sənədlərini dövlət başçılarına, BMT-yə, ATƏT-ə, digər beynəlxalq təşkilatlara çatdırır, Ermənistanın bizim əzəli torpaqlarımızı işğal etdiyini faktlarla sübut edirdi. Bəli, böyük öndərimizin arzuları nəhayət ki, 2020-ci ildə gerçəyə çevrildi. Müstəqil Azərbaycanın qurucusu və memarı, dahi şəxsiyyət Heydər Əliyevin vəsiyyətini Prezident, Müzəffər Ali Baş Komandan İlham Əliyev yerinə yetirdi.

Xalqımız böyük Qələbənin ilk müjdəsini ötən il noyabrın 8-də Qarabağın ürəyi sayılan, incisi hesab olunan Şuşa şəhərinin işğaldan azad edildiyi ilk saatlarda eşitdi. Həmin gün Azərbaycan Prezidenti, Müzəffər Ali Baş Komandan İlham Əliyev Şəhidlər Xiyabanında xalqa müraciətində bu barədə məlumat vermişdir:

“Əziz bacılar və qardaşlar, bu gün bu müjdəni mən burada - Şəhidlər Xiyabanında doğma xalqıma verirəm. Bu, təsadüfi deyil. Bu, təbiidir. Bu gün şəhidlərimizin ruhu qarşısında bir daha baş əyirəm. Bu gün bəyan edirəm ki, şəhidlərimizin qanı yerdə qalmır. Erməni vəhşiliyinin, qurbanlarının, Xocalı qurbanlarının qanı yerdə qalmır. İntiqamımızı döyüş meydanında aldıq. Biz mülki vətəndaşlara qarşı heç bir vaxt müharibə aparmamışıq, bu dəfə də aparmamışıq. Baxmayaraq ki, mənfur düşmən 93 mülki şəxsi namərd atəşlə öldürüb, 400-dən çox mülki şəxs yaralanıb. Amma mən dedim yox, biz azərbaycanlıyıq! Biz intiqamımızı döyüş meydanında alacağıq və alırıq! Onların ordusunu məhv etmişik, texnikasını məhv etmişik, məhv edirik və edəcəyik. Düşməni qovuruq və qovacağıq”. Daha sonra Fəxri Xiyabana gələn dövlətimizin başçısı çıxışında demişdir: “Mən bu gün, eyni zamanda, ulu öndər Heydər Əliyevin məzarını ziyarət etdim, onun ruhu qarşısında baş əydim. Ürəyimdə dedim, xoşbəxt adamam ki, ata vəsiyyətini yerinə yetirdim. Şuşanı azad etdik! Bu, böyük Qələbədir. Şəhidlərimizin, ulu öndərin ruhu şaddır bu gün. Gözün aydın olsun Azərbaycan!”

Ermənistan 44 günlük müharibədə məğlub olduğunu görüb müqaviməti dayandırmaqdan, Azərbaycanın şərtlərini qeyd-şərtsiz qəbul etməkdən başqa çarəsi qalmadı. Azərbaycan, Rusiya prezidentlərinin və Ermənistanın baş nazirinin birgə imzaladıqları bəyanat elə düşmən ölkənin kapitulyasiyasının ifadəsi oldu. İmzalanan üçtərəfli bəyanatdan sonra noyabrın 10-dan etibarən Dağlıq Qarabağda atəşin və bütün hərbi əməliyyatların dayandırılması elan oldundu.

28 il yarım işğal altında qalan Şuşanın işğaldan azad olunması, ümummilli lider Heydər Əliyevin “Azərbaycan üzükdür, Şuşa onun qaşı” sözləri yenidən öz dəyərinə qovuşdu. Şanlı Ordumuzun gücü, qüdrəti və qətiyyəti sayəsində bu qədim şəhər öz sahiblərinə qaytarıldı. Şuşada yenə də azan səsi eşidildi, sənətkarlar beşiyi olan bu şəhərdə artıq Azərbaycan bayrağı dalğalanır.

Onu da qeyd edək ki, hərbi güc yolu ilə birinci Cəbrayıl şəhəri, daha sonra Zəngilan, Qubadlı rayonları işğaldan azad edildi, bu ərazilərimizdə üçrəngli bayrağımız dalğalandı. Nəhayət, imzalanmış üçtərəfli bəyanatdakı razılaşmaya əsasən dekabrın 1-nə kimi işğal altında olan Kəlbəcər, Ağdam və Laçın rayonlarından Ermənistan öz qoşunlarını çıxardı. Həm də bu rayonlar bir güllə atılmadan belə geri qaytarıldı. On illər boyu Ermənistan ordusunun Azərbaycanın işğal etdikləri ərazilərdən qeyd-şərtsiz çıxarılması haqqında BMT-nin qəbul etdiyi 4 qətnamənin, ATƏT-in Minsk qrupunun həmsədrlərinin (Rusiya, Fransa və ABŞ) nizamlaya bilmədikləri münaqişəyə son qoyuldu, baza prinsiplərinin hər iki mərhələsi (beynəlxalq hüquq normalarına uyğun əvvəlcə 5 rayonun, daha sonra 2 rayonun qaytarılması) yerinə yetirildi, qondarma “Dağlıq Qarabağ respublikası”nın yaradılması xülyası tarixin arxivinə yuvarlandı.

Ölkəmizin rəhbəri Dünya Azərbaycanlılarının Həmrəyliyi Günü münasibətilə xalqa müraciətində bu barədə deyib: “Mən hər zaman deyirdim, son 17 il ərzində, demək olar, bütün beynəlxalq tədbirlərdəki çıxışlarımda deyirdim ki, bu məsələnin həlli bizim üçün prioritetdir. Deyirdim ki, Azərbaycan heç vaxt işğalla barışmayacaq. Deyirdim ki, Azərbaycan heç vaxt imkan verməyəcək ki, tarixi, əzəli Azərbaycan torpaqlarında ikinci erməni dövləti yaradılsın. Deyirdim ki, biz heç vaxt qondarma “Dağlıq Qarabağ respublikası”na müstəqillik verməyəcəyik.

Heç vaxt orada hər hansı bir səsvermə keçirilməyəcəkdir”. Bütün dünyanın gözü qarşısında xalqımızın tarixində heç vaxt olmadığı dərəcədə yüksək birlik, həmrəylik nümayiş etdirildi, daxildəki həmrəylik milli birlik vahid amal uğrunda birləşdi. Ay yarım davam edən bu savaş xalq-iqtidar birliyindən güc alan müstəqil Azərbaycanın qüdrətinin, milli birliyinin sarsılmazlığının göstəricisi oldu. Dövlət başçısı cənab İlham Əliyevin rəhbərliyi altında ordumuz mümkün olmayanın mümkünə çevirdi. Ötən il sentyabrın 27-dən başlayan Vətən müharibəsinə noyabrın 8-də “Qarabağ Azərbaycandır!” nidası ilə yekun vuruldu. Müzəffər Ali Baş Komandanın müdrik və qətiyyətli siyasəti, məğrur və iradəli Azərbaycan Ordusunun əzmi, qanını, canını qurban verərək əbədiyyata qovuşan şəhidlərimizin ruhu və qazilərimizin sağlamlığı bahasına tariximizə bəxş edilən şanlı Qələbə həm də dünya azərbaycanlılarını dəmir yumruq ətrafında sıx birləşdirdi. İstər Vətən müharibəsində, istərsə də ondan sonrakı dövrdə dünyanın müxtəlif ölkələrində yaşayan soydaşlarımızdan Azərbaycan Prezidentinin ünvanına gələn minlərlə teleqramda məhz bu fikirlər öz əksini tapmışdır. Bütün çıxışlarında və müraciətlərində “Qarabağ Azərbaycandır!” deyən möhtərəm Prezidentimiz onu xəyallarımızdan gerçəkliyə çevirdi.

Azərbaycan Prezidenti yeni il ərəfəsində xalqa müraciətində bildirir ki, son 17 il ərzində mənim fəaliyyətimdə ölkəmizin gücləndirilməsi, beynəlxalq müstəvidə mövqelərimizin möhkəmləndirilməsi, ölkə daxilindəki proseslərin müsbət məcrada getməsi əsas vəzifə idi. Heç bir təzyiq, heç bir təhdid məni bu yoldan döndərə bilmədi. Çünki bir amalım var idi - güclü Azərbaycan qurmaq, torpaqlarımızı işğaldan azad etmək.

Qeyd edək ki, son 17 il ərzində dövlət başçımızın rəhbərliyi altında nəhəng neft, qaz, dəmir yolu layihələri icra edilmiş, Azərbaycan iqtisadi cəhətdən dünyada qabaqcıllar sırasına çıxmışdır. İqtisadi qüdrətimiz digər sahələrlə yanaşı, hərbi gücümüzün dünya standartları səviyyəsində qalxmasına imkan vermişdir. Məhz vətən müharibəsində Ermənistan hərbi texnikamızın nəyə qadir olduğunu gördü. Hətta bir çox dünya ölkələri müharibədən sonra bizim hərbi taktikamızı öyrənməkdə maraqlıdırlar. Dünya təcrübəsi də göstərir ki, güc iqtisadiyyatdır. İqtisadiyyat güclü olmasa, nə hərbi, nə də siyasi gücdən söhbət gedə bilməz.

Düzgün planlaşdırılmış və həyata keçirilmiş əməliyyatlar sayəsində qəhrəman zabit və əsgərlərimiz texniki imkanlardan bacarıqla istifadə edib rəşadət göstərərək Ermənistan ordusunu və hərbi texnikasını darmadağın etdi. Ermənistan kapitulyasiya aktına imza atdı, bunu bütün dünya gördü. Bu gün döyüş meydanlarında məhv edilmiş və erməni əsgərlərinin qoyub qaçdıqları zaman ələ keçirilmiş yüzlərlə hərbi texnika və sursat bunun bir sübutudur.

Artıq müharibə arxada qalıb, ölkəmiz üçün yeni dövr - quruculuq və abadlıq dövrü başlayır. İşğaldan azad olunmuş torpaqlarımızın bərpası günləri bizi gözləyir. Çünki düşmən işğal etdiyi və artıq azad edilən torpaqlarda hər şeyi dağıdıb, yerlə-yeksan edib. Bir sözlə, bütün şəhərlərimiz, kəndlərimiz ən yeni üslubda yenidən qurulacaq, bərpa ediləcək, Azərbaycan Prezidenti, Ali Baş Komandan İlham Əliyevin bəyan etdiyi kimi, Qarabağ bölgəsində cənnət yaradacağıq. Bizim xalqımız buna layiqdir. Bizim xalqımıza qələbə yaraşır və qələbə həmişə bizimlə olacaq!

Əlbəttə, işğaldan azad olunmuş ərazilərin bərpasını və keçmiş məcburi köçkünlərin doğma yurd-yuvalarına qayıtmasının zamana ehtiyacı var. Onu da əminliklə deyə bilərik ki, müharibənin vurduğu yaralar tezliklə aradan qaldırılacaq, ölkəmizdə iqtisadi cəhətdən yeni çiçəklənmə dövrü başlayacaq, gələcək nəsillərimiz Azərbaycan kimi daha parlaq və qüdrətli bir dövlətdə yaşayacaq. Buna heç kəs şübhə etməsin.

Ramiz YUSİFLİ,

“Respublika”.

Fevralın 24-də Türkdilli Dövlətlərin Əməkdaşlıq Şurasının (Türk Şurası - TDƏŞ) energetika nazirlərinin birinci görüşü keçirilib. Azərbaycanın təşkilata sədrliyi çərçivəsində baş tutan videokonfransda Azərbaycan, Qazaxıstan, Qırğızıstan, Türkiyə, Özbəkistan və Macarıstanın yüksək səviyyəli nümayəndələri iştirak ediblər.

Energetika Nazirliyindən AZƏRTAC-a bildirilib ki, tədbir Azərbaycanın energetika naziri Pərviz Şahbazov və TDƏŞ-in Baş katibi Bağdad Amreyevin açılış nitqləri ilə başlayıb. İclasa sədrlik edən nazir bildirib ki, türkdilli dövlətlərlə siyasi və iqtisadi əlaqələrin genişləndirilməsi Azərbaycanın ümummilli lideri Heydər Əliyevin əsasını qoyduğu və bu gün Prezident İlham Əliyevin məqsədyönlü şəkildə davam etdirdiyi dövlət siyasətinin prioritet istiqamətlərindən biridir. Türkdilli Dövlətlərin Əməkdaşlıq Şurası nüfuzlu, çoxtərəfli əməkdaşlıq formatı kimi uğurla inkişaf edir və Azərbaycan bu əməkdaşlığın humanitar müstəvidən çoxşaxəli iqtisadi müstəviyə doğru genişlənərək inkişafına öz töhfəsini verir: “Türkdilli Dövlətlərin Əməkdaşlıq Şurasına üzv ölkələrlə Azərbaycanın ticarət dövriyyəsi 2009-cu illə müqayisədə 2020-ci ildə 3,5 dəfə artaraq 4,4 milyard ABŞ dollarına çatıb. Şuraya üzv ölkələrin Azərbaycanın xarici ticarətindəki payı 17,9 faiz təşkil edir. Bu ölkələr 1995-2020-ci illər ərzində Azərbaycan iqtisadiyyatına 13 milyard dollar investisiya qoyub. Azərbaycan isə üzv ölkələrin iqtisadiyyatına 18,3 milyard dollar sərmayə yatırıb”.

P.Şahbazov bütün sahələrdə olduğu kimi enerji sahəsində də yüksək səviyyədə olan Azərbaycan-Türkiyə münasibətlərinin Türk Şurası formatında enerji əməkdaşlığı modeli üçün də əsas rol oynadığını bildirib: “Bu günə qədər Bakı-Tbilisi-Ceyhan boru xətti ilə Türkiyə və dünya bazarlarına təkcə Azərbaycanın təxminən 431 milyon tondan çox nefti nəql edilib. Qaz kəmərləri ilə indiyə qədər Türkiyəyə 79 milyard kubmetr qaz nəql olunub. Eyni zamanda, bu layihələrimiz sayəsində Mərkəzi Asiyadan olan tərəfdaşlarımızın da enerji resurslarının bir hissəsi Azərbaycan vasitəsilə dünya bazarlarına nəql edilir”.

Azərbaycanın təşkilata sədrliyinin mürəkkəb bir dövrə təsadüf etməsinə baxmayaraq, nümunəvi səviyyədə olan həmrəylik və səmərəli qarşılıqlı fəaliyyətlə yadda qaldığı vurğulanıb. Azərbaycana 44 günlük Vətən müharibəsi dövründə ən çox dəstək verən təşkilatın məhz Türk Şurası olduğu qeyd edilib. Azad edilmiş ərazilərin bərpasında, həmçinin Qarabağın “yaşıl enerji” zonasına çevrilməsi prosesində Türkdilli Dövlətlərin Əməkdaşlıq Şurasına üzv ölkələrin şirkətlərinin iştirakı əməkdaşlığı dərinləşdirəcək imkanlar kimi diqqətə çatdırılıb.

Təşkilatın Baş katibi B.Amreyev energetika sahəsində əməkdaşlığın Türk Şurasına üzv dövlətlər üçün strateji əhəmiyyət daşıdığını və bu istiqamətdə səmərəli regional və ikitərəfli əməkdaşlığın təşviqinin təşkilatın əsas məqsəd və vəzifələrindən biri olduğunu bildirib. O, Azərbaycan və Türkiyə arasında müxtəlif sahələrdə, o cümlədən energetika sahəsində olan nümunəvi əməkdaşlıqdan bəhs edərək Cənub Qaz Dəhlizinin gələcək uğurlu əməkdaşlıqlara imkanlar açdığını qeyd edib.

Görüşdə, həmçinin Türkiyənin energetika və təbii sərvətlər naziri Fatih Dönməz, Qazaxıstanın energetika naziri Nurlan Noqayev, Qırğızıstanın energetika və sənaye nazirinin müavini Veronika İsayeva, Özbəkistan energetika nazirinin elm və innovasiyalar üzrə müşaviri Əziz Əliməhəmmədov və Macarıstanın Xarici İşlər və Ticarət Nazirliyinin energetika və iqlim üzrə xüsusi səfiri Dora Zombori çıxış edib.

Nazirlər görüşündə fevralın 23-də keçirilmiş energetika üzrə işçi qrupunun birinci iclasının hesabatı nəzərdən keçirilib, enerji marşrutlarının inkişafı və şaxələndirilməsi, enerji resursları və neft-kimya məhsullarının istehsalı və tədarükündə regiondaxili əlaqələrin gücləndirilməsi, neft və qaz sektorunda, bərpaolunan enerji mənbələri və qabaqcıl texnologiyaların inkişafı üçün investisiya mühitinin yaxşılaşdırılması, enerji səmərəliliyi üzrə təcrübə mübadiləsi sahəsində əməkdaşlıq imkanları müzakirə edilib. Eyni zamanda, energetika sahəsində birgə təlim mərkəzinin yaradılması, təcrübə mübadiləsi məqsədi ilə tədbirlərin keçirilməsi təklif edilib.

Xatırladaq ki, Azərbaycan, Qazaxıstan, Qırğızıstan, Türkiyə və Özbəkistan TDƏŞ-in üzvləridir. Macarıstan isə müşahidəçi qismində iştirak edir. 2019-cu il oktyabrın 15-də Bakıda keçirilmiş TDƏŞ-in VII Zirvə Görüşündə Türk Şurasına sədrlik Qırğızıstandan Azərbaycana keçib.

 

 

AZƏRTAC

Qarabağda topların artıq susmasına baxmayaraq, hərbçi və mülki insanların həlak olması davam edir. Buna səbəb bütün Qarabağı bürümüş minalanmış sahələrdir. Nəticədə hər həftə neçə insanın həyatı yarımçıq qalır, neçə insan şikəst olur. Atəşkəs haqqında Bəyanat imzalanandan sonra 50-dən çox insan, o cümlədən bir nəfər rusiyalı sülhməramlı minaya düşüb həlak olub.  

AZƏRTAC xəbər verir ki, bu fikirlər rusiyalı jurnalist Dmitri Vinoqradovun “Svobodnaya pressa” internet-nəşrində dərc edilmiş məqaləsində öz əksini tapıb.

Dağlıq Qarabağ münaqişəsi zonasında hərbi əməliyyatların dayandırılmasından təqribən 4 ay keçməsini xatırladan müəllif deyir: “Hərbi-texniki baxımdan qat-qat üstünlüyə malik olan Azərbaycan Ordusunun sürətli hücumunu dayandırmağı bacarmayan Ermənistan ondan ötrü ağır şərtlərlə sülh bağlamağa məcbur oldu. O vaxtdan regionda qüvvədə olan atəşkəs rejimi təqribən iki minlik rusiyalı sülhməramlı kontingent tərəfindən təmin edilir”.

Jurnalist qeyd edir ki, həm Birinci, həm də İkinci Qarabağ müharibəsi dövründə şiddətli döyüşlərin getdiyi ərazilərin demək olar ki, hamısında bu gün minasızlaşdırma üzrə fəal iş aparılır.

Minasızlaşdırma xeyli vaxt və resurs tələb edən bir prosesdir. Ötən il noyabr ayında döyüş əməliyyatları başa çatandan bəri Azərbaycan ərazisinin 27 kvadratkilometrlik hissəsi minalardan təmizlənib. Çox da böyük olmayan bu sahədə 40 minə yaxın döyüş sursatı aşkar edilib. Onların hər biri gələcəkdə ciddi təhlükə mənbəyi ola bilərdi. Söhbət erməni silahlı dəstələri tərəfindən 30 ilə yaxın müddətdə nəzarətdə saxlanan ərazilərdən gedir. Bu illər ərzində ermənilər həmin ərazilərin demək olar ki, hər bir qarışını minalayıblar.

Minalardan təmizlənmiş 27 kvadratkilometrlik sahədə aşkar edilmiş mərmilərin ümumi dəyəri 3 milyon dollara yaxındır. İstehkamçıların fikrincə, onların keçdikləri və ya gələcəkdə işləməyi planlaşdırdıqları ərazilərdə toplam 4,5 milyona qədər mina ola bilər. Mütəxəssislərin hesablamalarına görə, ermənilərin orada basdırdığı minaların ümumi dəyəri 340 milyon dollara çata bilər. Müəllif vurğulayır: “Bu, astronomik məbləğdir. Belə çıxır ki, işğal illəri ərzində Ermənistan Azərbaycan ərazilərini minalamaq məqsədilə Ermənistanın 2020-ci il üçün hərbi büdcəsinin 50 faizi, rəsmi valyuta ehtiyatlarının 15 faizi və ya dövlət büdcəsinin 10 faizi qədər vəsait sərf edib”.

D.Vinoqradovun fikrincə, ötənilki müharibənin nəticələri bu xərclərin mənasız olduğunu nümayiş etdirdi. Məlum oldu ki, erməni silahlı qüvvələri tərəfindən torpaqların gen-bol minalanması həmin əraziləri öz nəzarətində saxlamağa kömək etməyib - havada mütləq üstünlüyə malik olan Azərbaycan Ordusu xüsusi təyinatlıların mobil qruplarının köməyi ilə düşmənin müdafiə xəttini qısa müddətdə dəf etdi. Halbuki, erməni tərəfi həmin müdafiə xəttinin yaradılmasına yüz milyonlarla dollar xərcləmişdi.

Jurnalist təəccübünü gizlətmədən vurğulayır ki, Ermənistanın keçmiş rəhbərləri Dağlıq Qarabağ ətrafındakı yeddi rayonun Azərbaycana qaytarılması məsələsini müzakirə etməyə hazır olduqlarını bildirsələr də, eyni zamanda ölkənin hərbi büdcəsinin xeyli hissəsini məhz həmin ərazilərin minalanmasına sərf etmişdi. O yazır: “Onlardan sonra hakimiyyətə gəlmiş Nikol Paşinyanın komandasının timsalında yeni rəhbərlər rayonların qaytarılması məsələsinin müzakirəsindən ümumiyyətlə imtina etdilər, beləliklə, müharibəyə təhrik etdilər, nəticədə həmin əraziləri tamamilə itirdilər və bunun müqabilində heç nə əldə etmədilər”.

Rusiyalı jurnalist sonda yazır: “Qarabağda sonuncu silahlı münaqişənin yekunlarına əsasən deyə bilərik ki, ötən 30 il ərzində ərazilərin minalanmasına sərf edilmiş yüz milyonlarla dollar məbləğində vəsaiti daha səmərəli şəkildə xərcləmək, elm, təhsil və səhiyyə sahələrinə sərmayə qoymaq olardı. Bu gün isə həmin vəsait sözün hərfi mənasında yerə basdırılıb və adətən müharibəyə heç bir aidiyyəti olmayan insanların həyatına son qoymağa “xidmət edir”.

 

 

AZƏRTAC

Heydər Əliyev Fondunun vitse-prezidenti Leyla Əliyevanın təşəbbüsü ilə həyata keçirilən “Xocalıya ədalət!” beynəlxalq məlumatlandırma kampaniyası çərçivəsində Ankarada Xocalı soyqırımının 29-cu ildönümünə həsr olunan anım mərasimi keçirilib.

Azərbaycanın Türkiyədəki səfirliyi, Türkiyə-Azərbaycan Dostluq, Əməkdaşlıq və Həmrəylik Fondu və Diasporla İş üzrə Dövlət Komitəsi tərəfindən birgə təşkil olunan tədbirdə əvvəlcə Azərbaycanın və Türkiyənin dövlət himnləri səsləndirilib, Xocalı faciəsi qurbanlarının, eləcə də bütün şəhidlərimizin xatirəsi bir dəqiqəlik sükutla yad edilib.

Xocalı faciəsi barədə ümumi məlumat ve

rildikdən sonra faciənin dəhşətlərini əks etdirən film nümayiş olunub.

Rəsmi hissədə Qara Dəniz İqtisadi Əməkdaşlıq Təşkilatı Parlament Məclisinin Baş katibi Asəf Hacıyev və Qazaxıstanın Türkiyədəki səfiri Abzal Saparbekulı Xocalı soyqırımının səbəb və nəticələrindən danışıblar. Onlar türkdilli xalqların və ölkələrin tarixlərinin dərindən öyrənilməsinin vacibliyini bildiriblər.

Türkiyə-Azərbaycan Dostluq, Əməkdaşlıq və Həmrəylik Fondunun rəhbəri, professor Aygün Attarın sədrliyi ilə keçirilən mərasimin panel hissəsində Azərbaycanın Türkiyədəki səfiri Xəzər İbrahim, Diasporla İş üzrə Dövlət Komitəsi sədrinin birinci müavini Valeh Hacıyev, Türk Şurasının Baş katibi Bağdad Amreyev və Türkiyə xarici işlər nazirinin müavini Yavuz Selim Kıran çıxış ediblər.

Xocalı soyqırımına siyasi qiymət verilməsi, dünya birliyi tərəfindən tanınması proseslərinə dair geniş məlumat verən professor Aygün Attar diqqətə çatdırıb ki, təcavüzkar Ermənistan Azərbaycana qarşı təkcə Xocalı soyqırımını törətməyib, eyni zamanda, otuz il işğal altında saxladığı torpaqlarda bütün tikililəri dağıdıb, meşələri yandırıb, doğrayıb məhv edib, yeraltı və yerüstü sərvətləri talayıb, su mənbələrinə və təbiətə qarşı sistemli terror törədib.

İşğalçı Ermənistanın Azərbaycan xalqına qarşı yalnız Xocalı soyqırımını deyil, davamlı olaraq çoxistiqamətli cinayətlər törətdiyini xatırladan səfir Xəzər İbrahim bildirib ki, bu cinayətlər 44 günlük Vətən müharibəsində müasir dünyanın gözü qarşısında ən ağır formalarda davam etdi. Azərbaycanın infrastrukturu, mülki əhali, yaşayış məskənləri ağır artilleriya və raketlərlə hədəf alındı. Lakin bütün bu vəhşiliklərə sinə gərən Azərbaycan savaşdan üzüağ və qalib çıxdı. İndi biz Zəfər qazanan qalib xalq kimi başımızı dik tutaraq Xocalıya ədalət tələb edirik.

Tarixdə yaşadığımız bütün acılardan dərs alaraq gələcəyə nikbin baxmağın vacibliyindən danışan Türkiyə xarici işlər nazirinin müavini Yavuz Selim Kıran bildirib ki, türk xalqları bir-birinə dəstək verərək daha mübariz olmalıdır. Bir olsaq təhdid və risklərə qarşı daha təsirli tədbirlər görərik. Azərbaycan 44 günlük Vətən müharibəsində nəyə qadir olduğunu öz rəşadəti ilə bütün dünyaya göstərdi. Bizi güclü edən birliyimiz və dəyərlərimizdir.

“Xocalıya ədalət!” beynəlxalq məlumatlandırma kampaniyasının mahiyyətindən danışan Diasporla İş üzrə Dövlət Komitəsi sədrinin birinci müavini Valeh Hacıyev diqqətə çatdırıb ki, biz təkcə Xocalı soyqırımının dəhşətlərini tanıtmaqla kifayətlənməməliyik. Erməni vandallar bütün cinayətlərini xalqlarımıza və ölkələrimizə qarşı məqsədyönlü planlaşdıraraq həyata keçiriblər. Bu cinayətlərin böyük bir hissəsi müasir dünyanın gözü qarşısında işğaldan azad olunan ərazilərimizdə üzə çıxır.

Xocalı soyqırımının təkcə Azərbaycan xalqının deyil, bütün türk dünyasının ortaq acısı olduğunu diqqətə çatdıran Türk Şurasının Baş katibi Bağdad Amreyev deyib ki, türkdilli ölkələr və xalqlar bu soyqırımını heç zaman unutmayacaq. Türk Şurası olaraq “Xocalıya ədalət!” beynəlxalq məlumatlandırma kampaniyasında hər zaman Azərbaycanla çiyin-çiyinə olduq, 44 günlük Vətən müharibəsində siyasi dəstəyimizlə qardaşlığımızı nümayiş etdirdik.

Çıxışlarda müzəffər Ali Baş Komandan İlham Əliyevin rəhbərliyi ilə yenilməz Azərbaycan Ordusunun qazandığı Zəfərin regionda yaratdığı yeni münasibətlərdən bəhs olunub. Bu haqlı mübarizədə türk dünyasının, eləcə də Prezident Rəcəb Tayyib Ərdoğan başda olmaqla qardaş Türkiyənin siyasi mənəvi dəstəyi tarixi hadisə kimi dəyərləndirilib. Diqqətə çatdırılıb ki, bundan sonra da Xocalıya ədalətə nail olana qədər daha fəal şəkildə mübarizə aparılmalıdır. 

 

 

 

AZƏRTAC

Fevralın 24-də Azərbaycan və Pakistan parlamentlərarası dostluq qruplarının Xocalı soyqırımının 29-cu ildönümünə həsr olunmuş videoformatda görüşü keçirilib.

Milli Məclisin Mətbuat və ictimaiyyətlə əlaqələr şöbəsindən AZƏRTAC-a bildiriblər ki, videogörüşdə Azərbaycan-Pakistan parlamentlərarası əlaqələr üzrə işçi qrupunun rəhbəri Qənirə Paşayeva Pakistan Senatının və Milli Assambleyasının Azərbaycanla dostluq qrupunun üzvlərini və iştirakçıları salamlayaraq bildirib ki, Xocalı soyqırımı hər zaman bizim qəlbimizdə bir ağrıdır. Çünki erməni silahlı qüvvələri uşaq, qadın, yaşlı demədən bizim soydaşlarımızı qətlə yetirib, ağır işgəncələrə məruz qoyublar. Xocalı şəhəri yer üzündən silinib. Onlar məhz azərbaycanlı olduqlarına görə qətlə yetiriliblər. Ermənistanın sabiq prezidenti Serj Sarkisyan britaniyalı jurnalist Tomas de Vaalın kitabında bu insanları məhz azərbaycanlı olduqlarına görə qətlə yetirdiklərini etiraf edib.

Qənirə Paşayeva diqqətə çatdırıb ki, bizim əsas məqsədimiz bu soyqırımı törədənlərin ədalət qarşısında cavab verməsidir. Bu soyqırımı azərbaycanlılara qarşı törədilməklə insanlıq əleyhinə bir cinayətdir. Dünyanın bu soyqırımı tanıması, həqiqətləri bilməsi üçün qardaş və dost ölkələrə ehtiyacımız var. Bu baxımdan Pakistana təşəkkür edirik ki, bu qardaş ölkə həmişə Azərbaycanın yanında olub. Biz bu mənəvi və siyasi dəstəyin davamlı olacağına inanırıq.

Qənirə Paşayeva Prezident, Ali Baş komandan İlham Əliyevin rəhbərliyi ilə 44 günlük müharibə nəticəsində işğaldan azad olunmuş torpaqlarımızda ermənilərin törətdiyi vandalizmi öz gözləri ilə görmələri üçün pakistanlı deputatları ölkəmizə səfərə dəvət edib. 

Çıxış edən Pakistan Milli Assambleyasında Azərbaycanla dostluq qrupunun üzvləri xanım Şaza Xavaca, Farrux Xan bildiriblər ki, ermənilərin Azərbaycana qarşı törətdiyi Xocalı soyqırımı ilə bağlı Pakistan bir sıra bəyanatlarla çıxış edib. Milli Assambleyanın üzvləri Xocalı soyqırımı zamanı qətlə yetirilmiş azərbaycanlılara Allahdan rəhmət diləyiblər, bu ağır cinayəti törədənlərin cəzalarına çatacağına əminliklərini bildiriblər. Pakistanlı deputatlar beynəlxalq təşkilatlarda Pakistana verilən dəstəyə görə Azərbaycana təşəkkür ediblər.

Görüşdə çıxış edən Milli Məclisin deputatları Ceyhun Məmmədov, Cavanşir Paşazadə, Mahir Abbaszadə, Sadiq Qurbanov, Ülviyyə Həmzəyeva bildiriblər ki, Azərbaycan bir tolerantlıq nümunəsidir. Ermənistan isə işğal etdiyi Azərbaycan torpaqlarında məscidləri, tarixi abidələri məhv edib. Deputatlar vurğulayıblar ki, Xocalı soyqırımı heç vaxt unudulmayacaq, Azərbaycan xalqının qan yaddaşında əbədi qalacaq.

Görüşdə çıxış edən Senatda Pakistan-Azərbaycan dostluq qrupunun rəhbəri Talha Mahmud, senatorlar Şahzad Vasim, Ayeşa Raza Faruq və Nuzhat Sadiq bildiriblər ki, Xocalı soyqırımı tarixin qara ləkəsidir. Erməni silahlı qüvvələrinin günahsız mülki vətəndaşları öldürməsi bəşəriyyətə qarşı törədilmiş cinayətdir, soyqırımıdır. Bir sıra ölkələr, o cümlədən Pakistan bunu soyqırımı kimi qəbul edib. Senatorlar bildiriblər ki, Pakistan həmişə qardaş Azərbaycanın yanında olub və bundan sonra da olacaq. Pakistanlı parlament nümayəndələri Azərbaycana sülh, əmin-amanlıq və tərəqqi arzulayıblar.

Onlayn tədbirə yekun vuran Azərbaycanın Pakistandakı səfiri Əli Əlizadə bu görüşə göstərilən diqqətə görə hər iki tərəfin deputatlarına təşəkkür edib.

 

 

AZƏRTAC

Müxtəlif qitələr üzrə bir neçə ölkədə aparılmış sınaqların ümumi nəticələri göstərdi ki, “CoronaVac” vaksini müxtəlif əhali qrupundan olan şəxslərdə COVİD-19 infeksiyasına qarşı effektli və təhlükəsizdir.

Bu fikri Çinin peyvənd istehsalı üzrə ixtisaslaşmış “Sinovac Biotech” şirkətinin baş meneceri xanım Quan Yan AZƏRTAC-ın xüsusi müxbirinə müsahibəsində deyib. O, təmsil etdiyi şirkətin COVİD-19 virusuna qarşı peyvəndin hazırlanması işlərinə ötən ilin yanvarında başlanıldığını və inaktiv vaksin variantını seçdiklərini deyib.

“Bu, etibarlı və ənənəvi vaksin texnologiyasıdır və dünyada müxtəlif xəstəliklərə qarşı vaksinlərin çoxu da məhz bu kateqoriya vaksinlərdir. Bizim qrip, hepatit əleyhinə və digər vaksinlərimiz də inaktiv peyvəndlərdir”, - deyən Quan Yan əlavə edib ki, heyvanlar üzərində sınaqlar uğurla başa çatandan sonra ötən ilin aprelində peyvəndin insanlar üzərində kliniki sınaqlarına icazə verilib. Birinci və ikinci mərhələ kliniki sınaqlar 2 yaş qrupu üzrə (18-59 və 60 yaşdan yuxarı) Çində aparılıb.

“Sinovac”ın rəsmisi bildirib ki, peyvəndin effektivliyinə əmin olmaq üçün 3-cü mərhələ kliniki sınaqların təkcə Çində yox, həm də müxtəlif qitələr üzrə bir neçə ölkədə və regionda aparılmasına qərar verilib. Bununla əlaqədar Braziliyada, Türkiyə, İndoneziya və Çilidəki tərəfdaşlarla danışıqlar aparılıb. İndiyədək Braziliya, Türkiyə və İndoneziyadakı sınaqların ilkin nəticələri əldə edilib.

Quan Yan deyib ki, fevralın əvvəlində Çinin müvafiq qurumu “Sinovac” şirkətinin COVİD-19 peyvəndinin kütləvi marketinqinə icazə verib. Bu zaman peyvəndin həm Çində, həm də xaricdə 3-cü mərhələ kliniki sınaqlarının nəticələri də əsas götürülüb. Xüsusilə Türkiyədəki sınaqların nəticələri diqqətçəkən olub. Türkiyədə “CoronaVac” peyvəndinin effektivliyi 91,25 faiz olub. Bu da çox sevindirici bir nəticədir. Bəzi ölkələrdə vaksinin sınaqlarında iştirak edənlərin sağlamlıq vəziyyəti ilə əlaqədar olaraq effektivlik dərəcəsi dəyişir.

“Sinovac” rəsmisi COVİD-19 pandemiyasına qalib gəlməkdən ötrü peyvəndin mövcudluğunun çox vacib olduğunu vurğulayıb: “Bizim peyvəndin saxlanma və daşınması üçün tələb edilən 2-8 dərəcə Selsi temperatur şəraiti onun daha əlçatan olmasını göstərir. Bu da inaktiv vaksinin bu pandemiyada çox yaxşı işlədiyini deməyə əsas verir. Çünki vaksinin anbarlarda yığılması, daşınması, klinikalarda saxlanması da vacib məsələdir”.

Quan Yan deyib ki, hökumətdən müvafiq razılıq əldə olunduqdan sonra ən qısa zamanda vaksinin ardıcıllığını və uzunmüddətli müşahidəsi üzrə araşdırmalara başlayacaqlarını diqqətə çatdırıb. “Çünki adətən vaksin hazırlanması illər tələb edir, amma COVİD-19 əleyhinə vaksin bir ilin içərisində hazır oldu. Biz vaxt qazanmaq üçün bəzi tədqiqatları paralel aparmalı olduq. Peyvəndin ən qısa zamanda hazır olması üçün bütün qüvvələr səfərbər edildi, çünki bütün dünya vaksinin hazır olmasına ümid edirdi. Hər kəs dünyanın indiki pandemik vəziyyətini dəyişməyin ən səmərəli və yekun yolunun məhz vaksindən istifadə etmək olduğunu dərk edir”, - deyə Quan Yan deyib.

İndiyədək 10-dan çox ölkədə “CoronaVac” peyvəndinin təcili istifadəsinə icazə verildiyini bildirən “Sinovac” rəsmisi, bu peyvəndin Azərbaycanda vaksinasiya prosesində də istifadə olunmasından məmnunluğunu ifadə edib. “Biz ümid edirik ki, şirkətimizin vaksinlərinin effektivliyi və təhlükəsizliyi sayəsində əməkdaşlıq etdiyimiz ölkələrdə pandemiyaya ən qısa zamanda qalib gəlmək və həyatı əvvəlki axarına qaytarmaq mümkün olacaq”, - deyə Quan Yan bildirib.

Qeyd edək ki, “Sinovac Biotech” şirkətinin COVİD-19 virusuna qarşı peyvəndinə dünyada maraq böyükdür. “CoronaVac” peyvəndinin Çin, Türkiyə, İndoneziya, Braziliya, Çili, Kolumbiya, Meksika, Filippin və bir neçə başqa ölkədə tətbiqinə icazə verilib. Ötən ay Azərbaycanda başlayan COVİD-19 virusuna qarşı vaksinasiya prosesində də məhz “Sinovac”ın peyvəndindən istifadə olunur. Təsirsiz hala gətirilmiş (inaktivləşmiş) bu peyvəndin hazırlanmasında orqanizmdə ciddi xəstəliyə və ya əks-təsirə səbəb olmadan bədənin immunitet sistemini virusa məruz qoymaq üçün öldürülmüş virus hissəciklərindən istifadə olunub. Şirkət peyvəndə olan yerli və xarici tələbatı nəzərə alaraq illik istehsal gücünü 1 milyard dozaya çatdırmaq üçün istehsalı genişləndirir.

AZƏRTAC

“YAŞAT” Fondunun dəstəyi ilə ölkəmizə gələn türkiyəli həkimlər Vətən müharibəsində ağır yaralanmış qazilərimizin müayinələrini davam etdirirlər.

Bu barədə AZƏRTAC-a Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin İctimaiyyətlə əlaqələr şöbəsindən məlumat verilib.

Həkim heyətinin tərkibində ortoped, beyin cərrahı, ümumi cərrah və digər ixtisaslı həkimlər var.

Xatırladaq ki, “YAŞAT” Fondunun dəstəyi, Müdafiə Nazirliyi və İcbari Tibbi Sığorta üzrə Dövlət Agentliyinin birgə təşkilatçılığı ilə Türkiyə Respublikasından həkim heyəti ölkəmizə gəlib.

 

 

AZƏRTAC

Cümə axşamı, 25 Fevral 2021 11:53

ZƏFƏRƏ APARAN YOL

SSRİ-nin dağılması ilə müstəqillik əldə etmiş əksər respublikalar ilk illərdə sosial, iqtisadi, siyasi, bir sözlə, həyatın bütün sahələrini əhatə edən ciddi çətinliklərlə üzləşdilər. O dövrə qədər mövcud olmuş İttifaqdaxili iqtisadi əlaqələrin, respublikalararası müqavilələrin, eləcə də qanunların qüvvədən düşməsi ölkəmizi də dərin böhran vəziyyətinə gətirib çıxarmışdı.
XIX əsrdə Çar Rusiyası tərəfindən hissə-hissə köçürülmüş, Qərbi Azərbaycan torpaqlarını məngirləməklə dövlət statusu qazanmış ermənilər sonrakı iki yüz ilə yaxın müddət ərzində mütəmadi olaraq himayədarlarının dəstəyinə və köməyinə arxalanaraq Azərbaycan ərazilərinə və azərbaycanlılara qarşı təcavüzkar və soyqırım siyasəti yeritmiş, torpaqlarımızı mənimsəmiş, minlərlə həmvətənlərimizi milli-etnik zəmində kütləvi qırğınlara məruz qoymuşlar.
1986-1987-ci illərdə ermənilərin xalqımıza və torpaqlarımıza qarşı təcavüz dalğası yenidən baş qaldırdı. Onların budəfəki məqsədləri Çar Rusiyası tərəfindən “Kürəkçay”, “Gülüstan” və “Türkmənçay” sülh müqavilələrindən sonra dünyanın bir sıra regionlarından köçürülərək Azərbaycanın Qarabağ bölgəsində məskunlaşdırılmış, 1923-cü ildə Azərbaycanın tərkibində muxtariyyət statusu verilmiş erməni icmasının heç bir beynəlxalq normalarla uzlaşmayan formatda Azərbaycanın tərkibindən çıxmaq, əsrlərlə ata-baba yurdu olan yerli azərbaycanlı əhalini sıxışdırıb qovmaq və məhv etməklə ya Ermənistana birləşdirmək, ya da Azərbaycan torpaqlarında ikinci erməni dövləti yaratmaq idi.
İllərlə düşmənçilik siyasəti yürüdən, mahiyyətcə erməni şovinizmini və terrorunu təbliğ edən daşnaksütyun partiyasının fəalları, Dağlıq Qarabağ Muxtar Vilayətində cinayət yolu ilə mənimsədikləri külli miqdarda vəsait hesabına quduzlaşmış və məsuliyyətdən yayınmaqda maraqlı olan bir qrup nankor köçəryanlar, sərkisyanlar, poqosyanlar və digərləri ilə cinayət əlaqəsinə girərək, guya Qarabağın “köklü sakinləri” olan “məzlum” ermənilər azərbaycanlılar tərəfindən sıxışdırılması və hüquqlarının pozulması səbəbindən Azərbaycanın tərkibindən çıxmaq, özlərinin “tam müstəqilliyini” elan etmək məcburiyyətində qaldıqlarını bəyan etmişlər. Əslində isə, o zaman SSRİ-yə başçılıq edən Mixail Qorbaçovun ikiüzlü siyasətinə güvənən və onun ətrafında cəmləşən erməni şovinistlərinin ideyalarından qaynaqlanan bu aksiya çox əvvəl planlaşdırılmışdı.
Son vaxtlar erməni siyasətçilərinin bəziləri Qarabağın Azərbaycanın tərkibindən çıxması fikrinə guya SSRİ dövlətinin dağılması prosesində gəldiklərini iddia etməyə cəhd edirlər. Halbuki hadisələrə rəvac verənlərdən biri olan Qorbaçovun köməkçisi Aqambekyan SSRİ-nin hələ dağılmağa məruz qalmasından dörd il qabaq, 1987-ci ildə Fransada çıxış edərək Qarabağda yaşayan ermənilərin “öz müqəddəratını təyin etmə” planları barədə açıqlama vermişdi. Bu ərəfədə Ermənistanın yerli sakinləri olan azərbaycanlıların öz tarixi vətənlərindən qovulub çıxarılması prosesinə artıq başlanmışdı. 1988-ci ilin yanvar-fevral aylarında Qarabağ ərazisində millətlərarası münasibətləri qızışdırmaq məqsədilə ermənilər tərəfindən iki nəfər azərbaycanlı çobanın öldürülməsi və Sumqayıt şəhərində E.Qriqoryan soyadlı şəxsin, azərbaycanlı və erməni millətindən olan otuz iki nəfərin öldürülməsi ilə nəticələnən, əvvəlcədən planlaşdırılmış təxribatları Azərbaycana qarşı növbəti xəyanətin başlanğıc mərhələsi idi.
O zaman Sovetlər ölkəsində böyük nüfuza malik, SSRİ Nazirlər Soveti sədrinin 1-ci müavini, Sovet İttifaqı KP MK-nın Siyasi Bürosunun üzvü Heydər Əliyevin həmin vəzifədə olduğu, eləcə də Azərbaycana rəhbərlik etdiyi əvvəlki illərdə erməni millətçiləri nankorluq nümunəsi olan bu niyyətlərini qabartmağa belə cəsarət etmədilər. İttifaq rəhbərliyində obyektiv və prinsipial mövqeyi ilə seçilən Heydər Əliyev idarəçilik mexanizmi tənəzzülə uğramaqda olan M.Qorbaçovun da yaralı yeri idi və mahiyyət etibarı ilə onun daşnaklarla Heydər Əliyevə qarşı məqsədi üst-üstə düşürdü.
M.Qorbaçov hələ Stavropol vilayətində işlədiyi dövrlərdən erməni mafiyasının sifarişi ilə üzərinə götürdüyü öhdəliklər sayəsində yüksəldiyi rəhbər vəzifəni, onunla müqayisəolunmaz qüruru və işgüzar nüfuzu ilə fərqlənən, idarəçilikdə yol verdiyi səhvləri büronun iclaslarında üzünə çırpan Heydər Əliyev şəxsiyyətinin zəhmindən və tutduğu vəzifəni uduzmaq təhlükəsindən ehtiyat edirdi. Ona görə də Heydər Əliyevin hansı yolla olursa-olsun vəzifəsindən istefa verməsinə nail olmaq, həm də Azərbaycan Respublikası KP MK-nın 1-ci katibi başda olmaqla, DİN, DTK və digər mühüm nazirlik və xidmətlərin rəhbər heyətlərinin, Heydər Əliyev şəxsiyyətinə qısqanclıqla yanaşan, “Mərkəz”in göstərişlərini özünün şəxsiyyətindən, milli mənsubiyyətindən və digər mənəvi dəyərlərdən üstün tutan bayağılaşmış manqurtlarla əvəz olunması kimi qərəzli məqsəd güdən plan həyata keçirilməli idi.
Məhz bu məqsədlə planlaşdırılmış təxribatların həyata keçirilməsinin başlanğıc mərhələsində Azərbaycan KP MK-nın 1-ci katibi vəzifəsinə təyin olunmuş və iki ilə yaxın müddət ərzində respublikaya rəhbərliyi dövründə ölkəni xaos vəziyyətinə gətirib çıxaran Ə.Vəzirovun həmin günlərdə verdiyi müsahibədən məlum olur ki, 1985-ci ildə onun hələ Xarici İşlər Nazirliyi sistemində işlədiyi vaxt Qorbaçov ona Azərbaycanda 1-ci katib vəzifəsini təklif edib. O isə təklif olunan vəzifəni bacarmayacağı barədə bildirdiyini etiraf etmişdi. Heç də təsadüfi deyildi ki, üç il sonra Qorbaçov “əvəzolunmaz” Ə.Vəzirovun Azərbaycana rəhbər təyin olunması barədə qərarı qəbul edir və sonuncu 20 yanvar 1990-cı il hadisələrindən iki gün əvvələ qədərki müddət ərzində həqiqətən də bacarmadığı vəzifəni acınacaqlı sonluqla yerinə yetirir. Yanvarın 18-də (20 Yanvar hadisələrindən 2 gün əvvəl) Moskvaya qayıtdıqda, Qorbaçov onu həmin vaxt, nə də sonrakı müddət ərzində qəbul etməyi belə rəva bilmir.
Ə.Vəzirovun müsahibəsində qeyd etdiyi bu faktın özü bir daha təsdiq edir ki, Heydər Əliyevə və Azərbaycana qarşı Qorbaçovla erməni şovinistləri arasında separatist əlaqə hələ 1985-ci ildə mövcud olub və Ə.Vəzirovun bilərəkdən Azərbaycana rəhbər təyin olunması və “təyinatı üzrə istifadə edilməsi”, qabaqcadan tərtib olunmuş planın tərkib hissəsi olmaqla məqsədyönlü həyata keçirilmişdir.
H eydər Əliyevin istefasından sonra həmin dövrdə onun Azərbaycana qayıtmasının qarşısını almaq məqsədilə DTK rəhbərliyinə tədbirlər görülməsi barədə müvafiq tapşırıqlar verilmişdi. Bu xidmətin Azərbaycan üzrə yerli əməkdaşları və əlaltıları vasitəsi ilə Azərbaycandan Heydər Əliyev haqqında uydurma, anonim yazılar təşkil olunmaqla, onu xalqımızın gözündən salmağa cəhdlər edilirdi. Hətta Ulu Öndərin Moskva şəhəri yaxınlığında tibb müəssisələrinin birində müalicə olunduğu zaman onun Azərbaycana qayıdacağından narahat olan, o dövrdə Azərbaycanın ölkə başçısı A.Mütəllibov Rusiya DTK sədrinin vasitəsi və xidməti telefonu ilə Heydər Əliyevlə əlaqə saxlamış, ona Azərbaycana qayıtmamağı məsləhət görərək, vətənində artıq onu sevmədiklərinə dair həqiqətə uyğun olmayan məlumat vermiş və Bakıya döndüyü təqdirdə təhlükə ilə qarşılaşacağının istisna olmadığı barədə bildirmişdi.
Təbii ki, Heydər Əliyev hər hansı təhlükədən qorxmadığını, Azərbaycanın onun doğma vətəni olduğunu, öz xalqını sevdiyini, istədiyi vaxt vətəninə qayıdacağını, heç kəsin ona mane ola bilməyəcəyini və heç kimin belə bir səlahiyyətə malik olmadığını nəzərə çatdırmışdı. Halbuki həmin ərəfədə, sonradan özlərini ifşa edən və səriştəsiz hakimiyyətlərini qorumağa cəhd edən bir qrup ikiüzlü nankorlar istisna olmaqla, qədirbilən Azərbaycan xalqı həmişə olduğu kimi öz ləyaqətli oğlunun xalqımıza olan sonsuz istəyini, respublikamızın inkşafı naminə gördüyü misilsiz işləri yüksək qiymətləndirirdi və ona tükənməz sevgisi var idi. Buna baxmayaraq, özgə dəyirmanına su tökən hakimiyyət nümayəndələrinin fəaliyyətdə olan gizli şəbəkələrinin vasitəsilə qurduqları təxribatlarla Heydər Əliyevi Bakıya gəlməkdən çəkindirmək məqsədilə ölkəmizin tanınmış ziyalıları ilə birgə hava limanında onu qarşılamağa hazırlaşdıqları barədə Ulu Öndərlə telefon əlaqəsi saxlayan Azərnəşrin direktoru Əjdər Xanbabayev 30.05.1990-cı il tarixdə axşam saat 10 radələrində şəhərin mərkəzinə yaxın Ketsxoveli və Poluxin küçələrinin kəsişdiyi döngədə dostunun evindən çıxıb avtomobilinə əyləşdiyi zaman yaxın məsafədən açılan atəşlə qətlə yetirildi.
Heç bir hədə-qorxuya məhəl qoymayan Heydər Əliyev Bakıya gəldi və bir neçə gündən sonra ilk vaxtlarda anadan olduğu Naxçıvanda yaşamağa və işləməyə üstünlük verdi.
Respublika rəhbərliyinin, eləcə də hakimiyyəti ələ keçirmək iddiasında olan Xalq Cəbhəsinin yarıtmaz və satqın mövqelərindən istifadə edən ermənilər Qarabağda və Sumqayıtda törətdikləri təxribatlarla təcavüzkar niyyətlərinə yol açdılar. Ermənistan ərazisindən işgəncələr tətbiq olunmaqla, son nəfərə qədər qovulan 250 minə yaxın azərbaycanlı öz ata-baba yurdları ilə vidalaşmalı oldu. Düşmənin silahlı qüvvələri himayədarlarının fəal dəstəyi ilə o dövrün Dağlıq Qarabağ Muxtar Vilayətinin ərazisinə daxil olan Xankəndini, Xocalını, daha sonra Şuşanı, Laçını və ətraf əraziləri işğal etdi.
1905, 1918, 1948-1953-cü illərdə milli zəmində azərbaycanlılara qarşı törədilən soyqırımı siyasətinin tərkib hissəsi və davamı olaraq, işğal edilən ərazilərimizdən qovulan həmvətənlərimiz yenə də bu qəddar siyasətin qurbanları oldular. Yüzlərlə qadın, uşaq, qoca xüsusi amansızlıqla qətlə yetirildi, ailələr məhv edildi. Xankəndidə dislokasiya olunmuş rus ordusunun 366-cı motoatıcı alayının hərbi dəstəyi və iştirakı ilə törədilən Xocalı faciəsi erməni faşistləri tərəfindən azərbaycanlılara qarşı milli-etnik zəmində həyata keçirdikləri ən qəddar soyqırımdır. Şaxtalı və qarlı gündə erməni faşistlərinin kütləvi silahlı hücumundan yarıçılpaq və ayaqyalın vəziyyətdə qurtulmağa cəhd edən ananın sinəsinə sıxdığı körpəsini silahın süngüsü ilə qucağından zorla qopararaq onun gözü qarşısında qətlə yetirib, sonra özünü də oxşar işgəncələrə məruz qoymaları, fikrimcə, tarixdə analoqu olmayan vəhşiliyin bir nümunəsidir.
SSRİ-nin dağılmasından sonra, 1992-ci ildə Azərbaycan BMT-nin üzvlüyünə qəbul oldu.
Dünyanın ən yüksək statusa malik mötəbər beynəlxalq təşkilatı olan BMT və onun Təhlükəsizlik Şurası, fəaliyyətini tənzimləyən nizamnaməsinə uyğun olaraq, hər hansı ölkənin beynəlxalq normalar çərçivəsində tanınmış ərazilərinə, suverenliyinə yönələn müdaxilə, təcavüz, o cümlədən silahlı hücum törədildiyi hallarda, onun qarşısını almağa yönələn tədbirlər görmək, o cümlədən sanksiyalar tətbiq etmək, lazım gəldikdə, təcavüzkara qarşı sərəncamında olan silahlı struktur qurumun gücündən istifadə etmək səlahiyyətinə malikdir.
Öz qəsbkarlıq siyasətini davam etdirərək, 1993-cü il aprel ayının ilk günlərindən başlayaraq, düşmən DQMV-nin ərazisinə daxil olmayan Kəlbəcəri, Ağdamı, Füzulini, Cəbrayılı, Qubadlını, Zəngilanı və onlara bitişik çoxsaylı yaşayış məntəqələrini işğal etdi.
Həmin ilin aprel-noyabr ayları ərzində BMT-nin Təhlükəsizlik Şurası tərəfindən işğal olunmuş torpaqların beynəlxalq hüquq normaları əsasında tanınmış Azərbaycan əraziləri olmasını təsdiq edən, erməni silahlı qüvvələrinin Azərbaycanın işğal olunmuş ərazilərindən qeyd-şərtsiz çıxarılması tələblərini əks etdirən, əslində Dağlıq Qarabağın işğal altında olan ərazilərinə və Ermənistanın təcavüzkar işğalçılıq roluna nisbətdə liberal mövqe nümayiş etdirən dörd qətnamə qəbul olundu.
Lakin qəbul olunmuş qətnamələrə məhəl qoymayan erməni faşistləri özbaşınalıqlarını davam etdirərək işğal etdikləri ərazilərdə yaşayan 750 minə yaxın yerli əhalini öz doğma ev-eşiyindən didərgin salmışdı.
Ölkəmizin daxilində mövcud olan dərin iqtisadi və siyasi böhran, hakimiyyətsizliyin baş alıb getdiyi qeyri-sabit şərait, hərbi sahədə özbaşınalığın hökm sürməsi, torpaqlarımıza, eləcə də həmvətənlərimizə qarşı törədilən təcavüzün qarşısını almağa imkan vermirdi. Belə bir şəraitdə müharibənin daha ağır nəticələrə gətirib çıxarması ehtimalı qaçılmaz olaraq qalırdı. BMT Təhlükəsizlik Şurası isə qətnamələrinin icrasına yönələn tədbirlər görməkdən yayınırdı.
1992-ci ilin mayında hakimiyyəti zəbt edən Xalq Cəbhəsinin bir illik səriştəsiz fəaliyyətinin nəticəsi olaraq yaranmış özbaşınalıq zəminində, ərazilərimizin işğalının davam etdiyi bir dövrdə və şəraitdə kəşfiyyat orqanlarının və əlaltılarının təhriki ilə separatçı ünsürlərin cənub və şimal bölgələrində ölkənin parçalanmasına yönələn cəhdləri, 709 saylı hərbi hissənin dövlət çevrilişi məqsədilə törətdiyi Gəncə qiyamı vətəndaş müharibəsinin başlanmasına gətirib çıxarmışdı. Xalqımızın həm də maddi çətinliklərə məruz qaldığı ümidsiz vəziyyətində Heydər Əliyevin xalqın təkidli xahişi və tələbi ilə Bakıya dəvət olunması, ölkədə tamamilə nüfuzunu itirmiş və dövlətçiliyi yox dərəcəsinə gətirib çıxaran Ə.Elçibəyin özü üçün də ən optimal və ümidverici variant idi.
Tarix də sübuta yetirdi ki, Azərbaycanın müstəqilliyinin möhkəmlənməsi, xalqının gələcək xoşbəxtliyi və rifahı naminə canından keçməyə hazır olan dahi rəhbər - Heydər Əliyev xalqının ümidini qırmadı və Bakıya gəldi. Mövcud problemlərin hər biri təxirəsalınmaz və təsirli tədbirlər görülməsini tələb etdiyindən, idarəçilikdə böyük təcrübəsi olan, siyasi bilik və bacarığa malik təcrübəli kadrlara böyük ehtiyac var idi. Ulu Öndər hələ Azərbaycana rəhbərlik etdiyi 1969-1982-ci illər ərzində, tabeliyində işləmiş, onun idarəçilik təcrübəsindən yararlanan, bilik və bacarığına bələd olduğu, hətta sonradan nankorluq edib arxasınca danışan şəxslərdən olsalar da belə, bəzilərini bir sıra mühüm sahələrdə məsul vəzifələrə təyin etdi, fərdi keyfiyyətlərini nəzərə almadan, idarəçilik sistemində onların fəaliyyəti üçün şərait yaratdı.
Xarici kəşfiyyat orqanlarının təhriki və dəstəyi ilə Azərbaycanın parçalanmasına, müstəqilliyinə yönələn qəsdlər, törədilən təxribatlar, dövlət çevrilişinə cəhdlər, terror aktları, özünün həyatına qarşı sui-qəsdlər ölkə Prezidenti Heydər Əliyevi xalqının xoşbəxt gələcəyi naminə tutduğu müqəddəs yoldan döndərə bilmədi. Ulu Öndərin uzaqgörən siyasəti, cəsarətli, həm də çevik addımları sayəsində mənfur qüvvələrin ölkəmizin təbii sərvətlərinə sahib çıxmaq arzuları ürəklərində qaldı. Xarici investorların ölkəmizə cəlb olunması, dünyanın mötəbər neft şirkətləri ilə imzalanan kontraktlar, təkcə iqtisadi cəhətdən deyil, həm siyasi, həm də beynəlxalq əlaqələrin qurulması və inkişafı sahəsində müstəsna əhəmiyyətə malik oldu.
D ağlıq Qarabağın ərazisini, eləcə də 7 rayonu işğal etmiş Ermənistanla həmin ərəfədə müharibənin davam etdirilməsində uğur əldə etməyin yanlış variant ola biləcəyini düşünərək, Heydər Əliyev Bakıya qayıtdığı ilk anlardan ölkəmizin hərtərəfli böhran vəziyyətini nəzərə alaraq, düşmən tərəflə müvəqqəti də olsa atəşkəsə nail olmaq istiqamətində danışıqlar aparılmasına üstünlük verdi və 1994-cü ilin may ayında bu barədə qarşılıqlı razılıq əldə olundu.
Beynəlxalq sahədə də münasibətlər yox dərəcəsində idi. Azərbaycana rəhbərlik etmiş şəxslərin ikili standartlara xidmət etməsi, mövqe primitivliyi və təcrübəsizliyi ucbatından ölkənin beynəlxalq əlaqələri bərbad vəziyyətdə idi. Ermənilərin fitnəkar niyyətləri, Azərbaycana qarşı düşmənçilik mövqelərinin, eləcə də mütəmadi olaraq davam edən əsassız torpaq iddialarının mahiyyəti ictimaiyyətə çatdırılmırdı. Torpaqlarımızda ikinci erməni dövləti yaratmaq məqsədi ilə yüz minlərlə azərbaycanlı əhalinin yurd-yuvalarından didərgin salınması, minlərlə həmvətənlərimizin xüsusi amansızlıqla qətlə yetirilməsi kimi vəhşilikləri barədə nəinki beynəlxalq səviyyədə, hətta ölkənin daxilində belə faktiki reallığı əks etdirən informasiya qıtlığı mövcud idi. Qarabağ ermənilərinin guya azərbaycanlılar tərəfindən sıxışdırılması və hüquqlarının pozulduğu barədə daşnaklar tərəfindən uydurulmuş şər və böhtan dolu təbliğat beynəlxalq arenada əsl həqiqətin ört-basdır edilməsinə, ağ yalan və iftiraların isə ayaq tutub yeriməsinə gətirib çıxarmışdı.
Münaqişənin həlli ilə bağlı ATƏT-in yaratdığı Minsk qrupunun iştirakı ilə aparılan danışıqlar prosesində, eləcə də iştirak etdiyi bütün beynəlxalq tədbirlərdə Heydər Əliyev Ermənistan silahlı qüvvələrinin işğal olunmuş Azərbaycan torpaqlarından çıxarılması, ölkəmizin ərazi bütövlüyünün təmin olunması barədə qəbul olunmuş BMT qətnamələrinin icrasına yönələn əsaslandırılmış qətiyyətli mövqeyini dəfələrlə bəyan etmiş, iştirakçı dövlətlərin dəstəyini qazanmışdı.
Ölkəmizin daxilində sabitliyi bərqərar etmək, iqtisadi, siyasi, xüsusilə də hərbi vəziyyəti tarazlaşdırmaq, müasir hərb sənətinin sirrlərini mənimsəyən etibarlı orduya malik olmaq, öz xalqının sarsılmaz ideya və iradə birliyinə və nəhayət, qələbə zəfərinə əmin olmaq, həmçinin, Qarabağın tarixən və bütün dövrlərdə Azərbaycan torpağı olması barədə əsl həqiqəti, ermənilərin növbəti təcavüzünün yüz ildən çox müddətdə azərbaycanlılara qarşı davam edən milli düşmənçilik siyasətinin tərkib hissəsi olması barədə faktların beynəlxalq ictimaiyyətin nəzərinə çatdırılması vacib vəzifələrdən idi.
BMT Təhlükəsizlik Şurasının icrasız qalan qətnamələrinin kağız üzərində mövcudluğuna ümid bəsləməklə işğal olunmuş ərazilərimizin taleyini, ATƏT-in Minsk qrupunun mənasız müzakirələrinə etibar etmək sadəlövhlük olardı. Onların bu fəaliyyəti sanki, daha çox, ərazilərimizin işğalını unutdurmağa yönəlmişdi. Otuz ilə yaxın müddət ərzində erməni lobbisinin güclü təsirə malik olduğu, həm də BMT Təhlükəsizlik Şurasının daimi üzvləri olan ölkələrin nümayəndələrindən təşkil olunmuş bu qrupun təşəbbüsü və iştirakı ilə ara-sıra keçirilən müzakirələr məcazi mənada “gözə kül üfürmək” təsəvvürü yaradırdı və Azərbaycan tərəfini arxayınlaşdırmaq, ötürülmüş müddəti bir qədər də uzatmaqla təcavüzkara öz cinayətkar niyyətlərinə nail olmağa imkan verən şərait yaratmaqdan başqa bir şey deyildi.
Müstəqil dövlətçiliyimizin qorunması və inkşafı, ölkədaxili sabitliyin təmin olunması, idarəçilik sisteminin qurulması, dövlətin iqtisadi, siyasi və hüquqi əsaslarının möhkəmləndirilməsi, milli ordunun yaradılması və formalaşdırılması, beynəlxalq münasibətlərin və mədəni əlaqələrin inkişafı məhz ümummilli lider Heydər Əliyevin vətəninə, xalqına olan sarsılmaz bağlılığının, sönməz sevgisinin qüdrətindən irəli gələn misilsiz xidmətləri sayəsində mümkün oldu.
Heydər Əliyevin layiqli davamçısı, Azərbaycan Respublikasının Prezidenti İlham Əliyev başa düşürdü ki, BMT Təhlükəsizlik Şurası qətnamələrinin uzun müddət ərzində Ermənistan tərəfindən icra olunmamasına bilərəkdən göz yumulur. Beynəlxalq sənədlərdə “münaqişə” kimi qeyd olunan bu təcavüzün və işğalın danışıqlar yolu ilə həllinin ikili standartlar çərçivəsində fəaliyyət göstərən ATƏT-in Minsk qrupuna həvalə olunması yalnız təcavüzkar tərəfin mənafeyinə xidmət edir. Azərbaycanın öz hərbi gücü sayəsində torpaqlarını azad etmək iqtidarında olmasına isə inamla yanaşılmır.
Azərbaycanın ərazi bütövlüyünün təmin olunmasına dair Avropa İttifaqı, Avropa Şurası, İslam Əməkdaşlıq Təşkilatı, Qoşulmama Hərəkatı və s. beynəlxalq təşkilatlar tərəfindən qəbul olunan qərarlar da, təəssüf ki, təcavüzkara təsir etmək iqtidarında olmadı. Əksinə, illər ötdükcə, havadarlarına güvənərək, BMT TŞ və ATƏT-in Minsk qrupunun fəaliyyətsizliyindən azğınlaşan düşmən Dağlıq Qarabağ bölgəsinə aid olmayan Tərtər, Tovuz, Qazax, Gədəbəy, Daşkəsən rayonlarının yaşayış məntəqələrini də mütəmadi olaraq atəşə tutur, dinc əhaliyə qarşı maddi və mənəvi zərər vurmaqda davam edirdi.
O tuz ilə yaxın müddət ərzində aparılan danışıqlar prosesində Azərbaycanın mövqeyi dəyişməz olmuşdur. Ermənistan silahlı qüvvələrinin Azərbaycanın beynəlxalq səviyyədə tanınmış ərazilərindən çıxarılması, ölkəmizin ərazi bütövlüyünün təmin olunması, eləcə də bir milyona yaxın qaçqın və məcburi köçkünlərin tarixən yaşadıqları yurdlarına qayıtmaları kimi hüquqlarının bərpa olunduğu təqdirdə, Qarabağ erməni icmasına Azərbaycanın tərkibində ən yüksək muxtariyyət verilməsi məsələsinin müzakirə olunması mümkünlüyü barədə bəyanatlar verilmişdir. Lakin qarşı tərəf işğal etdikləri əraziləri daha da genişləndirmək niyyəti ilə yenidən müharibəyə hazırlıq istiqamətində genişmiqyaslı tədbirlər görməkdə davam etmişdir. Bu ərazilərdə hücum və müdafiə zamanı yerdəyişmələr və manevrlər etmək məqsədilə öz düşüncələri çərçivəsində keçilməz səngərlər, yeraltı sığınacaqlar qurmuş, müxtəlif növ silahlar, tanklar, hərbi maşınlar, təyyarələr, raket qurğuları və s. əldə etmişlər.
Dünyanın bir nömrəli terroristi imicini qazanmış Sorosun yetişdirməsi olan Paşinyan “Sorosizm”in Ermənistanda çox geniş yayılmış təşkilatları və tərəfdaşlarının köməyi ilə Qarabağdakı soyqırımı müəllifi, hərbi cinayətkar Serj Sərkisyanın hakimiyyətini devirərək baş nazir vəzifəsini tutdu. Hakimiyyəti zəbt etdikdən az müddət sonra bənzəri olmayan azğınlıqla Xankəndidə “Qarabağ ermənistandır, nöqtə” - deyib, bəyanat səsləndirdi və bununla da BMT TŞ qətnamələrini icra etməyəcəyini və Minsk qrupunun iştirakı ilə aparılan sülh danışıqlarının əhəmiyyətsizliyini dünyaya nümayiş etdirdi. Bundan sonra, əsabələri ilə birlikdə Azərbaycanın qürur mənbəyi olan Şuşa şəhərinə gedərək, vaxtilə Qarabağ xanlarının yarışlar təşkil etdiyi Cıdır düzündə, sərxoş vəziyyətdə nümayişkaranə tərzdə rəqs etdi.
Azərbaycan Respublikasının Prezidenti İlham Əliyev yenə də səbr və dözüm nümayiş etdirdi və beynəlxalq təşkilatların iclaslarında dəfələrlə mövcud reallığı Paşinyanın simasında Ermənistana anlatmağa cəhdlər etdi. Sonuncu dəfə isə Münhen Təhlükəsizlik Konfransında müxbirin Qarabağla bağlı sualları əsasında keçirilən debatda, haqqa-ədalətə söykənərək, tarixi faktlara əsaslanan dəlillərlə beynəlxalq qanun və konvensiyalara, BMT Təhlükəsizlik Şurasının müvafiq qətnamələrinə istinad etməklə, Qarabağın Azərbaycanın tarixi ərazisi olmasını bir daha sübuta yetirdi. Əvvəlki şərtlərinə sadiq qalaraq, Ermənistanın silahlı ordu hissələrini Azərbaycan torpaqlarından çıxardığı təqdirdə Qarabağ erməni icmasının normal şəraitlə təmin olunacağını və bundan sonra onların status məsələsinin müzakirə oluna biləcəyni bir daha dilə gətirdi. Eyni zamanda, təkrarən nəzərə çatdırdı ki, beynəlxalq təşkilatların qərar və qətnamələri icra olunmadığı təqdirdə Azərbaycan xalqı BMT Nizamnaməsinin müvafiq normalarına uyğun olaraq, ərazilərinin işğaldan azad edilməsi hüququnu özündə saxlayır. Tarixi reallıqdan və beynəlxalq hüquq normalarından bixəbər Paşinyanın məna və mahiyyət kəsb etməyən, eybəcərləşdirilmiş şəkildə ifadə etdiyi həqiqətdən uzaq sözlər isə onu tədbir iştirakçıları və dünya qarşısında gülünc vəziyyətə saldı. Siyasi müstəvidə Azərbaycan Prezidentinə biabırcasına uduzduğunu dərk edən Paşinyan daha geniş əraziləri işğal etmək xülyası ilə öz gücünü hərbi sahədə nümayiş etdirəcəyinə ümidlə yanaşdı.
Artıq dünyanın güclü silahlı qüvvələri sırasına daxil olan Azərbaycan ordusunun Ali Baş Komandanı İlham Əliyevin uzun illər ərzində göstərdiyi dözüm və səbrinin tükəndiyi son anda, Ermənistan ordusunun silahlı qüvvələri 27 sentyabr 2020-ci il tarixdə səhər saat 6-da Azərbaycanın yaşayış məntəqələrini iri çaplı ağır artileriya qurğularından atəşə tutdu. Müxtəlif tipli ağır texnika ilə sərhədlərimizi pozaraq yaşayış məntəqələrimizə mütəşəkkil hücumu göstərdi ki, düşmənin növbəti təcavüzü açıq-aşkar yeni ərazilərimizin işğalına, dinc əhalinin məhv edilməsinə yönəlib.
A li Baş Komandan İlham Əliyevin torpaqlarımızın düşməndən hərbi yolla azad edilməsi üçün illər uzunu əmr gözləyən əsgərlərimizə, “İRƏLİ!” komandasını verdi, ordumuz bayram əhval-ruhiyyəsi ilə qarşıladı və dərhal düşmənin cəbhə boyu hücumunun qarşısını alaraq onu ağır itkilər verib, geriyə çəkilməyə məcbur etdi. Düşmən yerdəyişmə manevrləri tətbiq etməklə bir neçə dəfə hücum taktikasını dəyişməyə cəhd etdisə də, müharibənin ilk günlərindən Azərbaycan dövlətinin və onun ordusunun gücü ermənilərin qurduqları taktikanı və səngərləri darmadağın etdi.
Otuz il ərzində yaratdıqları maneələri və istehkamları dəf etmək nə qədər çətin olsa belə, vətəninə, xalqına, Ali Baş Komandana olan sevgi, sarsılmaz milli ruh, habelə düşmənin dözülməz xislətinə və xəyanətinə qarşı illərlə formalaşmış nifrət hissləri ölümün gözünün içinə Şəhidlik zirvəsindən baxan əsgərlərimizi zəfər qələbəsi naminə yalnız irəli apardı.
Qırx dörd gün davam edən Vətən müharibəsi, hər bir azərbaycanlıya həyəcan dolu qürurverici təəsüratlar, xoşbəxt anlar bəxş etdi. Məğrur və igid əsgərlərimizin döyüş meydanında göstərdikləri yenilməz şücaət, qəhrəmanlıq nümunələri Milli hərb tariximizə, eləcə də xalqımızın yaddaşına Azərbaycan əsgərinin XXI əsrin döyüş salnaməsi kimi həkk olundu.
Vətən müharibəsi başladığı ilk anlardan Azərbaycan ordusunun Ali Baş Komandanı İlham Əliyevin qələbə əzminə, nikbin əhval-ruhiyyəyə malik olması hər kəsdə, hətta cəbhədə düşmənlə qarşı-qarşıya döyüşən və hər an şəhid olmağa hazır olan əsgərlərimizdə böyük ruh yüksəkliyi, qələbəyə inam yaradırdı. Düşmən qüvvələrinin müqavimətini qırıb, igid əsgərlərimizin irəliyə doğru atdıqları hər addım, dəf olunan istehkamlar gecəli-gündüzlü nəzarətdə olmaqla, hər bir yüksəkliyin, kəndin, rayonun, şəhərin azad edilməsini televiziya ekranları vasitəsilə canlı yayımda məhz Ali Baş Komandanın özü tərəfindən hər kəsin qəlbini oxşayan səmimi ifadələrlə xalqımıza elan etməsi hər bir azərbaycanlının, otuz il ərzində qəlbində yaşatdığı niskilli hisslərini əbədi xoşbəxtlik duyğularla əvəz edir, bütün dünya azərbaycanlılarının ümummilli bayramına çevrilirək xüsusi təntənə ilə qeyd olunurdu.
Azərbaycan Respublikasının Prezidenti, Ali Baş Komandan İlham Əliyevin, beynəlxalq tədbirlərdə erməni diasporunun Azərbaycanın əleyhinə apardığı uydurma və yalanların ifşa olunmasını, Qarabağ torpaqlarının tarixən və hər zaman Azərbaycana məxsus olmasını, Ermənistanın Azərbaycana qarşı təcavüzkar və işğalçılıq siyasətinin əsl mahiyyətini, BMT TŞ qətnamələrinin icra olunmamasında maraqlı olan qüvvələrin riyakar münasibətlərini əks etdirən, həmçinin Azərbaycanın haqlı və ədalətli mövqeyini dünyaya çatdıran tarixi faktlara, beynəlxalq hüquq normalarına əsaslanan çıxışları, Almaniya, İngiltərə, ABŞ, Rusiya, Fransa və digər ölkələrin kütləvi informasiya vasitələrinin agentliklərinə verdiyi çoxsaylı müsahibələri erməni şovinistlərinin uzun illər ərzində apardığı anti-Azərbaycan təbliğatını alt-üst etdi. Erməni millətçilərinin uydurulmuş və quraşdırılmış yalanları üzərində qazanılan bu uğur, uzun illər öz yerini tapmaqda çətinliklərlə qarşılaşan, şər qüvvələrin sərt müqaviməti ilə üzləşən Haqqın və Ədalətin nəhayət ki, nail olduğu möhtəşəm Zəfər idi.
Əslində, Heydər Əliyev kimi vətənpərvər, müdrik və dövlət idarəçiliyində böyük təcrübəyə malik siyasi dövlət xadiminin təlim-tərbiyəsi mühitində formalaşması İlham Əliyevin xarizmatik şəxsiyyət və siyasi xadim kimi yetişməsində rolu əvəzsizdir. Bir sıra Rusiya siyasətçilərinin İlham Əliyevin beynəlxalq hüquq sahəsində yüksək biliyə malik olması və dövlət rəhbəri kimi yetişməsində, həm də, təhsil aldığı Moskva Dövlət Beynəlxalq Münasibətlər İnstitutunun məzunu olmasına dair qürur duyduqları barədə fikirlər də diqqətəlayiqdir.
Ölkəmizin iqtisadi, siyasi və hüquqi əsaslarının möhkəmlənməsi, xalqımızın maddi rifahının yaxşılaşması, təhsil, səhiyyə, hərbi, idman və digər sahələrdə əldə olunan misilsiz nailiyyətlər Azərbaycan Prezidenti və Ali Baş Komandan İlham Əliyevin gərgin əməyi və məqsədyönlü fəaliyyətinin, vətəninə, xalqına sarsılmaz sevgisinin təzahürüdür, ən başlıcası isə ümummilli liderin dövlətçilik ideyalarına, onun nəsihət və vəsiyyətlərinə sadiqliyin və yerinə yetirməsinin nəticəsi olması danılmazdır.
Ulu Öndər 2003-cü il prezident seçkilərində xalqa müraciət edərək İlham Əliyev barəsində demişdi: “O, yüksək intellektli, praqmatik düşüncəli, müasir dünya siyasətini və iqtisadiyyatını gözəl bilən, enerjili və təşəbbüskar bir şəxsiyyətdir... İnanıram ki, mənim axıra çatdıra bilmədiyim taleyüklü məsələləri, planları, işləri Sizin köməyiniz və dəstəyinizlə İlham Əliyev başa çatdıra biləcək. Mən ona özüm qədər inanıram və gələcəyinə böyük ümidlər bəsləyirəm”.
Azərbaycan Prezidenti, Ali Baş Komandan İlham Əliyev xalqımızın ümummilli lideri Heydər Əliyevin müqəddəs vəsiyyətini ölkə həyatının bütün sahələri ilə yanaşı, həm diplomatiya müstəvisində, həm döyüş meydanında yenilməz bilik və bacarıq, mərdlik və cəsarət nümayiş etdirməklə, Azərbaycan Ordusunun fədakarlığı və igidliyi sayəsində işğal altında olan ərazilərimizi erməni faşistlərindən azad etdi.
Ali Baş Komandan Şuşa şəhərinin işğaldan azad olunduğu 8 noyabr 2020-ci il tarixdə Ulu Öndərin məzarını ziyarət edərək qürurla, bir az da kövrək duyğularla atasının ruhu qarşısında baş əydi, ata vəsiyyətini yerinə yetirdiyindən xoşbəxt olduğunu ifadə etdi.
Ümummilli Liderin ən layiqli siyasi varisi İlham Əliyevə milli qürurumuzun rəhni olan bu vəsiyyəti və onun ən yüksək səviyyədə yerinə yetirilməsi Azərbaycanın müasir tarixində xalqımızın mənəvi dəyərlərini zənginləşdirən parlaq səhifələrdəndir.
Dünyada sülhə, beynəlmiləlçiliyə və qanunlara, eyni zamanda öz milli adət və ənənələrinə, tarixi-irsi, mədəni və dini abidələrinə önəm verən Azərbaycan, hansı millətə, dinə mənsub olmasından asılı olmayaraq, başqa ölkələrin və xalqların da mənəvi dəyərlərinə həmişə tolerant münasibət nümayiş etdirmiş, yüksək həssaslıqla və incə düşüncələrlə yanaşmışdır.
Humanizmin və xeyirxahlığın nümunəsi olan ölkəmizə qarşı mədəni və mənəvi dəyərləri anlamaq və qiymətləndirmək iqtidarında olmayan bəzi ölkələrin hakimiyyət rəhbərlərinin qeyri-adekvat və eyni zamanda, açıqdan-açığa beynəlxalq hüquq normalarına zidd mövqe nümayiş etdirməsi təəccüb və təəssüf doğurur. Eyni zamanda, bu münasibətin erməni diasporunun həmin ölkələrdə prezident seçkiləri zamanı təsiredici imkanlarından sui-istifadəsi ilə əlaqədar olması dilemması da anlaşılandır.
Son illərdə multikulturalizmin həm ölkə daxilində, həm də beynəlxalq səviyyədə təbliğ olunması və inkişafında Azərbaycanın Birinci vitse-prezidenti Mehriban xanım Əliyevanın rolu əvəzolunmazdır. Onun həyata keçirdiyi çoxşaxəli xeyirxah missiyalar neçə-neçə ağır xəstəliyə düçar olanların, şikəst insanların, müharibə əlillərinin müalicə olunub şəfa tapmasina yardımçı olmuşdur. Təbii fəlakət və düşmən təcavüzü nəticəsində zərər çəkmiş ailələrə göstərilən maddi və tibbi yardımlarla yanaşı, milli mənşəyindən asılı olmayaraq ölkəmizin daxilində, həm də xarici ölkələrin ərazisində beynəlxalq əhəmiyyətə malik tarixi, dini-mədəni abidələrin təmirinə və bərpasına göstərilən əvəzsiz diqqət Azərbaycanın dünyada mədəni və mənəvi dəyərlərə verdiyi dayanıqlı önəm və qiymətin təzahürüdür.
Əfsuslar olsun ki, Azərbaycan torpaqlarının Ermənistanın işğalı altında olduğu müddət ərzində həmin ərazilərimizdə vəhşiliklərə məruz qalmış təkcə müsəlman dünyasına deyil, xristianlara, başqa mədəniyyətlərə və dinlərə məxsus abidələr də məhv edilmiş, yaxud yararsız vəziyyətə salınmışdır. Qədim albanlara məxsus abidələrin qalıqları, qəbirlər də daxil olmaqla, sökülüb saxtalaşdırılaraq onların gələcəkdə ermənilərin öz əcdadlarına məxsusluğu barədə rəylər yaratmağa cəhdlər göstərilmişdir.
Bu ərazilərin illər və əsrlər boyu azərbaycanlıların qədim yaşayış yerləri olmasını həyasızcasına inkar etməyə cəhd edən ermənilər ağına-bozuna baxmadan milli ədavət zəminində Azərbaycanın tarixinə aid olan qalaları, qədim mağaraları, tarixi incəsənət abidələrini, muzeyləri, məktəbləri, kitabxanaları söküb dağıtmışlar. Şərq dünyasının musiqi korifeyləri olan Üzeyir bəy Hacıbəylinin, Bülbülün, görkəmli siyasi xadim və şair Xurşudbanu Natəvanın və digərlərinin abidələrini odlu silahlardan atəşə tutaraq gülləbaran etmişlər.
Erməni şovinistlərinin dini ocaqlara münasibəti də dəyişməz olmuşdur. İşğal olunmuş ərazilərdə qəbristanlıqlar məhv edilmiş, 70-dən çox məscid və dini məbədlər dağıdılmış, qalan bir neçəsi isə, təkcə azərbaycanlıların deyil, dünya xalqlarının mənəvi dəyərlərini təhqir edərək bu müqəddəs ocaqları tövlə qismində istifadə etməkdən belə çəkinməmişlər. Qarabağ ərazisində yaşadıqları evlərin bir hissəsi istisna olmaqla, işğal edilmiş şəhər və rayonların hər birində evlər və binalar dağıdılmış, yaşayış və qeyri-yaşayış binalarının qapıları, pəncərələri sökülərək aparılmışdır.
Bu gün dünyanın xüsusi olaraq diqqətində olan ətraf mühitin, fauna və flora ehtiyatlarının, o cümlədən meşələrin qorunmasının prioritet istiqamətlərindən olduğu bir zamanda, işğal altında olmuş ərazilər xarabazara çevrilmiş, meşələr qarət olunmuş, ağaclar kəsilib aparılmış, yaxud yandırılaraq məhv edilmişdir. Təslim aktı imzalandıqdan sonra köçə-köç durumda da azad etməli olduqları ərazilərdə, işğaldan əvvəl azərbaycanlılara məxsus olmuş evləri və onlara bitişik təsərrüfat sahələrini dünyanın gözü qarşısında əvvəlcə qarət və talan edib, sonra da od vurub yandırmaqla məhv etmələri, bu barbarlar barədə dahi şəxsiyyətlərin bu millətin ən yararsız məxluq olmaları barədə fikirlərinin həqiqət olduğunu bir daha sübuta yetirdi.
Ermənistanın qonşu ölkələrə qarşı torpaq iddiaları, bu zəmində Azərbaycana qarşı törətdikləri təcavüzkar siyasət, onların “dənizdən dənizə böyük Ermənistan” yaratmaq kimi mif ideyalarını həyata keçirmək barədə xülyalarına xidmət etməklə, azərbaycanlıların milli-etnik zəmində məhv edilməsi və ərazilərini mənimsəməyə yönəlmişdir.
B axmayaraq ki, Ermənistan dövlət olaraq, Azərbaycanın qədim torpaqlarında yaradılıb, lakin Azərbaycan heç zaman Ermənistana qarşı heç vaxt heç bir iddia irəli sürməmişdir. Ermənistan isə uzun illər boyu qarşılıqlı münasibətlərin yaxşılaşmasına səy göstərən Azərbaycana qarşı şovinist, təcavüzkar və işğalçılıq siyasətindən əl çəkmir. Erməni terror və təxribatının sonuncu dalğasına qədər müddət ərzində Azərbaycan ərazilərində, o cümlədən Bakı şəhərində yaşayan ermənilərin azərbaycanlılar tərəfindən onlara münasibətdə milli ayrı-seçkiliklə qarşılaşmaları barədə hər hansı fakt mövcud olmamış və yaxud qeydə alınmamışdır. Əksinə, iki millət arasında qarşılıqlı münasibətlərin daim normal olduğu barədə fakt o zaman Bakı sakini olmuş hər kəs tərəfindən, o cümlədən ermənilərin özləri də təsdiq edə bilər.
Lakin hər dəfə olduğu kimi, erməni şovinistləri bu dəfə də öz çirkin niyyətlərini həyata keçirmək məqsədilə artıq normal xarakter almış milli münasibətlərə yenidən düşmənçilik toxumu səpdilər, bu münasibətlərə elə bir zərbə vurdular ki, nəticələrinin yaxın on illər ərzində sağalacağına inanmaq sadəlövhlük olardı.
Beynəlxalq qanunlara, BMT Təhlükəsizlik Şurasının qətnamələrinə məhəl qoymayan, güzəştli təkliflərlə razılaşmayan və sonda “Qarabağ Ermənistandır” deyərək dünya qanunlarına və Azərbaycana meydan oxuyan Ermənistanın baş naziri Paşinyan müharibənin ilk günlərindən Azərbaycan Ordusunun və onun Ali Baş Komandanı İlham Əliyevin qarşısında tab gətirə bilməyəcəyini nəhayət ki, anladı. Ayrı-ayrı ölkələrin rəhbərlərini dini, milli və digər həssas zəminlərdə uydurma təxribatlarla Azərbaycana qarşı qızışdırmağa cəhd etməklə, yalvarıb onlardan hərbi kömək dilənirdi. Lakin artıq haqqın, ədalətin Azərbaycan tərəfində olduğu barədə məlumatlı olan müvafiq ölkələrin rəhbərləri onun bu dilənçiliyinin milli mentalitetlərinə uyğun təxribatlar olduğunu dərk edərək başlarından rədd edirdilər. Təkrar telefon əlaqəsi saxlamaq cəhdi, şübhəsiz ki, baş tutmurdu. Bundan sonra müharibə gedən ərazilərdən uzaq məsafədə yerləşən, dinc insanların sıx yaşadığı Gəncə, Bərdə, Ağcabədi, Xızı, Tərtər və digər şəhərləri, əksər hallarda əhalinin yatmış olduğu gecə vaxtı ballistik raketlərlə atəşə tutdu. Geniş miqyasda dağıntılara, habelə, qoca, qadın, azyaşlı uşaqlar da daxil olmaqla dinc insanların, bir sıra hallarda ailələrin faciəsi ilə nəticələnən təxribatlar törətməkdən belə çəkinmədilər. İşğalçılar Türkiyə hərbiçilərinin, daha sonra suriyalıların Azərbaycan tərəfində vuruşmaları barədə tamamilə uydurulmuş yalan məlumatlar yaymaqla Rusiya və Türkiyə qarşıdurması yaratmağa, bu qarşıdurma fonunda bəşəriyyət əleyhinə törətdiyi hərbi və terror cinayətlərini və Azərbaycan Ordusu qarşısında biabırçı məğlubiyyətini ört-basdır etməyə cəhd edirdilər.
Lakin Azərbaycan Prezidenti, Türkiyə və Rusiya dövlət başçıları bu təxribatların mahiyyətini və məqsədini düzgün qiymətləndirərək, düşmənin fitnəkar niyyətlərinə nail olmağa imkan vermədilər. Hər kəs anladı ki, Azərbaycanın məqsədi öz hərbi gücü sayəsində öz torpaqlarını işğaldan azad etmək, düşmənin hərbi qüvvələrini ərazilərimizdən qovub çıxarmaqdır.
44 gün davam edən müharibədə məğlub olan Ermənistan, baş nazir Paşinyanın simasında Rusiya Prezidenti Vladimir Putinin vasitəçiliyi və iştirakı ilə təslim bəyanatını imzalayaraq Azərbaycan Prezidentinin qarşısında diz çökdü, qalan üç rayonu və ətraf əraziləri qısa müddət ərzində könüllü olaraq Azərbaycana təhvil vermək barədə öhdəlik qəbul etdi.
Beynəlxalq qanunlarla, BMT TŞ qətnamələri ilə əsaslandırılmış haqlı və ədalətli mövqeyinə arxalanaraq Azərbaycan işğalçı düşmənə qarşı Ali Baş Komandan İlham Əliyevin yaratdığı qüdrətli ordunun döyüş taktikası və yenilməz şücaəti sayəsində düşməni ərazilərimizdən qovub çıxararaq torpaqlarımızı geri qaytardı.
Azərbaycan üçün bu müharibə təcavüzkar və işğalçı düşmənə qarşı doğma torpaqlarının azadlığı uğrunda apardığı Vətən müharibəsi idi. Döyüşlərdə həlak olmuş gənclərimiz Vətən torpaqları uğrunda şəhidlik zirvəsinə yüksələn, həmişə xalqımızın qəlbində yaşayacaq Vətəninin şanlı və qəhrəman oğullarıdır.
Bu gün Ermənistanda hakimiyyət uğrunda dəridən-qabıqdan çıxan əsl günahkarların şovinist və məkrli əməllərinə hüquqi qiymət verilməsi hər iki xalqın qarşısında duran ən vacib və təxirəsalınmaz məsələlərdəndir. 1988-ci ildən başlamış qanlı hadisələrin səbəbkarları, Ermənistana rəhbərlik etmək iddiasında olmuş və minlərlə insanların qanı bahasına 30 ilə yaxın müddət ərzində məkrli niyyətlərini həyata keçirdikləri Qarabağ hərbi cinayətkarları Köçəryanın, Sərkisyanın, eləcə də onlara havadarlıq edən Qorbaçovun və onun köməkçiləri olmuş Aqambekyanın, Şahnazaryanın və digərlərinin Azərbaycana, həmçinin erməni xalqına vurduğu maddi, mənəvi zərərin ölçü vahidi yoxdur. Vurulan maddi zərəri milyardlarla hesablamaq mümkün olsa belə, bundan sonra, əsrlər boyu qonşu ölkə olaraq yanaşı yaşamağa məcbur olacaq iki millət arasında kəskin xarakter almış düşmənçilik münasibətlərinin davam edəcəyinə zəmin yaradan amillər ciddidir, hədsizdir, uzun illər xatirələrdən silinməzdir. Bəşəri dəyərlərə və insanlığa qarşı törədilən bu cinayətlərin təşkilatçı və təhrikçi subyektləri olan məlum şəxslərin əməllərinə hüquqi qiymət verilmədiyi və layiq olduqları cəzalara məhkum olmadıqları halda, gələcəkdə ədavətin və düşmənçiliyin daha faciəli və yüz illərlə davam edən nəticələri istisna olunmur.
Ona görə də erməni xalqı gələcək nəsillərin normal qonşuluq şəraitində yaşamaları naminə azərbaycanlılara qarşı qəlbində yaşatdığı və övladlarına nəsihət etdiyi hər cür kin-küdurəti, milli ədavəti, şovinizmi, xəyanəti təbliğ edən zərərli ideyalardan imtina etməli və düşmənçiliyə son qoymalıdır. Haqq-ədaləti, insanlığı, sülhü, əmin-amanlığı, gələcək nəsillərin xoşbəxtliyini hər cür şəxsi və milli ambisiyalardan üstün tutmalı, milli zəmində düşmənçiliyi təbliğ edən ayrı-ayrı yırtıcı və şovinist qüvvələrin törətdikləri bəşəri və hərbi cinayətlərə görə mühakimə edilməsində maraqlı olmalıdırlar.

Hüseyn ƏLİXANOV,
Ədliyyə general-mayoru.

Kəlbəcər Rayon İcra Hakimiyyətinin başçısı Azər Qocayev şəhid Daşqın Şəfiyevin məzarını ziyarət edib, məzarı üstə tər qərənfilər düzüb, şəhidlərimizin ruhuna dualar oxunub. Daha sonra rayon rəhbəri şəhidin böyüyüb boya-başa çatdığı evində olub, Azərbaycanın suverenliyi, ərazi bütövlüyü  uğrunda şəhid olan Daşqın Şəfiyevə  Allahdan rəhmət, ailə üzvlərinə səbr diləyib.

Rayon İcra Hakimiyyətinin başçısı Azər Qocayev Vətən müharibəsində Azərbaycanın qazandığı parlaq qələbədə Şəfiyevlər ailəsinin də payı olduğunu qeyd edərək, Vətənin azadlığı, bütövlüyü yolunda canından keçmiş şəhidlərimizə rəhmət, qazilərimizə şəfa diləyib. Bildirib ki, Daşqın da digər şəhidlərimiz kimi gənclərimizə örnək olaraq   hər an bizim qəlbimizdə əbədi yaşayacaqdır. Daşqın Şəfiyev kimi vətənə canlarını fəda etmiş igidlərimizin sayəsində biz doğma Kəlbəcərimizə, Qarabağımıza qayıdırıq. Bu gün praqmatik dövlət başçısı möhtərəm cənab Prezident İlham Əliyev və Birinci vitse-prezident Mehriban xanım Əliyeva tərəfindən şəhid ailələrinə böyük diqqət və qayğı göstərilir, onları narahat edən məsələlərə həssaslıqla yanaşılır. Rayon İcra Hakimiyyəti tərəfindən də şəhid ailələrinə, qazilərə bundan sonra da bu yanaşma davam edəcəkdir.

Onların müraciət və istəklərini dinləyən rayon rəhbəri, problemlərin həlli istiqamətində lazım olan bütün tədbirlərin görüləcəyini şəhid ailəsinə bildirib.

Şəhidin atası Hidayət Şəfiyev qeyd edib ki, onların övladı ali bir amal - Vətən torpaqlarının işğaldan azad edilməsi uğrunda döyüşərkən şəhidlik zirvəsinə ucalıb. O oğlu ilə fəxr etdiyini və bir oğul torpağa verərək minlərlə oğul qazandığını bildirmişdir. Şəhidin atası vurğulamışdır ki, dövlətimiz və xalqımız şəhidlərin xatirəsini daim uca tutur. Hidayət  Şəfiyev  şəhid ailələrinə göstərilən diqqət və qayğıya görə ölkə başçısı cənab İlham Əliyevə  və Birinci vitse-prezident Mehriban Əliyevaya öz təşəkkürünü ifadə edib.

 

Zabit XƏLİLOV,

“Respublika”.

1 -dən səhifə 1904

Təqvim

« February 2021 »
Mon Tue Wed Thu Fri Sat Sun
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28

ZIYARƏTÇİLƏR

Ziyarətçilər886741

Currently are 78 guests and no members online